Recently Published: Nyheiter

Tryggare med sjekklister

Arne Eithun — Wed, 28 Apr 2010 12:59:37

Nær alle operasjonsstover ved Førde sentralsjukehus har no teke i bruk sjekklister i samband med operasjonar. – Det er veldig flott, seier prosjektleiar Barthold Vonen.

Prosjektet "Trygg Kirurgi", som starta opp i fjor haust, går ut på å innføre sjekklister i samband med operasjonar. Målsetjinga er å bidra til at etablerte faglege retningslinjer blir følgt, og at pasientar blir tekne hand om på ein tryggast mogleg måte.

– Erfaringane frå sentral operasjonsavdeling i Førde er langt på veg positive. Sjekklistene blir brukt ved mellom 60 og 80 prosent av operasjonane, noko vi er svært tilfredse med. Augeavdelinga skal snart ta i bruk sjekklistene på sine operasjonsstover også, seier Vonen.

Satsinga i Helse Førde er eitt av dei største pågåande kvalitetssatsingsprosjekta i Helse Vest. Blant dei tilsette som jobbar på operasjonsstovene har prosjektet blitt teke vel imot, fortel fagsjukepleiar Jarle Øen og oversjukepleiar Reidun Bergheim ved operasjonsavdelinga.

– Ja, heilt klart. I starten, før ein heilt visste kva som var intensjonen, var kanskje nokre litt avventande. Men etter kvart har alle sett verdien av sjekklistene. Det aukar også samhaldet i gruppa, seier dei.

Men har de eksempel på at sjekklistene faktisk har hindra feil under operasjon?

– Det har vi, blant anna har det vore gløymt å gje antibiotika ved nokre tilfeller. Noko som blir gjeve for å hindre infeksjonar i samband med inngrepet. Elles har vi rydda opp i mistydingar som enkelte gonger kan vere lette å gløyme. Sjekklista ber oss stille banale spørsmål til tider, men eg trur dei fleste no ser verdien av det, det aukar kvaliteten, seier dei.

Ambulanseløftet

Arne Eithun, Helse Førde — Thu, 29 Apr 2010 14:58:13

105 ambulansearbeidarar i Helse Førde har no fagbrev. Det betyr at føretaket langt på veg har innfridd dei nye krava om auka kompetanse i ambulansetenesta.

Ved nokre stasjonar har vi framleis ei utfordring, men i sum ser situasjonen veldig bra ut, seier ambulansesjef i Helse Førde, Stian Sægrov.

– Forskrift om akuttmedisinske tenester set krav til at kvar ambulanse må ha minimum ein autorisert ambulansearbeidar på vakt frå 1. april 2010. Det har vore ei stor utfordring for Helse Førde, men berre det siste året har nærare 30 tilsette fått autorisasjon, fortel Sægrov.

– Totalt har vi i dag 60 prosent dekning, mot 40 prosent i fjor. Det gjer oss i stand til nesten å alltid ha ein person med fagbrev i kvar ambulanse. I dei situasjonane ambulansar ikkje oppfyller kravet, har vi innført kompenserande tiltak.

Ambulansesjefen seier at utfordringane har vore størst ved dei minste stasjonane i Sogn og Fjordane, men innan kort tid er det venta at ytterlegare 15–20 tilsette skal avleggje fagprøve.

– I tillegg til formelle kompetansekrav, har tilsette i ambulansetenesta også nyleg vore gjennom årleg resertifisering og utsjekk på avanserte behandlingsprotokollar og tiltakskort.

Dette som eit ledd i tenesta sin internkontroll. Her vert personellet sin kompetanse på avansert luftvegstiltak, gjenoppliving og legemiddelhandtering prøvd ut og kvalitetssikra, seier Sægrov.

6 av 10 med fagbrev

Ved Vågsøy ambulansestasjon har no seks av dei ti faste tilsette fagbrev i ambulansefaget.

To av dei er Therese Gotteberg Hopland og Vidar Kvalheim, begge frå Måløy. Dei tok prøva i mars.

– Hovuddelen av fagprøva gjekk på ordinære vakttenester der vi køyrde reelle ambulanseoppdrag i halvanna døgn. Vi fekk tre akuttoppdrag og to hasteoppdrag på vaktene våre. Sjølv var vi tilfredse med eigen innsats under prøva, noko sensorane også var, seier dei.

Det er fleire vegar til fagbrev. Nokre vel ambulanselinje ved vidaregåande skule med to år i lære, medan andre blir autoriserte som privatistar. Då må ein ha fem års erfaring i faget først.

Born og insulinpumpe

Mon, 06 Sep 2010 12:14:29

Barneavdelinga held samling for foreldre og born, 22. juni, for born som nyttar insulinpumpe.

Barneavdelinga arrangerer samling for deg som bruker insulinpumpe og for foreldre.

Stad:
Samlinga vert på Lærings- og meistringssenteret v/ Rema (Vie senter) i Førde.

Tid:
Tysdag 22.juni kl. 10.00 -15.00.

Program for samlinga:

10.00-10.15
Velkomen
10.15-11.00
Karbohydrat, introduksjon v/dietetikar Helga Helland
11.00-11.30
Kva er bolus-wizard? - ved diabetessjukepleiar Randi Gamlestøl
11.30-12.30
Lunsj
12.30-14.30
Individuell rettleiing og innstilling (20 min på kvar) ved overlege Per-Helge Kvistad og Randi Gamlestøl
Eige opplegg for dei som ventar

Med atterhald om endringar i programmet. Pausar blir lagt inn undervegs.

Praktiske opplysningar:

Deltaking på foreldresamling gjev grunnlag for å søkje dekning for utgifter til reise etter fastsette satsar. Ein vil òg kunne søkje om opplæringspengar for tapt arbeidsinntekt. Skjema får de på samlinga.

Høve til å bestille lunsj, må bestillast på førehand i påmeldinga, pris 50,-. Det er daglegvarebutikk ved sidan av Læring- og meistringssenteret.

Eigendel på kr 295,- for dei over 16 år. Beløpet kan førast på kvitteringskortet for eigendelar.

Informasjon:

Randi Gamlestøl tlf: 578 39 954 - Silje-Katrin Sandnes mob: 415 30 377.

Påmeldingsfrist: 8. juni.

Maksimalt tal barn: 10.

Først til mølla. Ved stor pågang blir det sett opp ny samling til hausten.

Påmelding:

Lærings- og meistringsenteret, tlf: 578 39 870.

Oppgje:

Barnet sitt namn og f.dato
Forelder sitt namn
Lunsj
Event. tema de øskjer å ta opp på samlinga

Vel møtt!

Ekspertar inn i dag til døgn

Mon, 07 Jun 2010 15:36:58

Fleire av dei fremste fagfolka i Helse Førde utgjer no ekspertgruppa i prosjektet "døgn til dag". - Det er heilt avgjerande at desse er med frå første stund, seier prosjektleiaren.
I styringsgruppa for prosjektet er det vedteke at Helse Førde skal ha tilbod om dagbehandling for alle behandlingsforløp der dette kan fagleg grunngjevast, og såleis er målet at Helse Førde skal bli eit føregangssjukehus inn dagbasert behandling.

- Skal vi få dette til er vi heilt avhengig av at fagfolka deltek aktivt frå fyrste stund, seier Tove Hovland som er prosjektleiar.

Ho har fått med seg desse fagfolka i ekspertgruppa:

Fabian Bergqvist, overlege barneavdelinga
Hildur Thingnes, sjukepleiar ass seksjonssjef, medisinsk seksjon FSS
Finn Johan Halvorsen, overlege, seksjonssjef, medisinsk seksjon FSS
Stig Hegrestad, overlege nevrolog
Svein Ove Vingsnes, overlege anestesi
Kari Anne Indrebø, anestesispl / DKS
Jostein Tjugum, overlege, kvinneklinikken
Nils Sletteskog, kirurg, avd. sjef. kirurgisk avdeling
Evelyn Stavang, oversjukepleiar, kirurgisk sengepost
Kristian Humborstad, overlege (skulder og artroskopisk kirurgi)
Konrad Mader, overlege (traumatologi)
Normunn Svoen, praksiskonsulent

Treng påfyll
Tove Hovland er svært takksam for at så mange har takka ja til å delta i det omfattande døgn til dag-prosjektet. Men ho trur samstundes at lista med fagekspertar ikkje er vid nok.

- Etterkvart som prosjektet tek form, vil eg i samråd med gruppa, truleg innhente informasjon frå andre ekspertar også, seier ho.

Styret ber om utgreiing

Mon, 07 Jun 2010 08:36:06

Styret i Helse Førde ynskjer ei klarare oppgåvefordeling mellom sjukehusa våre, og har bede administrasjonen kartlegge fleire områder av drifta.

Det er i samband med styret sitt strategiske arbeidet, at dei har kome med signal om kva områder dei ynskjer å sjå nærmare på. I første omgang ber dei administrasjonen kartlegge innhald og drift ved dei tre somatiske sjukehusa innanfor nokre områder.

Samanslåing
- Vi har vore veldig tydlege på kva økonomisk utvikling føretaket skal ha, både neste år og i framtida. Difor må ein del av vårt strategiske arbeid heilt klart sjåast i samanheng med budsjettet for 2010, seier styreleiar Clara Øberg.

Blant anna ynskjer dei at det skal vurderast om føretaket treng ortopeditenester ved alle sjukehusa i fylket.

- Vi har sagt at det skal vurderast om vi kan klare oss med ortopedi berre to stader i Helse Førde, og vi ynskjer at administrasjonen førebur eit notat til oss om dette.

Øberg trur det i framtida vil vere mindre behov for sengeplassar ved sjukehusa. I ei framtidig tenking må dette takast høgde for, meiner ho.

- Vi skal ha ei moderne drift, og det tilseier på sikt færre inneliggande pasientar. Vi har som mål at langt fleire brukarar skal få hjelp på dagtid, og ser såleis ikkje vekk i frå at det kan vere ei løysing å ha èin meir generell sengepost ved lokalsjukehusa.

Heilskap
- Vi må også gjere kritiske vurderingar av våre vakt- og beredskapssystem. Ei kvar avklaring er viktig for oss for å kome vidare med ein meir heilskapleg organisering av det samla tilbodet vårt , seier Øberg.

Budsjett og strategi i Helse Førde

Fri, 03 Sep 2010 13:46:07

Helse Førde har no sendt ut styresakene som omhandlar mellom anna budsjettet for neste år, samt strategiprosessen fram mot 2020.

- Sidan september har vi brukt mykje tid på å kartleggje og analysere tenestetilbodet i Helse Førde. Funna der har vore viktige i forhold til budsjettet for neste år, og ikkje minst med tanke på det vidare arbeidet i strategiprosessen.

Det seier administrerande direktør i Helse Førde, Jon Bolstad.

Handlingsrom
Han peikar mellom anna på at slik situasjonen er i dag, har ikkje føretaket rom for heilt naudsynte tiltak som til dømes nyinvesteringar innan medisinsk-teknisk utstyr, nyinvesteringar i bygg og eigedom, etablering av ruspost på Nordfjordeid eller til etablering av nye tilbod til eldre og kronikarar.

- Strategiprosessen må sørgje for at vi kjem i posisjon til å gjere noko innan desse viktige områda. Vi har i fleire år gjennomført endringsprosessar innan eit snevert handlingsrom som i stor grad har sett ein stoggar for strukturelle endringar. Dette har vore naudsyne endringar, men er over tid ikkje nok til å skape ein berekraftig økonomi.

Helse Førde har lagt nasjonale rammedokument og styringssignal i botn for sitt arbeid med strategien dei komande 10 åra.

- Både Soria Moria 2 og stortingsmeldinga om samhandlingsreformen legg opp til at spesialisthelsetjenesta skal utviklast i ein endå tydelegare spesialisert retning. Det får betyding ikkje berre med tanke på arbeidsdelinga mellom kommunehelsetenesta og spesialisthelsetenesta, men også for arbeidsdelinga mellom sjukehusa. I strategiarbeidet ynskjer vi å vidareføre arbeidet med ein betre arbeidsdeling mellom våre institusjonar, seier Bolstad.

Ortopedi
I det vidare strategiarbeidet blir det lagt opp til å sjå på det ortopediske tenestetilbodet i Helse Førde, og moglegheitene for å samle dette på berre to stader. Bolstad meiner det ortopediske tilbodet i Helse Førde har god breiddekompetanse, men utfordringa er at denne kompetansen er spreidd på tre små og sårbare einingar.

- Vi har overkapasitet innan dette fagområdet. I samband med implementering av gjeldande ortopediplan har styret bedt om ei utgreiing som skal synleggjere korleis Helse Førde kan tilpasse kapasiteten og redusere kostnadane. Samla sett utgjere aktiviteten i Eid og Lærdal om lag halvparten av den samla aktiviteten i ortopedisk avdeling, og det er difor omfattande oppgåver som skal flyttast til andre lokalisasjonar. Truleg vil ein lokalisasjon med rein elektiv aktivitet utan akuttberedskap vere ei svært kostnadseffektiv løysing og kunne sameine høg kvalitet og stabil produksjon med lågt personellbehov, seier han.

Felles sengepostar
Styresaka om den vidare strategien i Helse Førde peikar også på fleire område det er naudsynt å kartleggje nærmare.

- Det er ei heil klar målsetjing for oss å redusere liggjetidene og samstundes dreie mykje av aktiviteten over frå døgn til dagbehandling. Sett i lys av dette er det naturleg å vurdere samanslåing av sengepostar og oppretting/utviding av pasienthotell ved alle sjukehusa.

Fødetilbod
Også fødetilboda på Eid og i Lærdal skal analyserast og vurderast før det endelege strategidokumentet blir vedteke av styret til våren. Men Bolstad seier at dette arbeidet også må sjåast i samanheng med Helse Vest sine planar for fødselsomsorga.

- Tidligare nivåinndeling med bakgrunn i talet på fødslar skal erstattast av kvalitetskrav til tenestetilbodet ved fødeinstitusjonane. Med bakgrunn i dette arbeider Helse Vest med ein regional plan for fødselsomsorga og dei signal som kjem i denne, vil være sentrale for organiseringa av tilbodet også i Helse Førde, seier han.

Vedtak i april
Arbeidet med strategiprosessen i Helse Førde har pågått i heile haust, men eit endeleg dokument som skal stake ut kursen fram mot 2020 blir ikkje vedteke før i april.

- Både vi og eigar, Helse Vest, er opptekne av at vi skal ha gode prosessar med våre tilsette. I tillegg har vi ein løpande dialog med ordførarane i fylket om dei endringane vi legg opp til. Sidan mykje av strategiarbeidet må sjåast i samanheng med samhandlingsreformen, der kommunane skal overta ein del av våre oppgåver, er det viktig at vi har ei god samhandling med kommunane. Det endelege strategidokumentet legg vi opp til at styret skal vedta i april, seier Jon Bolstad.

Møteplan for strategiarbeidet

Mon, 07 Jun 2010 09:05:06

Helse Førde legg opp til informasjons- og arbeidsmøter i samband med strategiprosessen allereie tidleg i januar. Merk deg datoane.

– For å sikre at flest mogleg får delta i prosessane, både internt og eksternt, er det viktig at vi allereie no kan tidfeste dei første møta. Like over nyttår er heile møte- og kommunikasjonsplanen for strategiarbeidet fram til april klar, seier administrerande direktør i Helse Førde, Jon Bolstad.

Han er oppteken av at både tilsette og representantar frå kommunane merkar seg dei første møta i januar.

– Møta 7., 11. og 12. januar blir viktige arbeidsmøter. Då skal vi samlast på dei ulike sjukehusa og vi prøver å leggje opp til mellom anna gruppearbeid. Desse arbeidsmøta er både for tilsette og eksterne partar, som til dømes kommunetilsette. Folk flest er også invitert til desse møta. Her skal vi ta utganspunkt i ein del av dei kartleggingane og analysane som er gjort, og deretter drøfte korleis Helse Førde skal sjå ut mot 2020 og korleis skal vi kome dit, seier han.

Dei vanlege dialogmøta, der styret møter ordførarane, er tenkt til februar og april. Nøyaktig dato for desse vil vi kome tilbake til når møte- og kommunikasjonsplanen er klar.

På nettsida Helse Førde 2020 vil vi leggje ut informasjon og saker frå det pågåande strategiarbeidet.

Møteplan januar:

6. januar Kl 14.00 - 15.30 (førebels tidsramme)	Stormøte med videooverføring til alle institusjonar. * Om strategi og Døgn til dag Forankring Helse Førde mot 2020. * Presentere rammene for arbeidet	Alle tilsette tillitsvalde, verneteneste
7. januar Kl. 15.00 – 18.00	Arbeidsmøte strategi LSH	Alle tilsette, tillitsvalde, verneteneste.
7. januar Kl. 19.00 – 22.00	Arbeidsmøte strategi Lærdal lokalsjukehusområde	Administrasjon, helsepersonell og innbyggjarane i kommunane.
11. januar Kl. 15.00 – 18.00	Arbeidsmøte strategi FSS	Alle tilsette, tillitsvalde, verneteneste.
11. januar Kl. 19.00 – 22.00	Arbeidsmøte strategi Førde lokalsjukehusområde	Administrasjon, helsepersonell og innbyggjarane i kommunane.
12. januar Kl 15.00 – 18.00	Arbeidsmøte strategi NSH	Alle tilsette, tillitsvalde, verneteneste.
12. januar Kl 19.00 – 22.00	Arbeidsmøte strategi Nordfjord lokalsjukehusområde	Administrasjon, helsepersonell og innbyggjarane i kommunane.

Fult hus på informasjonsmøte

Mon, 07 Jun 2010 09:09:34

Auditoriet ved Førde sentralsjukehus hadde ikkje nok sitjeplassar då administrerande direktør Jon Bolstad informerte om det pågåande strategiarbeidet i Helse Førde.

Orienteringa til Jon Bolstad onsdag 6. januar vart også video-overført til samtlege institusjonar med godt oppmøte både i Lærdal, Eid og Tronvik.

Administrerande direktør tok mellom anna for seg no-situasjonen til Helse Førde og kva utfordringar føretaket har i samband med moderne pasientbehandling og ein berekraftig økonomi.

- Vi ser at vi har overkapasitet innan ein del områder av sjukehusdrifta vår, der må vi sørge for at behovet og forbruket følgjer kvarandre. I tillegg er det avgjerande å få ein sunn økonomi som gjer at vi kan investere i heilt naudsynt utstyr. Det skal ikkje vere slik at folk i Sogn og Fjordane skal ha eit dårlegare spesialisttilbod fordi vi ikkje har råd til å henge med på utviklinga innan moderne medisin, sa Bolstad.

Tilhøyrarane fekk også høyre kva som er tidsplanen for det vidare arbeidet denne vinteren. Fram til april skal det haldast fleire arbeidsmøter og informasjonsmøter både internt og eksternt. Det første møtet finn stad torsdag 7. januar i Lærdal. Gruppearbeid med dei tilsette startar klokka 15 i kantina på sjukehuset, og klokka 19 same kveld inviterer Helse Førde både lokalpolitikarar, kommunetilsette og folk flest til samling same stad.

Les også:
AD-presentasjon 6. januar og samlesida for strategiarbeidet Helse Førde 2020.

Gruppearbeida i gang

Mon, 07 Jun 2010 09:12:47

Gruppearbeida i samband med strategiplanen til Helse Førde starta på Lærdal sjukehus torsdag 7. desember. Omlag 35 tilsette deltok på møtet.

Viseadministrerande direktør i Helse Førde, Vidar Vie, opna arbeidsmøtet i Lærdal med å fortelje om rammene for strategiarbeidet i føretaket. Vidare utdjupa han prinsippa for oppgåvene, før utviklingssjef Tove Hovland sette i gang sjølve gruppearbeidet.

Les meir om rammene for strategiarbeidet på denne sida.

Viktige spørsmål
Oppgåva det vart brukt mest tid på rundt dei seks gruppeborda var kva som er dei viktigaste føresetnadane for å få til visjonen til føretaket, nemleg å fremje god helse og livskvalitet. Og korleis ein best kan gje kunnskapsbasert diagnose og behandling.

- Vi kunne godt fått meir tid. Det er viktige spørsmål vi diskuterer og sånn sett kunne vi brukt fleire kveldar på dette.

Det sa Rønnaug Jansen som er seksjonsleiar på LMBB ved Lærdal sjukehus. Samstundes meiner ho arbeidsmetoden som vart nytta i gruppearbeidet var god.

- Eg synst det fungerer greit, og så håpar eg at desse innspela vil vise igjen og blir tekne på alvor, sa ho.

Oppgåver på nett
Oppgåvene som blir brukt i arbeidsmøta kjem etterkvart til å bli lagde ut på samlesida for strategiarbeidet.

- Då opnar vi for at både dei som er på sjølve møte, men også dei som ikkje har høve til å delta, kan få bruke tid kvar for seg til å setje seg inn i problemstillingane. Ynskjer dei i tillegg å kome med innspel er det berre å sende det på e-post til seniorrådgjevar Kari Kjos, seier utviklingssjef Tove Hovland. Du når ho på denne adressa: kari.kjos@helse-forde.no

For folk flest
Arbeidsmøta i strategiprosessen er delte inn i to grupper. Først for tilsette i Helse Førde, og seinare same dag for eksterne partar. Det kan vere pasientar, pårørande, lokalpolitikarar og folk flest. Dette møtet samla rundt 25 personar i Lærdal torsdag kveld. Politikarane i Sogn viste stor interesse, og både Jarle Aarvoll (Sogndal), Olav Lunden (Leikanger) og Arne Sanden (Lærdal) møtte opp.

Tilsvarande arbeidsmøter finn også stad ved Førde sentralsjukehus måndag 11. januar og ved Nordfjord sjukehus tysdag 12. januar. Sjå møteplanen her.

Arbeidsmøte samla 60 på Eid

Mon, 07 Jun 2010 09:15:43

Arbeidsmøtet i samband med strategiarbeidet samla 60 tilsette ved Nordfjord sjukehus tysdag 12. januar. Mange av dei var opptekne av å diskutere ortopeditilbodet i Helse Førde.

Ei av dei som deltok var oversjukepleiar Oddrun Rye ved ortopedisk seksjon på Nordfjord sjukehus. Ho var nøgd med deltakinga.

- Ja, dette var veldig bra. Eg synst det var eit godt engasjement, og det viser nok at dei tilsette er veldig opptekne av at vi skal bevare det gode tilbodet vi har ved sjukehuset.

Fleire bilete og kommentarar frå gruppemøta i Helse Førde kjem i januarutgåva av informasjonsavisa Helsa Vår.

Les også meir om strategiarbeidet på Helse Førde 2020.

Helseministeren til Førde

Mon, 07 Jun 2010 09:46:14

Helseminister Anne-Grete Strøm-Erichsen kjem til Førde 5. mars.

Strøm-Erichsen skal blant anna delta på dialogmøtet mellom styret i Helse Førde og ordførarane i Sogn og Fjordane. Dette møtet blir lagt til Førde same dagen. Helseministeren kjem også til å vitje Førde sentralsjukehus medan ho er her.

- Det er veldig kjekt at ministeren kjem, ikkje minst i denne viktige fasen der vi er i gang med å utforme strategien for føretaket fram mot 2020. Kor mykje tid ho set av til dialogmøtet og besøket på sjukehuset veit vi ikkje endå, men vi skal uansett sørge for at ho får ei god mottaking, seier administrerande direktør i Helse Førde, Jon Bolstad.

Referat frå arbeidsmøta

Mon, 07 Jun 2010 09:50:05

Dei mange innspela i samband med arbeidsmøta i Helse Førde er no lagde ut på våre nettsider.
Møta i Helse Førde samla fleire hundre personar, både tilsette og folk flest. Innspela frå gruppearbeida vart skrivne på lappar, men er no systematiserte og lagde ut på nettsidene.

Gå til sida Helse Førde 2020 (referata ligg i høgre marg).

- Eg trur vi har fått inn over 1000 lappar, så det har vore ein god jobb for sekretærane å skrive desse handskrivne innspela over i dokumentversjon. Vi har klart å tyde dei fleste lappane, seier utviklingssjef i Helse Førde, Tove Hovland.

Ord er enkelte stader erstatta med prikkar der setningar ikkje har vore mogeleg å lese.

Denne veka pågår det arbeidsmøter i dei ulike klinikkråda. Referat frå desse vil også kome så fort dei er gjennomførde.

Stolt over engasjementet

Mon, 07 Jun 2010 09:53:10

Styreleiar i Helse Førde, Clara Øberg (biletet), er stolt over det store engasjementet som har vore i samband med arbeidsmøta i føretaket.

-Vi har vore opptekne av at leiinga i Helse Førde skal ha gode prosessar opp mot dei tilsette i dette strategiarbeidet. Arbeidsmøter med fokus på korleis vi skal nå målsetjingane våre, meiner eg har vore ein god start, seier ho.

Øberg og resten av styret vil etterkvart få dei mange innspela som eige vedlegg til styresaka som skal opp i april.

– Det blir spennande å sjå kva som er kome inn, og ikkje minst om det er forskjell på prioriteringane ut i frå kvar dei tilsette jobbar. Vi skal uansett ta med oss dette, og så får vi sjå kva innspel som styret meiner bør inn i det endelege strategidokumentet, seier ho.

Strategiplanen blir også tema når styret i Helse Førde inviterer ordførarane i fylket til dialogmøte 5. mars. Der vil også helseministeren delta.

– Det er svært gledeleg at ho kjem, seier Øberg.

Send innspel elektronisk

Mon, 07 Jun 2010 09:56:38

Dersom du gjekk glipp av arbeidsmøta i Helse Førde, kan du sende ein e-post til oss.

Det har vore halde opne arbeidsmøter, både for tilsette og folk flest, i Sunnfjord, Nordfjord og Sogn dei siste vekene. Dette er ein del av innspelsfasen i samband med styret sitt strategiarbeid fram mot 2020.

Det kom inn svært mange innspel på sjølve møta, men det er også mogleg å sende inn elektronisk om du ikkje hadde høve til å delta på gruppemøta.

Send innspela dine til seniorrådgjevar i Helse Førde, Kari Kjos, innan 8. februar.

Ynskjer meir gruppearbeid

Mon, 07 Jun 2010 09:59:18

Både Fagforbundet og NSF er nøgde med metoden som Helse Førde brukte i arbeidsmøta med dei tilsette. - Dette kan ein nytte meir, seier Kjell Nygård.

- Vi har fått tilbakemeldingar om at dette har fungert veldig bra, og at ein slik måte å jobbe på også kan brukast i andre samanhengar. Men eg har også høyrt at enkelte har etterlyst litt meir informasjon om sjølve møta og kva oppgåvene går ut på, seier føretakstillitsvald for Fagforbundet, Kjell Nygård.

Han var sjølv tilstades og deltakar på gruppemøta om strategien, både i Lærdal og Førde. Han opplevde då at det vart jobba kreativt rundt dei mange borda.

- Her får alle kome til ordet, og det er ikkje berre dei sterke røystene som blir høyrd. Det er kjempebra.

- Er dette ein måte å gjere det også i andre prosessar enn i strategiplanen?

- Metodikken som er brukt under arbeidsmøta, er den tenkinga som ligg til grunn for pilotsjukehusprosjektet i Helse Førde, betre kjent som Forbetringsprogrammet. Dette er ein metodikk som eg har stor tru på og som tidlegare er blitt brukt i Modellkommune og Kvalitetskommuneprogramma med stort hell rundt om i landet.

- Dette er program som er godt forankraheilt inn til departementet. Eg håpar og trur at Helse Førde vil nytte tilsvarande metode i andre typar omstillingsarbeid i framtida, både store og små prosessar, seier Nygård.

Nygård får støtte av Randi Fagereng, føretakstillitsvald i Norsk sjukepleiarforbund. Ho meiner metodikken bør brukast ved andre høve.

- Fleire NSF-medlemmar har meldt dette tilbake. Dei trur dei lettare kan kome fram med sine innspel og tankar ved f.eks. avdelingssamanslåingar m.m. Fleire av dei sitr på ein erfaringsbase og ein kompetanse som ville fått fram potensialet i Helse Førde i mange samanhengar, seier ho.

Møteplan oppdatert

Mon, 07 Jun 2010 10:19:46

Møte- og kommunikasjonsplanen i samband med strategiarbeidet i Helse Førde er no tilgjengeleg på nettsidene Helse Førde 2020.

Møte- og kommunikasjonsplanen i samband med strategiarbeidet i Helse Førde er no tilgjengeleg på nettsidene Helse Førde 2020.

Handlingsplanen strekkjer seg heilt fram til styret sitt møte i midten av juni, då langtidsbudsjettet i føretaket skal vedtakast.

Som det går fram av planen skal styret handsame strategidokumentet 30. april.

Det kan kome endringar, og planen vil bli oppdatert fortløpande når det føreligg informasjon om nye aktivitetar.

Informasjons- og kommunikasjonsplan

Orienterte om strategiplanen

Mon, 07 Jun 2010 10:23:00

Styret i Helse Førde har fatta vedtak om utlegging av høyringsdokument for strategeiprosess Helse Førde 2020. I saka finn du dokumentet og presentasjonar frå møta i dag.

Det har i dag vore ei rekkje informasjonsmøter om høyringa til strategiplan 2020 i Helse Førde.

Dagen starta i auditoriet ved Førde sentralsjukehus der adm.dir. Jon Bolstad orienterte tilsette i føretaket om høyringsgrunnlaget. Eit meir enn fullstett auditorium med videostudio til dei andre institusjonane i føretaket følgde med på Helse Førde sitt styre sine strategiar for dei næraste 10 åra for føretaket.

Helseminister Anne-Grete Strøm-Ericksen deltok på møtet som KS og styret i Helse Førde arrangerte på Sunnfjord Hotell i Førde. Mange pressefolk og representantar frå ulike aksjonsgrupper i fylket deltok også på møtet.

Seinare på dagen vart ordførarane i fylket saman med KS og fylkeskommunen orientert.

Presentasjonar i møta (pdf):

Samarbeid mellom Helse Førde og Helse Sunnmøre

Mon, 07 Jun 2010 10:27:21

Som ledd i strategi- og omstillingsarbeidet i Helse Midt Norge RHF, Helse Sunnmøre HF og Helse Førde HF har det vore utført ei utgreiing av kapasitet og pasientgrunnlag for bestemte pasientgrupper på tvers av fylkesgrensa.

Utgreiingsarbeidet har vore gjennomført av PricewaterhouseCoopers (PwC), i nært samarbeid med fagmiljøa i Helse Førde HF og Helse Sunnmøre HF.

Rapportake kan kort oppsummerast slik:

Vurdering av Rus- og Psykiatritilbodet for pasientar tilhøyrande Volda DPS og Nordfjord Psykiatrisenter (NPS)

Rapporten i pdf-versjon

Volda DPS er ein seksjon under Vaksenpsykiatrisk avdeling i Helse Sunnmøre, og NPS er ein avdeling under klinikken Psykisk helsevern i Helse Førde.

Behandlingseiningane NPS og Volda DPS har ledig kapasitet. Dette gjev grunnlag for å sjå nærare på korleis aktiviteten kan tilpassast det behovdet ein ser i dag. Auka samhandling mellom Helse Førde og Helse Sunnmøre kan bidra til å utnytte den samla kapasiteten innan rus- og psykiatriområdet og tilby pasientar i området trygg og god behandling.

Tilpassing av aktivitet ved begge sentra kan skje gjennom ei auka samhandling om pasientgrupper. Helseføretaka ønskjer å utgreie nærmare kva pasientgrupper som primært kan tilvisast til Volda DPS, og kva for grupper som primært kan tilvisast til NPS. Det kan sjå ut som særs god kapasitet for behanling av unge med rusproblem ved NPS i større grad kan utnyttast gjennom ei utveksling av pasientar frå Sunnmøre.

Vurdering av pasientgrunnlaget for fødetilbodet ved Volda sjukehus

Rapporten i pdf-versjon

Føde- barselavdelinga/gynekologiavdelinga ved Volda sjukehus er ein del av Kvinneklinikken i Helse Sunnmøre. Føde- og gynekologiavdelinga på Nordfjord sjukehus er ein del av Kvinneklinikken (KK) i Helse Førde.

Føde- barselavdelinga/gynekologiavdelinga i Volda har ledig kapasitet til å ta i mot pasientar frå Nordfjord sjukehus.

Ved eit eventuelt samarbeid mellom Helse Sunnmøre og Helse Førde vil dei som ventar ukompliserte fødslar i kommunane Eid, Vågsøy, Selje, Stryn og Hornindal kunne overførast til Volda sjukehus. Det er sannsynleg at nokre fødande gjennom Fritt Sjukehusval vil velje å føde i Førde framfor i Volda, særleg vil dette kunne gjelde for fødande i deler av Stryn.

Konsekvensar
For at samhandlinga rundt desse pasientgruppene skal lukkast bør mellom anna bindande avtaler utarbeidast, ein felles koordineringseining bør etablerast og ein må sjå på økonomiske, kapasitetsmessige og behandlingsmessige konsekvensar. Fagleg kvalitet er og ein viktig faktor.

Det vidare arbeidet med rapportane i helseføretaka
PwC-rapportane vil vere eit nyttig bakgrunnsmateriale for dei vidare drøftingane mellom Helse Midt-Norge/Helse Vest knytt til randsoneutfordringar mellom Helse Sunnmøre og Helse Førde. Samarbeidet mellom helseføretaka vil fortsette parallelt med at dei ulike strategidokumenta er/blir sendt ut på høyring.

- - - - - - - - - - - - - - - - - - - - -- - - - - - - - - - - - - - - - - - - - - - -

For ytterlegare informasjon:
Fagdirektør Hans Johan Breidablik, telefon 578 39 034 / 901 82 853

Mange høyringsinnspel

Mon, 07 Jun 2010 10:31:02

Høyringsfristen i samband med Helse Førde sin strategiplan gjekk ut 19. april. Dei fleste høyringsinstansar har kome med innspel.

- Det tykkjer vi er veldig flott. I tillegg har det kome andre høyringsuttalar, blant anna frå privatpersonar og næringsliv. Ein del personar har også sendt postkort, seier utviklingssjef Tove Hovland i Helse Førde.

Blant høyringsinstansane er mellom andre alle kommunar i fylket, Sogn og Fjordane fylkeskommune, Helse Bergen og Helse Sunnmøre og brukarane sine interesseorganisasjonar. Administrasjonen vil no sjå på tilbakemeldingane frå høyringsinstansane og starte sakshandsaminga.

– Styret skal handsame endeleg strategiplan 27. mai, men før den tid skal det utarbeidast eit solid saksunderlag. I dette arbeidet vil vi også leggje til grunn innspela frå høyringsinstansane, seier Hovland.

Styret i Helse Førde har vore klare på at det grunnleggande for innspela, er at dei tek i vare kravet om moderne, kunnskapsbaserte og trygge tenester innan tilgjengelege økonomiske rammer til innbyggjarane i heile Sogn og Fjordane.

Høyringsdokumenta tilgjengelege

Mon, 07 Jun 2010 10:34:37

Høyringsinnspela i samband med strategiplanen ligg no tilgjengelege på nett.

Vi har ogsåt samla alle dokument som er ein del av faktagrunnlaget for styringsgruppa i arbeidet med strategiplanen for 2020. Du kan lese dokumentet i pdf-format her:

Faktagrunnlag for styringsgruppa

Innkomne høyringar:

Vitja Hallingdal sjukestugu

Mon, 07 Jun 2010 10:39:23

I samband med strategiarbeidet vitja leiargruppa i Helse Førde, Hallingdal sjukestugu i slutten av april. – Eit veldig nyttig besøk, seier utviklingsdirektør, Tove Hovland.

Sjukestugu, som ligg i Ål, har sakte men sikkert, år for år, blitt ein institusjon som hallingdølene er blitt glade i. Eit lokalmedisinsk senter, der drifta er delt mellom kommunane i regionen og spesialisthelsetenesta ved Vestre Viken helseføretak. Mykje likt det Helse Førde legg opp til i strategiplanen fram mot 2020.

– Intensjonen vår har vore å møte samhandlingsreforma, og ta på alvor at mykje av det som i dag er våre oppgåver, skal over til kommunane. I Hallingdal ser vi samhandlingsreforma i praksis. Dei har bygd opp eit tilbod over 30 år, og det var interessant å sjå kor mykje kommunane bidrar med. Også innanfor logistikkområdet var dei komne langt, seier utviklingsdirektør i Helse Førde, Tove Hovland, og viser til at tre helsebussar er sett opp mellom Geilo og houvdsjukehuset på Hønefoss.

Desentralisert poliklinikk

Hallingdal sjukestugu har ein sengepost med til saman 14 senger. Den blir driven av spesialisthelsetenesta, men det er allmennlegar som har det faglege ansvaret. I tillegg til sengepost har dei svært mange dag- og poliklinikktilbod, røntgen- og laboratorietenster, tappestasjon for blodbanken og lærings og meistringssenter.

– Eg talde opp nesten 14 ulike tilbod som blir gjeve poliklinisk. Det blir organisert ved at spesialistar frå morsjukehuset på Hønefoss reiser til Hallingdal i ein fast turnus. På den måten slepp pasientar i regionen å reise til Ringerike sjukehus, legen kjem heller ut til dei. Hos oss er 90 prosent av dei som står på ventelistene folk som ventar på behandling ved poliklinikkane. Difor var det nyttig å sjå kva poliklinikktilbod dei har klart å desentralisere til eit lokalmedisinsk senter, seier Hovland.

Akutte innleggingar

Hallingdal sjukestugu har også ei enkel form for akuttberedskap. I 2009 hadde dei nær 200 innleggingar av ulike karakterar.

– Det kan vere snakk om enklare behandling, medisinsk oppfølging og i mange samanhengar observasjonar. I siste tilfellet snakkar vi mest om dehydrerte pasientar som trenger intravenøs væskebehandling, ernæringssvikt, blodtransfusjoner og infeksjonspasientar, seier administrasjonssjef ved sjukestugu, Reidar Aasheim.

Han fortel at dei også har nokre akutte innleggingar i samband med naudfødslar og innan lindrande behandling.

Like utfordringar

Styret i Helse Førde skal i år ta stilling til kva organisasjonsmodell som skal liggje til grunn for vidare utvikling av føretaket. Sjølv om det er stort engasjement i Sogn og Fjordane for korleis den framtidige strukturen skal sjå ut, kjenner Aasheim seg igjen i utfordringsbilete.

– Dette besøket har også gjort til at vi har blitt godt kjent med dei problemstillingane de står overfor. Det er heilt klart at vi har mange felles utfordringar i våre helseføretak, og med å sørgje for spesialisthelsetenester til utkantane i Norge på ein god og hensiktsmessig måte. Litt ulik er geografien, men likskapane er mange, sa han.

Notat om akuttberedskap

Wed, 09 Jun 2010 14:51:26

I samband med Helse Førde sin strategiprosess er akuttberedskap eit viktig element i debattane. Det er difor laga eit notat om dei akuttmedisinske kjedene i Sogn og Fjordane.

- Det er viktig å vite at akuttberedskap skal dekkje mange tilstandar og at desse tilstandane har ulik hastegrad og alvorsgrad. T.d. vil ein person med akutt hjartestans trenge hjelp innan få minuttar om han skal overleve, og tilfeldig kompetanse i umiddelbar nærleik kan vere avgjerande. På den andre sida vil kommunale legevaktslegar kunne ta hand om eit stort spekter av dei meir vanlege akutte tilstandane i kommunen, seier utviklingsdirektør Tove Hovland i Helse Førde.

Ho ber folk lese notatet om akuttberedskap i fylket.

Hjernelag i fokus

Finn Ove Njøsen — Tue, 08 Jun 2010 10:29:22

”Bruk hue”, vær positiv og ha pasienten i sentrum var nokre av Erik Fismen sine innspel på fagdag for hjerneslag. Nærare 60 tilsette i Helse Førde deltok i undervisninga.
Oppdatering av kunnskapar innan hjerneslag var tema for ein dags undervisning ved Førde sentralsjukehus. Innleiarane sørgja for god kvalitet under temadagen.

Det var avdeling for nevro-, revmatologi og rehabilitering som fekk oppdatert sine kunnskapar innan feltet hjerneslag.

Kognitiv terapi
Erik Fismen, fysikalsk medisinar ved Hauglandssenteret, held ein times innlegg om kognitiv terapi i ein rehabiliteringsprosess. ”Aktivhet – aktivitet. Det går an å bruke hue mens du trener”, var tittelen på føredraget til hans.

Fismen understreka at alle faggrupper er like viktige i rehabiliteringa, men at pasienten uansett er den viktigaste.

– Vær positiv og ha pasienten i sentrum, understreka Fismen.

Det var teke opp fleire tema som dei tilsette fekk ny og oppdatert kompetanse i.

Praktisk øving
Det vart gjennomført praktiske øvingar med ”slagpasient” med tema: ”pasient med venstresidig hjerneinfarkt, total afasi, hemiparalyse høgre side og inkontinent. Klokka er 08.30 på sengeposten…”

Elles fekk dei tilsette i Helse Førde innføring i nasjonale retningslinjer for behandling og rehabilitering av hjerneslag. Overlege Hegrestad var innom anatomi, hjerneslag og trombolyse medan slagsjukepleiar Systaddal gjekk igjennom område sjukepleie frå mottak til sengepost og trombolyse på sengeposten.

Logoped R. Bjørkedal, fysioterapeut A. R. Akselsen og E. N. Lundekvam hadde inspirerande føredrag innan sine fagfelt.

– Dette var ei veldig vellukka samling og det er bra at dei tilsette stadig får påfyll av kunnskap og tankar kring arbeidet med pasienten, seier avdelingssjef Signe Nordvik.

Kvitt smertene etter 40 år

Tue, 08 Jun 2010 11:58:38

I nesten 40 år var Knut Dvergsdal plaga av smerter i heile kroppen. No er dei nesten borte.

Dvergsdal er ein av mange revmatiske pasientar som har fått nytte av den biomedisinske revolusjonen.

- Når du går i så lang tid med verk i kroppen, og får ein medisin som så å seie tek dei heilt vekk, så blir du ein ny person. Slik eg ser det, så har eg fått eit nytt liv, seier 61 år gamle Knut Dvergsdal.

Heilt sidan tidleg i 20-åra har han hatt revmatiske smerter. I dag er han stiv i ryggen og nakken, og veit at han også må leve med deti framtida. Men den nye medisinen har gjort livet langt lettare. Avdelingsleiar Kjell Haaland på revmatologisk avdeling seier at den biomedisinske revolusjonen dei siste 5-6 åra har endra behandlinga dramatisk.
- Meir enn nokon gong er det viktig med tidleg og rett diagnose fordi vi no har eit middel som hos mange pasientar kan bremse eller stanse utvikling av ein destruktiv leddbetennelse. Mange kan med det unngå livsvarig handikap. For første gong i historia har vi middel som verkar på revmatisk betennelse i ledd i ryggrada, seier Haaland.

I den moderne poliklinikken i påbygget ved Førde sentralsjukehus er han og kollegaene betre rusta enn nokon sinne til å hjelpe pasientar som Dvergsdal. Kvart år har dei om lag 2500 konsultasjonar på poliklinikken. Om lag 900 av dei er nytilviste pasientar. Knut Dvergsdal håpar at mange andre revmatiske pasientar får oppleve det same som han.
- Dei gamle medisinane var til langt mindre hjelp, og gav også biverknadar. Håpet mitt no er at eg ikkje får eit tilbakefall i form av biverknadar, men så langt ser det svært bra ut, seier han.

Nils Sletteskog i nasjonal gruppe for kreftbehandling

Tue, 08 Jun 2010 12:32:21

Overlege og avdelingssjef Nils Sletteskog på Kirurgisk avdeling i Helse Førde er oppnemnt i ei nasjonal gruppe for behandling av coloncancer uten fjernemetastaser.
Bakgrunnen er at direktoratet ønskjer å starte arbeidet med eit nasjonalt handlingsprogram for kolorektalkreft.

I samarbeid med fagmiljøet har dei sett ned ei arbeidsgruppe som skal jobbe med å lage eit nasjonalt handlingsprogram med retningslinjer for diagnostikk, behandling og oppfølging av kolorektalkreft.

Unik legekvartett

Thu, 25 Nov 2010 09:09:42

Rekrutteringsarbeidet som er gjort ved seksjon for øyre-nase-hals på Førde sentralsjukehus blir lagt merke til. Samtlege spesialistar på avdelinga er frå fylket.
Mange års erfaring viser at det er størst sjanse for stabil arbeidskraft frå helsepersonell som har ein eller anna tilknyting til staden. Difor har vi aktivt stimulert aktuelle kandidatar til å satse på denne arbeidsstaden, seier Helge Hagen, seksjonsleiar ved ØNH i Førde.

For mange avdelingar er det ei utfordring berre å få tak i overlegar, anten det er snakk om norsk eller utanlandsk arbeidskraft. Seksjon for øyre-nase-hals på Førde sentralsjukehus kan no skilte med fire "fjogningar" på laget. Og tru ikkje at det er tilfeldig.

Takkar Haukeland
– Vi har sidan tidleg på 90-talet arbeidd målretta med å rekruttere legar til ØNH spesialiteten med tilknyting til fylket. Takka vere godt samarbeid med ØNH-avdelinga på Haukeland, har våre legar i spesialisering fått raskt tilgang på stilling der for å ferdigstille spesialiteten. Legane har fått stipendordning for å gjere ferdig spesialiteten i Bergen, og dette medfører bindingstid når dei returnerer som ferdige spesialistar.

Helse Førde har til saman nær 300 utanlandske helsearbeidarar ved dei ulike institusjonane i fylket. Over halvparten av desse er overlegar.

– Vi må nok ha eit stort fokus på å rekruttere lokalt, sjølv om det er eit tidkrevjande arbeid. Hjå oss ser det ut til at legane i større grad blir verande ved avdelingane i mange år, i høve til slik det tidlegare var med kortvarige tilsetjingsforhold frå andre stader i landet eller utlandet, seier seksjonsleiaren.

Helge Hagen var den første av dei fire lokale overlegane som vart tilsett ved øyre-nase-hals-seksjonen i Førde. Sidan då har han aktivt søkt blant turnuskandidatar frå fylket, invitert aktuelle personar til hospitering og enkelte gonger har han fått tips om kandidatar. Slik har han altså sakte men sikkert sikra seg full "lokal dekning" på seksjonen.

Nummer fem på veg
Og som ikkje det er nok, spesialist nummer fem er også på veg.

– Mari Furnes frå Vågsøy er for tida LIS-lege på Haukeland. Om to år er ho etter planen tilbake her. Det er kjekt at vi også klarar å rekruttere lokale kvinner tilbake, seier Hagen.

Behandling av kroniske sår

Tue, 08 Jun 2010 13:17:35

Det var ein av postane på programmet då 37 sjukepleiarar og legar var samla til sårkurs på Høgskulen, avd. Helsefag 8. og 9. mai.

Kursopplegget er utvikla i nært samarbeid med hudavdelinga ved Helse Førde og vart arrangert for andre gong.

Lenkje:
Les meir på Høgskulen sine nettsider.

Brystkreftbehandling i Sogn og Fjordane

Trygve Nybø, overlege kreftpoliklinikken Helse Førde — Tue, 08 Jun 2010 13:28:39

Det har den siste tida vore fokus på behandlinga av brystkreft i Sogn og Fjordane. Seksjonsoverlege Trygve Nybø i Helse Førde meiner bilete som er framstilt treng å korrigerast.
Det har vore framme i media at når det gjeld behandling av brystkreft gitt mellom 1985 og 2004 så ligg Sogn og Fjordane dårlig an. Dette er nok riktig, sjølv om forskjellane mellom landsdelane er små. Ein må også vere klar over at dette er ein historisk statistikk som ikkje viser status av behandlinga slik den blir gitt i dag.

I Helse Førde såg ein mot slutten av 1990-åra at det var av betyding å setje inn større ressursar innan brystkreftbehandlinga i Sogn og Fjordane. Det ein då gjorde var at ein sentraliserte behandlinga.

Ved Førde sentralsjukehus vart det danna eit brystdiagnostisk senter, med tett samarbeid mellom kirurg, røntgenlege og kreftspesialist. Seksjonsoverlege Trygve Nybø blei ansvarleg for den kirurgiske sida, overlege Inger Marie Juel fekk hovudansvaret for røntgendelen og Geirfinn Vagstad var inne som kreftspesialist. Frå 2002 fekk vi tilsett overlege Ståle Sund som patolog og Helse Førde hadde då eit fullverdig brystdiagnostisk team. Frå dette året kunne vi få frysesnitt, det vil sei undersøkje preparat under operasjon – eit klart framsteg for brystkreftbehandlinga.

Vi starta opp med "vaktpostlymfeknuteteknikk", og kunne dermed unngå større operasjonar for å fjerne lymfeknutar i armhola. Dette ga mindre inngrep på pasienten og færre pasientar vart utsette for problematiske seinverknader etter inngrep i armhola. Vi kom så med i det nasjonale screeningprogrammet frå 2003. Då kunne vi kalle inn alle kvinner mellom 50 og 70 år i Sogn og Fjordane til brystundersøking annakvart år. Når det gjeld det tekniske utstyret har føretaket fått oppgradert dette til moderne digitale mammografer, og frå januar 2010 også spesialmaskin for å ta prøver frå forandringar som er så små at ein ikkje kan kjenne dei frå utsida.

Ved brystdiagnostisk senter i Førde behandlar vi mellom 50 og 70 nye brystkreft-tilfeller kvart år. Vi har eit godt og tett samarbeid med vår moderavdeling på Haukeland Universitetssjukehus. Når det gjeld resultat av denne større innsatsen frå Helse Førde si side er det klart at vi først etter 5 – 10 år vil vite korleis vi ligg an i forhold til resten av landet. Vi kan som kjent ikkje få oversikt over 10 års sjukdomsfri overleving før det har gått 10 år etter behandlinga. Det er viktig for kvinnene i Sogn og Fjordane å vite at behandlinga dei får her er like god som i resten av landet. Til hjelp for å få vite dette kjem ein truleg i år i gang med eit nasjonalt brystkreftregister som registrerer alle kvinner som får brystkreft, med detaljert sjukdomsoversikt og behandling. Då vil vi betre kunne samanlikne regionane med kvarande. Det er klart at dersom Helse Førde ikkje kan ha ei behandling for brystkreft på høgde med resten av landet, så skal vi heller ikkje drive med det.

"Eigen spesialitet"
Frå 2008 vart det danna ein eigen kirurgisk spesialitet for mamma endokrin kirurgi (det vil sei brystkirurgi og hormonelle sjukdomar slik som skjoldbruskkjertelsjukdom og liknande). Det er svært få slike spesialistar i Noreg i dag. Det er berre Haukeland Universitetssjukehus som har full dekning av dette, og det vil ta lang tid før det blir full dekning av slike spesialistar rundt om på dei brystdiagnostiske sentra i Noreg. På sikt må nok Helse Førde syte for å utdanne sine eigne spesialistar. I mellomtida har ein spesialistar i kirurgi som har spesialkompetanse innan ei av desse greinene. Det vil sei at dei har det som ein stor og viktig del av sine arbeidsoppgåver å ta hand om brystkreftkirurgien eller endokrinkirurgien.

10. gong med laproskopi

Finn Ove Njøsen — Tue, 08 Jun 2010 13:56:19

150 deltakarar har tatt Helse Førde si opplæring i laparoskopisk suturteknikk sidan 2001. I år var det deltakarar frå Harstad i nord til Arendal i sør.
Kvinneklinikken i Helse Førde arrangerte 10. – 11. mai kurs med kursleiarane Jostein Tjugum og Tom Guldhav.

– I år som tidlegare var det venteliste for å delta på kurset. Legar og LIS-legar frå heile landet deltek, fortel kurssekretær Anne-Randi Solheim i Helse Førde.

Treng fleire kurs
– Vi har for få kurs av dette slaget i Noreg. Målet må vere at vi kan få auke volumet på opplæringa i laparoskopisk suturteknikk, fortel Ronald Mårvik.

Mårvik er sjef for Nasjonalt senter for avansert kikholskirurgi. Senteret ligg ved St. Olavs i Trondheim. Mårvik deltok dette året som førelesar og instruktør under kurset i Helse Førde. Kursdeltakarane følgjer kriteria til "Førde-modellen" ved å sy laparoskopisk. Deltakarane trenar seg på å sy " i ein boks", til dømes i ein magesekk, medan dei ser på skjermen kva dei gjer.

Effektiv læring
– Denne opplæringa gjev svært god læring. Ein flygar som flyr i simulator har ein læringsgrad på 0,9 i høve til å fly eit fly. Ein lege som simulerer ein operasjon på utstyret dei nyttar i Helse Førde har ein læregrad på heile 2,3 fortel Mårvik.

– Å nytte kikholsoperasjonar er samfunnsøkonomisk. Mange slike operasjonar kan gjerast som dagbehandling. Det betyr at vi får to gevinstar – pasienten kan kome raskare heim att og helsevesenet slepp å nytte kostbare senger, understrekar Mårvik.

Under opplæringa brukar kursdeltakarane utstyr som er identisk med det ein nyttar ved ein ordinær operasjon.

Som tidlegare var professor Bergamaschi med. Han var pådrivar for kursa i Helse Førde og har årleg vore førelesar. I dag er han professor i New York. Bergamaschi og Mårvik samarbeider om forsking på suturteknikken.

Betre oppfølging av skulderpasientar

Finn Ove Njøsen — Wed, 29 Sep 2010 13:52:44

Helse Førde har fått såkornmidlar til kvalitetsutvikling innanfor ortopedi og fysioterapi for skulderpasientar. Det er fysioterapeut Åslaug Haugset og seksjonsoverlege Kristian S. Humborstad som leiar prosjektet.
– Vi ønskjer å utvikle ei betre oppfølging av skulderpasientar. Difor set vi no i gang eit prosjekt for å få betre tilpassa postoperative rutinar, rehabiliteringsprotokollar og kontrollregimer, fortel Åslaug Haugset, fysioterapeut ved Nordfjord sjukehus.

Prosjektet Haugset og Humborstad no startar opp har motteke 100.000 kroner i såkalla ”Såkornsmidlar til lokale kvalitetsutviklingsprosjekt”.

Årleg blir det utført operasjoner på ca ca 300 skulderpasienter ved sjukehuset.

Krevjande gruppe
Denne pasientgruppa er krevjande, både diagnostisk, operativt og i rehabiliteringsperioden etter inngrepet. Det har og skjedd ei rivande utvikling innan behandlingstilbodet til skulderpasientane.

– Det er ikkje tidlegare brukt fysioterapeut som ein del av behandlingsteamet ved ortopedisk poliklinikk, men vi kan absolutt tilføre rehabiliteringa mykje. Dette både for å plukke ut og justere kursen for dei pasientane som ikkje blir betre etter inngrepet, og for å vere eit bindeledd mellom ortopedisk avdeling og fysioterapeutar i førstelina, påpeikar Haugset.

På etterkontrollen av skulderopererte fangar fysioterapeutar opp ein del signal frå pasientar som er viktige å ta med i arbeidet med å utvikle god pasientinformasjon.

Målsetjinga med prosjektet er å sikre at pasientane får ein høg fagleg kvalitet og oppdatert kunnskap ligg til grunn i etterbehandlinga av denne gruppa pasientar.

Betre rutinar
Prosjektet fokuserer på gode og oppdaterte postoperative rutinar og rehabiliteringsprotokollar. God og eintydig informasjon til pasientane, både skriftleg og munnleg, og til slutt god kommunikasjon og samhandling med førstelinetenesta.

– Vi ønskjer å lage ei eiga nettside der vi kan halde førstelinetenesta oppdatert om det vi driv med, og leggje ut nye rehabiliteringsprotokollar. Vi ønskjer eit tettare samarbeid med private og kommunale fysioterapeutar, slik at oppfølginga i kommunane blir best mogleg for dei skulderopererte, seier Haugset, som håpar at dei kan få prosjektet ferdig i løpet av første halvår 2010.

Markering av dialyse i Lærdal

Wed, 09 Jun 2010 09:42:07

Måndag 26. mars markerte Helse Førde oppstarten av dialysetilbodet ved Lærdal sjukehus. Ein god dag for pasientane i Indre Sogn som no får kortare veg til tilbodet, som dei fleste pasientar må nytte vanlegvis tre gonger i veka.

- Det kjekkaste med jobben min, er å markere noko som er bra for pasientane våre, sa administrerande direktør Jon Bolstad, til presse og inviterte under markeringa på Lærdal sjukehus.

I samarbeid med Førde sentralsjukehus har no dialysepasientane i fylket fått tilbod på Nordfjordeid og Lærdal. Dette betyr langt mindre reisetid for pasientane som skal ha dialysebehandling.

Auka behov

Per i dag er det seks dialysepasientar i Indre Sogn. Fleire vil truleg kome til. På landsbasis aukar behovet for dialysebehandling med om lag 10 prosent årleg.

I tilfelle det er behov for større kapasitet ligg det til rette for auka aktivitet i Lærdal.

Overlegane Mona Skibenesvåg Løvø og Astrid Dale skal stå for det faglege ansvaret for dialysetilbodet i fylket. Mona Skibenesvåg Løvø deltok under merkeringa måndag. Ho skal ha hovudansvaret for Lærdal, medan Dale skal ha hovudansvaret for Nordfjordeid.

Løvø understreka at alle dialysepasientar først må til Sentralsjukehuset for vurdering. Deretter skal Lærdal ha den daglege dialysebehandlinga. Alle med mellom anna akutt nyresvikt skal framleis til Sentralsjukehuset, påpeika Løvø.

Assistentlege Svein Urnes skal stå for den daglege drifta i Lærdal.

Blomar og gåve

Regionrådet i Sogn gav avdelinga ein flatskjerm TV slik at pasientane kan nytte det under dialysebehandlinga. Ei behandling som tek fleire timar.

Klinikkdirektør Arve Varden gav blomar til Løvø og Urnes og gratulerte dei med det nye tilbodet i Lærdal.

Under markeringa var innbydde gjester og presse med på omvisning på den nye avdelinga. Det er tilsett fire sjukepleiarar ved avdelinga. Arve Varden nytta også høve til å gje blomar til sjukepleiarane som hadde vore 6-7 veker på opplæring ved Førde sentralsjukehus.

Forprosjektering av psykosepost

Wed, 09 Jun 2010 13:45:25

Adm. dir Jon Bolstad går inn for at det vert sett i gang forprosjektering av psykosepost i Førde i løpet av 2007. Føretaket kan spare 7-8 millionar kroner i året på utbygginga

Styret i Helse Førde gjekk i 2003 inn for at
det skulle utgreiast psykosepost,
alders- og nevropsykiatrisk tilbod og auka areal til Førde BUP i Førde.

- Utrekningar frå Psykisk Helsevern viser at dei kan spare om lag fem millionar kroner i året på å avvikle drifta på Tronvik og samle den i Førde. I tillegg kjem reduserte avskrivingar på rundt to millionar kroner, seier administrerande direktør i Helse Førde, Jon Bolstad.

I opptrappingsplanen for Psykisk helse går det fram at alle distriktspsykiatriske senter skal ha ein psykose sengepost og eit ambulant team. Dette tilbodet er på plass i indre Sogn og Nordfjord, men ikkje i Sunnfjord og ytre Sogn.

Stort framsteg - Vi har ikkje eit fullgodt spesialisert tilbod til psykotiske pasientar i Sunnfjord og ytre Sogn i dag. For denne pasientgruppa vil ein psykosepost vere eit stort framsteg, seier klinikkdirektør i Psykisk helsevern, Ole Christian Reusch.

Utbygging av psykosepost og tilbod innan alders- og nevropsykiatri gjer mogeleg å redusere det totale talet på sengeplassar med åtte, spare sju-åtte millionar kroner, og gje pasientane eit meir spesialisert tilbod. Førde BUP har i dag sprengt kapasitet og treng større areal. Ei utbygging vil også føre til at Helse Førde kan avslutte leigeforholdet i eit anna bygg i Førde.

- Grunngjevinga for reduksjonen av tal senger ligg mellom anna i eit meir spesialisert tilbod der fleire pasientar vil få eit poliklinikktilbod. Poliklinikktilbodet er oppretta pr i dag, men vil trenge fleire stillingar. Ei arbeidsgruppe har vurdert problemstillingane på nytt no i vinter, og meiner at vi også må vurdere å flytte sikkerheitsposten frå Tronvik til Førde. Tidlegare har vi sagt at det kan vere mogeleg å oppretthalde eit fagleg miljø ved Tronvik viss Helse Vest ønskjer å driv rusbehandling der. No er Helse Vest svært avventande til å bygge opp nye langtidstilbod, og då meiner arbeidsgruppa vår at det er best å samle alt i Førde, seier Reusch, som opplyser at det er 33 pasientplassar og om lag 90 årsverk ved Tronvik.

Spørsmålet om å setje av 1,5 millionar til forprosjektering kjem opp i styret i Helse Førde førstkomande fredag.

Info

Vidar Vie 26.03.2007

Valdtektsmottak for Sogn og Fjordane

Wed, 09 Jun 2010 13:51:08

Helse Førde har rutinar for mottak av kvinner over 16 år som er blitt utsette for valdtekt. Kvinnene kan visast til Gynekologisk seksjon ved Førde sentralsjukehus, opplyser avdelingssjef Agnethe Dissing Sættem.

- Vi utarbeidde rutinar for valdtektsmottak for fleire år sidan. Talet på kor mange som vert tilviste kvar år varierer, men det ligg godt i underkant av ti kvinner, seier avdelingssjefen.

Føremålet med valdtektsmottaket er primært å utføre rettsmedisinsk undersøking ved politimeld valdtekt. Men det vert også teke imot kvinner som er tilviste frå kommunelege utan at valdtekta er meld til politiet.

Ved utlevering av rettsmedisinsk erklæring/dokumentasjon skal det føreligge eit mandat frå politiet om kva spørsmål legeerklæringa skal avklare. Kvinna må også skrive under på erklæring om fritak frå teieplikt før legeerklæring kan sendast til politiet, seier Dissing Sættem, som også opplyser at jenter under 16 år skal visast til barneavdelinga ved Haukeland Universitetssjukehus.

Ved undersøkinga skal det også leggast vekt på om kvinna har personar ho kan søkje støtte hos det næraste døgnet. Viss det er akutt behov for det så vert ho tilvist til vakthavande psykiatrisk lege. Elles vert den valdtekne alltid tilrådd å søkje kontakt med fastlegen/primærhelsetenesta første kvardag etter hendinga.

Kvinneklinikken sender no ut ny informasjon om valdtektsmottaket til helsestasjonar, kommunelegar og politi.

Info

Vidar Vie 26.03.2007

Kommunelegar fekk informasjon om MR

Wed, 16 Jun 2010 13:52:30

Nesten 20 kommunelegar frå Nordfjord fekk onsdag informasjon om det nye MR-tilbodet ved Nordfjord sjukehus. Håpet til Helse Førde er at pasientane deira no vil nytte dette tilbodet.

- Målet med møtet var å samle kommunelegane i Nordfjord for å gje dei informasjon om MR-tilbodet ved sjukehuset, seier Sveinung Bjørkedal som er avdelingssjef ved Radiologisk avdeling i Helse Førde.

MR-maskina kom på plass ved sjukehuset tidlegare i vinter. Investeringa i maskin og ombyggingar var på heile 14 millionar kroner. For Helse Førde er det difor viktig at nordfjordingane støttar opp om tilbodet.

- Vi håpar at utstyret vert brukt av primærlegane i Nordfjord. Desse pasientane har til no stort sett gått til Sunnmøre. Det har påført helseføretaket kostnader, samstundes som vi går glipp av inntekter. Kommunelegane gav også uttrykk for at dei ønskjer å nytte dette tilbodet i nærområdet i staden for å sende pasientane vekk, seier Bjørkedal.

På møtet gjekk Helse Førde gjennom utstyret som var kjøpt inn til dei ulike typane undersøkingar, og fortalte kva undersøkingar som er mogeleg å gjennomføre. Det siste utstyret for at MR’en skal bli komplett, med tanke på Helse Førde sitt behov for undersøkingar, er på plass om eit par veker.

- Vi opplyste også om at dette er eit dagtilbod måndag til fredag. Vi utfører ikkje øyeblikkeleg hjelp-undersøkingar verken i Førde eller ved Nordfjord sjukehus. Det var også omvising på MR-laben og vi oppfatta det slik at kommunelegane var svært nøgde med det vi har fått til der, seier Bjørkedal.

Info

Vidar Vie 30.03.2007

Gode resultat for intensivbehandling i Helse Førde

Wed, 09 Jun 2010 14:12:11

– Intensiven ved Førde sentralsjukehus har gode tal for behandling av pasientar. I gruppa eldre har vi minst like gode resultat som regionsjukehusa, seier overlege ved intensivavdelinga Rune Arild Larsen.

– Det er ingen grunn til at eldre ikkje skal få fullverdig behandling, gode tal for utskriving underbyggjer dette, seier overlegen.

Førde sentralsjukehus har ein høg snittalder på dei som kjem til intensivavdelinga, snittet er heile 65,7 år.

– Det som er veldig bra er at vi har ein høg prosent utskrivne pasientar, og dermed låg prosent døde pasientar her i Førde, trass i høg alder. Vi har god grunn til å gle oss over resultatet som kjem fram i det nasjonale intensivregisteret, fastslår Larsen.

– Vi behandlar eldre ut frå diagnosane deira, på lik linje med alle andre aldersgrupper. Intensivavdelinga ved Førde sentralsjukehus er difor ein god plass å kome til også for dei eldre, gode tal frå undersøkinga underbyggjer dette, påpeikar Larsen.

Halvparten av alle intensivpasientar i Noreg blir behandla på sentralsjukehus, 20 prosent blir behandla på lokalsjukehus, medan 30 prosent blir lagt inn på regionsjukehusa. Det er få intensivpasientar som blir sendt frå Førde sentralsjukehus til Haukeland.

Intensivavdelinga ved Førde sentralsjukehus er med i norsk intensivregister. Rapporten for 2005 blei lagt fram i november i fjor. Det var i 2005 lagt inn 278 pasientar i registeret i Førde. Totalt sett er det mange fleire som var innom avdelinga.

Undersøkinga byggjer på eit stort materiale av europeiske og nordamerikanske intensivpasientar.

Intensivpasientane blir registrert i to dataverktøy som byggjer på ei rekkje fysiologiske variablar, stort sett uavhengig av diagnose. Det blir vidare registrert pleietyngde. Ordinære oppvakingspasientar som ligg mindre er eitt døgn blir ikkje rekna med..

Info

Vidar Vie 02.04.2007

Med våren kjem også pollensesongen og påfølgande plager for mange allergikarar. Her finn du nokon gode råd

Wed, 09 Jun 2010 14:18:29

Med våren kjem også pollensesongen og påfølgande plager for mange allergikarar. Her finn du nokon gode råd.

Einar Solheim er overlege ved ØNH-avdelinga til Helse Førde. Han opplyser at dei viktigaste pollenallergiane er bjørk og gras.

- Bjørkeallergikarane kan allereie få problem frå februar på grunn av kryssallergi med Or og Hassel som har spreiing tidleg i sesongen. Graspollen er i første rekkje eit problem i perioden juni til september, seier Solheim.

Her er nokre av råda hans til allergikarane:

1 – Unngå eksponering for det du er allergisk mot. Det vil seie at allergikarane må planlegge aktiviteten langt betre enn mange andre.

2 - Ta medisin i forkant av eksponering, for eksempel i god tid før pollensesongen.

3 – Ha ikkje opne vindauge under pollenspreiinga. Både til hus og bilvindauge er det mogeleg å få pollenfilter.

4 – Tørk ikkje klede utandørs i verste pollensesongen.

5 - Skyll nasen med saltvatn etter ein dag utandørs.

6 – For foreldre med born som er allergikarar så er det viktig å vere merksam på om vener og klassekameratar har husdyr. For born med allergi mot dyrehår kan det vere nok å sitje i nærleiken av ein klassekamerat med kattehår på kleda for at allergien skal slå ut.

Info

Vidar Vie 02.04.2007

"Tjukk, men ikkje tjukk i hovudet"

Thu, 10 Jun 2010 09:35:22

Å vere overvektig handlar om eit liv med skjulte vanskar og stigmatisering frå omgjevnadane.

To sterke innlegg frå brukarar som har gjennomgått behandling for sjukleg overvekt innleia dag 2 på LMS si regionale nettverkssamling. Ei lydhøyr forsamling fekk to ulike historiar frå ulike behandlingsformer, men likevel med mange like opplevingar. "Solveig" blei operert for sjukleg overvekt ved kirurgisk avd. ved FSS for fire år sidan og Alvhild var med i andre gruppa som fekk reise til Ebeltoft i Danmark og seinare Hauglandsenteret for livsstilsbehandling.

Mat som medisin
"Solveig" fortel om eit liv med slanking, allereie frå 4. klasse - over 150 kilo til saman, men ho blei berre tyngre og tyngre. Til slutt hadde ho "slanka på seg" ei overvekt på 100 kilo. "Solveig" var matmisbrukar. Maten blei medisin mot både vonde kjensler, angst, dårleg sjølvbilete og sjølvkjensle. Den blei ein redningsvest og ein løysingsmodell. Maten svikta aldri. Feittet som kom på kroppen fekk etter kvart ein funksjon. Det skjulte eit sårbart indre og var ei hjelp til å sette grenser, det vart eit skjul som holdt andre på avstand. Mange overvektige har utvikla eteforstyrringar som resultat av angst, seksuelle overgrep, ønskje om å bli sett, men òg for å gøyme seg.

Ned i vekt - men kva så?
Etter operasjonen gjekk "Solveig" ned 62 kilo på 9 mnd. Vekttapet førte til nye utfordringar. Det å få eit normalt forhold til mat, å endre livsstil etter mange år som matmisbrukar var ikkje lett. Ofte vert det ein såkalla "symptomswich". Ein erstattar maten som rusmiddel med anna misbruk for å oppnå ein "rus"- alkohol, arbeid, shopping. Mange skal ta att det livet dei gjekk glipp av når dei var innestengde i sin eigen kropp. "Solveig" opplevde å bli møtt annleis av samfunnet etter vektnedgangen. Ho opplevde respekt og å bli verdsett på ein anna måte enn før. Dette førte til ei identitetsendring - "kven er eg?" Det kunne vere vanskeleg å takle all merksemda, spesielt frå det andre kjønn. Plutseleg var ho blitt ei attraktiv dame. Heile familien vert berørt av endringa og mange får samlivsproblem. "Solveig" meiner det er nødvendig å ta med partnar i behandlinga for å skape forståing for den prosessen den opererte går gjennom.

Langvarig behov for hjelp og oppfølging
Alle vonde kjensler ein hadde før operasjonen, sjølvforakten ein hadde, dei store omveltingane i livet forsvinn ikkje med vektnedgongen. "Solveig" er klar på at det er nødvendig med god oppfølging. God informasjon i heile behandlingsforlaupet; om operasjon, mat og etevanar, kropp og rørsle. Å få hjelp til å takle dei store utfordringane som kjem etter operasjonen er nødvendig. Sjølvhjelpsgrupper eller individuell oppfølging etter behov og å ha eit nettverk av hjelparar som kan kontaktast, er "Solveig" sitt ønske. Det å møte andre i same situasjon, ha nokon å snakke med, trene saman med er til god nytte. Ho sler også eit slag for individuell plan som eit godt verktøy til dei som ønskjer det.

"Solveig" avsluttar sitt gripande innlegg med eit flott bilete av familien sin og med orda: "Takk for livet jeg fikk i gave på nytt."

Livsstilsendring (om å endre livsstil)
Alvhild er litt redd for å stå fram, men vil veldig gjerne fortelle si historie. Ho er veldig glad for at så mange i helsevesenet vil jobbe for ho og andre i same situasjon. Alvhild fortel om rein lukke når ho kom til Ebeltoft. Der låg alt til rette for å lukkast. Gode treningsforhold, god kunnskap og kompetanse hos dei som jobba der og ikkje minst; dei blei møtte med respekt. Mange overvektige opplever å bli stigmatiserte; er du overvektig er du også dum. Men, som Alvhild seier "eg er tjukk, men ikkje tjukk i hovudet."

Gruppa som kom til Ebeltoft blei samansveisa dei 16 vekene opphaldet varte og dei fann god støtte i kvarandre. Med Alvhild gjekk det svært godt. Ho gjekk ned mange kilo, trena og hadde ein sunn livsstil. Det var lett å lukkast når alt låg så godt til rette. Utfordringane kom når ho kom heim til dagleglivet. Då var det mange oppgåver som venta og familien måtte involverast. Alvhild fortalde om mannen som overtok det som var hennas oppgåver på veg mot ein sunn livsstil. Han gjekk tur med hunden og når Alvhild kom med hundebandet, så ville slett ikkje hunden gå på tur. Mannen til Alvhild gjekk ned mange kilo... Alvhild fortel dette på ein humoristisk måte, men seier at det slett ikkje er så morsomt.

Etter nokre veker heime, var det eit nytt 16 vekers opphald, denne gongen på Hauglandssenteret. For Alvhild blei ikkje opphaldet på Hauglandssenteret like bra som på Ebeltoft. Dette var den andre overvektsgruppa på senteret og opplegget var ein del av eit pilotprosjekt i Helse Vest.

Manglande oppfølging
Alvhild og dei andre i hennar gruppe, vart lova oppfølging etter avslutta behandling. Men, dette blei det ikkje noko av. Dei blei overlatt til seg sjølve. Det har ført til at mange har hatt ein vektauke igjen. Alle unnateke ein har fått tilbake same overvekta. Alvhild meiner det er heilt nødvendig med lang oppfølging i etterkant av behandlinga, gjerne livslang. Ho ønskjer støtte- og samtalegruppe og sjølvhjelpsgruppe der dei t.d. kan trene i lag. For mange overvektige personar er det vanskeleg og umogleg å trene saman med normalvektige. Dei treng eit eige tilpassa opplegg.

Alvhild har no tatt eit initiativ i sin heimkommune. Ho vil starte ei sjølvhjelpsgruppe. Ein lokal aerobicinstruktør vil lage eit eige treningsopplegg for overvektige personar og folkehelsekoordinator i kommunen vil finne eigna lokale. LMS vil vere med å få i gang gruppa og bidra med fagkompetanse i forhold til ulike tema gruppa ønskjer fokus på. Alvhild har bestemt seg; no skal ho klare det og for å lukkast må ho bidra sjølv.

Tilbod til sjukleg overvektige under utvikling
Vidare denne nettverksdagen orienterte Villy Våge, Helse Førde, om kirurgisk behandling og Eirik Fismen, Hauglandssenteret, om livsstilsbehandling. Det blei lagt opp til ei drøfting om vegen vidare og LMS si rolle i førebyggings- og rehabiliteringsarbeidet. Regionalt behandlingssenter for sjukleg overvekt, Helse Førde, der Anne-Lene Norman er prosjektleiar, vil bruke tilbakemeldingane i det vidare arbeidet. Målsettinga er å få eit felles opplegg i Helse Vest.

Info

Kirstin Bruland 02.04.2007

Desentraliserer vaksine av allergikarar

Thu, 10 Jun 2010 09:41:39

Helse Førde har starta med vaksinering av allergikarar ved Nordfjord sjukehus. Målet over tid er å få på plass same tilbodet i Sogn, opplyser overlege Einar Solheim.

Helse Førde har starta med vaksinering av allergikarar ved Nordfjord sjukehus. Målet over tid er å få på plass same tilbodet i Sogn, opplyser overlege Einar Solheim.

- I februar sette vi i gang samarbeid med medisinsk poliklinikk ved Nordfjord sjukehus. Ein lege og to sjukepleiarar tek over pasientar frå Nordfjordområdet, etter at dei har fått innleiande behandling i Førde, seier Einar Solheim, som er overlege ved Øyre-, nase-, halsavdelinga i Helse Førde.

Avdelinga ved Førde sentralsjukehus er mellom dei avdelingane i landet som har breiast erfaring når det gjeld vaksine for allergikarar.

- Dette er ei behandling som krev kompetanse og erfaring og difor har vi så langt berre kunne gje dette tilbodet i Førde. Aukande tilgang på pasientar har ført til kapasitetsproblem ved ØNH-poliklinikk i Førde. Difor er eg svært glad for at vi har bygd opp kompetanse ved Nordfjord sjukehus. For pasientane betyr det mindre fråvær frå arbeidet og kortare tid til reising, seier Solheim.

Svært god effekt
Behandlinga er nemleg tidkrevjande for pasienten. Programmet strekker seg over fleire år, og dei første sju vekene må allergikaren ha sprøyte ein gong i veka, og deretter kvar andre månad. Vinsten er ein svært god effekt.

Målet på sikt er å få på plass det same tilbodet i Sogn. Det kan skje ved kompetanseoppbygging på sjukehuset i Lærdal, eller ved at ein interessert kommunelege tek seg av det.

Info

Vidar Vie 02.04.2007

Spreier kunnskap om allergivaksine

Thu, 10 Jun 2010 09:46:20

Mange allergikarar får hjelp av vaksiner. Truleg kunne endå fleire vore hjelpne.

Den 25. april skal difor overlege Einar Solheim ved Øyre- nase- hals avdelinga til Førde informere kommunelegane om vaksinasjonprogrammet.

- Målet er å gjere kommunelegane merksame på at det er høve til å vaksinere mot allergi. Mange veit ikkje om tilbodet, og at det er eit godt tilbod til dei som ikkje er hjelpte av vanlege tiltak mot allergi. Dermed er det ein del allergikarar som kunne fått betre hjelp, avhengige av at dei blir tilviste i god tid., seier Solheim.

Det er for seint å starte med vaksinasjon før denne pollensesongen. Vaksinasjonsprogrammet strekker seg over tre år. Pollenallergi, dyrehårsallergi og allergi mot midd er dei tre vanlegaste allergiane som vaksinen virkar mot. Vaksinasjon mot stikk frå bier og kveps går over fem år. Dei første sju vekene er det sprøyter kvar veke, og deretter kvar andre månad.

Info

Vidar Vie 29.03.2007

Langsiktig strategi skal på høyring

Thu, 10 Jun 2010 09:53:35

Forslaget til strategi for helseføretaka i vest fram mot 2020 skal no på høyring, både i eigne føretak og i eksterne grupper som har vore involverte i planarbeidet. Det vedtok styret i Helse Vest i dag.

Helseføretaka og andre som har vore involverte i arbeidet skal gi sine tilbakemeldingar i slutten av juni.

- Vi har hatt ein open og involverande prosess der målet er å etablere ein felles visjon, eit felles verdigrunnlag og felles overordna mål for utviklinga av spesialisthelsetenesta i heile regionen. Forslaget blir no sendt ut på høyring, både internt og eksternt. Vi ønskjer eit stort engasjement blant medarbeidarane våre, blant brukarane av helsetenestene og andre eksterne interessentar, seier styreleiar i Helse Vest, Oddvard Nilsen.

Helse2020 er eit strategiarbeid der Helse Vest viser kva for utfordringar, krav, forventningar og moglegheiter vi står overfor fram mot 2020. Gjennom fagleg solid kunnskap, involverande prosessar og aktiv deltaking har prosjektet klargjort ulike utfordringar og gitt tydelege tilrådingar for korleis ein best møter utfordringane i spesialisthelsetenesta på Vestlandet dei neste åra.

- Dei dyktige fagmiljøa i føretaksgruppa har bidrege aktivt gjennom arbeid i ulike faggrupper, og i ulike samlingar i regionen. Planarbeidet er gjennomført på tvers av tradisjonelle faggrenser, og med aktiv deltaking både frå tillitsvalde og brukarrepresentantar. På den måten har vi utfordra tradisjonelle tenkemåtar og prøvd å gjere oss i stand til å møte dei framtidige drivkreftene og utviklingstrekka på ein heilskapleg måte, understrekar Nilsen.

Styret i Helse Vest skal vedta det endelege planverket i styremøte 5. september 2007.

Info

Vidar Vie 11.04.2007

Svært gode resultat i mars

Thu, 10 Jun 2010 09:58:38

Helse Førde oppnådde fleire DRG-poeng i mars enn nokon månad tidlegare. Samstundes var talet på heildøgnsopphald svært høgt.

Helse Førde skal oppnå 22 000 DRG-poeng i løpet av 2007. Dei ulike behandlingane, konsultasjonane og operasjonane gir ulik mengde DRG-poeng, og for kvart DRG-poeng får helseføretaket ein sum pengar.

I mars månad oppnådde Helse Førde om lag 2050 DRG-poeng. Det er om lag 50 poeng over mars i fjor, som også var ein svært god månad. Så langt føretaket har oversikt, så er det ikkje oppnådd så høge tal i nokon månad tidlegare. Resultatet i januar og februar var ein del lågare, og etter tre månader ligg Helse Førde no 250 poeng bak tilsvarande tal i 2006.

Det er ikkje råd å seie om resultatet for mars er ein varig trend. Ei av årsakene kan vere at det vart gjennomført mange operasjonar med høg DRG-vekting i denne månaden.

Mange sjukehusopphald
I januar hadde Helse Førde relativt sett få sjukehusopphald. Den trenden ser ut til å vere snudd. I februar og mars var talet på sjukehusopphald identisk med fjorårstala. Mars var elles den fjorårsmånaden med flest sjukehusopphald.

Dei mange DRG-poenga og sjukehusopphalda må også sjåast i samanheng med at det har vore reduksjonar i overtidstimar og månadsverk, og også i talet på senger. Oppsummert viser dette at drifta har blitt meir effektiv, og at det vert lagt ned ein stor innsats frå dei tilsette.

Bak budsjett

Trass i den høge aktiviteten, så ligg helseføretaket framleis bak budsjettet for 2007. Årsaka er den svært store omstillingsutfordringa som Helse Førde har. Det er eit krav frå Storting og eigar at alle helseføretak skal gå i balanse i løpet av dette året, medan det tidlegare har vore gjeve løyve til å gå med ein viss sum i underskot.

Styre og administrasjon har gjennom budsjettbehandlinga peika på risikoen for at målet ikkje vert nådd dette året, og dei førebelse prognosane viser også at det kan gå mot eit større underskot i 2007.

Info

Redaktør Web 13.04.2007

Fjerndiagnostikk i Helse Førde

Thu, 10 Jun 2010 10:26:36

Jaanus Kaljusto er tilsett som radiolog i Helse Førde. Kontoret hans finn du på Bygdøy Allé i Oslo. Der har han eige kontor med ei 100 Mbits datalinje. Han jobbar primært for radiologisk avdeling på Eid, men også for avdelinga i Førde.

- Dette er ein god måte å løyse mangelen på radiologar i Helse Førde. Alternativet er dyre vikarstafettar, seier Hilde Marit Rangsæter, seksjonsleiar ved radiologisk avdeling, seksjon Førde.

Kaljusto som kjem frå Estland arbeidde tidlegare som radiolog i Sverige. Han er svensk og norsk radiologspesialist. Han har også tidlegare arbeidd i Helse Førde, men flytta til Oslo for å jobbe i eit privat firma. I dag er han igjen tilsett hos Helse Førde.

- Han har busett seg, og har familie, i Oslo. Helse Førde nytta likevel høve til å tilsetje han, og såg moglegheitene sjølv om blir buande i Oslo, seier Rangsæter.

- Med dagens teknikk, ei kraftig datalinje og med telefon held han kontakt med sjukehusa i Eid og Førde, og kan på denne måten arbeide som normalt, seier Hilde Marit Rangsæter.

Legane her i fylket og "avdelinga" på Bygdøy ser dei same bileta på skjermane sine og kan fagleg sett gjere førsteklasses vurderingar av bileta. Dei kan då samarbeide om å beskrive bileta. Det er heilt avgjerande at datalinjene er kraftige nok til å kunne gjere dette.

Rangsæter fortel at USA nyttar ein del tenester frå India og det same blir gjort fleire stader i Europa.

- Å nytte private tilbod kan vere problematisk i høve til kven som "eig" svaret av analysen av bileta. Når Jaanus no er tilsett i Helse Førde så blir ikkje ei problemstilling, understrekar Rangsæter.

- Dyktige medarbeidarar i Helse Førde

Jaanus Kaljusto er glad for å vere tilbake i Helse Førde. Samarbeidet han no har med kollegaer i Eid og Førde er ein god måte å jobbe på, meiner han.

- Dette er ein effektiv måte å jobbe på. Eg sit på mitt kontor her i Oslo, i fred og ro, og kan studere bilete frå MR'en på Eid eller bilete frå Førde, seier Kaljusto.

Han er godt nøgd med at han no kan konsentrere seg om å studere bilete og sleppe mykje av papirarbeidet han elles ville hatt ved å jobbe på ei avdeling. Han meiner også at det å vere åleine på kontoret gjer han meir effektiv i arbeidet han skal utføre.

Kaljusto føler seg ikkje einsam på Bygdøy Allé.

- Eg har telefonlinje internt i Helse Førde-systemet (IP-telefon) og kan diskutere med radiologane på Eid og Førde. Eg kjenner også mine kollegaer godt frå tida mi i Førde. Når nokon ringjer kjenner eg stemmene deira, seier han.

Allereie då eg kom til Førde i 1996 fekk eg eit godt inntrykk av radiologane. Dei har eit høgt fagleg nivå på det arbeidet dei utfører.

Info

Finn Ove Njøsen 16.04.2007

Ønskjer polske legar til Helse Førde

Thu, 10 Jun 2010 10:35:38

Fagdirektør Hans Johan Breidablik har vore i Polen. Der har han i samarbeid med Helse Vest sett på om det kan vere mogleg å få polske legespesialistar til Helse Førde. I første omgang har Helse Førde meldt interesse for legar i sju ulike spesialistområde.

– Mange norske verksemder
har gjestearbeidarar frå Polen.
Dette er også aktuelt for Helse Førde. Polen har mange legar og det er difor naturleg at vi vender oss dit for å prøve å rekruttere, seier Breidablik.

Hans Johan Breidablik, fagdirektør og personaldirektør i
Helse Vest Odd Søreide og Hilde Christiansen, var denne veka i Warszawa for å få orientering om utdanningssystemet for legar og spesialistutdanninga i Polen. Dei besøkte også eit firma som driv med rekruttering av spesialistar. Dette firmaet har rekruttert fleire hundre legar og andre faggrupper som til dømes tannlegar til mellom anna England og Danmark.

Breidablik understrekar at dei har ein streng prosess for å velje ut og vurdere kandidatane. Når dei aktuelle personane er vald ut og får kontrakt med arbeidsgjevar startar kandidatane ei intensiv språkopplæring i Polen. Hovudvekta i denne opplæringa er fagspråk. Breidablik påpeikar at språkkurset er ekstremt krevjande.

Førebels er det berre Helse Førde innan Helse Vest sitt føretaksområde som har vurdert å rekruttere polske spesialistar. Helse Vest vil vurdere å inngå rammeavtale med eit rekrutteringsfirma i nær framtid. Blir dette gjennomført vil det vere opp til Helse Førde å inngå kontraktar med dei aktuelle legespesialistane før eventuell språkopplæring med meir vert starta i Polen.

– Dersom det blir aktuelt å hente polske legar, vil kandidatane etter planen kunne vere klare til teneste for Helse Førde våren 2008, seier Breidablik.

Dei fagområda Helse Førde i denne omgang ønskjer legar til er hematologi, infeksjonsmedisin, revmatologi, hudsjukdommar, nevrologi, geriatri og onkologi. Dette er legar som det er vanskeleg å få tak i Noreg, seier fagdirektøren.

– Polen har mange legar og institusjonar. Dei har ikkje ventetid i det heile på sjukehusa. Det vil difor ikkje vere ei utarming av polsk helsevesen med å rekruttere legar derfrå, understrekar fagdirektør i Helse Førde, Hans Johan Breidablik.

Info

Finn Ove Njøsen 18.04.2007

Kjøper drosjetenester for 45 millionar

Thu, 10 Jun 2010 10:56:36

Helse Førde kjøper årleg drosjetenester for over 45 millionar kroner. Målet til helseføretaket er at all pasienttransport skal vere elektronisk rekvirert og styrt i løpet av 2008.

Helse Førde kjøper årleg drosjetenester for over 45 millionar kroner. Målet til helseføretaket er at all pasienttransport skal vere elektronisk rekvirert og styrt i løpet av 2008.

13. april møtte Helse Førde Norges Taxiforbund avdeling Sogn og Fjordane sine medlemer på eit felles møte på Skei Hotell vedkomande pasienttransporttilbodet i Sogn og Fjordane. Direktør Terje Olav Øen hadde ein gjennomgang av Helse Førde sin økonomiske utfordringar og korleis pasienttransporten må samordnast i større grad for å oppnå kravet til innsparing innan denne sektoren.

- Helse Førde har arbeidd med å skape nøkterne haldningar hjå rekvirentar i Helse Førde når det gjeld val av transportmiddel og arbeider også overfor rekvirentane i kommunane om det same. Vidare har vi tankar om eit kursopplegg for sjåførar som utfører pasienttransport, for å skape betre kvalitet for brukarane. Det vil vi truleg samarbeide med samferdsleseksjonen i fylkeskommunen om, seier Øen.

Største drosjekunden

På møtet gjekk Helse Førde gjennom krava til transportørane og kravde full lojalitet til dei reglar som helseføretak har for pasienttransport. Truleg er helseføretaket den største kunden med kjøp av drosjetenester for vel 45 millionar årleg. Desse kostnadene konkurrerar med økonomirammene til drift av behandlingstiltak i sjukehusa.

Kirstin Vik orienterte også om kva krav Helse Vest stiller til oppgjer for pasienttransport og at det er naudsynt med god dokumentasjon. Ambulanseinspektør Inge Horstad hadde gjennomgang av nytt nasjonalt elektronisk rekvireringsystem for pasienttransport og Geir Tøfte frå TTS orienterte om taksameterløysingar som kan nyttast i høve til dette.

- Målet til helseføretaket er at all pasienttransport skal vere elektronisk rekvirert og styrt i løpet av 2008. Det inneber at mellom anna fastlegar vil rekvirere transport elektronisk, og at køyrekontoret i Helse Førde koordinerer tenesta. Pasientar skal no tinge ekstraskyss direkte hjå køyrekontoret og ikkje via lokal drosjestasjon, seier Terje Olav Øen.

Info

Finn Ove Njøsen 20.04.2007

Helse Førde får luftsmitteisolat

Thu, 10 Jun 2010 11:03:27

Det første luftsmitteisolatet i Helse Førde skal på plass i løpet av året. – Det vil gje tryggare forhold for personale, pårørande og medpasientar, seier hygienesjukepleiar Maren Erland.

Isolatet kjem hovudsakleg til å bli nytta for tuberkulosepasientar. Rommet skal vere lufttett, og eit ventilasjonsanlegg gjer at det heile tida er undertrykk der. På vegen inn skal personale og pårørande gjennom ei sluse som også har undertrykk. Dermed kjem ikkje smittestoff ut i resten av sjukehuset.

- Den helsemessige vinsten er først og fremst tryggare forhold for personalet som skal behandle pasientane. Betre ventilasjon gjer at konsentrasjonen av smittestoff vert lågare, og dermed blir også situasjonen betre for dei pårørande. Isolatet gjer også at det ikkje er nokon risiko for at smitte kjem ut der dei andre pasientane oppheld seg, seier hygienesjukepleiar Maren Erland.

Skal nyttast av fleire

Luftsmitteisolatet vert lagt til Medisinsk avdeling ved Førde sentralsjukehus, men skal også nyttast av andre avdelingar.

- Det skal vere mogeleg å gjere til dømes dialyse- og intensivbehandling der. Ved andre avdelingar vil vi prioritere kontaktsmitteisolat, som ikkje har dei same restriksjonane til ventilering som eit luftsmitteisolat, seier Erland.

Byggestart til hausten
Prosjektleiar Anders Bergset seier dei reknar med byggestart til hausten, og at byggetida vert om lag tre månader.

- Vi har lyst det ut på anbod, og fristen for å levere inn tilbod er 30. mai. Sjølve ventilasjonsanlegget er truleg største kostnaden, men også krava til at rommet skal vere heilt tett vil vere vesentleg økonomisk, seier han.

Eit filter skal hindre at smittestoff går ut av sjukehuset, og utblåsinga skal i tillegg ligge eit godt stykke unna inntaket til ventilasjonsanlegget til sjukehuset.

Info

Redaktør Web 23.04.2007

Fødselsdepresjon og barn sitt temperament

Thu, 10 Jun 2010 11:09:37

Fødselsdepresjon hos mor kan føre til trass, sinne og språkvanskar hos toåringar. Eit forskingsprosjekt skal vise om borna har dei same problema i seinare alder også.

Fødselsdepresjon hos mor kan føre til trass, sinne og språkvanskar hos toåringar. Eit forskingsprosjekt skal vise om borna har dei same problema i seinare alder også.

- Målet vårt er å undersøkje korleis fødselsdepresjon hos mor kan påverke barnet si utvikling, seier psykologspesialist Arnold Goksøyr ved Sogndal BUP.

Forsking i dei siste 20 åra viser at ein del av desse borna får dårlegare språkutvikling og vanskar med trass og sinne i 2 års alderen. I 4–5 års alderen kan desse borna ofte ha lærevanskar, dårlegare utvikla språk og ADHD liknande symptom.

- Vi vil undersøkje om det er slik når borna er blitt 8 – 12 år gamle også, seier Goksøyr, som er hovudansvarleg for forskingsprosjektet. Professor Mikael Heimann ved Regionsenter for barn- og unges psykiske helse (RBUP) ved Universitetet i Bergen er rettleiar, og psykolog Pål Iversen ved Indre Sogn Psykiatrisenter er prosjektmedarbeidar.

- Bør prioritere fødselsdepresjonar

Fødselsdepresjon råkar 8 – 15% av kvinnene etter ein fødsel og er dermed nokså vanleg. I tillegg til å vere plagsamt for kvinna, ser det ut til å vere ein viktig risikofaktor for lærevanskar og åtferdsvanskar/ADHD hos barnet.

- Vi treng meir forsking på dette området, men alt no er det mykje som tyder på at ein bør prioritere å behandle fødselsdepresjonar, både for kvinna sin eigen del og ikkje minst for å førebygge uheldig utvikling hos barnet, seier Goksøyr, som håpar på å få resultata av forskingsprosjektet klare til publisering seint på hausten 2007.

Spørjeskjema til 1740 born

- Vi har sendt ut spørjeskjema til foreldra til 1740 born i Sogn. Vi spør om både mor og far si psykiske helse etter barnet sin fødsel og detaljert om barnet sin veremåte i dag med omsyn til aktivitet, konsentrasjon, tolmod, trass og sinne – kort sagt om barnet sitt temperament eller personlegdomstrekk.

Gjennom samarbeid med ei rekke skular i området har dei sendt ut spørjeskjema på ein måte som sikrar foreldra sin anonymitet.

- Alle skulane vi kontakta sa ja til å delta, og har gjort ein kjempeinnsats. I slike undersøkingar får ein sjeldan tilbake meir enn 1/3 av det ein sender ut, men vi har til no ein svarprosent på nesten 40% og det tykkjer vi er brukbart, seier Goksøy, som no arbeider med statistiske analyser.

God kompetanse i Helse Førde

Fødselsdepresjon er som ein vanleg depresjon, men det startar vanlegvis i løpet av dei første månadane etter fødselen. Symptoma er dei same som ved andre depresjonar: kraftløyse, manglande overskot, ein er trist og nedtrykt, kan ha søvnproblem og endra appetitt.

- For kvinner med fødselsdepresjon er det mest naturleg å vende seg først til helsestasjonen der ein bur, men ein kan også kontakte BUP for å få hjelp. Alle dei tre barne- og ungdomspsykiatriske poliklinikkane i Helse Førde har god kompetanse på dette området, seier Arnold Goksøyr.

Info

Vidar Vie 25.04.2007

Ortopediplan skal setjast i verk frå 1. juni

Wed, 29 Sep 2010 14:01:10

Styret i Helse Førde vedtok i dag at ”Plan for ortopediske tenester i Helse Førde” skal leggast til grunn for vidare drift og organisering av fagområdet ortopedi i Helse Førde HF.

Ortopediplanen vil føre til ei meir effektiv økonomisk drift av Ortopedisk avdeling. Med iverksetting av planen i 2007 vil dette betre resultatet for avdelinga med om lag 3,4 mill. kr. Planen skal setjast i verk frå 1. juni 2007, heiter det i vedtaket frå styret, som også peikar på at den ortopediske rehabiliteringa må takast i vare av gruppa som arbeider med rehabiliteringsplan for føretaket.

Målet som låg til grunn for arbeidet med planen var at ortopedien skal:

Ha høg fagleg kvalitet
Dekke behovet for ortopediske tenester i HF.
Ha robuste fagmiljø
Vere ein attraktiv utdanningsstad

Hovudpunkta i planen er som følgjande:

Alle legane i ortopedisk avdeling skal inngå i ein felles tenesteplan. Det er i dag 11 overlegestillingar innan ortopedi i Helse Førde. Skal vi få til samhandling og arbeide på tvers av seksjonane, må overlegestillingar i ortopedisk avdeling fordelast slik: 6 overlegeheimlar ved FSS, 3 ved NSH og 3 ved LSH. Dette gir ei auke på 1 overlegestilling i Helse Førde
Styrke fagmiljøet på Førde sentralsjukehus (FSS) samtidig som ein held vedlike kvalitativt gode fagmiljø ved Lærdal sjukehus (LSH) og Nordfjord sjukehus (NSH).
Styrke og få eit tettare samarbeid mellom FSS og lokalsjukehusa og nytte den samla ortopedikompetansen i Helse Førde på ein mest mogeleg fleksibel måte.
Den operative verksemda ved LSH og NSH skal hovudsakeleg vere retta inn mot elektiv ortopedi
Gruppa meiner at det bør vere 4 legar i spesialisering (LIS) ved ortopedisk avdeling. Desse skal utdannast på tvers av seksjonane slik at dei får breiast mulig utdanning.
NSH og LSH er lokalsjukehus med tilpassa akuttfunksjonar og skal kunne behandle basal traumatologi, såkalla ”kvardagstraume”. Dei skal ha operativ beredskap på dag/ettermiddag 08.00 – 18.00.
Som akuttsjukehus skal FSS ha kontinuerleg operasjonsberedskap i vakt. Dette gjeld anestesipersonell, operasjonspersonell og intensivpersonell. Større skadar skal sendast til FSS og dei mest alvorlege skadane skal direkte til Haukeland Universitetssjukehus (HUS) som ein forventar vert traumesenter i Helse Vest
Ortopedi skal utøvast av spesialistar i faget og verksemda i Florø knytt til ortopediske prosedyrar vert overført til ortopedisk avdeling
Sengekapasiteten vert teken ned. Framlegget er ein reduksjon av sengetalet for ortopedi frå 56 til 42 senger (minus 14 senger).
Det vert halde fram med integrert opptrening/enkel rehabilitering med 6 senger for NSH og 10 senger ved LSH. Pasientar frå FSS som treng opptrening skal få tilbod ved LSH og NSH.
Både i styringsdokument og i vedtak i styret i Helse Førde vert det lagt vekt på å auka dagkirurgisk verksemd. Rapporten peikar på at det snarast bør planleggast/ leggast til rette for meir dagbehandling ved FSS.
Helse Førde bør (må) arbeide vidare med å planlegge akuttmedisinske team ved både NSH, FSS og LSH.

Spesialisthelseteneste innan geriatri og alderspsykiatri

Thu, 10 Jun 2010 11:38:48

Som ledd i arbeidet med å få på plass spesialisthelseteneste innan geriatri / alderspsykiatri i Helse Førde, var medlemar frå ei arbeidsgruppe på hospitering i Bergen sist veke.

Arbeidsgruppa besøkte geriatrisk seksjon ved Diakonissehjemmets sykehus på Haraldsplass og Olaviken alderspsykiatriske sykehus.

- Arbeidsgruppa fekk god informasjon om kva rolle dei ulike poliklinikkane og sengepostane har og på kva faggrupper som hovudsakleg jobbar med dei ulike problemstillingane. Pasientar med kognitiv svikt, både med og utan psykiatriske problemstillingar, er ei sentral gruppe det vert gjeve tilbod til både poliklinisk, ambulant og i sengepost, seier leiar for arbeidsgruppa i Helse Førde, Hildur Thingnes.

Arbeidsgruppa skal levere ein rapport til klinikkdirektøren ved medisinsk klinikk innan utgangen av mai.

Medlemar av gruppa er:
Fagdirektør Hans Johan Breidablik
Psykiater Ragnar Børsheim
Nevropsykolog Are Mikal Lillebø
Avdelingssjef/nevrolog Stig Hegrestad
Seksjonsleiar/lungelege Finn Johan Halvorsen
Oversjukepleiar og leiar for arbeidsgruppa Hildur Thingnes

Info

Redaktør Web 30.04.2007

Helse Førde sitt styrevedtak – økonomirapportering

Thu, 10 Jun 2010 11:42:06

I Helse Førde sitt styremøte fredag 27. april sa styret seg positiv til god kostnadskontroll og god drift fram til no i 2007.

Føretaksstyret i Helse Førde vil på komande styremøte vurdere om dei tiltake som er sett i verk er tilstrekkjelege. Dersom tiltaka ikkje er nok, vil styret på setje inn ytterlegare tiltak.

Her er Helse Førde sitt styrevedtak fredag 27. april:

Styret ser positivt på god kostnadskontroll og god drift fram til no i 2007.

På neste styremøte føreset styret at innsparingseffekten på 3,4 mill. kr., som fylgje av plan for ortopediske tenester i Helse Førde, er innarbeidd i årsprognosen.
Styret føreset at det på neste styremøte vert lagt fram førebels plan for oppstart av pasienthotell, med tilhøyrande omstillingar og økonomiske effektar for 2007 og 2008.
Styret vil på neste styremøte vurdere om dei tiltaka som er sett i verk til no er tilstrekkelige, eller om det må setjast i verk ytterlegare tiltak.

Info

Finn Ove Njøsen 30.04.2007

Greier ut pasienthotell ved Førde sentralsjukehus

Thu, 10 Jun 2010 11:47:23

Helse Førde skal utgreie pasienthotell ved Førde sentralsjukehus. Det aktuelle arealet ligg i 7. etasje.

Pasienthotell tilbyr pasientar som er innskrivne på ulike avdelingar opphald på hotellet som alternativ til i dag, då dei ligg inne på sjølve avdelinga. Dette kan vere:

pasientar som er oppegåande og er sjølvhjelpne i stor grad, eller har med pårørande som kan stå for dette (t.d. barn med foreldre)

pasientar som er innskrivne under ulike avdelingar.

Pasienthotellet kjem ikkje til å ha reservert tal senger for einskildavdelingar. Pasientane vil framleis være den aktuelle avdelinga sitt ansvar, også under opphaldet på pasienthotellet. Dei er sikra tilgang på fagleg hjelp ved uføresette hendingar/komplikasjonar, også under opphaldet på pasienthotellet.

Eksempel på pasientar som nytte hotellet er:

pasientar som er inne for å utføre ulike typar undersøkingar og preoperative vurderingar
pasientar som ventar på behandling
pasientar som er i ei avsluttande behandling, men som krev nærleik til sjukehuset sine ressursar dersom det skulle oppstå komplikasjonar
pasientar der diagnostikk og behandling vil vare i fleire dagar, men der det ikkje er nødvendig med pleie i ein vanleg sengepost og der det ikkje er hensiktsmessig eller trygt å reise heim om natta

Skal sette ned prosjektgruppe

Utgreiingsarbeidet vert sett i gang snarast, og det er eit mål at pasienthotellet skal vere ein realitet til hausten 2007. Arealet som er tenkt nytta ligg i 7. etasje, og er i dag brukt av sengepostane for avdeling for medisinsk rehabilitering (AFMR) og revmatologisk avdeling. Desse sengepostane får dermed areal andre stader i Førde sentralsjukehus. Fellesposten ØNH/auge/kjevekirurgi sengepost vert endra slik at pasientar innlagde i denne posten stort sett vil nytte pasienthotellet.

Prosjektet er førebels på eit tidleg stadium, og det er difor for tidleg å seie noko eintydig om alle konsekvensar for dei ulike avdelingane ved sjukehuset. Det vert sett ned ei prosjektgruppe som får i oppdrag å planlegge og gjennomføre endringa. Dei avdelingane dette får konsekvensar for skal delta i denne gruppa. Ein viktig del av arbeidet blir å få på plass ein god logistikk og godt internt samarbeid. Hovudmålet med å få på plass pasienthotellet er optimalisering av dei totale ressursane til Helse Førde.

Styret i Helse Førde vart i dag orientert om arbeidet med pasienthotellet.

Info

Redaktør Web 02.05.2007

Helse Førde etterlyser snorkarar

Thu, 10 Jun 2010 11:53:05

Helse Førde si avdeling for øyre, nase og hals (ØNH) ved Førde Sentralsjukehus
er i stand til å gje fleire
med snorkeproblem hjelp. Avdelinga har høg kompetanse og er godt utstyrt til å ta imot pasientane i fylket.
Helse Førde har kvart år hatt betydelege utgifter ved at mange snorkepasientar frå fylket er blitt sendt til Voss. Søvnklinikken på Voss er no lagt ned.

– Vi har no overtatt ein del av desse 60–70 pasientar som var tilvist til Voss frå vårt fylke, og er klar til å ta imot fleire, seier overlege John Arthur Kvamme ved ØNH-avdelinga ved Førde sentralsjukehus.

Berre tre vekers ventetid
Snorkarar som ønskjer å bli kvitt problemet sitt må først gå til fastlegen sin for å få tilvising. Pasienten vil då bli satt opp direkte til søvnregistrering utan å måtte vente på time ved ØNH poliklinikk.

– Helse Førde har det apparatet og kvaliteten på behandlinga som skal til for at pasientane får ei optimal behandling her i fylket. Dette er også viktig for økonomien til Helse Førde, understrekar Kvamme.

Kvamme opplever også at pasientar frå andre fylke no vender seg til Førde sentralsjukehus for å få undersøking og behandling. Dette skjer fordi dei veit at Helse Førde har korte ventetider og kvaliteten på behandlinga er på topp.

Enkel utgreiing ”over natta”
Ved Førde sentralsjukehus kan ein bli utgreidd ”over natta”. Pasienten kjem til sjukehuset om lag klokka 18.00 om ettermiddagen og blir tatt imot av vakthavande lege. På føremiddagen om lag klokka 10.00 dagen etter, er undersøkinga ferdig. Pasienten får snakka med lege og det kan fastleggjast tidleg om vidare behandling er naudsynt. Det tek inntil tre nye veker før operasjon eller andre tiltak blir sett i verk. Dei som nyttar Førde sentralsjukehus kan då innan halvannan månad få den behandlinga dei treng.

Kontrollar og vidare oppfølging får ein også ved ØNH avdelinga ved Førde sentralsjukehus. Naudsynt utstyr som t.d. CPAP, får pasientane med seg med det same. Dersom ein vel sjukehus utanfor fylket, får ein tilsendt utstyret i posten, noko som vil forseinke behandlinga og vere meir krevjande for pasienten.

John Arthur Kvamme fortel at ein i tillegg har eit nært samarbeid med barne-, kirurgisk-, nevrologisk-, lunge– og anestesiavdeling der ØNH avdelinga gjer søvnregistrering/utredning/tilpassing av utstyr ved overvekt og eller nevrologiske lidingar.

I tillegg til John Arthur Kvamme er Ingvild Eikenes tilsett som sjukepleiar i 100 prosent stilling på søvnklinikken..

Info

Finn Ove Njøsen 02.05.2007

– Hadde leita opp Jellestad uansett kvar i verda

Wed, 29 Sep 2010 13:59:49

I april starta ortopediavdelinga i Helse Førde opp att med computernavigerte kneoperasjonar i Lærdal. Fem nye kneproteser sette Truls Jellestad på plass første veka. Inntil to kne for dagen kan Lærdal sjukehus no operere.

Annabeth Hagen frå Oslo var ein av dei første i operasjonssalen sist veke. Ho fekk nytt høgre kne sommaren 2006. I år var det venstre kne som måtte skiftast ut.

Hagen sitt høgre kne fungerer no heilt optimalt. Ho reknar med at ho no vil få eit heilt nytt liv med to kne som fungerer som nye, etter operasjonen sist veka i april.

– Eg kan ikkje få fullrose Lærdal sjukehus godt nok. Heile atmosfæren rundt operasjonen er heilt topp – frå eg kjem inn døra til eg kan reise att, seier Annabeth Hagen, som no har busett seg i Spania.

– Eg hadde leita verda rundt for å finne Truls Jellestad att, seier ho, og legg til at ho er glad for at han framleis er ved Lærdal sjukehus.

Computeren har eksakte opplysningar om 5.000 ulike kne lagt inn i databasen. Ortoped Truls Jellestad opnar kneet til pasienten og skannar det og les av verdiane for å finne det kneet som er mest mogleg likt det kneet han opererer.

I tillegg analyserast akser, vinklar og spenninga i kneets leddband. Etter at pasienten sitt kne er forma med presisjonssag vel ortopeden den rette storleiken på kneprotesen.

– Heile operasjonen blir ”tatt opp” av computeren og eg kan såleis bruke dette til dokumentasjon og opplæring ved eit seinare høve, seier Jellestad.

Truls Jellestad fortel at Annabeth Hagen allereie dagen etter er på beina og kan ta fatt på rehabiliteringssperioden.

– Teknisk sett kan vi operere begge knea til pasienten same dagen. Inngrepet blir større, men vi ville spare pasienten for ein ekstra operasjon med påfølgjande opptrening, seier Jellestad.

– Vi har til no ikkje gjort det på denne måten, men det vil nok bli aktuelt i framtida, fortel Truls Jellestad..

Operasjonssjukepleiarane Pim Kaldenback og Eva Næstrøm hjelper til under operasjonen, medan Jenny Bergquist er anestesisjukepleiar. Under operasjonen vi følgde var også turnuslege Jenny Smenes med for opplæring.

18 fødslar i Lærdal

Thu, 10 Jun 2010 12:03:01

Fødestova i Lærdal hadde 18 fødslar i april i år. Så mange fødslar har det ikkje vore der sidan januar 2005. Fødselstala i fylket ligg så langt i år over fjoråret.

Fødeavdelinga i Lærdal vart gjort om til forsterka fødestove i april 2004. Årsaka var dei låge fødselstala. I 2006 var det på det meste 12 fødslar i løpet av ein månad. Tala frå april i år er dermed svært gledelege.

Talet på fødslar ved sjukehusa i Sogn og Fjordane har gått ned gjennom mange år. Så langt i år har det vore 29 fleire fødslar i løpet av årets fire første månader enn i same periode i fjor.

Førde sentralsjukehus har hatt ein auke på 24 fødslar, Lærdal sjukehus har hatt ein auke på sju, og ved Nordfjord sjukehus har det vore ein nedgang på to.

Info

Redaktør Web 07.05.2007

Ny ordning skal få folk raskare tilbake i arbeid

Thu, 10 Jun 2010 12:05:19

Sjukemeldte skal raskare få tilbod om behandling eller reabilitering gjennom tilvising til spesialisthelsetenesta. Ordninga har fått namnet "Raskare tilbake".

Det er personar som går på sjukepengar eller som står i fare for sjukemelding på grunn av helsemessige årsaker, som no kan få eit tilbod om raskare spesialistbehandling.

Alle fastlegande får i desse dagar eit brev om at dei skal vurdere om sjukemelde pasientar kan komme raskare tilbake i jobb gjennom tilvising til spesialisthelsetenesta.

Stortinget har bevilga 604 millionar kroner til kjøp av helse- og rehabiliteringstenester for å få sjukemelde arbeidstakarar raskare tilbake i jobb. Tiltaket er eit ledd i oppfølginga av Sjukefråversutvalet sitt arbeid hausten 2006. Av dei 604 millionane, er 380 millionar øyremerka spesialisthelsetenesta.

Formålet er å få sjukemelde raskare tilbake i arbeid, og ordninga heiter "Raskare tilbake". Det er personar som går på sjukepengar eller som står i fare for sjukemelding på grunn av helsemessige årsaker, som no kan få eit tilbod om raskare spesialistbehandling.

Sosial- og helsedirektoratet og Arbeids- og velferdsdirektoratet har sendt ut brevet til fastlegane. Her blir fastlegane bedt om å finne og tilvise aktuelle pasientar til ordninga. Midlane som dei regionale helseføretaka disponerer skal nyttast til behandlings- og rehabiliteringstiltak for at pasientar som er tilviste skal kunne komme raskare tilbake i arbeid. Ordninga skal gjennomførast utan at det fører til ei nedprioritering av øvrige pasientar.

Tilvisingsadresse i Helse Førde er:

Helse Førde HF
"Raskere tilbake" -
tilvisingsmottak
6807 Førde

NAV har oppretta ein eigen nettstad der du finn meir informasjon:
http://www.nav.no/raskeretilbake

Du kan få meir informasjon om ordninga på Fritt Sjukehusval - tlf 800 41 004

Info

Redaktør Web 08.05.2007

Kort ventetid på røntgen i Helse Førde

Thu, 10 Jun 2010 12:14:01

Helse Førde sine ventetider på radiologiske tenester går nedover. Spesielt ved Nærsjukehuset i Florø er ventetidene korte.

Investeringar i nytt utstyr er ein av grunnane til dette.

– Ingen treng lenger å reise utanom fylket for å få radiologiske tenester. Investeringar i nytt utstyr i Helse Førde fører til at ventetidene i heile helseføretaket no går nedover. Mellom anna fører den nye MR-maskina på Eid til at Helse Førde no er i stand til å gje endå betre service til pasientane i fylket, fortel avdelingssjef Sveinung Bjørkedal ved radiologisk avdeling.

Oppstarten av MR på Eid har ført til at på Eid no er 2 vekers ventetid. Helse Førde hadde tidlegare ei maskin i Førde. Den nye utstyret på Eid fører til at ventetida også i Førde er på veg nedover.

CT-undersøking
I Florø må ein vente ei veke på CT-undersøking, men det er mogleg å kome til i løpet av 2–3 dagar, påpeikar Bjørkedal. På Eid er ein no nede i 2–3 veker for same undersøkinga.

Røntgen av nakke/rygg/skulder/hofter, nyrer/uringvegar og tjukktarm kan utførast innan ei veke i Florø. På same måte som for CT-undersøkingar kan pasientar i mange tilfelle kome til same dag eller i løpet av 2–3 dagar i Florø.

I Florø er ventetida på ultralyd berre to veker, men også her er det mogleg å kome til i løpet av ein dag eller to.

Helse Førde har høgt fagleg tilbod for alle typar røntgen. Sveinung Bjørkedal understrekar difor at han håper at pasientar, i alle høve frå Sogn og Fjordane, vil nytte seg av det lokale og gode tilbodet som helseføretaket gjev. Bjørkedal legg heller ikkje skjul på at det er viktig at innbyggjarane nyttar helseføretaket sine tenester på grunn av økonomiske vinningar.

Bruk oss
– Vi legg opp til ein kapasitet her i fylket basert på vårt folketal. Kostnadene ved å måtte betale for våre pasientar utanfor fylket er dårleg økonomi for Helse Førde. Når vi kan gje same fagleg gode tilbod som andre, samt at Helse Førde kan gje dei aller fleste tenestene til pasientane etter røntgenundersøking, så nytt oss, oppmodar avdelingssjef Sveinung Bjørkedal ved radiologisk avdeling i Helse Førde.

– Målsettinga er å få undersøkt folk så fort som mogleg, slik at ein raskt kan få tilstanden avklara, og eventuell behandling raskt kan setjast i gang. Til beste for pasientane, avsluttar Bjørkedal.

Info

Finn Ove Njøsen 08.05.2007

Helse Førde - stafetten 2007

Thu, 10 Jun 2010 12:44:35

Torsdag 7. juni kl 18.00 går startskotet for Helse Førde-stafetten. I år inviterer vi også bedrifter utanfrå til å delta.

Invitasjon er også sendt i vanleg post til
i Førde/omegn. Vi har nok ikkje sendt til
alle, men alle er like velkomne til å vere med!

Det blir utlevering av startnummer frå kl 17.00, oppvarming v/Unn Hege kl 17.15, og stafettstart kl 18.00.
Premiar til vinnarlaget og tilfeldig uttrekte lag.
Vi skal ha grillmat til alle deltakarar i målområdet.

Løypa er tilsaman 10 km, fordelt på 6 etappar (frå 1000 m til 3200 m) med jogging, stavgang, offroad-sykling og gange.
Kart med løypeskildring finn du her.
Alle lag må ha minimum to av begge kjønn.

Påmelding, som kostar kr 500,- pr lag for eksterne bedrifter, sendast på eige skjema til Harald Munkvold innan 1. juni.

Vel møtt!

Venleg helsing
Bedriftidrettslaget
FSS

Sparte pengar og betre arbeidsmiljø

Thu, 10 Jun 2010 13:12:28

Sengesentralen ved Førde sentralsjukehus har fått nytt utstyr for knapt to millionar kroner. – Ei investering som både fører til betre arbeidsmiljø og innsparingar, seier Anders Bergset.

Ny sengevaskar, pute- og dynevaskar og to tørketromlar har den siste tida kome på plass på sengesentralen.

- Dette er ei betydeleg oppgradering. Vinsten er mellom anna at vi slepp å sende puter og dyner til vaskeri. Det sparer vi pengar på. I tillegg sparer vi arbeidsinnsats når det gjeld vasking av senger, som i lengre tid har blitt vaska manuelt, seier Anders Bergset ved prosjekt- og eigedomsavdelinga.

Den nye vaskemaskina er langt meir avansert enn den som stod i sengesentralen tidlegare. Ulike program sikrar rett vask, alt etter om det er smittesenger eller andre senger som skal vaskast. Maskina, som også vaskar madrassar, kosta om lag 1,3 millionar kroner, medan det andre utstyret kosta om lag 400 000 kroner.

- Vi tek også sikte på å oppgradere golv og veggar som i løpet av åra har fått ein del skader, seier Bergset.

Info

Redaktør Web 09.05.2007

Ei støtte når katastrofen slår til

Thu, 10 Jun 2010 13:17:13

Ved større ulukker trengst det hjelp på mange plan. Psykososial støttegruppe i Helse Førde står klar når katastrofen råkar.

- Siste oppdraget hadde vi 22 februar, då hurtigruta Nordstjernen nesten gjekk på grunn ved Bulandet. Saman med kommunelegen i Flora gjennomførte eg ein kort debriefing/samtale med passasjerar og mannskap. Andre eksempel er at vi assisterte ein kommune med å gjennomføre ein debriefing med skiløperar som overlevde ei rasulukke, og at vi rykker ut ved større bilulukker, seier Anita N. Leirvåg som er leiar for Psykososiale støttegruppe ved større ulykker eller katastrofe i Helse Førde.

Første gong gruppa gjekk inn i ei stor ulukke var dpå ambulansehelikopteret havarerte i Vevring i 1996.

- Vi har vore ute mange gonger seinare, men aldri i ei ulukke med slike dimensjonar og med så mange nære kollegaer. Heldigvis har fylket vore skåna for mange slike katastrofar. Det viktige er at vi er budde på at dei kan inntreffe igjen, og at vi er kompetente til å handtere dei, seier Leirvåg om gruppa som yter hjelp til dei som har vore utsette for ei ulukke, pårørande og hjelpemannskap.

Kommunale krisegrupper

- Dei siste to åra har kommunane hatt plikt til å ha eigne krisegrupper, som ofte er sette saman av kommunelege, helsesøster og andre fagfolk frå kommunen. Når dei treng hjelp ringer dei til AMK, som så tek kontakt med oss. Ved andre føretak veit eg at dei rykker ut ved ulukker som har eit visst tal omkomne. Vi ser meir på kor store ressursar som krevst, enn kor stort det fysiske skadeomfanget er, seier Leirvåg.

Ho fortel at dei også vurderer om kommunen er betre i stand til å handtere problemet sjølve.

- Oppfølginga ligg ofte i kommunen. Vi kjem inn og trekkjer oss ofte raskt tilbake. Difor kan det vere tilfelle der det er best om all hjelp skjer i kommunen, og vår erfaring er at dei gjer ein god jobb, seier Anita Leirvåg.

Frivillige frå Psykisk helsevern

Gruppa er sett saman av fire medlemer frå Nordfjord psykiatrisenter, fire medlemer frå Indre Sogn psykiatrisenter og elleve medlemer frå Psykiatrisk klinikk i Førde. Det inkluderer også medlemer frå Barne- og Ungdomspsykiatrisk poliklinikk og Ungdomsavdeling for Psykisk helsevern.

Dei er alle frivillige: psykiatrar, psykologar, sosionomar, psykiatriske sjukepleiarar frå Psykisk helsevern, i tillegg til sjukehuspresten ved Førde sentralsjukehus. Alle har brei erfaring på kvar sitt felt. Gruppe er dermed tverrfagleg og omfatter heile Helse Førde.

- Vi legg vekt på å halde vedlike kompetansen på traumebehandling og førebygging av PTSD og har difor årleg undervisning med heile gruppa bl.a. frå Atle Dyregrov ved Krisepsykologisk senter i Bergen og Dag Øystein Nordanger ved Ressurssenter om vold, traumatisk stress og selvmordforebygging- Region Vest-Helse Bergen. I tillegg har vi eitt til to møter kvart år der vi møtest for å gå gjennom aktuelle tema, seier Anita Nelissen Leirvåg.

Info

Redaktør Web 11.05.2007

Bjørn Smelvær – årets sjukepleiar i Sogn og Fjordane

Thu, 10 Jun 2010 13:21:43

Sjukepleiarprisen for Sogn og Fjordane vart i dag utdelt til Bjørn Smelvær. Han fekk prisen for sin høge kvalitet i utøving av yrket og sin gode måte å hjelpe sjukepleiarstudentar ved avdelinga.

Smelvær er tilsett ved ortopeden ved Førde Sentralsjukehus. Prisen vart utdelt på sjukepleiarhøgskulen i Sogn og Fjordane fredag 11. mai.

NSF Sogn og Fjordane deler ut prisen årleg til ein sjukepleiar som utøvar sjukepleie og gir rettleiing til sjukepleiarstudentar av høg kvalitet.

Leiar i NSF, Oddgeir Lunde, fortalde under prisutdelinga at Smelvær er ein inspirator for kollegaer og utøver yrket av ein høg kvalitet. Det var kollegaer ved ortopedien ved Fss som foreslo Smelvær som prismottakar.

Dette er første gong ein mannleg sjukepleiar har fått denne utmerkinga her i fylket.

– Vi treng fleire menn i sjukepleiaryrket, sa leiaren i sjukepleiarforbundet. Det er i dag for få menn innan yrket og oppmoda dermed fleire menn til å søke yrket.

Dei tilsette ved ortopeden som var møtt opp under prisutdelinga las opp dikt til ære for prismottakaren: Bjørn Smelvær var tydeleg rørd over tildelinga. Prisen som var eit kunstverk, diplom og blomar.

Årets sjukepleiar 2007

Søster Bjørn, du fortener ein pris,
Ja, det gjer du på mange vis.
Ein humørspreiar – full av energi,
og enda har du meir å gi!

Pasienten i fokus er alfa omega,
det ber sjukepleiegjerninga di preg av.
Masse kunnskap du innehar,
noko vi og studentar drar nytte av.

Alltid positiv – med ein god kommentar på lur,
og vi har jammen til gode å sjå deg sur.
Med deg på laget går jobben så lett,
du er eit førebilete for mange – rett og slett.

Pasientar gjer du inntrykk på,
”jobbar han Smelvær her enno då?”
-er spørsmål vi alle har svara på.
”Ja, han var jammen ein artig kar,
tenk eg gløymde nesten kva smerte var”.

Ikkje berre er du sjukepleieprofesjonell,
du er rett og slett ein prisvinnar selv.
Gratulerar søster Bjørn, og hugs no dette;
Vi set pris på deg – det vil vi berette!!

Helsing søstrene på ortopeden.

Info

Redaktør Web 11.05.2007

Gir honnør til hjelpekorpset i Stryn

Thu, 10 Jun 2010 14:08:06

Konstituert ambulansesjef i Helse Førde, Stian Sægrov, gir honnør til Stryn Røde Kors Hjelpekorps etter redningsaksjonen i Holen 9. mai. Fleire naudetatar merka seg deira raske og profesjonelle reaksjon.

- Som kst ambulansesjef og som operativ leiar Helse på skadestaden, vil eg gi stor honnør for snarrådig og profesjonell innsats på ulykkesstaden, skriv Sægrov i eit brev til Stryn Røde Kors.

Sægrov viser til at naudetatane brann, politi og helse ved ulike aksjonar og ulukker er avhengige av å ha eit nært samspel og stundom få hjelp av den friviljuge delen av redningstenesta i Noreg.

- Under aksjonen i Holen 9.mai kunne ein konstatere at den friviljuge beredskapen og resultatet av mange øvingstimar for vassredningsgruppa i Stryn, har ført til ei svært dyktig og kompetent teneste, skriv han i brevet.

Sjølv om den 21 år gamle sjåføren seinare døydde etter ulukka, så håpar han at innsatsen er ein motivasjon og inspirasjon til vidare drift for gruppa.

- I etterkant av slike tragiske ulukker, lyt vi som jobbar med akuttmedisin og beredskap til dagen, glede oss over at det er personar og organisasjonar som brukar mykje av si fritid til å opparbeide seg kunnskap og beredskap for redningsaksjonar, heiter det i brevet.

Info

Redaktør Web 11.05.2007

Helse Førde tek i bruk ny operasjonstove

Thu, 10 Jun 2010 14:14:43

Ei ny operasjonstove er teken i bruk ved Førde sentralsjukehus. Gevinsten er større operasjonskapasitet og betre arbeidsmiljø.

- Dette er den første store endringa i operasjonsavdelinga ved Førde sentralsjukehus sidan huset vart bygt i 1979, og er ein milepel for oss, seier Olav Hesjedal, leiar for Avdeling for akuttmedisin i Helse Førde.

Førde sentralsjukehus har med dette to operasjonsstover som kan nyttast til protesekirurgi.

- For å få ein perfekt logistikk så må ein ha to stover til eit operasjonsteam. No kan vi førebu neste inngrep på ei stove, medan teamet gjer seg ferdig på den andre. Til no har tid gått vekk på å gjere stova klar igjen etter ein operasjon. Personalet slepp også vente på å gjere klar neste pasient. Vi håpar å spare ein til to timar pr dag på dette. Det betyr også fleire operasjonar, og at personale får mindre press på slutten av dagen, seier Hesjedal.

Stova som no er bygd om vart tidlegare nytta av augeavdelinga, som i fjor fekk operasjonsstover ved eigne lokale i første etasje av Førde sentralsjukehus.

Ultrarein luft
- Den nye stova skal i hovudsak nyttast til operasjonar der det vert sett inn leddprotesar, karprotesar og pacemaker, men også til andre operasjonar som krev reinromsteknikk. Ventilasjonssystemet sikrar at lufta er heilt rein for bakterieberande partiklar, seier oversjukepleiar Reidun Bergheim.

Lampene i stova er ein heilt ny teknologi, som gjer at personalet får godt lys utan at lampene gir varme. I tillegg korrigerer lampene automatisk for skuggar. Det er også mogeleg å endre fargetemperatur, noko som er gunstig ved enkelte inngrep.

- Vi har også fått kamera som kan plasserast i handtaket på lampene. Kamera kan nyttast i fem ulike operasjonsstover i Førde, Lærdal og på Nordfjordeid, og skal mellom anna brukast i kurs og undervisningssamanheng. Plasseringa av dei gjer at det blir enklare å følgje med på operasjonen ved å følgje den på ein data- eller fjernsynsskjerm, enn ved å følgje den på sjølve operasjonsstova, seier Bergheim.

Betre arbeidsmiljø
Ho er også svært fornøgd med at logistikken er betra når det gjeld reingjering av instrument.

- Vaskekapasiteten i eit tilstøytande rom er forbetra. Den nye stova gjorde at vi måtte auke kapasiteten til vasking av instrument. Det er viktig at reingjeringsprosessen er så tett opp til inngrepet som mogeleg, for å få eit godt vaskeresultat. No er vi sikra det, seier Bergheim som peikar på fleire arbeidsmiljøvinstar ved den nye stova.

- I 1979 var alt brunt og oransje. Dei nye lokala er lyse og trivelege. I tillegg har det kome på plass sug som gir minst mogeleg støy, lamper som ikkje gir varme og betre høve til å regulere temperaturen. I det store og heile eit stort framsteg for arbeidsmiljøet, seier ho.

Info

Redaktør Web 14.05.2007

Sterilsentralen er oppgradert

Mon, 14 Jun 2010 07:19:49

Sterilsentralen ved Førde sentralsjukehus har fått trivelegare lokale og ny kabinett vaskemaskin. - Vi er utruleg glade for å ha fått til denne kvalitetshevinga, seier sterilsentralleiar Britt-Irèn Helle.

Vi kan vaske stålbord, transportbakker
og andre større ting, men ikkje instrument.
Det er auka bruk av aluminiumscontainerar med filter som steriliseringsemballasje. Container i aluminium får no kvalitetsikra reingjering fordi reingjeringsmiddelet er spesialtilpassa, fortel Helle.

- Maskina er svært avansert og fører til at vi slepp mykje av det manuelle arbeidet vi har gjort sidan bandvaskemaskina havarerte seier Helle.

Investeringa kom på knapt halvannan millionar kroner. Også golvbelegg, og delvis veggbelegget, på den ureine sida, er skifta ut. Maskina som har to dører gir klart skilje mellom ureint og reint rom i avdelinga.

- Vi er no i gang med forbetringar av gammalt og utslite utstyr. Her er det blitt både lysare og trivelegare. Både oppussinga og den nye maskina har gjeve arbeidsmiljøet vårt eit løft, seier Helle.

Info

Intranett Fellesbruker 22.05.2007

Høyringsuttale om Helse 2020

Mon, 14 Jun 2010 07:30:10

Brukarutvalet i Helse Førde har gjeve sin høyringsuttale til Helse 2020, som er utarbeidd av Helse Vest.

Strategidokumentet skal vedtakast i Helse Vest sitt styre 5. september, og er no ute til høyring. Helse Førde sitt arbeid med å utarbeide strategiar for lokalsjukehusa vil halde fram etter dette styremøtet.

Brukarutvalet i Helse Førde handsama saka den 16. mai. Her er heile høyringsuttalen:

Høyringsuttale frå Brukarutvalet i Helse Førde - Helse 2020

Brukarutvalet i Helse Førde hadde denne saka til handsaming i møte 16.05.2007.

Innleiing:

Brukarutvalet syner til utsendt høyringsdokument, og seier seg tilfreds med at det vert lagt ned eit godt arbeid for å planleggje helsetenestene på Vestlandet i eit langt perspektiv. Brukarutvalet stiller seg likevel spørjande til om det er mogleg å planleggje helsetenestene i eit så langt perspektiv, som frå no og heilt fram til år 2020. Erfaringane frå Helse Førde, med kortsiktige perspektiv, handlingsorientering og konstant fokus på økonomi, kan tyde på at den reelle planlegginga i praksis har eit svært kort perspektiv. Difor er det viktig at helseføretaket uansett vert sikra føreseielege og robuste rammevilkår framover.

Til høyringsdokumentet:

Brukarutvalet syner til visjon og mål og gjer si tilslutning til at desse skal vere overordna og førande for det vidare arbeidet med Helse 2020. Det er viktig at desse formuleringane ikkje endar opp som festtalestoff. Formuleringane må bli realisert i praksis, slik at dei kan danne grunnlaget for eit godt innhald for brukarar og pasientar i Sogn og Fjordane.

Generelt er Brukarutvalet kritisk til detaljrikdomen i dokumentet. Dokumentet burde blitt redigert, slik at dei reelle utviklingstrekka og tiltaka, også for Sogn og Fjordane sin del, hadde kome fram i ein lett forståeleg kortversjon. Ein legg til grunn at dette blir teke omsyn til seinare i prosessen.

Generelt vil Brukarutvalet presisere at konklusjonane av arbeidet Helse 2020 må føre til like gode, eller betre tilbod av helsetenester for innbyggarane i fylket vårt enn i dag. Prinsippet om likeverdige helsetenester må halde fram like sterkt som i dag. Dette må gjelde uavhengig av bustad den enkelte innbyggar har i fylket.

I tillegg er det kritisk viktig at Helse Førde vert sikra eit betre økonomisk/finansielt grunnlag for si drift enn i dag. Stadige nedskjeringar og pålegg om innsparing fører til unødig utryggleik for pasientane, og vil forsterke problematikken knytt til større og større grad av gjestepasientar ut av fylket.

Sogn og Fjordane er eit grisgrendt fylke med store avstandar og svakare utbygt kollektivtilbod enn i dei fleste andre fylker. Dette medfører økonomiske meirbelastningar for den prehospitale (ambulanse/taxi) tenesta i Helse Førde, samanlikna med andre helseføretak. Difor er det særs viktig at dette blir fullt ut økonomisk kompensert frå Staten.

Eit anna særs viktig utfordringsområde for Helse Førde er rekruttering av fagfolk. Dette punktet er så viktig at det burde vore framheva endå tydelegare i dokumentet. Mangel på tilstrekkelig tilgang på fagfolk, både med breidde – og spisskompetanse vil på lang sikt føre til utarming av helsetilboda i Sogn og Fjordane.

Brukarutvalet Helse Førde syner i tillegg spesielt til kapittel 5. Helse Førde må bli sikra trygge og nære sjukehustenester med like god kvalitet som elles på Vestlandet og i Noreg. Kvalitetsaspektet må haldast fram som eit hovudmål også vidare i prosessen. Nye metodar og utvikling i teknologi må kome også våre innbyggarar til del og ikkje i unødig grad bli sentralisert ut av fylket. Lokalsjukehusa må også framover få spele ei fullverdig rolle, med omsyn til nærleik og tilgang på dei helsetenestene som folk flest har behov for. Sentralsjukehuset må behalde, styrke og utvida, den breidda i spesialisttilbod som pr. dags dato er der.

Spesifikke innspel/kommentarar på enkeltformuleringar i dokumentet:

Side 11, tiltak 5,8, andre avsnitt, Prioritering… osv:

Brukarutvalet reagerar negativt på ”kost/nytte”-formuleringane. Dette må eventuelt konkretiserast, og formuleringane slik dei står no er totalt uakseptable i eit pasientperspektiv.

Side 12, tiltak 5,9, første avsnitt, I dag har ein stor del av pasientmassen…osv:

Brukarutvalet meiner formuleringane som går på reduksjon av ”Ø-hjelp” og ”nødvendig helsehjelp” er uakseptable. Desse formuleringane er svært uheldige. Avsnittet burde heller vore bygd opp positivt, slik at helsetenesta vert organisert slik at dei som har behov for ulike typar hjelp, får det når behovet er der.

Stein Loftesnes
Leiar i Brukarutvalet i Helse Førde

Info

Vidar Vie 24.05.2007

Vald i nære relasjonar

Mon, 14 Jun 2010 07:34:38

Mangel på kunnskap er ofte det som møter valdtekne kvinner når dei oppsøkjer hjelpeapparatet. Det var ikkje mangel på kunnskap hos føredragshaldarane på temadagen ved Lærings- og meistringssenteret (LMS) tysdag 8. mai.

Herdis Magerøy og
Rita Sletner har begge god
kunnskap. Dette delte dei
med tilhøyrarane som hadde møtt opp denne dagen. Sogn og Fjordane har ikkje eige valdtektsmottak, men har rutinar for korleis ein møter utsette. Kunnskapen er nok sterkt varierande hos dei ulike etatar og kontor og kan bli betre. Det er viktig at det tilbodet som fins er kjent og at vi som arbeider i hjelpeapparatet er med på å vidareutvikle dette tilbodet.

Valdtekt, eit samfunnsproblem?
I media siste tida har det vore fokus på overfallsvaldtekt. Det har vore fleire overfallsvaldtekter komprimerte i ein periode og då grip naturleg nok media fatt i det. Men, kva skjer i heimane? Ein går ut frå at det er store mørketal på valdtekt utført i nære relasjonar, av ein du har eit tillitsforhold til, og det er ein auke i ungdoms- og kameratvaldtekter. Valdtekt angår oss alle, seier leiar ved DIXI Ressurssenter i Oslo, Herdis Magerøy.

Mange utsette legg skulda på seg sjølve for det som skjedde; korleis dei gjekk kledde, rus m.m. Ingen har rett til å voldta. Valdtekt er eit av dei grovaste overgrep og kan, i følgje Magerøy, sidestillast med drap. Skulda må plasserast der den skal vere, hos overgriparen, og difor bør valdtekt meldast til politiet. For mange er skamma så stor at dei unngår å melde valdtekt. Dei er redde for rykteflaum og spørsmåla frå politiet, den medisinske undersøkinga. Er overgriparen ein du kjenner og har eit tillitsforhold til, er det endå vanskelegare å melde ei valdtekt. Magerøy si klare oppmoding er likevel å melde overgrepet.

Haldningsskapande arbeid
DIXI Ressurssenter arbeider for å hjelpe valdtektsofre og deira pårørande, spreie informasjon om mellom anna reaksjonar og seinskadar, samt drive haldningsskapande arbeid. Dei går inn i skulane og snakkar med ungdomane om kroppskrenking og seksualitet. Målet er å skape 0-toleranse for valdtekt, men Magerøy trur ikkje det skjer. Samfunnet må akseptere at det skjer valdtekt og skjerpe strafferamma. Strafferamma er i dag så låg at det blir nesten "legalt" å voldta.

Skal ungdomane ta førehandsreglar når dei er ute? Er det alkohol med i biletet, er dei meir sårbare. Magerøy ber ungdomane lytte til eigen intuisjon og ha ei klok atferd.

Hjelpeapparatet
Mange utsette slit med seinskadar i mange år etter valdtekta. Ved DIXI Ressurssenter får dei utsette tilbod om å gå i samtalegruppe. Der får dei støtte frå andre i same situasjon og stadfesting på sine reaksjonar. Samtalegruppe er eit lågterskeltilbod og det er den utsette som bestemmer tempo og progresjon.
Målet er å opprette eit valdtektsmottak i kvart fylke. Det er ikkje på plass. Det er viktig at hjelpeapparatet tilrettelegg og etablerar eit godt traume- og hjelpetilbod til dei utsette.

"Utrygge menneske har inga velferd"
Rita Sletner, leiar av valdtektsutvalet oppnemnt av regjeringa, seier at vald mot kvinner ikkje er eit privat anliggande, men eit samfunnsansvar. Vald mot kvinner er flytta frå det private til det offentlege rom. Mange kvinner lever som Noregs internflyktningar. Vald i heimen er eit tabubelagt område. Menneskeverdet til dei som lever under slike forhold er krenka på det ytterste. Desse menneska kjenner seg utrygge og opplever inga velferd.

Frikjenningsprosenten i valdtektssaker er stor samanlikna med andre lovbrot, 30% mot 6,7%. Få valdtekter vert melde, særleg gjeld det bekjentskapsvaldtekter. Kvifor er det slik? Valdtektutvalet skal prøve å finne svar på det. Vi veit at mange utsette som tek kontakt med hjelpeapparatet opplever prosessen i ettertid som å gjennomgå overgrepet på nytt og at det høge talet av saker som vert henlagt er med på at mange vegrar seg mot å melde til politiet. Sletner gir all ære til politiet for den gode kompetansehevinga som har vore i etaten. Politiet må stille ein del objektive spørsmål for å sikre bevis, men prøver å vise menneskelege omsyn. Mediainteressen er stor i slike saker. Dette kan også vere årsak til at mange let vere å melde.

Valdtektsutvalet skal levere sin rapport i oktober 2007 og dei ser på kva andre land har gjort for å etablere eit godt tilbod til valdtekne. Danmark har valdtektsmottak som fungerar godt og England har såkalla "safehouse" og ambulerande team.

Tilbodet i Sogn og Fjordane
I den første akutte fasen etter ei valdtekt, er det akuttmottaket ved sjukehuset som tek imot den utsette. Det er eigne rutinar for mottak av den utsette. Politiet vert kopla inn dersom kvinna vel å melde overgrepet eller dersom politiet vel å melde saka på eige initiativ. Barn under 16 år som vert utsette for overgrep, vert sende vidare til Haukeland Universitetssjukehus. Både Herdis Magerøy og Rita Sletner trekkjer fram kor viktig det er med samtalegruppe for desse kvinnene. Krisesenteret i Sogn og Fjordane har planar om å starte slik samtalegruppe, men ser utfordringa med å nå ut i fylket med tilbodet. Lærings- og meistringssenteret har tilbod om samtalegruppe for valdtekne kvinner. Eit samarbeid mellom Krisesenteret og LMS kan vere aktuelt for å nå ut til fleire.

Flora kommune har fått tilskot for å utvikle eit hjelpetilbod til valdtekne. Det er tilsett lege og jordmor/helsesyster i prosjektet og dei ser føre seg eit mogleg ambulerande valdtektsmottak som reiser dit den utsette er. Arbeidet er heilt i startfasen.

For Sogn og Fjordane er det viktig med kompetanseheving og at den blir kjent både internt i hjelpeapparatet og ute blant innbyggjarane i fylket. Det er viktig at folk flest veit kvar dei kan vende seg og det er viktig at vi i hjelpeapparatet har den nødvendige kompetanse for å kunne hjelpe den utsette med å få kontakt der det er hjelp å få, og at den nødvendige hjelpa finns.

Info

Redaktør Web 25.05.2007

Betre rutinar for innkalling

Mon, 14 Jun 2010 10:14:55

Pasientar tilvist til ortopedisk avdeling Helse Førde skal få betre service ved at brev om at ein er sett på venteliste skal erstattast med brev om tildelt time.

Klinikkdirektør Anne Margrete Øvsthus fortel at dette vil bli ei vesentleg forbetring for pasientane som er tilvist til poliklinisk undersøking.

– Tidlegare fekk pasientar brev om at dei er sett på venteliste og kor lang denne ventetida kan bli. No skal altså pasientane få brev med dato og klokkeslett for undersøkinga. På denne måten slepp pasienten å vente på endå eit brev om dette, og dei kan forhalde seg til ein gitt time, seier Øvsthus.

– For å få dette til må ortopedisk avdeling lage ein total arbeidsplan for når legar er tilgjengeleg. Den fullstendige arbeidsplanen skal gjelde fram i tid, seier Øvsthus.

I Lærdal og Eid vil den nye ordninga med innkalling av pasientar ta til å gjelde i løpet av juni månad. Ved Førde sentralsjukehus vil nyordninga kome i gang frå 1. september.

– Dette er ei stor forbetring for pasientane som no skal sleppe å vente og undre seg på når dei blir kalla inn til undersøking, avsluttar Øvsthus.

Info

Redaktør Web 25.05.2007

Flytskjema for akutt hjartesjukdom, hjerneslag og traume

Mon, 14 Jun 2010 10:18:02

Helse Førde har utarbeid skjema som viser korleis akutt hjartesjukdom, traume og akutt hjerneslag skal handterast i Helse Førde.

Du finn alle skjema i høgre spalte.

Hovudarkitekt for skjemaet om akutt hjartesjukdom er kardiolog Eva Søgnen ved FSS, og det er elles basert på innspel frå møte mellom kardiologar i Helse Førde, Haukeland sjukehus, akuttmedisin og prehospital klinikk i Helse Førde.
Skjemaet om traumehandtering er blitt til som del av arbeidet med ny Ortopediplan i Helse Førde. Flytskjemaet er vedlegg i planen som igjen er vedteken av styret for Helse Førde.
Skjemaet om akutt hjerneslag er utarbeidd i samarbeid med nevrolog Stig Hegrestad FSS og prehospital klinikk.

Utkastet til flytskjema har også vore presentert for Indre Sogn Legeforum i møte og innspel derifrå er tekne med.

Standardisering
Standardisering av pasientforløp er sett på som ein viktig del av kvalitetsarbeidet og det er viktig at alle partar som samhandlar (legevakt/AMK/ambulanse/luftambulanse/vakthavande på sjukehus) i høve akutte alvorlege sjukdomstilstandar på denne måten får ein sams retningsgjevande mal å følgje i Sogn og Fjordane.

Det å få fram slike flytskjema inneber at det dreier seg om kompromissløysingar der ein til sist må velje mellom ulike alternativ, og der ulike fagpersonar kanskje vil kunne ha noko divergerande syn, og kunne føle desse skjemaa som ei avgrensing i utøvinga av det faglege skjønet.

Slik sett betyr det å gå ut med desse retningslinjene at omsynet til å få ei sams og utvitydig handsaming av desse tilstandane har vore eit viktigare omsyn enn kva den enkelte fagperson i systemet sjølv vil halde for den beste løysinga hjå sine pasientar.

Førande
I høve akutte tilstandar er heller ikkje retten til Fritt sjukehusval tilstades for den einskilde pasienten, noko som kunne ha avgrensa mogelegheita for slik standardisering.

Retningslinjene slik dei kjem til uttrykk i flytskjemaa må difor oppfattast som i stor grad førande for handsaminga innanfor Helse Førde, og det å fråvike desse vil då måtte krevje ei klar grunngjeving i det aktuelle pasienttilfellet. Skjema og tilhøyrande utfyllande tekst er lagde inn i EK-handboka.

Det er eit mål å bruke eige helseføretak der dette har god nok kvalitet og tilgjenge. Når det gjeld bruk av meir sentralisert kompetanse er det naturleg å nytte Haukeland sjukehus i størst mogeleg grad både fordi det er innanfor same RHF, vi har mykje grenseflater elles fagleg og kommunikasjonsvegar mot Haukeland vanlegvis er meir innarbeidde og velfungerande for transporttenestene i Helse Førde.

Fritt sjukehusval
I dei tilfelle der det dreier seg om elektiv behandling av til dømes hjartesjukdom vil pasienten ha sin klare rett til Fritt sjukehusval basert på kjennskap til og eventuelt tidlegare erfaring med ulike institusjonar. Men mange pasientar vil også be fagpersonar om konkrete råd i høve behandlinga av eigen sjukdom. Det er då viktig at dei får ein balansert informasjon som også omfattar det at vi har eit omfattande samhandlingsmønster opp mot Haukeland sjukehus som kan vere moment pasienten bør ta med i sin eigen vurdering.

Når det gjeld legar i 1. linjetenesta (primærhelsetenesta) så vil alle legekontora motta desse flytskjemaa, men Helse Førde har her ikkje nokon instruksjonsrett i høve til at dei skal følgjast frå legevaktslegen si side. Det er likevel å håpe at også føremonene ved å få til slik standardiserting vil verte erkjent også i 1. linjetenesta, slik at ein får til ei best mogeleg samhandling til beste for den akutt sjuke pasienten i Sogn og Fjordane.

Flytskjemaa er sjølvsagt opne for endringar og revisjonar ettersom tid, kunnskap og erfaring vert hausta. Dei skal som minimum gjennomgåast ein gong årleg.

Spørsmål vedrørande flytskjemaa kan rettast til Hans-Johan Breidablik, Fagdirektør, Helse Førde.

Info

Redaktør Web 29.05.2007

Færre utskrivingsklare pasientar på medisinsk

Mon, 18 Oct 2010 12:54:39

Talet på utskrivingsklare pasientar i sengene på Medisinsk avdeling går nedover. – Ei riktig utvikling, seier klinikkdirektør Arve Varden.

I januar i år var 6,7 prosent av sengene i avdelinga nytta av pasientar som var utskrivingsklare. Det fører til at dei tek opp senger som skulle vore nytta av andre pasientar. Talet var i april kome ned på 2,9 prosent.

- Vi har hatt auka fokus på dette og er i tett dialog med kommunane. Når pasientane reiser ut når dei er utskrivingsklare så vert dei også tekne hand om av rett omsorgsnivå. Dette er viktig for pasientane, seier klinikkdirektør Arve Varden.

Liggetida ved dei ulike seksjonane innanfor Medisinsk avdeling går også nedover. I januar var snittet 4,9 døgn, medan det i april var 4,2 døgn.

Meir informasjon finn du i dokumentet i høgre stolpe.

Info

Vidar Vie 29.05.2007

Anne Stubdal vert praksiskonsulent i Helse Førde

Mon, 14 Jun 2010 10:24:56

Anne Stubdal frå Stryn skal frå 20. august vere praksiskonsulent i Helse Førde. Målet er endå betre samhandling mellom helseføretaket og primærhelsetenesta.

- Vi trur at dette ytterlegare vil betre og styrke samhandlinga. Først og fremst gjennom at vi med dette arbeidet vil få innspel, erfaringar og andre moment frå dei som arbeider i kommunane inn til oss som arbeider i Helse Førde, seier fagdirektør Hans-Johan Breidablik.

Stubdal er kommunelege i Stryn og er hyra inn som konsulent i Helse Førde ein dag i veka. Samhandlinga mellom kommunane og Helse Førde føregår på svært mange plan, og føretaket set i verk fleire tiltak for å forbetre den ytterlegare. Mellom anna ønskjer Helse Førde å etablere faste møtepunkt mellom sjukehuslegane og kommunelegane.

Som praksiskonsulent skal Stubdal mellom anna vurdere praksis for tilvising, innlegging og utskriving og utvikle gode retningslinjer på desse områda. Eit anna viktig område er betra informasjonsflyt i samhandlinga mellom primærhelsetenesta og helseføretaket. Det kan mellom anna skje gjennom utarbeiding av informasjonsbrev, deltaking på møter, gjennomføring av kurs, medverking til auka bruk av IKT-verktøy og tilrettelegging for gjensidig hospitering.

Info

Vidar Vie 30.05.2007

Samanslåing av avdelingar i Medisinsk klinikk

Mon, 14 Jun 2010 10:27:41

Avdeling for barnehabilitering og Barneavdelinga vert slegne saman til ei avdeling med Rolf Horne som avdelingssjef.

Dei to avdelingane har i dag samarbeid på mange felt, og eg trur at dette både fagleg og økonomisk er eit riktig val. På grunn av rekrutteringssituasjonen er også habiliteringseininga avhengig av å låne legeressursar frå Barneavdelinga, seier klinikkdirektør Arve Varden.

Den nye organiseringa inneber at avdeling for barnehabilitering vert ei eining i barneavdelinga. Ei av fagstillingane i avdelinga får eit ansvar tilsvarande 50 % til koordinering av aktivitetar innanfor fagområdet. I tillegg skal vedkomande vere leiar for tverrfagleg team.

Funksjonen som koordinator og leiar for tverrfagleg team skal lysast ut. Denne stillingsfunksjonen får nemninga habiliteringskoordinator og skal rapportere til avdelingssjef for Barneavdelinga.

Info

Vidar Vie 31.05.2007

Ny doktorgrad

Mon, 14 Jun 2010 10:30:23

Cand. med. Dejan Ignjatovic disputerer den 8. juni 2007 for graden PhD ved Universitetet i Bergen med avhandlinga: ”A 3-D post-mortem model provides rationale for complications in gastrointestinal surgery.”

Ignjatovic har hatt sjukehusturnus i Helse Førde, og har tidlegare arbeidd ved FOU-avdelinga i føretaket. No er han turnuslege i Aurland. Han har framleis tilknyting til Helse Førde gjennom eit forskingssamarbeid med Avdeling for patologi. Det siste av seks delarbeid for doktorgraden blei utført i samarbeid med Avdeling for patologi i Helse Førde.

Her er pressemeldinga frå Universitetet i Bergen.

Info

Vidar Vie 01.06.2007

Søkjer om 11,5 millionar til å utvikle lokalsjukehusa

Mon, 14 Jun 2010 10:34:48

Helse Førde vil auke tryggleiken når det oppstår akutte situasjonar, og søkjer om 11,5 millionar kroner for å utvikle lokalsjukehusa. – Eit stort og framtidsretta løft, seier adm. dir. Jon Bolstad.

Føretaket søkjer om midlar til to ulike prosjekt:

1. Utvikling av den akuttmedisinske kjeda i lokalsjukehusområda
2. Etablering av teledialyse på lokalsjukehusa

- Stikkorda for begge prosjekta er ny teknologi og eit betre tilbod til innbyggjarane i distrikta. Nøkkelen for å få det til er eit tett samarbeid med kommunane, seier Jon Bolstad.

Søknaden er no sendt til Helse Vest. Stortinget løyvde 50 millionar kroner til auka samhandling og vidareutvikling av lokalsjukehusa, og det er desse pengane det no blir søkt om midlar frå.

Tryggare når akutte situasjonar oppstår

Utviklinga av den akuttmedisinske kjeda i lokalsjukehusområda er eit stort prosjekt der felles kommunal legevakt, felles akuttmottak, akuttmedisinske team og telemedisin er sentrale tema.
- Vi ønskjer å samordne ressursar ved sjukehusa og i kommunane, og å bruke den nyaste og beste teknologien. Målet er å gje pasientane diagnosen så nær heimen som mogeleg, og å gje rett behandling på lågast mogeleg nivå, seier Bolstad.

Føretaket ønskjer å gjennomføre prosjektet i samarbeid med Nasjonalt senter for telemedisin, i tillegg til kommunane. Eit aktuelt tema er videobasert akuttmedisinsk konferanse der til dømdes spesialistar ved Førde sentralsjukehus gir videobasert rettleiing til helsepersonell ved lokalsjukehusa. Det skal sikre raskare og rettare diagnostisering av pasientar i ein akutt situasjon.

Krev tett samarbeid

Å utvikle den akuttmedisinske kjeda krev eit tett samarbeid mellom Helse Førde og kommunehelsetenesta. Tiltaka som Helse Førde ønskjer å setje i verk er:

felles kommunal legevakt/ felles akuttmottak ved Lærdal sjukehus, Nordfjord sjukehus og Førde sentralsjukehus
observasjonssenger i tilknyting til legevakt/felles akuttmottak
akuttmedisinske team i kvart lokalsjukehusområde som skal omfatte både somatisk helseteneste, psykisk helsevern og rusomsorg
telemedisinske løysingar på lokalsjukehusa for å lettare diagnostisere og såleis leia pasientane inn i rett behandlingskjede.

- Vi ønskjer å starte opp prosjekta i det lokalsjukehusområdet der tilhøva ligg til rette, og det er ønskje frå kommunane om å kome fort i gang, seier Bolstad.

Auka satsing på desentralisert dialyse

Helse Førde har på kort tid bygd opp tilbod om desentralisert dialyse i Lærdal og på Nordfjordeid. Dette har gjort kvardagen langt lettare for ei pasientgruppe som er sterkt aukande. No ønskjer føretaket å satse ytterlegare.

- Pasientane ved lokalsjukehusa får eit betre helsetilbod og lettare tilgang til spesialist dersom sjukehusa vert knytt opp mot Førde sentralsjukehus ved hjelp av mellom anna videokonferanse. Det vil gje sikrare tenester, tryggare pasientar og gje eit betre grunnlag for dei medisinske avgjerdene, seier Bolstad om delprosjektet som har følgjande mål:

kartlegge eksisterande og behov for nytt utstyr, infrastruktur og pasientvolum
skaffa og utplassera utstyr
utvikla nye rutinar for samhandling mellom dialysesatellittane (NSH, LSH) og FSS
gjennomføre opplæring i bruk av utstyret
gjennomføre sendingar med pasientar

Positive effektar for kommunar og pasientar

- Helse Førde ser at investering og utvikling i lokalsjukehusområda truleg vil ha innverknad på rekruttering, kompetanseheving og kunnskapsutvikling også i kommunane. I tilegg vil vi peike på effekten ved utvikling av telemedisinske løysingar på lokalsjukehusa. I løpet av 2007 vil alle legekontor i Sogn og Fjordane vere oppkopla til Nasjonalt helsenett og vi reknar med at alle legekontor kan utføre elektronisk meldingsutvikling (epikriser og tilvising) i løpet av 2007. IT- forum si helsegruppe søkjer no midlar for å kople opp pleie- og omsorgstenesta til helsenettet, heiter det i søknaden.

Kunnskapen og kompetansen som vert utvikla gjennom prosjektet kan også nyttast på fleire sjukdomar når det gjeld diagnose, behandling, opplæring og informasjon ved lokalsjukehusa og i kommunane.

For ytterlegare informasjon, kontakt:

Adm. direktør Jon Bolstad, 57 83 90 20
Seniorrådgjevar Tove Hovland, 57 83 98 92
Informasjonssjef Vidar Vie, 48 07 75 86

Info

Vidar Vie 01.06.2007

Deltaking på meistringskurs krev tilvising av lege

Mon, 14 Jun 2010 10:36:42

Primærlege vil oppleve at mange tek kontakt for å få tilvising til å delta på meistringskurs ved Lærings- og meistringssenteret, LMS.

Helseføretaket har høve til å nytte opplæringstakst A99 for deltakarar på meistringskurs.

Kriteriar
Meistringskurset, eller opplæringsprogrammet, må innehalde informasjon om sjukdomen, behandlingsformer, eigenbehandling og meistring, rettar og vidare oppfølging.
Kurset må strekkje seg over minimum 7 undervisningstimar og deltakarane må delta på minst 80% av kurset.
Kurset skal vere tverrfagleg, inkludere brukarkompetanse og i stor grad vere basert på gjennomføring i små grupper.
Det må ligge føre ein konkret plan for korleis primærhelsetenesta/primærlegar vert trekt inn i gjennomføringa av kurset og den vidare oppfølginga av deltakarane.
Takst vert utløyst ein gong pr. deltakar pr. kurs. Det vert utløyst kun ein eigendel pr. deltakar pr. kurs.
Kurset må gjennomførast i regi av sjukehus og med ein lege som er ansvarleg for medisinskfagleg innhald og opplegg for gjennomføring. Sjølve gjennomføringa av opplæringa kan anna kvalifisert helsepersonell tilsett på sjukehuset, poliklinikken eller lærings- og meistringssenteret utføre.
Taksten kan ikkje nyttast til eigne røykeavvenningskurs.
Deltakarane skal vere tilviste av lege for at taksten vert utløyst.
Taksten gjeld også pasientar utan diagnose.
For pasientopplæring innan astma må kurset strekkje seg over minimum 5 undervisningstimar, t.d. 4 timar fellesopplæring og 1-3 timar individuell opplæring.
Takst A99 kan ikkje krevjast i tillegg til andre takstar.
Takst A99 kan krevjast ved opplæring av foreldre/føresette ved barn sin sjukdom.

Kilde: Lovdata - Opplæringstakst A99 og Takst A99

Info

Vidar Vie 01.06.2007

50 fødslar i Lærdal så langt i år

Mon, 14 Jun 2010 10:40:32

Fødselstala ved den forsterka fødestova i Lærdal ligg så langt i år eit godt stykke framfor fjoråret.

I mai var det 11 fødslar ved fødestova mot ein i same månad i fjor. Så langt i år har det vore 50 fødslar mot 33 på dei fem første månadene i 2006. I løpet av heile fjoråret var det 73 fødslar der. Den svært positive utviklinga frå april har dermed halde fram.

I Nordfjord har det så langt i år vore åtte færre fødslar enn i same periode i fjor, medan det i Førde har vore sju fleire. Totalt sett har talet på fødslar ved sjukehusa i fylket auka med 16 hittil i år.

Info

Vidar Vie 05.06.2007

Krav om politiattest for arbeid med born og utviklingshemma

Mon, 14 Jun 2010 10:46:20

Frå 1. april 2007 er det ein ny bestemmelse i Helsepersonellova kor det vert stilt krav om innhenting av politiattest for helsepersonell og sosialpersonell som arbeider og får tilbod om visse stillingar i helsevesenet.

Føremålet med å innføre eit krav om politiattest for helse- og sosialpersonell er å førebygge seksuelle overgrep mot born og personar med utviklingshemming. Dette inneber at politiattest skal innhentast kor helse- og sosialpersonell i utøvinga av sitt arbeid kan kome i situasjonar med born eller utviklingshemma kor seksuelle overgrep kan finne stad.

Politiattesten skal vise om vedkommande er sikta, tiltalt, pålagt førelegg eller er dømd for seksualbrot eller barnepornografi etter straffeloven.

I Helse Førde gjeld dette følgjande avdelingar og følgjande stillingskategoriar:

Institusjon	Avd	Stilingskategori
FSS	Barneavd	Sjukepleiar Hjelpepleiar Førskulelærar Lege
FSS	AFMR	Psykologar Logopedar Fysioterapeutar Ergoterapeutar.
FSS	Avd for barnehabilitering	Alle stillingskategoriar
Førde BUP		Alle stillingskategoriar med unntak av merkantile stillingar
Sogndal BUP		Alle stillingskategoriar med unntak av merkantile stillingar
UPH		Alle stillingskategoriar med unntak av miljøvertar og merkantil stillingar.

Krav om politiattest gjeld alle som arbeider i avdelingane både dei som allereie er tilsett samt nye tilsette samt, og omfattar alle faste og mellombelse tilsette, sommarvikarar, ekstravakter, elevar, studentar og personell i praksisplassar.

Ved utlysing av stillingar i desse avdelingane, skal det kome fram i utlysningsteksten at det vert stilt krav om politiattest før tiltrede. Politiattest skal leggjast fram av den som får tilbod om stillinga og ikkje alle søkjarar.

I utlysningsteksten skal det derfor stå: "Den som får tilbod om tilsetjing må legge fram tilfredstillande politiattest i høve til Lov om helsepersonell.

Tilsette som i dag arbeider i desse avdelingane har frist innan 1. september til å leggje fram politiattest for sin avdelingssjef.

Skjema ”søknad om politiattest” kan ein få ved å kontakte leiaren i si avdeling evt lokalt personalkontor. Søknaden skal ein sende til politi-/lensmannskontor i bustadkommunen sin.

Politiattesten skal ikkje vere over 3 månader gamal.

Førde, 4. juni 2007
Jan Birger Moe
personaldirektør

Info

Redaktør Web 04.06.2007

Skriv lærekontrakt med 20 ambulansetilsette

Mon, 14 Jun 2010 10:52:14

Prehospital klinikk i Helse Førde skal i sommar skrive lærekontrakt med 20 av dei tilsette i klinikken. Dette skal gjere ambulansepersonalet endå betre rusta til å takle vanskelege arbeidsoppgåver.

Prehospital klinikk, Helse Førde er godkjent som opplæringsbedrift i ambulansefaget, og tilbyr lærekontrakt til tilsette som manglar nødvendig læretid og kompetanse til å få moglegheit for å gå opp til praktisk prøve i ambulansefaget. Ved ein lærekontrakt vil Helse Førde forplikte seg til å gje nødvendig teoretisk og praktisk vegleiing for å nå dei mål som er fastsett i læreplanen for ambulansefaget. Dette vert gjort med praksisvegleiar i reelle oppdrag med pasientar, fagsamlingar, oppgåveskriving og praktiske øvingar med tenkte situasjonar som ambulansepersonell møter i kvardagen.

Høgare kompetansenivå

I lovgjevinga og forskrifter som regulerer akuttmedisinske tenester utanfor sjukehus, møter Helse Førde strenge krav til kompetanse. Eit av krava er at det til ein kvar tid skal vere ein ambulansearbeidar med fagbrev som bemannar ambulansen. For å imøtekomme dette kravet må Helse Førde ha fleire fagarbeidarar. Ved å tilby lærekontrakt, vil tilsette i Ambulansetenesta få eit betre teoretisk og praktisk grunnlag, før ein skal gå opp til fagprøve. Dette vil gje Helse Førde mange fleire fagarbeidarar og høgare kompetansenivå på tenesta i framtida.

Skal halde fram den høge aktiviteten

Fagopplæring i ambulansefaget ligg under den vidaregåande opplæringa som Fylkeskommunen har ansvar for. Helse Førde og Fylkeskommunen har difor innleia eit godt samarbeid om å nå felles mål i høve opplæring. Ambulansetenesta vil skrive lærekontrakt med nærare 20 tilsette med verknad frå sommaren 2007, og ein vil halde fram med den høge aktiviteten i tida framover for å sikre best mogleg fagleg kvalitet på dei tenester ambulansetenesta gjev.

Info

Vidar Vie 06.06.2007

Reviderer rusplan for Helse Førde

Mon, 14 Jun 2010 10:54:37

Helse Førde skal revidere rusplanen for føretaket. Arbeidet vert leia av ruskoordinator Harald Munkvold

Den førre rusplanen vart ferdig i 2005. I revisjonen skal arbeidsgruppa ta omsyn til endringar som:

o Utvikling i rusbruk
o Nye rusmidlar
o Endringar i kommunane sin kompetanse og kapasitet
o Ny kunnskap om behandling av rusrelaterte sjukdomar
o At Helse Førde no har det økonomiske ansvaret for kjøp av gjestepasientplassar for rusmiddelmisbrukarar utanfor Helse Vest
o Utviklinga innan behandlingsmetodar
o Kapasitet innan behandling av rusmiddelmisbrukarar i Helse Vest og i andre føretak
o Problemstillinga kring dobbeltdiagnose – pasientar. Er dette eit rusmiddelproblem eller eit psykiatrisk problem – korleis gje eit tilbod til denne pasientgruppa?
o Trong for kompetanse
o Trong for kapasitet – behandlarar
o Koordineringsfunksjonen – innhald og kapasitet

entralt i arbeidet med å revidere planen er også styringsdokument, styrevedtak, regional rusplan, mogeleg opptrappingsplan for rusfeltet og arbeidet til ulike arbeidsgrupper internt i Helse Førde.

I tillegg til Harald Munkvold, så har gruppa følgjande samansetning:

Spesialkonsulent Linda Os – Nordfjord psykiatrisenter
Psyk. sjukepleiar Rita Brendefur Espe – Nordfjord psykiatrisenter
Overlege Asbjørn Søviknes – Psykiatrisk klinikk
Brukarrepresentant – Solfrid Lillebø – Mental Helse
Brukarrepresentant – Gerd Bjørkedal – Mental Helse
Kommunelege – Halvar Seljesetær, Førde kommune.
Sosialkonsulent Silje Berge, Årdal kommune

Info

Vidar Vie 08.06.2007

Ønskjer faste møteplassar

Mon, 14 Jun 2010 10:58:44

Faste møteplassar mellom allmennlegane og Helse Førde er eit av dei viktigaste tiltaka for å auke samhandlinga. Det meiner Anne Stubdal som i august startar som praksiskonsulent i Helse Førde.

Faste møteplassar mellom allmennlegane og Helse Førde er eit av dei viktigaste tiltaka for å auke samhandlinga. Det meiner Anne Stubdal som i august startar som praksiskonsulent i Helse Førde.

Torsdag deltok ho på dialogmøtet i Nordfjord. Der møttest sjukehuslegar og allmennlegar for å diskutere korleis samhandlinga kan betrast. Helse Førde har tidlegare arrangert møter med same tema i Førde og Lærdal.

På kvart av møta har allmennlegar halde føredrag der utgangspunktet var: Kva type dialog, samhandling og informasjon treng kommunelegane og legane i Helse Førde for å sikre eit godt tilbod til pasientane?

Stubdal meiner desse fire punkta er dei viktigaste å ta fatt i no:

• Faste møteplassar mellom HF og allmennlegane. (uavhengig av farmasøytisk industri)
• Utarbeide kortfatta informasjon om helseføretaket, for utdeling i kommunane til nye legar
• Samarbeid om legevakt, evt felles akuttmottak
• Fleire praksiskonsulentstillingar, knytta til dei ulike klinikkane og sjukehusa i helseforetaket i 5-10% stillingar.

Info

Vidar Vie 08.06.2007

Nytt kurs i Laparoskopisk suturteknikk avslutta

Mon, 14 Jun 2010 11:07:14

Avdeling for forsking og utvikling arrangerte sitt sjuande kurs i Laparoskopisk suturteknikk. Kurset er blitt veldig populært – og rykte om kvaliteten sørgjer for at legar frå heile landet melder seg på kurset.

15 deltakarar frå heile landet deltok på kurs 24. og 25. mai som FOU avdelinga i Helse Førde arrangerer.

- Alle bestod kursprøva og tilbakemeldingane frå deltakarane er svært gode, seier kursansvarleg Anne-Randi Solheim.

Kursdeltakarane følgjer kriteria til ”Førde-modellen” ved å sy laparoskopisk. Ein trenar seg på å sy innvendig, til dømes i ein magesekk, medan ein ser på dataskjermen kva ein gjer.

FOU-avdelinga i Helse Førde har fem stasjonar med svært godt utstyr som kursdeltakarane kan nytte. Kursdeltakarane får bruke utstyr som er identisk med det ein nyttar ved ein ordinær operasjon.

Solheim fortel at det er venteliste for å få plass på kurset - og det har eit godt rykte i heile landet, noko som spreiinga på deltakarane fortel, frå Bodø, Trondheim, Arendal, Mo i Rana etc.

Bergamaschi var kursleiar. Jostein Tjugum og Tom Guldhav var lokale instruktørar. Geir Berge Øverland var invitert føredragshaldar med ”Laparoskopisk suturteknikk i urologi”.

Kurset er arrangert i samarbeid med Universitetet i Bergen i regi av Den Norske Legeforeining. Kurset er godkjent for følgjande spesialitetar: Fødselshjelp og kvinnesjukdomar, generell kirurgi, barnekirurgi, urologi og øyre-nase-hals-sjukdomar.

Kursansvarleg, Anne-Randi Solheim, takkar Høgskulen i Sogn og Fjordane for godt samarbeid.

Info

Finn Ove Njøsen 11.06.2007

Folkefest i sjukehusparken i Førde

Mon, 14 Jun 2010 12:31:55

Strålande sol, sveitte, smilande fjes, og god mat = Helse Førde-stafetten 2007.

I går kl 18.00 gjekk startskotet (17.mai-tuten) for Helse Førde-stafetten med 44 lag på startstreken. Etter seks etappar med gange, stavgang, sykling og jogging, kom lag nr 20 - Psyk.kameratane - inn til første plass på tida 46:19. Like etter passerte lag nr 42 - Halbrendssusen - målstreken på 46:50. Vel eitt minutt etter kom lag nr 1 - Airlift AS - inn til tredje plass (47:55). Sjå elles resultat her.

Før start var det oppvarming til fengande musikk og instruktør Unn Hege Johannessen. Undervegs i stafetten rapporterte speaker Ole Anders Sunnarvik plasseringar. I telt i målområdet kosa deltakarane seg med grillmat servert av sentralkjøkkenet ved Førde sentralsjukehus.

- Vi registrerte opp mot 500 personer (definitivt rekord!) med smått og stort som var innom og fekk seg grillmat på Helse Førde stafetten. Eg vil anta at dette er eit av dei største grillarrangemnet som finn stad i Førde. Etter det eg kunne både sjå og høyre var det berre fornøgde deltakarar, løypemannskap og alle andre supportarar. Vi frå kjøkkenet syntes det heile berre var moro, og vi stiller gjerne opp neste gong òg. Positive tiltak som dette er vi absolutt med på, seier kjøkkensjef Torstein Solset.

Vinnarlaget, Psyk.kameratane; Atle Skrede, Roger Midtbø, Gudmund Øvsthus, Elise Astad, Unn Hege Johannessen, Svein Ove Alisøy fekk kvart sitt gåvekort på kr 300 frå MX Sport. I tillegg vart det trekt ut 33 premiar frå Førde Sport (som også stilte med stand i målområdet) og MX Sport. Nokre av desse vart ikkje henta. Sjå liste her.

Bilete:
- Oppvarming og start
- Rapportering frå løypa
- Innspurten
- I målområdet
Sjå også Firda sin biletserie og Treningskontakt.no

Arrangementskomitèen og Bedriftsidrettslaget i Helse Førde takkar alle som var med og gjorde dette til ein så kjempekjekk ettermiddag!

Vel møtt igjen neste år!

Info

Åse Elisabeth Stadheim 12.06.2007

Helse Førde-stafetten

Mon, 14 Jun 2010 12:36:22

No er vinnar av tippekonkurransen klar.

Vinnar av tippekonkurransen om vinnartida vart Tore Andrè Dvergsdal. Han tippa tida 46:42. Vinnartida var som kjent 46:19. Han vart dermed nærast og fekk eit gåvekort til butikkane på sørsida på kr 1000.

Info

Åse Elisabeth Stadheim 12.06.2007

Helse Førde kursa i traumehandtering

Mon, 14 Jun 2010 12:45:44

Helse Førde inviterte til kurs i mottak og stabilisering av multitraumepasientar i starten av juni. – Dette var kjempebra. Opplæringa var realistisk og alle som deltok ”skjerpa” seg som om dette var ein ekte situasjon, seier lege Gjertrud Hustad ved avdeling for akuttmedisin.

– Det er viktig med denne teoretiske opplæringa. Vi treng mengdetrening i traumebehandling og dette kursopplegget er så nær opp til ein realistisk situasjon at det fungerer utmerka, seier Gjertrud Hustad.

Til stades på kurset var observatørar frå sjukehusa på Eid og Lærdal. Dei skal ha same kurset ved eit seinare høve. Kurset er i samarbeid med i samarbeid med stiftinga BEST.

Multitraume er alvorleg skadde pasientar med fleire typar skader der har trong for fleire spesialitetar som samhandlar om behandlinga.

Akuttmottaket ved FSS var stad for ei storstilt opplæring av kirurgar, anestesilegar, røntgenlegar, turnuslegar, anestesi-, operasjons-, intensiv- og mottakingssjukepleiarar. Bioingeniørar og radiografar var også deltakarar i kursinga.

Praktisk opplæring
Deltakarane vart delt opp i grupper etter at dei hadde gjennomgått teoretisk oppdatering. Dei utgjorde eit team, klar til å ta imot ”pasienten”. Pasienten var ei spesiallaga dukke der ein kunne følgje med på puls, pust med meir. Akuttmottaket var stad for den praktiske opplæringa og temperaturen var ”høg og hektisk” for å hjelpe pasienten.

Kursleiar fortel deltakarane; ”Ein 30 år gammal mann kjem med ambulanse frå ein kollisjon i bil. Han er delvis bevisst, klagar over smerter i magen, har skadar i kjeven. Open fraktur i legg som blør friskt”.

Teamleiar starta så førebuingane av personalet – til pasienten er på plass. Så er behandlinga i gang.

Observatørar og fagfolk var til stades for å evaluere alt som skjedde rundt pasienten, frå pasienten kjem til mottaket, oppfølging av pasient fram til stabilisering av pasienten.

Den teoretiske delen gjekk føre seg i auditoriet.

Evaluering viktig
Gjertrud Hustad påpeikar at ein ved eit slikt opplegg, i etterkant, har tid å evaluere det som har skjedd. Første øvinga bli teken opp på video til bruk i evalueringa.

– Dei ulike faggruppene lærer kvarandre endå betre å kjenne og dermed fungere best mogleg saman som team. Kurset som BEST gjennomfører er ei bra evaluering på korleis våre team fungerer saman, seier avdelingssjef ved Akuttmottak Tom Ole Dystad.

Hustad hadde faglege innlegg der ho i djupna kunne gå inn på smertefysiologi og behandling av kvalme/oppkast. Dette programmet vart lagt inn som eit lokalt initiativ frå Helse Førde i programmet.

– For meg vart det litt springing fram og tilbake under kursopplegget, men det er viktig og bra at vi kan gjennomføre slike kurs, smiler Hustad.

Stiftelsen BEST: Betre og systematisk traumebehandling:
Tverrfaglig teamtrening i dine egne omgivelser

Reviderer terapirettleiing for depresjon

Mon, 14 Jun 2010 12:50:26

Psykiater Trond Aarre deltek i arbeidet med å revidere den nasjonale terapirettleiinga for depresjon. - Det er viktig at Helse Førde stadfester si sterke stilling på dette feltet og at kompetansen i føretaket vårt kjem andre til gode, seier han.

Avdelingssjefen ved Nordfjord psykiatrisenter er ein av to psykiatrar som deltek i arbeidsgruppa til Sosial- og helsedirektoratet. Han var sjølv redaktør for den gjeldande terapirettleiaren.

- Eg peikte i 2003 på at utviklinga på feltet gjorde at eg ikkje lenger kunne stå fagleg inne for innhaldet og rådde til at ein anten trekte den attende eller oppdaterte den. Forskinga har akselerert på dette feltet, så slike samanfatningar av kunnskapar er å sjå på som ferskvare, seier Aarre.

Inkludering av brukarar
Dokumentet som gruppa skal utarbeide inneheld tilrådingar om korleis depresjonar bør utgreiast og handsamast.

- Det skal vise kva me veit om effekten av dei ulike psykoterapiane, kva lækjemiddel ein bør velje og korleis handsaminga bør følgjast opp. Det står også ein del om korleis brukarane og deira pårørande bør inkluderast og om kva opplæring pasientane bør få. Det vert og lagt vekt på kva pasientane sjølv kan bidra med og kva sjølvhjelpsressursar som finst, seier Trond Aarre.

- Krevjande og interessant
Arbeidet som starta for om lag eit halvt år sidan skal vere ferdig i løpet av komande haust, og har vore både krevjande og interessant.

- Det krev god fagkunnskap og evne til å finne faglege og språklege kompromiss som ulike profesjonar og representantar for brukarane kan leve med. Det er svært mykje vitskapleg kunnskap som skal oppsummerast og leggje grunnlaget for tilrådingane. Det er uunngåeleg at fagfolk tolkar denne kunnskapen litt ulikt, og dei faglege drøftingane vert difor utfordrande, seier han.

Info

Finn Ove Njøsen 12.06.2007

Tenk på helsa før du reiser

Mon, 14 Jun 2010 12:54:15

Har du tenkt å reise til utlandet i sommar? Hugs å få med deg Europeisk helsetrygdekort som du bestiller elektronisk hos NAV.

Europeisk helsetrygdkort dokumenterer at du har rett til å få dekka utgiftar til naudsynt medisinsk behandling når du oppheld deg midlertidig i eit annet EØS-land eller Sveits. Du har rett til behandling på lik linje med oppholdslandet sine borgarar.

Kortet erstattar den tidligere papirblanketten E 111. Ver merksam på at Europeisk helsetrygdekort ikkje dekker heimreise, så du må hugse å ha reiseforsikring i tillegg.

Du finn meir informasjon hos NAV

Info

Vidar Vie 12.06.2007

Team i lindrande behandling godt i gang

Mon, 14 Jun 2010 12:59:39

Team i lindrande behandling er no godt i gang og kan tilby hjelp til kommunehelsetenesta. Teamet kan hjelpe personar med langtkomen kreftsjukdom og andre behov for lindrande behandling.

Helse Førde har oppretta eit tilbod som heiter "Team i lindrande behandling". Teamet kan hjelpe personar med langtkomen kreftsjukdom og andre behov for lindrande behandling i sluttfasen av livet.

Teamet kan hjelpe til med smerte og symptombehandling, informasjon/avklaringssamtaler med pasientar og pårørande. Dei er eit bindeledd mellom 1. og 2. linjetenesta, og har nært samarbeid med heimesjukepleie og anna aktuellt helsepersonell i kommunane.

Teamet reiser på heimebesøk til pasientane saman med helsepersonell i kommunen.

Informasjon om team i lindrande behandling (word-dokument)
Henvisningsrutinar (word-dokument)
Henvisningsskjema m/ESAS (word-dokument)

Info

Redaktør Web 13.06.2007

Jobbsøking via nett i Helse Førde

Mon, 14 Jun 2010 13:02:54

Helse Førde forenklar no sitt arbeid med rekruttering av personell. Føretaket har innført rekrutteringssystemet Webcruiter.

Dei som ønskjer å søkje jobbar i Helse Førde vil i framtida kunne gå inn på føretaket sine nettsider og finne ledige stillingar og elektronisk søknadsskjema.

- 23. juni er det slutt på gamlemåten å rekruttere tilsette på – no er det Webcruiter som skal nyttast, seier personalrådgjevar Nina Selland.

Rekrutteringsprosessar er tidkrevjande og når mange søkarar sender sine søknader på papir, er det ei utfordring å halde oversikt over søkarmassen. For å forenkle dette arbeidet har Helse Førde tatt i bruk eit digitalt rekrutteringssystem, der alle desse prosessane føregår elektronisk.

Forenkling
WebCruiter gir mange fordelar både for Helse Førde og søkaren. Alle stillingsutlysingar vert til dømes lagra i systemet og ein kan såleis enkelt gjenbruke tidlegare utlysingar ved å gjere små endringar. WebCruiter er også kopla saman med saks- og dokumentsystemet til Helse Førde. Det inneber at korrespondanse mellom Helse Førde og søkaren blir lagra i sakshandsamingssystemet. WebCruiter sørgjer også automatsk for utsending av avslagsbrev til søkarar som ikkje nådde opp.

CV og tidlegare søknader blir lagra i systemet. Dette gjer det mogleg for ein søkar som har fått avslag på ein tidlegare søknad å bruke CV-en om igjen utan å skrive inn alt på ny når søkaren seinare finn ei anna ledig stilling i Helse Førde.

Gode erfaringar
Helse Førde er ikkje dei første i helsevesenet til å ta i bruk WebCruiter. Rikshospitalet/Radiumhospitalet tok i bruk Webcruiter hausten 2005.

– Det er eit veldig bra system som sparar mykje tid for den som er ansvarleg for stillingsutlysinga. Det er enkelt å publisere ei stillingsutlysing. Dette gjer det mogleg å kutte ut dyre avisannonsar, seier personalrådgjevar Nina Selland i Helse Førde.

Både eksterne og interne utlysingar av stillingar går no gjennom det nye rekrutteringssystemet.

– Færre feilkjelder
Dei aller fleste store bedrifter i Noreg brukar i dag skreddarsydde løysingar for rekruttering, og elektroniske søknader har blitt meir og meir vanleg. Personalrådgjevar Nina Selland, ser fram til at ein no får det nye systemet i gang og meiner Helse Førde no vil framstå som ein enno meir profesjonell arbeidsgjevar.

Ønskjer du meir informasjon, ta kontakt med nina.selland@helse-forde.no tlf: 57 83 91 71 eller 92 23 82 06.

Info

Redaktør Web 13.06.2007

Mammografiscreening: Godt oppmøte er blitt betre

Mon, 14 Jun 2010 13:08:26

Oppmøtet til mammografiscreening i Helse Førde er framleis best i landet. Frå eit flott resultat på 82 prosent i første runde er det no over 84 prosent som har møtt til runde to.

Seksjonsoverlege ved Brystdiagnostisk senter Inger Marie Juel jublar over resultatet.

Sogn og Fjordane er best i landet saman med Rogaland når det gjeld kvinner sitt oppmøte til mammografiscreening.

– Det er viktig at kvinnene deltek i det nasjonale screeningprogrammet. Vi får avdekka mogleg kreft på eit så tidleg stadium som råd. Vi kan då følgje opp og behandle kvinner for brystkreft så tidleg som mogleg, til beste for dei som får konstatert sjukdomen, seier Juel.

I første screeningrunde vart det funne 52 tilfelle av kreft. I andre runda gjekk talet ned til 44.

– Eg reknar med at talet på oppdaga krefttilfelle vil vere stabilt når kvinnene no jamleg blir screena. Kvinner som døyr av brystkreft vil på sikt gå ned grunna screeningprogrammet, meiner seksjonslegen.

– På verdsbasis vil talet brystkreft auke, noko som truleg også vil vere utviklinga i Noreg. Dette understrekar endå meir verdien av å vere tidleg ute og delta i screeningsprogrammet, påpeikar Inger Marie Juel.

– Kvinnene i Sogn og Fjordane er orienterte om at mammografiprogrammet er viktig, og dei snakkar med kvarandre. Eg trur dette er ei vesentleg årsak at så mange møter opp, meiner Juel.

Juel trekkjer også fram personalet som ei årsak til at oppmøtet er godt. Kvinnene blir positivt mottekne. Mammografiscreening er også mindre smertefull enn tidlegare grunna det nye utstyret som kom på plass i 2006.

Best frammøte i fylket har Jølster. Der møter 91 prosent av kvinnene fram til mammografiprogrammet. Svakast oppmøte i første runde av programmet hadde kvinner i Aurland kommune. På grunn av lange reiseavstandar har kvinnene i Aurland fått tilbod om mammografiscreening på Voss.

Brystdiagnostisk senter er no godt i gang med tredje runde av mammografiprogrammet. Det er kvinner som er født i åra 1939 – 1958 som er målgruppa for denne runden.

Info

Redaktør Web 13.06.2007

Senter for helseforsking søkjer leiar

Mon, 14 Jun 2010 13:12:07

Høgskulen i Sogn og Fjordane og Helse Førde går nye vegar for å auke aktivitet, kvalitet og samarbeid innan medisinsk og helsefagleg forsking og utviklingsarbeid.

Dei opprettar no ei felles forskingsavdeling,
Senter for helseforsking i Sogn og Fjordane.

– Den nye eininga skal samordna og utvikle institusjonane sitt FOU-arbeid. Hovudsakleg skal den bidra til at fagmiljøa våre er konkurransedyktige når det gjeld eksternt finansiert FOU-prosjekt, seier assisterande fagdirektør i Helse Førde Magni Haavardstun.

Det er føresett at ein vesentleg del av aktiviteten ved Senteret skal vere eksternt finansiert. Det vil bli lagt vekt på at FOU-arbeidet er relevant for Sogn og Fjordane, samstundes som det stettar nasjonale mål og kvalitetskrav.

Til å leia Senter for helseforsking i Sogn og Fjordane søkjer samarbeidspartane no etter ein fagleg leiar med forskingskompetanse på doktorgradnivå eller høgare, og som helst har helse-/medisinskfagleg bakgrunn.

– Vi ønskjer ein leiar med relevant erfaring frå forskingsplanlegging, utvikling og leiing. Vedkomande må ha evne til samarbeid, nettverksbygging, strategisk tenking, innovasjon og resultatorientering seier Haavardstun.

Det er også ønskjeleg at leiaren driv noko eiga forsking i den grad arbeidssituasjonen gjer dette mogleg.

Sentret er ikkje noko sjølvstendig organisatorisk eining, men er ei ramme kring FOU-samarbeidet mellom Helse Førde og Høgskulen i Sogn og Fjordane. Det vil bli inngått ein eigen samarbeidsavtale mellom partane som dannar ei overordna ramme for leiaren sine arbeidsoppgåver.

Høgskulen i Sogn og Fjordane vil ha arbeidsgjevaransvaret for stillinga og dekan på Avdeling for Helsefag er leiaren sin næraste overordna. Fagleg og administrativt rapporterer FOU-leiaren både til dekan ved avdeling for Helsefag, HSF og fagdirektør i Helse Førde avhengig av kven sitt ansvarsområde ei sak høyrer inn under.

Stillinga er fast ved HSF, avdeling for helsefag. Funksjonen som leiar for Senter for helseforsking i Sogn og Fjordane er tidsavgrensa, i første omgang for 4 år.

For dei som ønskjer meir informasjon om stillinga kan kontakte dekan Eva Marie Halvorsen, tlf. 57 72 25 55, eva.halvorsen@hisf.no eller fagdirektør Hans Johan Breidablikk, tlf. 90 18 28 53 hans.johan.breidablikk@helse-forde.no

Søknadsfrist på stillinga er 15.august.

Info

Redaktør Web 13.06.2007

Odd Fellow hjelper kreftpoliklinikken

Mon, 14 Jun 2010 13:15:57

Odd Fellow vil frå september månad stille med frivillige til mat- og kaffiservering til pasientar på kreftpoliklinikken ved Sentralsjukehuset. Dei planlegg også å innreie samtalerommet.

Kvar torsdag frå september månad kan pasientar treffe medlemer av Odd Fellow på kreftpolitiklinikken i 3–4 timar. Dei serverer pasientane kaffi og lagar til ei enkel servering av mat til pasientane.

Odd Fellow vil også støtte poliklinikken med innreiing av samtalerommet. Dei skal gå til innkjøp av møblar og liknande for å gjere det trivelegare på avdelinga. Dette for at pasientane skal få ei best mogleg oppleving av opphaldet på sjukehuset.

Medlemene av Odd Fellow som deltek i kaffi- og matserveringa får opplæring i korleis dei skal forhalde seg til pasientane før dei startar opp. Denne opplæringa vert gitt av kreftpoliklinikken i samarbeid med Kreftforeininga.

Odd Fellow sine foreiningar i Sogn og Fjordane har i fleire år hatt eit prosjekt for å hjelpe kreftavdelinga ved Førde sentralsjukehus. Dei har mellom anna kjøpt inn bilete og eit veggteppe, samt møblar.

Opplegget som startar opp i september er det foreininga i Førde (Fjordlenken) som står bak.

Info

Redaktør Web 14.06.2007

Tilbodet ved Tronvik

Mon, 14 Jun 2010 13:20:16

Det har dei siste vekene vore uttrykt uvisse om Tronvik si framtid. Difor er det viktig å presisere at det ikkje er gjort vedtak som tidfestar ein eventuell reduksjon av tilbodet ved institusjonen.

I 2003 gjorde styret i Helse Førde vedtak som ville innebere ei nedbygging av aktiviteten på Tronvik. Parallelt har det vore vurdert å etablere ny verksemd innafor behandling av ruslidingar knytt til Tronvik, i samarbeid med Helse Vest. I april i år kom det attendemelding frå Helse Vest om at ein ikkje såg føre seg ei slik satsing frå Helse Vest si side. Helse Førde arbeider for tida med revidering av rusplanen for føretaket. Vidare gjorde styret i Helse Førde i mars 2007 vedtak som peiker mot realisering av vedtaket frå 2003.

Dei vedtak som er gjort gjeld planlegging og prosjektering. Dette arbeidet er ikkje kome i gang enno, og mogeleg gjennomføring er heller ikkje dagsett. Godkjenning av prosjekta må til handsaming i styret for Helse Førde fleire gonger før det kan bli snakk om realisering, og i mellomtida er oppgåvene for Tronvik uendra. Det innebér at ein ved Psykiatrisk klinikk avd. Tronvik i fleire år framover vil halde fram med å ta i mot pasientar som krev lengre tids innlegging for psykiske lidingar, også pasientar med rusrelaterte psykiatriske lidingar.

Info

Vidar Vie 14.06.2007

Sender tilvisingar og epikriser elektronisk

Mon, 14 Jun 2010 13:24:59

Alle tilvisingar og epikriser blir frå i dag av sende elektronisk mellom Sunnfjord Medisinske Senter og Helse Førde. – Vi har fått til ei kvalitetsheving som kjem pasientane til gode, seier allmennlege Dagfinn Krogsæter.

- Tidlegare har epikrisene kome både elektronisk og pr. post, noko som har gjort at vi har vore nøydde til å utføre eit dobbeltarbeid. No unngår vi det, og vi slepp å sende tilvisingane i posten, seier Krogsæter som arbeider ved Sunnfjord Medisinske Senter.

Det største framsteget meiner han ligg i spart arbeid og i at dei no tek i bruk ein standard som heiter den gode tilvising.

- Standarden utgjer ei kvalitetsheving, og inneheld faste punkt som skal fyllast ut av primærlegane. Dermed er vi i større grad sikra at rett informasjon kjem fram til spesialisthelsetenesta, noko som igjen kjem pasienten til gode, seier han.

Krogsæter meiner at standardisering innan elektronisk samhandling i framtida vil gje ytterlegare vinstar.

- I dag er for eksempel ikkje medisinlistene standardiserte. Elektronisk samhandling gir oss høve til å standardisere desse slik at apotek, primærlege, sjukehus og omsorgstenesta brukar same mal. Det vil minke risikoen for feilmedisinering, seier han.

Glad for gjennombrotet
Krogsæter er glad for gjennombrotet, sjølv om han gjerne skulle sett at det kom tidlegare. Mangel på standardisering på IT-løysingar i Helse-Noreg har vore ei av utfordringane for prosjektet.

- Dei teknologiske utfordringane har vore store. Desto større grunn er det til å glede seg over vi har kome så langt, seier Arne Myrekrok som er leiar for Ejournal-prosjektet til Helse Førde

Etter Sunnfjord Medisinske Senter skal dei to andre pilotkontora; Luster legekontor og Gaular legekontor ta i bruk same løysingane.

- Når desse pilotane er gjennomførte og godkjente blir løysinga tilbydd alle legekontor i Sogn og Fjordane. Målet er at det skje i løpet av hausten 2007, seier han.

Økonomiske innsparingar
Tilvisingane frå primærlegane til Helse Førde har tidlegare blitt skrivne inn på sjukehuset. No vert dei skanna og lagt inn i journalsystemet, og med dei nye løysingane går dei altså rett inn i datasystemet.

- Gjennomføringa av dette prosjektet gir føretaket innsparingar på fleire felt. Vi slepp skanning og vi slepp å sende ut papirkopiar av epikrisene. Det viktigaste er likevel ei ytterlegare ”profesjonalisering” av samhandling gjennom eit dokumentert prosedyreverk og kontrakt mellom samarbeidspartane. Dette gjev alle partar ei kvalitetssikring som skal være så god at ein kan legg til rette for elektronisk samhandling utan papir for alle meldingar, seier Myrekrok.

Info

Vidar Vie 18.06.2007

Skal betre legerekrutteringa

Mon, 14 Jun 2010 13:29:22

Det har vore vanskeleg å rekruttere legar til Sogn og Fjordane. No har Helse Førde sett i gang eit prosjekt som voneleg skal gjere jobben lettare.

- Turnuslegar er den viktigaste rekrutteringsbasen for fylket vårt. Viss vi skal håpe på at dei slår seg ned her, så må vi også ta godt vare på dei, seier psykiater Petter Bugge som, saman med kollega Trond Aarre, er ansvarleg for prosjektet.

Gjennom møter med turnuslegane og sosialt fellesskap har dei sett fokus på problemstillingar som auka trivsel, betre samhandlingskompetanse og betre kompetanse til å løyse vanlege psykiatriske problemstillingar i allmennpraksis. Helse Førde gjennomfører møteserien på initiativ frå Fylkesmannen, som yter økonomisk støtte.

- Målet er at unge legar skal bli trygge og velfungerande, samhandle godt med andre tenesteytarar og trivast i arbeidet her i Sogn og Fjordane. Prosjektet har gjort meg og Trond optimistiske på vegner av faget og folket. Me opplever det som eit løft i kvardagen å bli betre kjende med unge kollegaer med gode haldningar og mykje kunnskap. Framtida ser lys ut dersom me greier å halde nokre av desse her i fylket, seier Petter Bugge.

Positive tilbakemeldingar
Det siste møtet i vår vart arrangert i Stryn i midten av juni. Bugge fortel at dei så langt har fått positive tilbakemeldingar frå deltakarane.

- Spranget frå akademiske studiar til klinsk kvardag er stort, og deltakarane tykkjer dei har nytte av å drøfte vanskelege problemstillingar med kollegaer med litt røynsle. Dette gjeld særleg psykiatriske problem, som unge legar ofte slit med å handtere. Lokale tilhøve og samhandlingsmønster avgjer i stor grad korleis psykiske lidingar vert handtert, og det er nyttig for alle partar at me har felles forståing av kva som er tenlege tiltak og forstandig arbeidsdeling, seier han.

Info

Vidar Vie 18.06.2007

Geriatriplan for fylket lagt fram

Mon, 14 Jun 2010 13:35:03

Plan for geriatrien i Sogn og Fjordane er no utarbeidd. Ei arbeidsgruppe har lagt fram planen til handsaming i Helse Førde sitt styre komande fredag.

Bakgrunnen for planen er at Helse Førde sette av to millionar kroner til oppretting av eit geriatrisk team. Eitt av måla er å hjelpe kommunane med å gje denne gruppa av pasientar eit betre tilbod.

Utifrå folketal, små fagmiljø og vanskar med å skaffe legespesialistar i Helse Førde, tilrår arbeidsgruppa at det vert satsa på oppbygging av eitt sentralt tverrfagleg team som skal tene både geriatriske og alderspsykiatriske pasientar, pårørande og personell i første og andre linetenesta. Teamet skal med dette kunne verte driftsmessig effektivt og fagleg solid, og det vil ivareta behovet for poliklinisk og ambulant verksemd innan desse fagområda.

Det er ikkje opplagt kva type personell som trengs i eit slikt team, for å ivareta hovudfunksjonane, uttalar arbeidsgruppa. Forslag til samansetjing er i stor grad tufta på erfaring frå geriatrisk og alderspsykiatrisk avdeling ved Haraldsplass i Bergen. Erfaring vil vise om andre faggrupper må knytast til og i kva grad bemanninga er rett i forhold til oppgåvene.

For at behandlingskjeda skal vere effektiv og i tråd med behov i framtida, trengs det, i tillegg til poliklinisk/ambulant teneste;

å øyremerke senger i ortopedisk og medisinsk avdeling til geriatrisk intervensjon for pasientar i akutt og subakutt fase

å bygge ut AFMR sengepost eller opprette eigen geriatrisk post for spesialisert rehabilitering i subakutt og kronisk fase
å ha sengar i psykiatrisk klinikk til utgreiing som er tilpassa behova til alderspsykiatriske pasientar som treng særskild skjerming

Folketalsutviklinga tilseier at tal eldre i Noreg vil auke betydeleg fram til 2050. Det er gruppa av dei eldste og skrøpelegaste som vil auke mest.

Med omstrukturering og endring av organisering innan ulike klinikkar i Helse Førde, er det mogleg å tilby tenester som gjev god helsegevinst for dei sjuke, gamle pasientane i Sogn og Fjordane.

Arbeidsgruppa meiner at teamet kan opprettast, uavhenging av om Helse Førde maktar å rekruttere geriater eller ikkje.

Målgruppa for teamet er pasientar som har eit samansett behov for helsetenester og som har behov for at fagpersonane samarbeider på tvers av klinikkane.

Det er også eit framtidig mål å gje pasientar tilbod om geriatriske tenester desentralisert, og at tiltaket skal fungere som eit kompetansetiltak for å støtte primærhelsetenesta. Dette kan verke positivt for pleie- og omsorgstenesta i kommunane.

Info

Finn Ove Njøsen 19.06.2007

Medlemene til samhandlingsråda er klare

Mon, 14 Jun 2010 13:37:01

Medlemene til Koordineringsrådet og Fagrådet, som skal arbeide med samhandling mellom kommunane og Helse Førde, er klare.

Koordineringsrådet:

Nils Gjerland, ordførar Førde

Olav Lunden, ordførar Leikanger

Trude Brosvik, ordførar Gulen

Sonja Edvardsen, ordførar Eid

Gunnar Engan, kommunelege Balestrand

Knut O. Aarethun, Fylkesstyreleiar i KS

Karen Moe, Brukarutvalet

Solfrid Lillebø, Brukarutvalet

Petter Øgar, Fylkesmannen i Sogn og Fjordane

Jon Bolstad, administrerande direktør Helse Førde

Hans Johan Breidablik, fagdirektør Helse Førde

Ole Christian Resusch, klinikkdirektør Psykisk helsevern

Arve Varden, klinikkdirektør Medisinsk klinikk

Anne Margrethe Øvsthus, klinikkdirektør Kirurgisk klinikk

Terje Olav Øen, klinikkdirektør Prehospital klinikk

Fagrådet:

Asbjørn Fjose, kommunalsjef Førde kommune

Gunnar Engan, kommunelege Balestrand kommune

Trond Inselseth, kommunelege Vågsøy kommune

Berit Wetlesen, helse- og sosialsjef Stryn kommune

Hans Johan Breidablik, fagdirektør Helse Førde

Olav Hesjedal, avdelingssjef Kirurgisk klinikk Helse Førde

Petter Bugge, Psykisk helsevern Helse Førde

Geir Andvik, avdelingssjef Kreftavdelinga Helse Førde

Astrid Dale, overlege Medisinsk avdeling Helse Førde

Info

Vidar Vie 20.06.2007

Telemedisin på dialogmøte

Mon, 14 Jun 2010 13:41:46

Telemedisin var eit av fleire tema som stod på sakskartet då det første dialogmøtet mellom Helse Førde og ordførarane i fylket vart arrangert i dag.

Morten Brattvoll frå Nasjonalt senter for telemedisin ved Universitetssjukehuset Nord Norge fortalte om dei mange muligheitane som ligg innanfor telemedisin. Gjennom ein film viste han mellom anna kor stor hjelp teledialyse har vore for pasientar og helsepersonell i Helse Nord. Filmen følgde ein pasient som går til dialyse i Hammerfest. Både pasienten og sjukepleiarane ved sjukehuset fortalt kor nyttig det var at nefrolog og anna helsepersonell ved Universitetssjukehuset i Nord Norge kunne følgje behandlinga.

- Betre pasientomsorg

- Tidlegare nytta vi brev, telefon og reiser, noko som har vore tungvint, fortalte ein nyrespesialist i Tromsø.

Han sa at dei brukte teledialyse til å gå visitt hos pasienten ved hjelp av kamera og biletoverføring. Ved hjelp av dataprogram kunne dei følgje behandlinga, og data frå behandlinga vart elektronisk overført til pasientjournalen etterpå.

- Vi kan sitje i Tromsø og bruke elektronisk stetoskop på ein pasient i Hammerfest, og vi kan bruke ultralydapparat ved overføring av data. Etter mi meining har dette ført til betre pasientomsorg og gjort kvardagen lettare for personalet i distriktet, sa nefrologen.

Pasienten i filmen fortalte om korleis det oppstod komplikasjonar ved siste behandling, og korleis han fekk hjelp via teledialyse.
- Alternativet hadde vore ei lang reise til Tromsø, fortalte han.

Helse Førde har det siste året bygd ut dialysetilbodet ved lokalsjukehusa i Lærdal og på Nordfjordeid, og ønskjer å vidareutvikle tilbodet med teledialyse.

- Tillitsskapande arbeid

Andre tema på seminaret var desentralisert dialyse, team lindrande behandling og patologitilbodet i Helse Førde. Den siste halvtimen var sett av til spørsmål og svar og då vart mellom anna legevaktsamarbeid, ambulansetenesta og praksiskonsulentordninga diskutert.

Representantar frå omlag ein tredje del av kommunane, samt fylkeskommunen, deltok i møtet med styret til Helse Førde.

Fylkesvaraordførar Tor Bremer rosa styret for initiativet og peika på at dialogmøter som dette var tillitsskapande arbeid i praksis. Han vona også at endå fleire kommunar vil stille på neste møte.

Info

Vidar Vie 22.06.2007

Pasientar med sjukleg overvekt skal få betre hjelp

Mon, 14 Jun 2010 13:52:49

Det er sett ned ei arbeidsgruppe som skal arbeide med mellom anna kompetansebygging for å hjelpe pasientar med sjukleg overvekt betre.

Målet er at helsepersonell i møte med den einskilde pasient skal få betre kompetanse.

Kompetansesenter for behandling av pasientar med sjukleg overvekt er den einaste regionale funksjonen Helse Førde har. Helse Førde si oppgåve i dette inneber førebygging, behandling (kirurgi- og livsstilsbehandling), oppfølging av pasientar etter behandling og forsking.

– Gode samarbeids- og koordineringsrutinar mellom første- og andrelinjetenesta er ein vesentleg føresetnad for at tilbodet skal vere fullgodt for pasientane. Dette er også eit fagområde med spesielle krav til tverrfagleg samarbeid og samhandling i spesialisthelsetenesta, seier Anne-Lene Norman som er prosjektkoordinator.

Arbeidsgruppa for førebygging og oppfølging av pasientar med sjukleg overvekt hadde sitt oppstartsmøte 14. juni -07.

– Denne gruppa går i gang med eit nybrottsarbeid innanfor dette feltet, påpeikar Norman.

Mandatet er hovudsakleg innretta mot helsepersonell i møte med den enkelte pasient og omfattar ikkje større folkehelsetiltak ført i statleg eller fylkeskommunal regi.

Førebygging av sjukleg overvekt

Korleis kartlegge/diagnostisere (barn/vaksne)?
Forslag til organisering/tverrfagleg samarbeid i kommunehelsetenesta.
Forslag til konkrete tiltak som gjeld pasient som er i ferd med å utvikle (sjukleg) overvekt - barn/vaksne.
Korleis kan LMS bidra med kompetansebygging for kommunalt helsepersonell?
Kva er indikasjonar på at pasienten skal tilvisast til spesialisthelsetenesta ?
Kva tiltak må ha vore utprøvd før tilvising til spesialisthelsetenesta ?

Oppfølging av pasientar etter behandling for sjukleg overvekt i spesialisthelsetenesta

Kva tilbod bør vere tilstades i kommunen for oppfølging av pasientar som er behandla for sjukleg overvekt (evt. skilnad på behov hos kirurgiske- og livsstilspasientar) ?

Kvar bør oppfølgings- og koordineringsansvar for desse pasientane plasserast i kommunen ?
Kva tilbod bør LMS gje i oppfølgingsarbeidet (gje eksempel på tilbod/innhald)?
Korleis bør spesialisthelsetenesta følgje opp i høve til kommunehelsetenesta (Individuell plan m.m.) ?

Deltakarar i arbeidsgruppa er : Kirstin Bruland (LMS - leiar), Ragnhild Berge Follevåg (RK Hauglandsenteret), Øyvind Watne (psykiater - kunne ikkje delta i første møte) Ronny Gåsdal (sj.pleiar) Helga Helland (ernæringsfysiolog) Fabian Bergqvist (overlege, barneavdelinga), Anne Endestad (helsesøster), Sissel Leth Olsen (kommunelege), Tor Vidar Myklebust (kommunelege)

I tillegg skal to brukarrepresentantar vere med. ("Overvektsforeningen" hadde ikkje fått utnemnd desse to til første møtet.

Info

Finn Ove Njøsen 22.06.2007

Helse Førde prioritert først

Mon, 14 Jun 2010 13:56:04

Helse Førde sin søknad om midlar til utvikling av den akuttmedisinske kjeda ved lokalsjukehusa er høgast prioritert på lista som Helse Vest har sendt departementet.

Stortinget har sett av 50 millionar kroner til vidareutvikling av lokalsjukehusa og samhandling mellom tenestenivåa. Helse Førde har søkt om til saman 11,5 millionar kroner av desse midlane. Helse Vest har føreteke ei prioritering mellom dei ulike søknadane som har kome inn frå dei lokale føretaka på Vestlandet og sendt over til departementet.

Helse Vest ber departementet om 7 millionar kroner til utvikling av den akuttmedisinske kjeda ved lokalsjukehusa i Helse Førde. Vidare har Helse Vest søkt departementet om 6,5 millionar kroner til Teleslagnettverk i Helse Vest, der Lærdal, Nordfjordeid, Voss, Stord og Odda skal utvikle dette.

Teledialyse ved Lærdal og Nordfjordeid står også høgt på prioriteringslista til Helse Vest. 3 millionar kroner ønskjer dei vert å sette av til å utvikle dialysetilbodet.

Helse Førde sin søknad om midlar til lokalsjukehusa er dermed på 1., 3. og 5. prioritet på ei liste med 10 punkt som Helse Vest har sendt departementet.

Info

Vidar Vie 22.06.2007

Fellesmøte mellom koordineringsrådet og fagrådet

Mon, 14 Jun 2010 13:59:45

Det første møtet i koordineringsrådet og fagrådet, som er dei nye samhandlingsorgana mellom kommunane og Helse Førde, vart gjennomført i dag.

vere ein arena for dialog om samhandling på overordna strategisk nivå
utarbeide forslag til rammeavtalar for samhandlinga (obs. konsultasjonsordninga)
diskutere og gi råd om korleis samhandlinga kan sikre pasientane best muleg tilbod

Fagrådet si hovudoppgåve er å gje fagleg støtte og råd til koordineringsrådet.

På dagens møtet vart det peika på kor viktig det er at kommunane tek eigarskapet alvorleg, og er med på å setje saker på agendaen.

Adm. dir. Jon Bolstad i Helse Førde er leiar i koordineringsrådet til 1. møte i 2008. Då tek kommunane over vervet. I fagrådet skal fagdirektør Hans Johan Breidablik vere leiar.

Her er medlemane i rådet:

Koordineringsrådet:

Nils Gjerland, ordførar Førde
Olav Lunden, ordførar Leikanger
Trude Brosvik, ordførar Gulen
Sonja Edvardsen, ordførar Eid
Gunnar Engan, kommunelege Balestrand
Knut O. Aarethun, Fylkesstyreleiar i KS
Karen Moe, Brukarutvalet
Solfrid Lillebø, Brukarutvalet
Petter Øgar, Fylkesmannen i Sogn og Fjordane
Jon Bolstad, administrerande direktør Helse Førde
Hans Johan Breidablik, fagdirektør Helse Førde
Ole Christian Resusch, klinikkdirektør Psykisk helsevern
Arve Varden, klinikkdirektør Medisinsk klinikk
Anne Margrethe Øvsthus, klinikkdirektør Kirurgisk klinikk Terje Olav Øen, klinikkdirektør Prehospital klinikk

Fagrådet:

Asbjørn Fjose, kommunalsjef Førde kommune

Gunnar Engan, kommunelege Balestrand kommune

Trond Inselseth, kommunelege Vågsøy kommune

Berit Wetlesen, helse- og sosialsjef Stryn kommune

Hans Johan Breidablik, fagdirektør Helse Førde

Olav Hesjedal, avdelingssjef Kirurgisk klinikk Helse Førde

Petter Bugge, Psykisk helsevern Helse Førde

Geir Andvik, avdelingssjef Kreftavdelinga Helse Førde

Astrid Dale, overlege Medisinsk avdeling Helse Førde

Info

Vidar Vie 28.06.2007

Suksesshistorie frå Nordfjord

Mon, 14 Jun 2010 14:02:18

Rådet for psykisk helse har leita opp suksesshistoriar frå distriktspsykiatriske senter i Noreg. Ein av dei fann dei i Nordfjord.

Det er laga ein eigen film frå jakta på dei gode tenestene i dei distriktspsykiatriske sentera. Ein film som viser gode eksempel på openheit, heilskap, nærleik og brukarmedverknad.

I den rosande omtalen av Nordfjord psykiatrisenter heiter det mellom anna:

"Nordfjord psykiatrisenter vektlegger å finne gode løsninger for brukeren i et tett og forpliktende samarbeid med kommune. Nordfjord ble beste DPS i kunnskapssenterets undersøkelse der fastlegene vurderte kvaliteten ved DPSene.

Nordfjord psykiatrisenter er et av tjenestestedene som ble lagt til grunn da helsemyndighetene valgte å satse på DPSer. DPSet har derfor vært et eksempel på hvordan utviklingen ved et DPS kan være.

I utgangspunktet kan steder som Nordfjord ha betydelige utfordringer med å lage godt psykisk helsevern. Vanskelig tilgang på fagfolk, få mennesker og store avstander i opptaksområdet og mangel på tradisjoner er noen slike forhold. Kanskje nettopp derfor har Nordfjord og kommunene funnet fram til arbeidsformer som burde kunne inspirere andre."

Info

Vidar Vie 28.06.2007

Kjøper 70-80 nye senger

Mon, 14 Jun 2010 14:08:13

Helse Førde kjøper inn mellom 70 og 80 nye senger som kan hevast og senkast. - Dette vil lette arbeidsforholda og gjere det betre for pasientane, seier ergoterapeut Endre Kirketeig.

Mange av dagens senger, og då spesielt ved Førde sentralsjukehus, er utslitne. Difor er den komande utskiftinga også svært etterlengta.

- No kjøper vi inn senger som kan hevast og senkast, og det betyr svært mykje for pleiepersonalet som kjem til å få langt lettare arbeidsforhold. I tillegg blir pasientkomforten betra. Mange pasientar vil også lettare kome seg ut av sengene, og kan dermed bli sengeliggande i kortare tid, seier Kirketeig.

Ei gruppe i føretaket har evaluert og prøvd ut senger frå aktuelle leverandørar, og valt ut selskapet føretaket skal inngå kontrakt med. Den første leveransen på 35 senger kan kome i løpet av september. Neste leveranse, på omlag like mange senger, skal kome mot slutten av året.

- I evalueringa har vi lagt vekt på alt frå økonomi, teknikk, haldbarheit og kor brukarvenlege dei er for tilsette og pasientar, seier Nils Arne Haukeland, avdelingssjef for teknisk drift i Helse Førde.

Som bileta under viser så kan den utvalde modellen hevast og senkast med 40-50 centimeter.

- Arbeidsmiljøundersøkingar viser at dette har vore sterkt etterspurt. Difor er det svært gledeleg at vi no får på plass desse sengene, seier Kirketeig.

Info

Vidar Vie 29.06.2007

Nordfjord sjukehus aukar talet senger – Florø reduserer

Mon, 14 Jun 2010 14:11:16

Nordfjord sjukehus aukar med tre senger på medisinsk sengepost, medan Nærsjukehuset i Florø reduserer med tre senger, opplyser klinikkdirektør Arve Varden.

Det har over tid vore fokus på talet senger ved Nordfjord sjukehus. Det er blitt vurdert tal pasientar innlagt på sengeposten på Eid, liggetida, tal utskrivingsklare pasientar og tal øyeblikkeleg hjelp-innleggingar. Dette fokuset har avdekka trong for tre nye senger ved sjukehuset.

- Desse tre sengeplassane blir no oppretta, fortel direktør ved Medisinsk klinikk Arve Varden.

Florø Nærsjukehus skal redusere tal senger ved sengeposten frå 14 til 11.

Bakgrunnen for reduksjonen er at Bremanger kommune har meddelt at dei har avslutta avtalen med Helse Førde frå 2. juli 2007. Det er sengene som er avsett til Bremanger kommune ved Nærsjukehuset som no vert teke vekk.

Info

Finn Ove Njøsen 03.07.2007

Sentralsjukehuset tek over drifta av kafeen i 1. etasje

Mon, 14 Jun 2010 14:14:10

- Vi får betre utnytting av ressursane og mattilbodet. Totalt sett skal dette gje eit betre tilbod til både tilsette og pasientar, samt besøkande og pårørande, seier Torstein Solset, kjøkkensjef ved Førde sentralsjukehus.

1. juli 2007 tok sentralsjukehuset over driftsansvaret for kafeen i første etasje. Ei eiga arbeidsgruppe har utarbeid nytt driftsopplegg der også ei oppgradering av personalkantina i andre etasje er ein del av dette. Kafeen har vore driven av eksterne aktørar i 28 år.

Kjøkkensjef ved sentralsjukehuset, Torstein Solset, har ei eiga intern arbeidsgruppe på kjøkkenet som har planlagt driftsovertakinga.

– Planen er at det skal vere ei driftssamordning mellom personalkantina og kafeteriaen. På denne måten får vi betre utnytting av ressursane og personale ved kjøkkenet. Dermed får polikliniske pasientar og besøkande samla eit betre mattilbod enn i dag, seier Solset.

I kafeteriaen legg kjøkkenet opp til eit mattilbod med god nylaga brødmat, salatar og frukter i skåler, nysteikte vaflar og kaffi. Det vil og verte tilbod om dagens suppe med rundstykke. Elles vil alle polikliniske pasientar, pårørande og besøkande få kjøpe varm mat i personalkantina i 2 etasje der det og vil verte reservert nokre bord til desse.

Det vert innført toprissystem både i personalkantina i 2 etasje og i kafeteriaen (like prisar begge stadar). Tilsette i Helse Førde må identifisere seg ved betaling.

Info

Finn Ove Njøsen 03.07.2007

Betre treningsforhold for kronisk sjuke

Mon, 14 Jun 2010 14:18:46

Pasientar som treng rehabilitering og opptrening skal i løpet av året få langt betre treningsforhold ved Førde sentralsjukehus.

Mykje av utstyret i treningsalen vår er gamalt og nedslite. No kjøper vi inn utstyr som skal gje betre forhold for pasientane, seier sjeffysioterapeut Jocelyn Astbury ved Avdeling for fysikalsk medisin og rehabilitering.

Ergometersykkel med ”spesialsete” er noko av det som blir kjøpt inn. Det vil gje pasientar som ikkje kan nytta oppreist sykkel med vanleg sete høve til å trene kondisjon under opphald ved FSS. Mellom anna gjeld det pasientar med dårleg balanse etter hjerneslag, og pasientar med sjukleg overvekt.

- Kondisjonstrening er svært viktig for mange pasientar som er innlagde til treningsopphald. Manglande utstyr har utelukka sykkeltrening for mange fram til no, seier Astbury.

Kolspasientar
Pulsoximeter med bluetooth teknologi er eit anna apparat som vert kjøpt inn. Det skal nyttast til å måle surstoff i blodet og pulsen under trening. Fysioterapeuten vil ha høve til å observere dette på avstand og kan velje rett treningsnivå for den einskilde og gje pasienten tilbakemelding om framgang under og etter trening.

- Utstyret er først og fremst tiltenkt pasientar med kronisk lungesjukdom, men det vil kunne nyttast til nær sagt alle pasientar i gymnastikksalen, seier sjeffysioterapeuten.

Tilpassa treningsbehov
Stepkassar skal også først og fremst nyttast til styrke og kondisjonstrening til pasientar med kronisk lungesjukdom. Step- trening er ein rimeleg kostnadsmessig investering som gjev stor gevinst til denne sjukdomsgruppa. Også revmatikarar, pasientar under rehabilitering etter hjerneslag og pasientar som har vore sengeliggande over lengre tid, vil ha god nytte av slikt utstyr.

Også dei 25 år gamle, og slitne og bråkete, trekkapparata blir skifta ut.

- Fysioterapeutane vil kunne arbeide meir effektivt med nytt utstyr som er lettare å tilpasse den einskilde pasient. Pasientar vil få nytte moderne utstyr som er nærast lydlaust og som er betre tilpassa treningsbehovet, seier Jocelyn Astbury.

Info

Vidar Vie 27.06.2007

Petter Bugge med i utgreiingsgruppe

Mon, 14 Jun 2010 22:50:22

Petter Bugge er med i ei nasjonal utgreiingsgruppe som skal sjå på samhandling mellom fastlegar og spesialisthelsetenesta. Målet er at dei dårlegaste innan psykiatrien skal få eit betre tilbod.

Petter Bugge, overlege ved
Nordfjord Psykiatrisenter, er med i
utgreiingsgruppa for å oppsummere
kunnskap om samhandling mellom fastlegane (førstelinjetenesta) og spesialisthelsetenesta.

– Vi har lite kunnskap om fastlegane si rolle i arbeidet med pasientar med alvorlege, kroniske, psykiatriske lidingar. Fastlegane bør vere meir aktive i høve denne pasientgruppa, som ofte har svært redusert livskvalitet, seier Petter Bugge.

Kunnskapssenteret har på grunn av si bekymring utnemnt ei gruppe som skal sjå på internasjonal forsking. Dei skal sjå på korleis samarbeidet mellom fastlegane og spesialisthelsetenesta fungerer. Utgreiingsgruppa skal vurdere om forskinga kan seie noko om kva for samhandlingsmodellar mellom fastlegen og spesialisthelsetenesta som er dei beste for pasienten.

Målet med sluttrapporten, som skal liggje føre om ikkje lenge, er å legge grunnlaget for ei vidare diskusjon om korleis dette samarbeidet bør organiserast i Noreg.

Det er Kunnskapssenteret under Sosial og helsedirektoratet som har oppnemnd gruppa.

Info

Finn Ove Njøsen 09.07.2007

Rask og moderne behandling for hjartepasientar

Mon, 14 Jun 2010 22:56:53

Helse Førde skal investere i underkant av ein million kroner i EKG-utstyr. – Eit klart framsteg for hjartemedisinen i Sogn og Fjordane, seier overlege Trine Vingsnes.

Helse Førde skal investere i underkant av ein million kroner i EKG-utstyr. – Eit klart framsteg for hjartemedisinen i Sogn og Fjordane, seier overlege Trine Vingsnes.

Elektrokardiografi (EKG, av og til også kalla hjartediagram) er ei svært viktig og vanleg hjarteundersøking. Legane er avhengige av EKG for å diagnostisere og behandle mellom anna akutt hjarteinfarkt og forstyrringar i hjarterytmen.

No skal Helse Førde kjøpe inn ein EKG-database og nye EKG-apparat til sjukehusa i Lærdal, Førde og Nordfjordeid.

- Det er ofte nødvendig å samanlikne nytt og gamalt EKG for å kunne gje rett behandling ved akutt hjartesjukdom. Til no har EKG vore skrivne ut på papir og lagra i pasientjournalen på sjukehusa. Etter at vi innførte elektronisk pasientjournal, har vi hatt ønskje om også å kunne lagre EKG elektronisk i ein eigen database. Då kan alle tidlegare EKG straks framskaffast, og legane vil kunne gje sikker diagnose.

Særleg gjeld det akutt hjarteinfarkt der det hastar med å kome til behandling, seier Vingsnes som arbeider på
Medisinsk avdeling på
Førde sentralsjukehus.

- Rask og moderne behandling
Ambulansane i fylket tek EKG og overfører det til vakthavande lege på sentralsjukehuset også i dag. Dette systemet vil fungere betre og sikrare når EKG-databasen er oppe og går. Då vil EKG frå ambulanse bli automatisk lagra.

- I heile Europa har denne utviklinga pågått nokre år og erfaringane er svært gode. EKG-database skal kjøpast inn som fellesprosjekt for heile Helse Vest. Dette er ei investering som sikrar at hjartepasientane i vårt område får rask og moderne behandling. I tillegg får vi sikrare og enklare lagring av vesentleg pasientinformasjon. EKG-databasen vil bli eit klart framsteg for hjartemedisinen i Sogn og Fjordane, seier Trine Vingsnes.

Info

Vidar Vie 27.06.2007

Første dag "utan" lønsslipp i Helse Førde

Mon, 14 Jun 2010 23:00:47

Torsdag 12. juli er ein merkedag for tilsette i Helse Førde. Det er slutt på den tradisjonelle lønsslippen på papir. Alle tilsette har fått sin eigen portal på nett for å laste ned sin eigen elektroniske lønsslipp.

Lønsslippen for tilsette i Helse Førde vil frå i dag av berre vere tilgjengeleg på web.

Dette er eit ledd i Helse Førde sitt moderniseringsprogram MOT (Medarbeidar-Organisasjon-Teknologi).

Tilsette i Helse Førde får no si eiga webside der dei mellom anna kan hente sin eigen lønsslipp. Lønsslippen vil berre kome dei tilsette i elektronisk versjon frå juliløna. Det vil seie at dei tilsette kan hente og lagre slippen på sin private PC eller hente den ut på ein jobb-PC.

Heile Helse Vest skal innføre dette systemet i løpet av dette året. Dei tilsette vil få tildelt passord og brukarnamn for å nytte si eiga web-side. Etterkvart vil alle få høve til fleire bruksområde på nettsida si, mellom anna eigen turnusliste m.m.

I denne omgang gjeld omlegginga berre lønsslippen.

I dag og i morgon er folk frå løns- og personalkontor tilgjengeleg for opplæring av tilsette for å opne si eiga nettside.

– Pågangen for opplæring har ikkje vore stor, noko som god informasjon i førekant er ein av grunnane for, trur Jan Løland. Løland er lønningsleiar i Helse Førde.

Løland har brukt ein del av tida si i dag, under opplæringa, å køyre ut lønsslippar til sommarvikarar som ikkje er registrert i Helse Førde sitt system som mottakar av elektronisk lønsslipp.

Tidlegare i moderniseringsprogrammet har Helse Førde innført jobbsøking elektronisk via internett.

Info

Finn Ove Njøsen 12.07.2007

Nye rutinar for rekvirering av sjuketransport

Mon, 14 Jun 2010 23:04:38

Helse Førde har laga nye retningslinjer for rekvirering av pasientreise – tidlegare kalla sjuketransport.

Det er helseføretaket som betaler for all pasienttransport. Dette har skjedd etter at ansvaret er flytta frå Rikstrygdeverket.

Det er nytta ei arbeidsgruppe for å kome med retningslinjer for rekvirering av pasienttransport, der målet er best mogeleg ressursutnytting og lågare kostnader på pasientreise.

Helsepersonellet i Helse Førde har sett i verk strengare vurdering for bruk av ekstraskyss, og vert av pasientar og pårørande i mange høve møtt med at dei er for strenge når det gjeld å skrive ut rekvisisjon for ekstratransport med drosje og tilsvarande. Vi ber no om at alle eksterne rekvirentar brukar strengt medisinsk skjønn i samsvar med retningslinjene som ligg vedlagd. Pasientar som treng ekstraskyss grunna trafikkale tilhøve skal visast til køyrekontoret tlf. 57 83 97 00 ( kl 0830-1400), eventuelt til lokalt trygdekontor på reiser innan kommunen.

Pasientar som nytter rutetilbod og eigentransport, vil få kostnadane refundert på lokalt trygdekontor (NAV) som før, men Helse Førde refunderer dette til NAV.

Det vert arbeidd med eit felles nasjonalt datasystem for sjuketransport (NISSY) som gjev rekvirentane høve til direkte rekvirering av oppdrag via pasientjournalsystemet. Helse Førde har tatt systemet i bruk og vi reknar med at tekniske løysingar for rekvirentane i norsk helsenett vil vere på plass ved årsskiftet.

Har ein spørsmål om retningslinjer for pasienttransport kan ein kontakt Inge Horstad, telf. 57 83 97 23 eller epost til Inge Horstad.

Info

Finn Ove Njøsen 16.07.2007

Kjøper inn 20 hjartestartar

Mon, 14 Jun 2010 23:09:02

Helse Førde byter ut dei gamle hjartestartane. Lærdal sjukehus står først i køen.

- På investeringsbudsjettet for 2007 er det sett av midlar for kjøp av nye hjertestartarar til sjukehusa og nokre av institusjonane i Helse Førde. Dagens hjartestartarar er godt vedlikehaldne, men fleire av maskinene er nærare 15 år gamle, seier Stian Sægrov som har leia arbeidsgruppa som har arbeidd med utskiftinga.

Gruppa har vurdert behovet for nye standardiserte hjartestartarar (defibrillatorar) og utplassering av dei. Val av utplassering er gjort ut frå tilbakemeldingar frå ulike avdelingar, og historiske tal over registerte hjartestans i avdelingane.

Eldst utstyr i Lærdal
- Totalt snakkar vi om rundt 20 hjartestartarar. Lærdal sjukehus har det eldste utstyret og difor skiftar vi ut der første, seier Sægrov.

Val av leverandør og produkt skal vere klart til hausten. Det vert særleg lagt vekt på at produkta skal vere framtidsretta, brukarvenlege og sjølvinstruerande. Årsaka er at dette er medisinteknisk utstyr som relativt sjeldan vert nytta.

- Vi går inn for å kjøpe inn to ulike produkt. På sengepostar og andre institusjonar skal det vere enkle og sjølvinstruerande maskiner. På overvakingsavdelingar ved lokalsjuka og ved intensiv og akuttmottak på Førde sentralsjukehus skal det kome meir avansert utstyr, seier Sægrov.

Info

Vidar Vie 25.06.2007

Stabile fødselstal i fylket

Mon, 14 Jun 2010 23:11:26

I første halvår 2007 var det 553 fødslar ved sjukehusa i Helse Førde. Det er ein nedgang på fire, dersom vi samanliknar med første halvår i 2006. Lærdal aukar medan Eid og Førde har hatt nedgang i tal fødslar.

Samanlikna med første halvår i 2006 har Lærdal sjukehus hatt ein auke på 13 fødslar. Førde sentralsjukehus har hatt ein nedgang på 10, medan Nordfjord sjukehus har hatt ein nedgang på 7 fødslar. Det er avdelingssjef ved Kvinneklinikken i Helse Førde, Agnete Settem Dissing som opplyser dette.

Fødselstala, Helse Førde, første halvår:

	30.06 2006	30.06 2007
Førde	372	362
Lærdal	42	55
Eid	143	136
Sum:	557	553

Info

Finn Ove Njøsen 17.07.2007

Skal avdekke dårleg hørsel hos små born

Mon, 14 Jun 2010 23:15:36

Nokre born er fødde med hørselstap. No kjøper Helse Førde inn utstyr som gjer helsepersonellet i stand til å oppdage det.

- Det er nasjonalt bestemt at det skal gjevast tilbod om hørselsundersøking av alle nyfødde, for tidlegast mogeleg å oppdage alvorlege høyretap. Lydstimulering av hørselsbaner og hjerne er viktig tidleg i livet. Difor bør også hørselstap oppdagast så tidleg som mogeleg. Ny teknologi gjev oss høve til det, ved hjelp av objektiv måling av hørselsevna, utan medverknad frå pasient, seier avdelingssjef Helge Hagen ved Øyre-, nase-, halsavdelinga i Helse Førde

Screeningutstyret skal plasserast i fødeavdelingane i Helse Førde, og undersøkinga skal gjerast av personalet som arbeider der. Dersom det vert oppdaga noko unormalt ved den første undersøkinga så vert det gjort utvida hørselsundersøking ved hørselssentralen FSS. Ved hørselssentralen må det såleis investerast i meir avansert utstyr, som måler om lydimpulsane når hjernen, såkalla hjernestammeaudiometri.

- Slepp å reise til Haukeland
Helse Førde har sett av over ein halv million kroner til utstyret, og målet er at det skal vere på plass i løpet av 2007.

- Hjernestammeaudiometriundersøkinga har hittil ikkje vore tilgjengeleg ved hørselssentralen på Førde sentralsjukehus, og aktuelle pasientar må i dag sendast til Haukeland for slik undersøking. Vi vonar med dette å kunne tilby hørselsmåling av alle nyfødde i Sogn og Fjordane, og meiner å lettare kunne avdekke behandlingstrengande hørselstap svært tidleg, slik at desse kan kome i behandling, seier Hagen.

Info

Vidar Vie 20.06.2007

Helse Førde kjøper nye respiratorar

Mon, 14 Jun 2010 23:20:49

Kvart år blir over 100 pasientar behandla med respirator ved Førde sentralsjukehus på grunn av pustestans. No kjøper føretaket inn nye og betre maskiner.

- Respirator er ei maskin som gir pustehjelp til kritisk sjuke pasientar, og er det viktigaste tekniske hjelpemiddelet på ei intensivavdeling. Det føregår ei rivande utvikling på dette feltet. Moderne respiratorar tilpassar seg i stadig større grad pasienten som opplever mykje mindre stress. Vi ser difor at tida på respirator blir kortare. Mange pasientar, som før blei lagt i narkose med et plastrør ned i luftrøret, kan no få tilstrekkelig pustehjelp ved hjelp av moderne respirator og maskebehandling, seier anestesioverlege Rune Larsen ved intensivavdelinga på Førde sentralsjukehus.

Investerer to millionar
Helse Førde skal investere om lag to millionar kroner i nye respiratorar i 2007. I første rekkje som ei erstatning og oppgradering av eksisterande utstyr. Førde sentralsjukehus har det største behovet. Dei nye maskinene blir difor plasserte der.

- I anbodet vil det også bli teke med ein opsjon for oppgradering av utstyr i Lærdal og på Nordfjordeid, seier avdelingssjef Jon Erik Skei ved Avdeling for medisinsk-teknisk utstyr.

Utviklinga innan medisinsk-teknisk utstyr går raskt. Med tanke på tryggleiken er det viktig at ustyret er standardisert slik at alle som skal bruke det kjenner det godt.

121 på Førde sentralsjukehus i fjor
- Dette er svært avansert utstyr som krev høg kompetanse hos pleiarar og legar. I praksis er det berre intensivavdelinga og barneavdelinga på Førde sentralsjukehus, og overvakingspostane på Eid og i Lærdal, som skal ha slikt utstyr, supplerer Rune Larsen.

Han opplyser at 121 pasientar vart behandla med respirator på intensivavdelinga på Førde sentralsjukehus i fjor. Nesten halvparten var over 75 år gamle, og behandlingsresultata var svært gode.

- I vinter måtte vi fleire gongar sende pasientar til Haukeland fordi vi ikkje hadde stor nok kapasitet. Førde sentralsjukehus treng difor minst fire respiratorar. Det betyr minst ein meir enn i dag, seier Larsen.

Info

Finn Ove Njøsen 27.07.2007

Pasienthjelpar i Helse Vest

Mon, 14 Jun 2010 23:23:53

- Eg håpar dette skal gi eit mykje betre tilbod til pasientane. Her vil dei få personleg og individuell oppfølging og praktisk hjelp til å finne fram, seier den nye pasienthjelparen Liv Torunn Rundhovde. Tenesta startar opp 20. august

Etter sommaren startar Helse Vest, som første helseregion, opp ei heilt ny teneste. Her kan pasientar få hjelp til praktiske ting dersom dei ønskjer å bruke retten sin til å velje sjukehus.

- Dette er noko som har mangla sidan pasientane fekk retten til å velje sjukehus. Eg jobba sjølv med inntak av pasientar når dette kom, og følte det var noko som mangla mellom oss på sjukehuset og pasientrettleiaren som svarar på det grøne nummeret til Fritt sjukehusval, seier ho.

Liv Torunn Rundhovde har lang fartstid frå Stavanger Universitetssjukehus. Der har ho arbeidd i 19 år, dei siste 19 åra som oversjukepleiar på ortopedisk avdeling.

- Eg ser fram til den kontakten med pasientane eg vil få som pasienthjelpar, seier ho. Rundhovde trur den største utfordringa blir å få gjort tilbodet kjent blant pasientar, men også blant fastlegar og på sjukehusa.

- Fastlegane som viser pasientane til behandling, og dei som behandlar søknadene på sjukehuset, er viktige. Dette skal vere eit tilbod til dei også, difor håper eg tenesta blir ålment kjent og akseptert også i desse gruppene, seier ho.

Etter sommaren vil ho vere klar på telefonen.

- Det er ikkje ideelt å starte opp tenesta før bemanninga på sjukehusa og legekontora er tilbake etter ferieavviklinga. I tillegg er det ein del praktiske ting som må på plass. Difor ser vi for oss oppstart 20. august, forklarer ho.

Info

Finn Ove Njøsen 27.07.2007

Feil og mistydingar i De Facto-rapport

Tue, 15 Jun 2010 07:19:40

Den 12. august 2007 la De Facto fram rapporten ”Den enes brød ….” som omhandlar plan for ortopediske tenester i Helse Førde. Rapporten inneheld dessverre mange feil og mistydingar.

Plan for ortopediske tenester i Helse Førde vart einstemming vedteken i styret for Helse Førde 27. april 2007. Det har vore brei semje om innhaldet i rapporten både blant ortopedane og dei andre tilsette sine representantar.

Plan for ortopedisk tenester er i første rekkje ein fagplan som syter for at Helse Førde har eit heilskapleg og godt nok ortopeditilbod til innbyggjarane i Sogn og Fjordane.
I tillegg legg den til rette for betre og lettare samarbeid mellom ortopedane i ortopedisk avdeling. Planen bidreg til eit større fagmiljø og tek i vare Helse Førde sitt ansvar som utdanningsinstitusjon innan ortopedi. Den medfører betre undervisning av legar i spesialisering , turnuslegar og medisinske studentar. Planen utviklar vidare funksjonsfordelinga som er basert på den kompetansen ortopedane på dei ulike sjukehusa har. Difor er t.d. ryggkirurgi lagt til Nordfjord sjukehus, medan knekirurgi er lagt til Lærdal sjukehus.

Gruppa som har jobba fram ortopediplanen var samansett av ein ortoped frå kvart av sjukehusa våre: Truls Jellestad, Lærdal sjukehus, Bengt Erik Larsson, Nordfjord sjukehus og Svenning i Lida, Førde sentralsjukehus. I tilegg var fagdirektør, klinikkdirektør, tillitsvalt og vernetenesta representert i gruppa.

Gruppa sitt mandat var å vurdere kva innhald og dimensjon ortopeditilbodet i Helse Førde må ha for å vere fagleg forsvarleg. Vidare skulle gruppa vurdere kva tilbod og funksjonar Helse Førde må ha for å kunne vere ein utdanningsinstitusjon for ortopedar. Til slutt skulle dei kome med forslag til lokalisering og oppgåvefordeling mellom institusjonane. Lokaliseringa og oppgåvefordelinga skulle vere fagleg forsvarleg, skulle ta omsyn til brukarane sine ynskje om nærleik og tilgjenge og stette kravet til effektiv bruk av ressursane.

Rapport av desember 2006 om ”Traumesystem i Norge – forslag til organisering av behandlinga av alvorleg skadde pasientar” og rapport om ”Lokalsykehusenes akuttfunksjoner i en samlet behandlingskjede” har vore viktige dokument i plangruppa sitt arbeid sidan desse rapportane gir retningslinjer for korleis helsetenesta i Noreg skal sikre kvalifisert hjelp til skadde pasientar. Plangruppa såg på ”Lokalsjukehusrapporten” som så viktig at gruppa avventa dei sentrale signala før konklusjonane vart dregne.

I den nasjonale gruppa som greidde ut lokalsjukehusa sine akuttfunksjonar var to av medlemmane frå Sogn og Fjordane, Svein Kåre Senneset frå Årdal kommune og overlege Bengt-Erik Larsson frå Nordfjord sjukehus. Vi vil gjere merksam på at i den nasjonale gruppa var konklusjonane einstemmige slik også konklusjonane frå plangruppa i Helse Førde var det. For Helse Førde si plangruppe var det sjølvsagt ein styrke at overlege Bengt-Erik Larsson var deltakar både på nasjonalt og lokalt nivå.

De Facto sin rapport, som er bestilt av Aksjonsgruppa for Nordfjord sjukehus, ser ut til å oversjå dei nasjonale føringane. I tillegg til å framstå som ei meiningsytring, har rapporten også mange direkte feil og mistydingar.

Nokre døme er:

Dei økonomiske konsekvensane i ortopediplanen er korrigerte prognoser for 2007 i forhold til budsjett 2007. De Facto har nytta tal for DRG poeng frå tertialrapporten som gjeld heile Helse Førde ( 232 poeng) og ikkje berre ortopedien. Dermed blir også resten av reknestykket galt.
Det er lagt inn auka utgifter til vikarar, hyblar, reiser, vask, mat og reinhald. Noko De Facto kunne fått stadfesta ved å kontakte Helse Førde.
Auka utgifter til ambulanse, luftambulanse og energi er ikkje lagt inn, fordi planen heller ikkje medfører endringar som gjer det nødvendig.
De Facto meiner at styrevedtaket i 2004 om å auke ortopedisk aktivitet ved Nordfjord sjukehus ikkje er følgt opp. Dette er ikkje rett. Den ortopediske aktiviteten, målt i DRG-poeng, har auka med nærare 60 % sidan 2004.

Det er ikkje korrekt at fleire fødande enn venta reiste til Volda ved stenginga i jule- og nyttårshelga 2006. I stengingsperioden var det to fødande som reiste dit for å føde.

Rapporten skriv at gruppa fekk streng beskjed om ikkje å ta opp fødetilbodet. Dette er ikkje korrekt. Helse Førde avventar dessutan ei nasjonal arbeidsgruppe som vurderer fødselsomsorga i Noreg.

Helse Førde sin erfaring frå tidlegare samarbeid med forskingsinstitusjonar er at rapportar vert sendt våre fagfolk til gjennomlesing før publisering. På den måten vert direkte feil luka ut før offentleggjering og mange mistydingar vert såleis unngått.

Vi vil også stille spørsmål om rapporten ”Den enes brød …” kunne vorte betre dersom fleire medlemmar av plangruppa hadde vorte nytta som informantar då De Facto henta inn data.

Verknaden av den vedtekne ortopediplanen kan i korte trekk oppsummerast slik:

For å ta ned generell overkapasitet innan ortopedi i Helse Førde vart det ved Nordfjord sjukehus teke vekk fire ortopediske senger. Samstundes skal det opprettast to senger for rehabilitering. Såleis misser Nordfjord sjukehus to senger medan Førde sentralsjukehus misser seks senger, Lærdal sjukehus sju senger og Nærsjukehuset misser all ortopedi.
Det er full vaktberedskap for vurdering av ortopedipasientar heile døgnet ved sjukehusa i Lærdal og på Nordfjordeid. Det er klare retningslinjer for kva skadar ein skal behandle ved desse sjukehusa og kva skader som skal sendast vidare til Førde sentralsjukehus eller Haukeland universitetssjukehus. Dette er i praksis ei skriftleggjering av den etablerte praksis som har vore i Helse Førde dei siste åra. Skadar vert, slik som før, i hovudsak handsama ved Nordfjord og Lærdal sjukehus, og eventuelt operert på dagtid.
Ved Nordfjord sjukehus og Lærdal sjukehus skal ortopediske operasjonar gjennomførast mellom klokka 08.00 og 18.00, alle kvardagar. Av omsyn til andre avdelingar er det passiv vaktberedskap innan anestesi og operasjon resten av døgnet.
Som akuttsjukehus må Førde sentralsjukehus ha kontinuerleg operasjonsberedskap i aktiv vakt. Dette gjeld anestesipersonell, operasjonspersonell og intensivpersonell.
For å skape større og meir robuste fagmiljø er ortopedien i Helse Førde samla i ei avdeling med ortopediske seksjonar på Lærdal sjukehus, Nordfjord sjukehus og Førde sentralsjukehus. Samlinga betyr at ortopedar ved Lærdal og Nordfjordeid kan få arbeidsdagar i Førde, og at legar i Førde kan få arbeidsdagar ved dei to andre sjukehusa. Ambulerande legar er i tråd med ønskja frå dei som arbeider med lokalsjukehusstrategien.
Funksjonsfordelinga betyr mellom anna at Nordfjord sjukehus skal ta hand om rygg- og skulderkirurgi.
Legar i spesialisering skal få ei fullverdig utdanning ved å ”gå i lære” hjå alle ortopediseksjonane i Helse Førde
Både i styringsdokumentet og i vedtak i styret i Helse Førde vert det lagt vekt på å auka dagkirurgisk verksemd. Rapporten frå ortopedigruppa peikar på denne utfordringa og seier at det snarast bør planleggast og leggast til rette for meir dagbehandling ved Førde sentralsjukehus.

Anne Margrethe Øvsthus
Direktør Kirurgisk klinikk
Helse Førde

Info

Vidar Vie 15.08.2007

8 av 10 får behandling lokalt

Tue, 15 Jun 2010 07:23:30

80 prosent av pasientane frå Sogn og Fjordane fekk behandling i eige helseføretak i 2006. I følgje Samdata-rapporten reiser dei ikkje oftare ut av heimfylket enn pasientar andre stadar i landet.

Nærare bestemt 79,3 prosent av dei dag- og døgnopphalda pasientar frå Sogn og Fjordane hadde på sjukehus i 2006 var på sjukehusa til Helse Førde, viser rapporten. Det betyr at sogningane og fjordingane nytta eigne sjukehus like ofte som dei som soknar til Helse Bergen.

Tilsvarande tal i Helse Fonna var 74,1 prosent og i Helse Stavanger 86,8 prosent. Det er elles store variasjonar mellom dei ulike helseføretaka i landet på dette punktet.

Bergen er alternativet
Dei av pasientane frå Sogn og Fjordane som nyttar andre sjukehus reiser i stor utstrekning til Helse Bergen. Berre 6,5 prosent brukte behandlingstilbod utanfor Helse Vest, viser rapporten. Det er færre enn i dei andre føretaka i regionen.

- Tala som kjem fram i rapporten viser at innbyggjarane i Sogn og Fjordane nyttar lokale sjukehus i like stor grad som innbyggjarar i andre fylke. Det kan sjå ut som at ein stor del reiser til Haukeland fordi vi ikkje har behandlingstilbod for desse lidingane i vårt fylke. Ei anna gruppe nyttar Fritt sjukehusval for å kome raskare til på sjukehus, seier fagdirektør Hans-Johan Breidablik i Helse Førde.

Store utgifter til gjestepasientar
Frå og med 2006 måtte Helse Førde betale når pasientar frå Sogn og Fjordane nytta andre sjukehus. Både rekninga frå sjukehusa, og reiseutgiftene, utgjer store summar for føretaket.

- Når vi får nye oppgåver tek det alltid litt tid før vi har nok erfaringsgrunnlag til å budsjettere nøyaktige utgifter. På dette området har vi fått større utgifter enn budsjettert, så langt i år. Difor har vi hatt sterk fokus på dette temaet i føretaket. Samdata-rapporten viser at det ikkje var fleire som reiste ut i 2006 enn i 2005, seier økonomidirektør Ørjan Sandvik.

Utgiftene til gjestepasientar ser ut til å stige i 2007, men det er framleis for tidleg å seie at pasientane nyttar andre sjukehus i større grad enn før. Trenden er den same også i andre helseføretak.

- Vi må vente eit år til før vi har fasiten, og då må også sjå våre tal opp mot tala frå andre føretak. Auken i utgifter kan for eksempel skuldast at sjukehusa er ”flinkare” til å fakturere andre føretak til rett tid enn tidlegare. Det kan også skuldast nye og dyre behandlingsformer. Samstundes er det naturleg å tru at større kunnskap om Fritt sjukehusval vil gjere at pasientane reiser meir i framtida, seier Sandvik.

Info

Vidar Vie 15.08.2007

Føreskriving og refusjon av TNF-hemmarar

Tue, 15 Jun 2010 07:40:27

Frå 010606 blei det innført nye regler for refusjon av TNF-hemmarar der helseføretaka skal betale for legemiddela. Samtidig blei det innført ein ny reseptgruppe, H-reseptar.

Av: Fag- og kvalitetssjef Liv Rustenberg, Apotekene Vest HF

Kva helseføretak som skal betale er basert på bustadkommunen til pasienten, uavhengig av behandlingsstad. Det er ingen restriksjonar på kva legar som kan føreskrive TNF-hemmarane.

Det er derimot avgrensingar med omsyn til kva føreskrivarar som helseføretaka refunderar.

Frå 1. juni 2007 er ingen "gamle" reseptar lenger gyldige. Helseføretaka vil difor berre refundere TNF-hemmarane når legen er tilsett i eit helseføretak eller legen har avtale med eit av helseføretaka.

Følgjande har avtale med Helse Vest:

Avtalespesialist:	Kontoradresse:	Poststed:
Danielsen, Helge	Uttrågt. 19	Voss
Livden, John Karsten	Teatergt. 37	Bergen
Morken, Tore	Valckendorfsgt. 9	Bergen
Rødland, Ole	Valckendorfsgt. 9	Bergen
Aarbrot, Steinulv	Spesialistsenteret på Straume	Straume
Johannessen, Arild Erik	Strandgt. 200	Bergen
Wiig, Gunnar	Lars Hilles gt. 20a	Bergen
Finnenes, Kjell K.	Haakon VIIs gt. 7	Bergen
Omdal, Roald	Lektor Mogrensgt. 16	Stavanger

Info

Vidar Vie 15.08.2007

Redusert kapasitet ved polikliniske konsultasjonar hos nevropsykolog

Tue, 15 Jun 2010 07:43:12

AFMR har ikkje høve til å ta imot nye tilvisningar med spørsmål om nevropsykologisk vurdering ved vår poliklinikk i haustsemesteret 2007, det vil seie ut året.

Dersom det er særskilt ynskje om revurdering av pasientar som tidlegare har vore utgreidd hos oss, vil ein etter søknad tilstrebe å imøtekomme dette.

Vi tillet oss å minne om spesialist i klinisk nevropsykologi Anne-Mari Bergedalen, Førde Nevropsykologiske Senter, som gjerne har kapasitet til å ta i mot nye tilvisingar:

Kontor/besøksadresse: Handelshuset, Storehagen 9, 6800 Førde.

Postadresse: Postboks 602, 6804 Førde.

Telefon: 91 72 64 53

Info

Knut Olav Halseth 16.08.2007

Offisiell oppstart for pasienthjelparen måndag

Tue, 15 Jun 2010 07:47:15

Ho har allereie tjuvstarta litt, men måndag 20. august går det offisielle startskotet for Noregs første pasienthjelpar. Då har Helse Vest, som første helseregion, på plass ei heilt ny teneste.

Hos Liv Torunn Rundhovde kan pasientar få praktisk hjelp og informasjon dersom dei ønskjer å bruke retten sin til å velje sjukehus.

- Dette er ein ny servicefunksjon, som vi har store forventningar til, seier kommunikasjonsdirektør Bjørg Sandal i Helse Vest. Sandal understrekar at tilbodet også er retta inn mot pårørande, fastlegar og sjukehuspersonell.

- Alle er velkomne til å ta kontakt!

Gratis telefonnummer 800 41 005

Hovudpersonen sjølv har også god tru på tenesta.
- Eg meiner dette vil gi ein mykje betre service til pasientane. Her vil dei få personleg og individuell oppfølging og praktisk hjelp til å finne fram i sjukehussystemet, seier Liv Torunn Rundhovde. Ho er å treffe på gratisnummeret 800 41 005 og e-postadressa pasienthjelp@helse-vest.no

Styrka rettar – betre service

Bakgrunnen for den nye satsinga er pasienten sin rett til sjølv å bestemme kor han vil la seg behandle. Mange veit at dei har retten, men veit ikkje korleis dei skal gå fram for å nyttiggjere seg denne moglegheita.

- Tilbakemeldingar viser at mange synes det er uoversiktleg og komplisert å ta seg fram i sjukehussystemet. I tillegg har mange spørsmål som dei ikkje veit kor dei skal stille. Med denne stillinga ønskjer vi å betre tilbodet til pasientane og gjere dei betre i stand til å bruke rettane sine, seier Bjørg Sandal.

Utviding av eksisterande tilbod

Liv Torunn Rundhovde har lang fartstid frå Stavanger Universitetssjukehus. Der har ho arbeidd i 24 år, dei siste åra som oversjukepleiar på ortopedisk avdeling. Som pasienthjelpar skal ho jobbe i forlenginga av det eksisterande tilbodet via Fritt sjukehusval.
Legekontora og sjukehusa på Vestlandet er allereie informert om det nye tilbodet i form av brev og plakatar med info om kva tenesta går ut på og korleis ein når pasienthjelparen.

Kontaktpersonar:

Kommunikasjonsdirektør Bjørg Sandal i Helse Vest RHF, mob. 41 53 38 07

Pasienthjelpar Liv Torunn Rundhovde i Helse Vest RHF, mob. 41 53 38 52

Info

Vidar Vie 17.08.2007

Betre røntgenutstyr til Nordfjord sjukehus

Tue, 15 Jun 2010 07:51:22

Helse Førde rustar opp radiologiutstyret ved Nordfjord sjukehus. Det nye digitale utstyret gjer seksjonen meir effektiv, aukar kapasiteten og gjer dei mindre sårbare for havari.

Utstyret som skal skiftast ut ved Nordfjord sjukehus er no 21 år gammalt. Det eine er eit gjennomlysningsapparat, og det andre eit mobilt røntgenapparat som vert nytta når pasienten ikkje kan flyttast til radiologisk seksjon.

- Den nye digitale skjelett/thorax lab'en ved Nordfjord sjukehus blir den første av sitt slag i Helse Førde. Den nye maskina skal være ei "all-round" maskin, dvs at ein må kunne ta dei fleste undersøkingar på den, inkludert skjelett, thorax/lunge, liggande og ståande undersøkingar, samt undersøkingar i seng. Unntaket er gjennomlysningsundersøkingar, men vi har ein digital gjennomlysningsmaskin frå 1999 som vil kunne ta alle slike undersøkingar hjå oss, seier seksjonsleiar Bjørn Tore Haugen.

Inn i den digitale tida
Dagens utstyr er i god stand, men det er svært vanskeleg å skaffe delar ved feil eller havari. Dessutan har det vore tungvint å bruke

- Det digitale utstyret sender bileta over til arbeidsstasjon og lagringseining i løpet av få sekund. Vi slepp dermed å fysisk transportere, framkalle, og eventuelt avlese ein filmkassett eller ei fosforplate. Den vil også vere betre ergonomisk for dei tilsette, i og med at dei ikkje lenger treng å handtere tunge biletplater, seier Haugen.

Auka kapasitet og betre bilete
Det nye utstyret fører ikkje til at sjukehuset kan utvide undersøkingsspekteret. Men det vil gje mange andre positive utslag.

- Vi blir meir effektive og kan doble kapasiteten på røntgen av Thorax/lunge. Vi blir også langt mindre sårbare for havari og uventa driftsstans. Biletkvaliteten vert betre, og stråledosen til pasienten er forventa å minke, seier Haugen.

Også Lærdal sjukehus skal få eit nytt mobilt røntgenapparat. Den samla investeringa er på om lag 2,5 millionar kroner, og Helse Førde sitt ambisiøse mål er at utstyret skal vere på plass i desember.

Info

Vidar Vie 20.08.2007

Verdas "sprøaste" menn og kvinner

Tue, 15 Jun 2010 08:28:01

Norske menn og kvinner er blant verdas "sprøaste". Kvart år brekk 9 000 nordmenn lårhalsen og 15 000 handleddet. Under rehabiliteringsveka kan du lære meir om temaet.

Kvifor norske menn og kvinner så ofte brekk bein, har forskarane førebels ikkje svar på. I samband med rehabiliteringsveka 2007 vert det arrangert eit ope temamøte om osteoporose torsdag 6. september kl 15.30-18.00 i Lærings og meistringssenteret sine lokaler på Vie i Førde

Temamøte er ope for alle som vil vite meir om osteoporose.

Tema:
Å leve med osteoporose
Kva er osteoporose?
Behandling og førebygging av osteoporose
Presentasjon av rehabiliteringstilbud for osteoporosepasientar ved lærings og meistringssenteret avdeling Florø

Førelesarar:
Brukarrepresentant Sissel Godø
Dr. Geir Kittang
Dr. Jan Noreide
Spl Gro Utkilen
Spl Nina Midtbø

Påmelding: tlf 41530548 / 41530523

Epost: lms@helse-forde.no

Pris: kr 50,-. Lett servering

Info

Vidar Vie 21.08.2007

Helse Førde kjøper nytt anestesiutstyr

Tue, 15 Jun 2010 08:31:43

Førde sentralsjukehus og Lærdal sjukehus skal få nye anestesiarbeidsstasjonar

Førde sentralsjukehus og Lærdal sjukehus skal få nye anestesiarbeidsstasjonar.

Nyinnkjøpet vil bli ei komplettering av eksisterande anestesiapparatparken, og inneber difor ei kvalitetssikring ved at ein tek sikte på å få skifta ut gamalt utstyr – og få på plass ein standardisert utstyrspark ved kvart sjukehus.

Søvnmonitorering under operasjon er ein ny teknologi som blir teken i bruk i Helse Førde i samband med utstyrskompletteringa. Den måler kor djupt pasienten søv, og gir personalet ved anestesiavdelinga ei ekstra rettesnor for korleis anestesien skal gjevast under operasjon, seier Helge Eide, oversjukepleiar ved Avdeling for akuttmedisin i Helse Førde.

Anestesiapparata blir brukt under operasjonen for å gje pasienten rett mengd luft, oksygen og anestesimiddel. Utstyret som no vert skifta ut er 20 år og mekanisk, medan det nye har elektroniske reguleringsmekanismar og overvaking.

- Vi kan gje sovemedisin blanda i den lufta pasienten pustar inn, slik at vi kan halde pasienten sovande, og til dels smertefri berre ved å la pasienten puste via anestesiarbeidsstasjonen. Gjennom apparatet overvakar vi puls, oksygenmetting i blodet, blodtrykk, EKG, muskelkraft, ventilasjonstrykk i lungene, temperatur, arterietrykk og venetrykk, seier Eide.

Fristen for å levere anbod er 3. september, og utstyret kjem til å bli kjøpt inn i løpet av hausten.

Info

Vidar Vie 22.08.2007

NOKLUS utvidar tilbodet i Helse Førde

Tue, 15 Jun 2010 08:35:12

NOKLUS ( Norsk kvalitetsforbedring av laboratorievirksomhet utenfor sykehus) utvidar tilbodet sitt i Helse Førde. Bioingeniør Marit Steinsund er tilsett ny i prosjektstilling frå 1. august

NOKLUS ( Norsk kvalitetsforbedring av laboratorievirksomhet utenfor sykehus) utvidar tilbodet sitt i Helse Førde. Bioingeniør Marit Steinsund er tilsett ny i prosjektstilling frå 1. august.

NOKLUS (Norsk kvalitetsforbedring av laboratorievirksomhet utenfor sykehus) arbeider for at laboratorieanalysar blir rekvirert, utført og tolka rett i samsvar med pasienten sitt behov for utredning, behandling og oppfølging. Dei fleste sjukeheimar i landet utfører i dag mange laboratorieanalysar, og resultata av desse blir brukte både ved langtidsoppfølging og akuttbehandling av pasientane. God kvalitet på analysane er difor avgjerande for tryggleiken til sjuke eldre og andre som i periodar treng sjukeheimstenester. Som ein del av ei større satsing på auka kvalitet av sjukeheimstenestene vart det i statsbudsjettet for 2007 avsett midlar for å inkludere sjukeheimar i NOKLUS. Sogn og Fjordane er eitt av fylka som er først ute, og sjukeheimar vil no få tilbod om gratis deltaking ut 2008. Deretter er planen å tilby tenester til sjølvkost.

I Helse Førde er bioingeniør Marit Steinsund tilsett i prosjektstilling. Ho vil besøkje alle sjukeheimar i fylket, ha god telefonkontakt med desse, tilby opplæring og rettleiing i laboratoriearbeid, og arrangere relevante fagkurs. Sjukeheimane vil kunne kvalitetssikre og få råd vedrørande all prøvetaking og analysering av prøvar som for eksempel CRP, glukose, hemoglobinmåling og urinprøvar. Ved innkjøp av nye instrument og oppstart av nye analysar, vil ein kunne få råd og hjelp.

I dag er 99% av legekontora i Noreg tilslutta NOKLUS ordninga, og det er ein del sjukeheimar som alt deltek. Erfaringane er gode, og tilsette ved sjukeheimar seier at dei er blitt tryggare på at analyseresultata blir rette.

Info

Reidun Skaflestad 27.08.2007

250 gynekologar til Førde

Tue, 15 Jun 2010 08:40:38

Norsk Gynekologisk Forening skal ha årsmøte 2007 i Førde. 250 gynekologar frå heile landet møtest i Førde frå 30. august til 1. september

- Årsmøte går på rundtur til dei store byane, og ville nok aldri ha kome hit om ikkje vi lokalt hadde føreslått det. Vi vil gjerne ”vise fram fylket vårt”, seier gynekolog Bjørg Ladehaug ved Kvinneklinikken i Helse Førde.

Årsmøtet skal haldast på Rica Sunnfjord Hotell. På programmet står det ei rekkje seminar. Mellom anna om behandling av særskilde risikotilstandar innanfor fødselshjelp og kvinnesjukdommar, overtidig svangerskap , ”Strukturproblemet i spesialiteten fødselshjelp og kvinnesykdommer” og vaksine mot livmorhalskreft.

I invitasjonen lokkar også gynekologane i Førde med storslagen natur med skjergard, fjord og fjell, dalar og bre. Dei innbyr til ulike turar mellom og etter tettpakka fagleg program.

Info

Vidar Vie 27.08.2007

3,6 millionar til utvikling av lokalsjukehusa

Tue, 15 Jun 2010 08:43:50

Helse Førde er tildelt 3,6 millionar kroner til utvikling av lokalsjukehusa. Pengane skal nyttast til å endå betre akuttberedskap.

Helse- og omsorgsministeren offentleggjorde i dag lista over prosjekt som skal få øyremerka midlar til utvikling av lokalsjukehusa. Helse Vest får tildelt 11,25 millionar kroner av den totale potten på 50 millionar kroner, og av dette får Helse Førde 3,6 millionar.

Prosjektet Helse Førde har fått pengar til skal utvikle den akuttmedisinske kjeda innanfor somatikk, psykiatri og rus. Prosjektet har fokus på samhandling, kompetanse og telemedisinske løysingar.

Helse Førde søkte om i alt 11,5 millionar kroner. Det inkluderte også pengar til auka satsing på desentralisert dialyse.

Utviklinga av den akuttmedisinske kjeda i lokalsjukehusområda er eit stort prosjekt der felles kommunal legevakt, felles akuttmottak, akuttmedisinske team, telemedisin og observarsjonssenger er sentrale tema.

- Vi ønskjer å samordne ressursar ved sjukehusa og i kommunane, og å bruke den nyaste og beste teknologien. Målet er å gje pasientane diagnosen så nær heimen som mogeleg, og å gje rett behandling på lågast mogeleg nivå, seier administrerande direktør i Helse Førde, Jon Bolstad.

Info

Vidar Vie 30.08.2007

Ny behandling for tidlegfødde

Tue, 15 Jun 2010 08:50:56

Barneavdelinga i Helse Førde har teke i bruk NIDCAP-metoden i behandling av born som er for tidleg fødde. To sjukepleiarar har spesialisert seg på fagfeltet.

Det er sjukepleiarane
Wenche Hårklau Vallestad
(til venstre på bilete) og Venke Grønsberg
som har spesialisert seg på fagfeltet.

Årleg blir det i Noreg fødd rundt 600 barn med ei fødselsvekt på under 1.000 gram. Forsking viser at det miljøet ein tilbyr desse barna den første levetida, også kan ha betydning for korleis dei klarer seg seinare i livet. Nokre av desse for tidlig fødde barna slit med ulike problem og skader langt opp i skulealderen.

NIDCAP står for: Newborn Individualized Development of Care and Assessment Programme. Metoden er utvikla i USA og inneber individuell behandling med gjentekne systematiske observasjonar av det for tidleg fødde barnet. Kvar observasjon gir ei detaljert beskriving av barnet si åtferd, på pleia og miljøet rundt den vesle. Det blir deretter utarbeidd ein individuell plan for korleis det enkelte barnet skal handterast.

Wenche Hårklau Vallestad og Venke Grønsberg, begge sjukepleiarar ved Nyføddavsnittet på Barneavdelinga ved Førde sentralsjukehus, har fullført 2 års observatørutdanning i regi av Kompetansehevingsprogrammet i Helse Vest. To sjukepleiarar frå alle sjukehusa i Helse Vest har delteke, og utdanninga har vore rettleia av Karen Smith frå St. Lukes Children Hospital i Idaho, USA.

Barneavdelinga ved Førde sentralsjukehus har teke metoden i bruk og vil i tida framover arbeide ytterlegare for å få tilpassa eit mest mogeleg NIDCAP-basert pleietilbod til dei små.

Info

Finn Ove Njøsen 31.08.2007

Øyar får brukte ambulansar av Helse Førde

Tue, 15 Jun 2010 08:54:31

Fleire øyar i fylket får bruke Helse Førde-ambulansar. Bilane er tenkt nytta til pasienttransport og brannvernoppdrag. Helse Førde sitt styre vedtok dette i dag i tråd med innstilling til vedtak.

Styret la vekt på at dette var eit svært positivt tiltak. Det vart også poengtert i styret at det er viktig med ein god dialog med kommunane vidare.

- I første omgang ser vi for oss at Bulandet/Værlandet og Atløy i Askvoll og Byrknesøy i Gulen er dei mest aktuelle stadane, seier Terje Olav Øen, direktør for Prehospital klinikk i Helse Førde.

Innbyggjarane på ein del øyar i Sogn og Fjordane har i dag eit mindre tilfredstillande tilbod knytt til landbasert pasienttransport- og ambulansetilbod. Helse Førde sitt styre har i dag slutta seg til å gje fleire ambulansebilar vederlagsfritt til kommunane (øyane). Bilane kan brukast til førstehjelpsrespons og betra pasienttransport internt på øyane, og kan nyttast av brannmannskap, frivillige og mannskap frå båtambulansetenesta. Ambulansetenesta i Helse Førde står for opplæring og trening av personellet, går det fram av saksframlegget.

- Bilane er brukte ambulansar som har køyrt ein del kilometer, men framleis har stor nytteverdi. På øyane kjem dei til å bli køyrde langt færre kilometer i løpet av eit år, men dei vil vere verdifulle når dei trengst. Vi har tidlegare stasjonert brukte ambulansar andre stadar i fylket, og tilbakemeldingane har vore gode, seier
Terje Olav Øen.

Info

Finn Ove Njøsen 31.08.2007

Blodgjevartenesta i Høyanger har starta opp att

Tue, 15 Jun 2010 08:58:54

Høyanger tappestasjon er igjen opna etter 3 års midlertidig stenging. 2 bioingeniørar frå Førde vil vere i Høyanger omlag ein gong i månaden.

Blodgivarar blir tappa frå kl. 09.00-14.00 og produksjonen av blodet føregår i Førde. Tappestasjonen er lokalisert i Høyanger Helsesenter i fine og lyse lokale.

Vi ynskjer nye og gamle blodgivarar velkomne til å gi blod i Høyanger igjen.

Ta kontakt på tlf. 57 83 93 00 - VI TRENG DEG!

Info

Finn Ove Njøsen 31.08.2007

Vil betre trivselen for kreftpasientar

Tue, 15 Jun 2010 09:02:30

Kaffi, rundstykke og frukt skal auke trivselen for kreftpasientar på kreftpoliklinikken ved Førde sentralsjukehus. 18 medlemer av Odd Fellow har gjennomført kurs for å lære korleis dei skal opptre i møte med kreftpasientar.

Vi ønskjer å gjere noko positivt for pasientane, fortel leiar i Odd Fellow si nemnd for ”utadvendt arbeid”, Åse Sandøy.

Kvar torsdag, kanskje også fredag, vil medlemer frå Odd Fellow gå rundt med trillebord og servere pasientane kaffi, rundstykke og frukt ved kreftpoliklinikken. I første omgang i ein prøveperiode fram til jul for å sjå korleis det fungerer.

Økonomisk støtte
– Odd Fellow sine foreiningar i Sogn og Fjordane har i mange år samla inn pengar til ulike tiltak ved kreftavdelinga i Førde. Mellom anna har dei vore med på utsmykking og innkjøp av møblar, fortel Sandøy.

I nærare 20 år har Odd Fellow i Sogn og Fjordane også samla inn pengar til kreftavdelinga ved Haukeland sjukehus. Dette er eit felles tiltak mellom foreiningane i Sogn og Fjordane og Hordaland.

– Vi synest dette er eit meiningsfylt tiltak, og er i tråd med det Odd Fellow står for, fortel Sandøy.

Omfattande opplæring
Det var eit omfattande program deltakarane frå Odd Fellow gjekk igjennom før dei skal starte opp det frivillige arbeidet på kreftpoliklinikken. I løpet av kurset er dei mellom anna igjennom tema som kommunikasjon, haldningar og teieplikt. Sjukehuspresten snakka om ”Tru og tvil når sjukdom råkar”.

Forelesarar frå Kreftforeininga og personell frå poliklinikken fortalde og informerte om det å ha kreft og korleis kvardagen på poliklinikken er.

14 av deltakarane kom frå foreininga i Førde, medan fire av deltakarane på kurset kom frå foreininga til Odd Fellow i Florø.

Info

Finn Ove Njøsen 31.08.2007

Interessert i auka kompetanse i gruppebehandling?

Tue, 15 Jun 2010 11:02:15

Det er framleis ledige plassar til eit eittårig utdanningsprogram i gruppebasert behandling av menneske med alvorlige psykiske lidingar.

Kurset er finansiert med midlar frå Sosial- og helsedirektoratet gjennom statlege stimuleringstiltak til psykisk helsevern - tilskot til utdanningstilbod i kommunane.

Stad: Florø

Adresse: Florø vidaregåande skule, auditoriet,
Professor Gjelsviksvei, Florø.

Målsetting:
Hovudmålsettinga for utdanningsprogrammet er å utvikle ferdigheiter i, og gje deltakarane betre forståing for gruppebaserte behandlingstilbod.

For brukarane vil gruppebaserte behandlingstilbod først og fremst spele ei rolle når det gjeld å utvikle sosial kompetanse, og betre evna til samhandling med andre. Deltaking i gruppe med andre i same situasjon vil også kunne understøtte og motivere til å følgje opp anna behandling på ein betre måte.

Målgruppe:
Utdanningsprogrammet vender seg til legar, psykologar, psykiatriske sjukepleiarar, sosionomar, ergoterapeutar, pedagogar, fysioterapeutar, hjelpepleiarar, aktivitørar og andre som arbeider med menneske med psykiske lidingar. Vi ynskjer deltakarar frå kommunehelsetenesta, og frå ulike nivå i 2. linetenesta som distriktspsykiatriske sentra, poliklinikkar og psykiatriske avdelingar.

Innhald:

Kurset består av

· Førelesningar
· Vegleiing
· Litteraturgjennomgang

Førelesningane vil bli gjeve i form av 7 dagsseminar, i løpet av eitt år.

Dato for oppstart er fredag 05.10.07,

Foredragshaldar: Psykiater og gruppeanalytikar Thor Kristian Island.

Andre dagsseminar vert fredag 16.11.07,

Foredragshaldar: Psykiater og gruppeanalytikar Kjersti Lyngstad.

Siste dagsseminar før jul vert 14.desember,

foredragshaldar ikkje avklara.

Våren 2008 vert det fire dagsseminar, alle på fredagar.

Vegleiinga: Deltakarane vil bli gitt vegleiing vil på eige arbeid i grupper på 6-8 personar, av diplomerte gruppeanalytikarar. Vegleiingsgruppene vil møtast omlag ein gong i månaden, til saman 10 gongar á 4 timar, - i alt 40 timer i løpet av året. Tid og stad for vegleiingssamlingane vil verte avklara på første seminardag. Desse dagane vil også verte lagt til fredagar.

Litteratur: Ein må lese noko litteratur på eiga hand, deltakarane samlast i gruppa for å gjennomgå litteraturen. Gruppene møtest i samband med vegleiinga,1 time 10 gonger i løpet av kursåret, etter vegleiinga.

Teoriforelesingane vil ta for seg fylgjande tema:

Rammer, fordeler og ulemper ved bruk av gruppeterapi i behandling av alvorlig psykisk sjuke.

· Almen gruppeteori, gruppedynamikk
· Gruppeterapi i ulike samanhangar
· Den terapeutiske samtalen
· Empati, kva rolle spelar det i behandling av andre menneske.
· Behandlarens eigne reaksjonar i møtet med alvorlig psykisk sjuke.
· Gruppebehandling av psykotiske og egosvake pasientar
· Bruk av grupper i rehabilitering av alvorlig psykisk lidande. Oppbygging og praktisering av gruppebehandling ved rehabiliteringseininga i eit DPS
· Gruppebehandling med rusavhengige
· Gruppebehandling ved personlegdomsforstyrringar
· Bruk av bildeterapi og kreative metodar i gruppebehandlinga.

Timeplanen:

0900-1030 Førelesning
1030-1045 Pause
1045-1130 Gruppediskusjon
1130-1215 Lunsj
1215-1315 Storgruppe
1315-1330 Pause
1330-1500 Førelesing

Som det er gjort greie for i innleiinga, er heile utdanningsprogrammet gratis.

Dette gjeld føredrag, lunsj på dagsseminara og utgifter til vegleiinga. Deltakarane må forplikte seg til å vere med på alle samlingane, og spørsmål kring løn under seminaret og dekking av eventuelle reiseutgifter må vere avklara med arbeidsgjevar.

Det er ikkje eit krav at ein driv med grupper, men ein ser det som ein fordel om ein startar opp undervegs. Alle typar grupper kan vere aktuelle.

Dersom ein har spørsmål knytt til utdanningsprogrammet, kan ein ringe:

Psyk. pol. Florø, telefon. 57751122, spør etter Bente Fure,

eller bente.fure@helse-forde.no

Påmelding til Flora Tjenestetorg, fristen for påmelding forlenga til 15.sept. 2007:

Telefon 57756000: Be om å bli sett på lista ”kommunekurs 2007”.
Gje opp arbeidsstad, yrkesgruppe, telefon og epostadresse.

Ein tek atterhald om at det meldar seg nok deltakarar til å gjennomføre programmet.

Vel møtt til eit spennande utdanningstilbod!

Førde/Florø 04.07.07

Med venleg helsing

*Øyvind Watne*	*Bente Fure*
Avdelingssjef Psykiatrisk klinikk Psyk.	sjukepleiar/diplomert gruppeanalytikar

Info

Finn Ove Njøsen 03.09.2007

Intervensjonsbehandling i Helse Førde

Tue, 15 Jun 2010 11:04:34

Radiologisk avdeling, seksjon Førde planlegg å starte opp igjen med intervensjonsbehandling ( blokking,stenting og evt rekanalisering) av bekkenkar og perifere kar.

Dei første pasientane vil bli behandla i september. Dette er ei behandling som vi ikkje har hatt kompetanse på siste åra. Det har no lukkast oss å få tilsett ein radiolog som har lang erfaring med dette. Denne behandlinga vil skje i nært samarbeid med speialist i karkirurgi og kirurgisk avdeling.

Pasientane skal tilvisast til spesialist i karkirurgi som vurderer og evt. tilviser vidare til Radiologisk avdeling. Pasientane vert innlagde i kirurgisk avdeling i ca 2 døgn.

Radiologisk avdeling,
Seksjon Førde.

Info

Vidar Vie 03.09.2007

Nytt utstyr for behandling av lymfeødem

Tue, 15 Jun 2010 11:11:45

Ved hjelp av ei testamentarisk gåve frå ein tidlegare kreftpasient har AMFR gått til innkjøp av ein pulsator for behandling av lymfeødem.

Lymfeødem er ein kronisk sjukdom som gjev hevelse til dømes i armar, bein og andlet/ munn. Som oftast oppstår lymfødem etter fjerning av lymfeknutar og / eller strålebehandling som følge av kreftoperasjon – sekundære lymfødem. Lymfeødem som oppstår på grunn av medfødde defektar i lymfeårane kallast primære lymfødem. Karakteristisk for eit lymfødem er auka proteinkonsentrasjon i vevsvæska og dette skil lymfødem fra andre typer ødem. Høgt proteininnhald fremmer ødemdanning og dessutan danning av bindevev og feitt.

Lympha Press Plus kan programmerast med opp til 5 ulike syklusar som gjer det mogeleg å setje opp individuelle behandlingsprogram tilpassa kvar einskild pasient. Maskina programmerst anten manuelt eller via PC.

Vi har frå før pulsatoren Lympha Press Mini som er det apparatet ein gjerne vel til pasientar som må utføre denne behandlinga jevnleg heime, gjerne i tillegg til behandling hos fysioterapeut.

Til denne nye maskina har vi kjøpt inn ein buksemansjett som er eit godt alternativ for brukarar som ellers vil bruke 2 beinmansjettar og i tillegg hoftemansjett. Buksemansjetten er enklare å administrere samstundes som ein får ein jevnare trykkprofil.

Med den nye maskina vert behandlinga meir effektiv og behageleg for pasienten.

Den nye pulsatoren blir først og fremst brukt som eit ledd i behandlinga av pasientar som t.d er bryst – eller underlivsopererte, men også andre krefttypar der det i etterkant av behandling har danna seg ødem.

Maskina kan også brukast ved andre lidingar som t.d. ved leggsår og ødem der pasienten har medfødde defektar i lymfesystemet.

Pulsatorbehandling brukast altså som eit supplement til manuelle teknikkar og bandasjering. Det er også viktig å påpeike at i starten av ei behandlingsrekke så er det den manuelle stimuleringa og drenasjen som er den viktigaste.

Vi har førebels ein fysioterapeut utdanna innan komplett fysikalsk lymfødembehandling. No i haust skal vi nytte midlar vi har fått til å utdanne ein person til. Utdanninga føregår i Oslo ved Skandinavisk Forum for Lymfologi.

Fysioterapeutane Aud Vassbotten Storøy (til venstre)
og Hildegunn Steindal viser fram utstyret til den nye
lymfeødempulsatoren. Hildegunn er utdanna i bruken av
apparatet, og Aud skal i haust og ta den naudsynte utdanninga
slik at vi får to fysioterapeutar som er skulerte i denne behandlinga.

Artikkel: Hildegunn Steindal og Knut Olav Halseth

Info

Finn Ove Njøsen 12.09.2007

Pasient-ros til Lærdal sjukehus

Tue, 15 Jun 2010 11:15:38

Lærdal sjukehus er eit av dei sjukehusa i landet som får høgast skår i ei nasjonal brukarundersøking.

Undersøkinga er gjennomført ved alle norske sjukehus, og pasientane har svart på spørsmål som gjeld organisering, pleie, legar, standard, evne til å ta seg av pårørande og informasjon om prøver. Pasientane ved Lærdal sjukehus er kort og godt kjempefornøgde med den behandlinga dei har fått.

På spørsmål som gjeld informasjon om prøver, undersøkingar og resultat av desse får lokalsjukehuset i indre Sogn høgast skår av alle sjukehus i landet. Legane ved sjukehuset blir berre overgått av kollegaene på Feiringklinikken på evne til å snakke forståeleg, det å ha omsorg og å vere fagleg dyktige, viser undersøkinga som vel 160 pasientar ved sjukehuset har svart på. Også innanfor dei andre felta får sjukehuset svært gode skussmål frå pasientane.

- Gledeleg

- Dette var svært gledeleg, og viser at vi har lukkast med den jobben vi har gjort. Men vi kan framleis bli betre, og det er det viktig at vi arbeider for å utvikle oss vidare, seier avdelingsoverlege ved ortopedisk seksjon Truls Jellestad.

Også leiar for Medisinsk seksjon, Marta Halset, er strålande fornøgd med resultatet av undersøkinga.

- Dette er resultatet av systematisk arbeid over lengre tid. Det viktige no er at vi held fram med det gode arbeidet, seier ho.

Dei to rosar personalet ved sjukehuset og deira innsats som har gjort det mogeleg å oppnå dette resultatet.

- Betyr mykje

Førde sentralsjukehus og Nordfjord sjukehus skil seg i mindre grad ut i forhold til dei andre sjukehusa i Noreg. Førde ligg litt under gjennomsnittet og Nordfjord litt over. Administrerande direktør i Helse Førde, Jon Bolstad, gler seg også over det gode resultatet ved Lærdal sjukehus.

- For Helse Førde betyr det mykje at eit av våre sjukehus kjem så godt ut i ei brukarundersøking. Den fortel oss om vi er på rett veg, og fortel oss også om kva område vi må jobbe hardare med framover. Difor blir det også interessant å sjå korleis vi utviklar oss når det kjem nye undersøkingar, seier Jon Bolstad.

Info

Vidar Vie 13.09.2007

Fss-kantina går nye vegar

Tue, 15 Jun 2010 11:19:31

- Vi har fokus på sunn mat som grove rundstykke. Vi skal no eksponere maten betre - også frukt og grønt, seier kjøkkensjef Torstein Solset ved Fss.

Vi må av og til fornye oss, seier Torstein Solset.

I samarbeid med ein av Helse Førde sine leverandørar jobbar kantina ved Fss for å eksponere maten betre - og legge større vekt på sunn mat som grove rundstykke. Også frukt og grønt skal eksponerast betre, i følgje kjøkkensjefen.

Leverandøren Mills har i dag to personar som hjelper kjøkkenet med tips og råd til korleis ein kan gjere varesortimentet og presentasjonen av produkta betre.

- Bakgrunnen for fornyinga er at vi har teke over drifta av kafeen i 1. etasje ved Fss. Eg trur at både personalet og besøkande vil setje pris på oppgraderinga av kantinematen, seier Solset.

Mat er viktig for velferd - og vi vil vise Fss positivt fram også på denne måten, avsluttar kjøkkensjefen.

Info

Finn Ove Njøsen 13.09.2007

Dei tilsette i Lærdal feira dagen

Tue, 15 Jun 2010 11:25:44

Dei tilsette ved Lærdal sjukehus tok ei velfortent feiring etter at resultatet av den nasjonale pasientundersøkinga i dag vart kjent.

Lærdal sjukehus er eit av dei sjukehusa i landet som får best tilbakemeldingar frå pasientane i undersøkinga.

- For Lærdal sjukehus, dei tilsette her, området rundt og for Helse Førde er det svært gledeleg å få eit slikt resultat. Det viser at dei som arbeider her står på for å gje våre pasientar eit best mogeleg tilbod, og det er den aller beste reklame dette sjukehuset kan få, sa styreleiar Clara Øberg.

Styreleiaren viste til at pasientar over heile landet er spurte om opplevingane dei sit att med etter å ha vore på sjukehus. Dei har svart på spørsmål som gjeld organisering, pleie, legar, standard, evne til å ta seg av pårørande og informasjon om prøver.

- For Lærdal sjukehus er resultatet mildt sagt strålande. Over heile linja er tilbakemeldingane svært gode. Ja, blant dei aller beste i heile landet, sa Clara Øberg som gratulerte med dagen.

Seksjonsleiar Marta Halset ved Medisinsk seksjon rosa også dei tilsette:

- Å få ei slik topp plassering skal alt personalet ta til seg. Her på sjukehuset har det alltid vore ein fellesskaps-følelse som har drege lasset! Alle har hatt omtanke for ”vårt” sjukehus. Dette fellesskapet påverkar heilheita for pasientopplevinga, sa ho.

Sjukehusleiinga hadde spandert velfortent marsipankake på dei tilsette ved sjukehuset. Og sjølvsagt fekk også dei fornøgde pasientane kake til kaffien litt seinare på dagen.

Info

Vidar Vie 13.09.2007

Bygger om inngangsparti

Tue, 15 Jun 2010 11:28:40

Den planlagde ombygginga av inngangspartiet ved Førde sentralsjukehus er no i gang.

Den planlagde ombygginga av inngangspartiet ved Førde sentralsjukehus er no i gang.

- Føremålet er å gje betre tilkomst for pasientar og publikum, og å få ei betre og meir teneleg avvikling av trafikken ved inngangspartiet, seier direktør Eiliv Berdal i Divisjon for intern service.

Ombygginga er siste del av prosjektet Påbygg 2000 og den inkluderer også bygging av informasjonsskranke i vestibylen.

- Det skal gje ein open og meir publikumsvenleg informasjonsskranke. Planen er å ferdigstille arbeidet i løpet av året, seier Berdal.

Ombygging også på Nordfjordeid

Helse Førde er i gang med ei mindre ombygging av venterommet til poliklinikken på Nordfjordeid.

Årsaka til ombygginga er innkjøpet av ny analysemaskin til laboratoriumet.

- Pasientar og tilsette må difor vere budde på at dette arealet blir prega av byggearbeid den næraste månaden, seier Eiliv Berdal.

Info

Finn Ove Njøsen 17.09.2007

Polske legar på besøk

Tue, 15 Jun 2010 11:32:08

Ei gruppe polske legar har vore på omvisning ved Lærdal sjukehus og Førde sentralsjukehus. Sju av legane får no tilbod om jobb i føretaket.

Dei polske legane fekk sjå kva sjukehusa i Lærdal og Førde står for, og kva føretaket kan tilby legane, dersom dei vel å søkje til eitt av sjukehusa.

I Førde var det klinikkdirektør Anne Margrete Øvsthus og Alina Rakke, opphavleg frå Polen, som guida legane rundt på sjukehuset. I Lærdal stod Marta Hallset, Ludvig Hval og Gerd Skalle for informasjonen.

Første orienteringsrunde
Dette er første runde med orientering til polske legar som besøker Helse Førde.

- Det vil kome fleire polske legar seinare for å sjå på tilhøva. Vi sender i utgangspunktet to legar for kvar spesialitet til informasjonen i Helse Førde. Vi doblar kvar spesialitet dersom nokon ikkje er aktuelle for stillingane, fortel Pedro Carmo frå rekrutteringsfirmaet Paragona.

Legane besøkte dei aktuelle avdelingane og vart seinare på dagen intervjua av leiinga der. På bakgrunn av intervjua har Helse Førde gjeve tilbake melding til Paragona om at sju av dei er aktuelle for arbeid i føretaket.

Det er no opp til den enkelte lege å avklare om han ønskjer å jobbe i Helse Førde. Etter at kontraktane er signerte så startar opplæring i mellom anna norsk i Polen i november. Lærarar frå Noreg skal reise til Polen for å ta del i utdanninga. Etter planen skal dei første legane ta til i arbeidet i Noreg i juni neste år.

Godt inntrykk
- Eg fekk eit veldig godt inntrykk av legane. Det verkar som om dei har høg kompetanse innan sine fagfelt, fortel klinikkdirektør Anne Margrete Øvsthus.

Marta Hallset fortel at dei også ved Lærdal sjukehus fekk eit positivt inntrykk av dei to legane som var der. Begge var spesialistar i indremedisin.

Dei polske legane fekk også eit innblikk i tilbod som barnehage, skule og kultur i dei to kommunane, og informasjon om Sogn og Fjordane fylke. Legane som var i Førde fortalde at dei ikkje var skremde over prisnivået. Korkje når det gjeld prisar på leilegheiter eller barnehage.

Marta Hallset fortel at dei polske legane som var i Lærdal var imponert av både Lærdal og naturen i og rundt sentrum. Dei fekk mellom anna besøke Villakssenteret.

Sjukepleiar Alina Rakke som er polskfødd stod for oversetjinga til dei polske legane.

Info

Finn Ove Njøsen 17.09.2007

Barneavdelinga med diabeteskompetanse

Tue, 15 Jun 2010 11:35:46

For å kunne leve godt med diabetes er det viktig med oppfølging. Barneavdelinga i Helse Førde har no fått utdanna ein diabetessjukepleiar som kan hjelpe.

250 born i Noreg får diagnosen diabetes 1 årleg.

Det er sjukepleiar Randi Stubhaug Gamlestøl ved Barneavdelinga i Helse Førde som har gjennomført klinisk utdanning i diabetessjukepleie.

Noreg og Norden ligg på verdstoppen når det gjeld tal personar med type 1 diabetes, og kvart år får om lag 250 born i Noreg denne diagnosen. Diabetes er ein kronisk sjukdom som aukar over heile verda.

- Det er viktig at helsetenesta har nok kompetanse og tilgang på kvalifisert personale til å ivareta denne gruppa pasientar i åra som kjem, seier avdelingssjukepleiar Heidi Vatsø ved barneavdelinga.

Gamlestøl som arbeider ved Barneavdelinga/poliklinikken ved Førde sentralsjukehus har fullført vidareutdanninga i diabetessjukepleie ved Høgskulen i Bergen. Det er eit studium over tre semester med ni samlingar i Bergen med påfølgande praksis. Høgskulen i Bergen er den einaste i landet med godkjent utdanning innan diabetes.

Info

Finn Ove Njøsen 18.09.2007

Ønskjer gjennomgang av ambulansesakene

Tue, 15 Jun 2010 11:39:52

Adm. dir Jon Bolstad i Helse Førde ønskjer ein gjennomgang av ambulansesakene som har kome opp i media den siste veka. Føretaket skal også vurdere endra rutinar for flytting av pasientar.

- Når vi ser at pasientar og pårørande opplever hendingar som uverdige, så er det grunn til å stoppe opp og gå gjennom rutinane våre. Eg ønskjer difor ein gjennomgang saman med leiinga i ambulansetenesta, tillitsvalde og vernetenesta, seier Jon Bolstad.

Han har forståing for kritikken som er sett fram den siste veka.

- Det er viktig at det blir sett søkelys på desse sakene, og vi tar dette svært alvorleg.

Ambulansetenesta til Helse Førde har over 11.000 oppdrag kvart år. I tillegg har vi koordinering av vel 27.000 pasienttransportoppdrag og dette saman med lokale drosjeturar utgjer samla kring 100.000 pasienttransportar årleg.

Ambulansane skal dekke eit stort og til dels grisgrendt område og gje tilgang til gode akuttenester.

- Eg veit kor utfordrande det er å få endane til å møtest, men pasientane må gå framfor alle andre omsyn. Ambulansetenesta har sjølv gripe tak i dette på ein god måte, og eg føler meg trygg på at vi skal få til forbetringar.

Info

Vidar Vie 21.09.2007

Saneringseininga oppdaterer kompetansen

Tue, 15 Jun 2010 11:48:01

For å halde oppe kompetansen i saneringseininga har ambulanse- og akuttpersonell i Helse Førde denne veka halde kurs.

Kurset oppdaterer personalet i korleis dei skal handtere kjemiske katastrofar i Sogn og Fjordane. Denne gongen var kurset ved ambulanseteneste sine lokale på Tefre i Førde. Lærdal og Eid står for tur for opplæring.

Saneringsteamet har dei siste åra blitt kalla inn tre gonger til reell utrykking.

Dette er ”for lite” og må difor tidvis halde
kompetansen i hevd ved
jamleg trening.

Etter å sett opp saneringsteamet si vogn, teltet på plass, og verneutstyret er på personalet, er det klart for å reingjere personar for kjemisk påverknad på kroppen.

Teamet har eit ”løypeband” der dei først klipper av pasienten sine klede. Deretter blir han grundig vaska og skura før tredje steget som er å tørke vedkomande.

Saneringsteamet har eige måleutstyr som måler om det framleis er kjemiske stoff på huda til pasienten. Dersom pasienten har meir kjemiske stoff på kroppen må saneringsteamet gjenta heile prosedyren på nytt. Når han er fri for kjemi så blir han boren til sjukebilen og sjukehus er neste steg.

Deltakarane på kurset testar og gjennomgår alle detaljar for at folket i Sogn og Fjordane skal få god behandling dersom ei ulukke skulle skje og nokon av oss får kjemiske stoff på kroppen.

– Bakgrunnen for Saneringsteamet er nok 11. september, seier kursleiar Tomas Marcinkowski i ambulansetenesta i Helse Førde.

Han fortel også at dei tre sjukehusa i fylket har 12 drakter kvar til bruk i Saneringsteltet. Bilen til saneringsteamet er stasjonert i Førde.

Saneringsteamet er klar til innsats ved kjemiske ulukker i Sogn og Fjordane.

Info

Finn Ove Njøsen 21.09.2007

Korleis kan vi utvikle gode pasientforløp?

Tue, 15 Jun 2010 11:53:52

Helse Vest og Helse Fonna inviterer til seminar om pasientforløp i Haugesund 24. oktober.

Alle med helsefagleg bvakgrunn som arbeider i spesialisthelsetenesta, aktuelle samarbeidspartnarar pg brilarar av helsetenestene er invitert.

I kvalitetssatsinga i helse Vest er utvikling av gode pasientforløp eit av satsingsområda, og Helse Vest har tildelt prosjektmidlar til kvalitetsutviklingsprosjekt.

Formålet med seminaret er å gje inspirasjon og drahjelp til både nye og eksisterande kvalitetsutviklingsprosjekt gjennom blant anna å dele erfaringar.

Sett av datoen - program og nærare informasjon blir sendt ut seinare.

Info

Finn Ove Njøsen 24.09.2007

Færre skifte av ambulanse

Tue, 15 Jun 2010 11:57:09

Tillitsvalde, verneteneste og leiinga i ambulansetenesta og Helse Førde møttest måndag for å gå gjennom mediesakene som kom opp førre veke.

Tenesta har fått kritikk knytt til tre konkrete oppdrag. Det er også kjent at pasientombodet så langt i år har fått sju klager knytt til pasienttransport, noko som er ein markant auke i høve til tidlegare. Helse Førde koordinerer og utfører om lag 100.000 pasientoppdrag i året. Både leiing, tilsette og verneteneste ynskjer at tenesta skal leverast best mogeleg for pasientane våre, og vil ha fokus på dette gjennom dagleg operativ drift.

Det vert no utarbeidd forslag til nye retningslinjer for bruk av tobåre-ambulanse og for byte av ambulansar. Desse skal no ut på høyring, og skal innførast i løpet av neste veke. I retningslinjene er det også presisert kva praksis som skal leggast til grunn når pårørande ønskjer å følgje med i ambulansane.

- Eg synest vi har klart å fange opp dei problemstillingane som har kome fram den siste veka i desse retningslinjene. På møtet kom det også fram gode forslag frå verneteneste og tillitsvalde som vi vil ta med før vi sender ut retningslinjene. Vi kjem framleis til å bruke ambulanse med to bårer, men retningslinjene slår tydelegare fast kva type pasientar som kan transporterast saman. Nokre pasientar må framleis byte ambulanse på ein transport, men også der skal vi gjere endringar som vil vere betre for pasientane, seier klinikkdirektør Terje Olav Øen i Prehospital klinikk.

Bytter mannskap i staden for ambulanse
Mange av ambulanseskifta har vore knytt til transportar frå Bremanger til Eid og Førde. Årsaka til pasientane har vore nøydde til å skifte ambulanse er at den einaste ambulansebilen ikkje skal forlate området dersom det oppstår ein akutt situasjon. Difor har pasienten vorte flytta over i ein møtande ambulanse, tilsvarande slik vi flytta pasientar over i båt før vegsambandet kom.

- No vil vi sette inn lik type ambulansar i Eid og i Bremanger. Dermed kan personellet frå Bremanger ta med seg Eid-bilen tilbake til Bremanger når dei møtest. Personellet frå Eid skal ta med seg pasienten i Bremangerbilen til Nordfjord sjukehus. Med dette unngår vi mange av dei ambulansebyta pasientane fekk i løpet av eit år, seier Terje Olav Øen.

Tenesta vil også innføre fleire andre tiltak for å gjere heilt nødvendige ambulansebyte best mogeleg for pasientane.

- Vi registrerer ingen klager på skifte mellom bil, båt og ambulansehelikopter, medan det er retta større merksemd mot skifte frå bil til bil. Desse byta skal vi redusere så langt råd er utan at det går ut over akuttberedskapen, seier Øen.

Info

Vidar Vie 25.09.2007

Omstillingsutfordring på 100 millionar i 2008

Tue, 15 Jun 2010 12:00:22

Helse Førde har ei omstillingsutfordring på 100 millionar kroner i 2008. Prognosen etter andre tertial i år viser ein vekst i kostnadene. Mellom anna knytt til eit dyrare lønsoppgjer enn budsjettert, og utfordringar i Prehospital klinikk.

Styret i Helse Førde skal fredag handsame økonomirapporten etter dei første åtte månadene i år, og ta stilling til korleis føretaket skal gjennomføre arbeidet med budsjettet for 2008. Prognosen viser at føretaket går mot eit underskot på 133 millionar kroner i 2007. Endringane i høve til siste prognose skuldast i hovudsak tre forhold:

Lønsoppgjeret vart om lag 14 millionar kroner dyrare enn budsjettert ut frå føringane i statsbudsjettet.

Prehospital klinikk har utfordringar knytt til kravet om reduksjon i kostnader til pasienttransport.
Talet på årsverk er redusert med 30 til no i år, og leiinga ser at det ikkje er mogeleg med nye omfattande reduksjonar i år. Difor blir det meldt avvik på om lag 16 millionar kroner innanfor generelle effektiviseringar.

- Vi har tidlegare meldt om usikkerheit knytt til måloppnåing på desse postane. Det er beklageleg at vi ikkje klarer å innfri kravet om balanse, men det er også viktig å få fram at vi reelt sett har reduksjonar både innanfor løns- og driftskostnader i 2007. På bakgrunn av dette kan det stillast spørsmål ved om inntektsramma er tilpassa dei oppgåvene vi har ansvaret for å løyse på ein god måte, seier administrerande direktør Jon Bolstad.

Ikkje balanse
Den førebelse inntektsramma for neste år, og prognosen for 2007, viser at føretaket har ein ubalanse i økonomien på 100 millionar kroner. Jon Bolstad, ønskjer å opprette ein omstillingsorganisasjon som skal arbeide vidare med dagens omstillingsarbeid, tiltak hausten 2007, nødvendige prosessar i samband med budsjettet for 2008, og å bringe økonomien til føretaket i balanse.

- Det er, med dei rammer og bindingar vi har i dag, ikkje mogeleg å få Helse Førde i balanse i 2008. Dette er svært beklageleg, fordi ein sunn økonomi er den beste garantisten for eit framtidig godt sjukehustilbod i Sogn og Fjordane. Samstundes er det slik at ingen kortsiktige tiltak kan bøte på denne situasjonen. Difor må vi få på plass ein langsiktig omstillingsorganisasjon som inkluderer medverknad frå dei tilsette. Om naudsynt ønskjer eg også å hente inn ekstern bistand for å styrke dette arbeidet, seier Jon Bolstad.

Info

Vidar Vie 25.09.2007

Bygging av ruspost skal vurderast på nytt

Tue, 15 Jun 2010 12:05:09

Rusposten ved Nordfjord psykiatrisenter kjem til å koste 10,6 millionar kroner meir enn føresett viser nye utrekningar. Adm. dir Jon Bolstad rår til at prosjektet vert stoppa i den forma det har no.

- Styrevedtaket gav ei budsjettramme for tiltaket på 16 mill kr. Når det no er gjennomført ei kostnadskalkyle som viser at investeringa kjem på 26,6 millionar kroner så finn eg det rett å legge fram saka for styret på nytt. Mitt råd er at prosjektet ikkje blir gjennomført før det er gjort alternative vurderingar, seier Jon Bolstad.

I framlegget til vedtaket heiter det at det vert satt i gang eit planarbeid med sikte på å avklare vidare lokalisering av desentraliserte helsetenester i vaksenpsykiatri 2007 – 2012. Organisering, arealbehov, lokalisering og finansiering vert sentrale element.

- Det er svært beklageleg at kostnadene blir så høge. Rusposten er eit godt og viktig tiltak, men med dei utfordringane Helse Førde står framfor finn eg det riktig å ta ei ny vurdering, seier Jon Bolstad.

Saka skal opp på styremøte førstkomande fredag.

Info

Finn Ove Njøsen 25.09.2007

Styret vil redusere underskotet

Tue, 15 Jun 2010 12:08:33

Styret forventar at Helse Førde klarer å redusere prognosen på minus 87 millionar kroner i avvik i høve til budsjettet.

Helse Førde sitt styre handsama i dag siste tertialrapport og uttrykte alvorleg bekymring for situasjonen. Dei vil difor sette inn tiltak for å betre resultatet.

Styret vil også at tiltaka blir gjennomført slik at effekten blir så høg som mogleg.

Det vil bli halde ekstraordinært styremøte den 17. oktober der nye og alle tidlegare vedtekne tiltak blir lagt fram og konsekvensar av desse.

Styret bad også om at det blir lagt fram ei sak om pasienthotell der både drift og investeringar vert lagt fram.

I tråd med administrerande direktør si innstilling skal det etablerast ein omstillingsorganisasjon i føretaket. Denne skal arbeide vidare med dagens omstillingsarbeid, tiltak hausten 2007, naudsynte prosessar i samband med budsjettet for 2008, og å bringe økonomien til føretaket i balanse. Styret føreset at deltaking i dette arbeidet er i tråd med reglane for medbestemming.

Elles fekk administrerande direktør fullmakt til å auke kapasiteten i det omstillingsarbeidet som pågår. Det kan vere aktuelt å nytte ekstern bistand om naudsynt.

Info

Finn Ove Njøsen 28.09.2007

Katastrofeøving ved Florø Lufthamn

Tue, 15 Jun 2010 12:12:04

Onsdag 19.september kl.18.00 mottok AMK Førde melding om flyhavari ved Florø Lufthavn. Dette var den siste av fire katastrofeøvingar som i løpet av siste året har vore gjennomført ved flyplassane i fylket.

Meldinga om flyhavari førde til full katastroftealarm og varsling av alle naudetatar sine respektive ressursar. Mellom anna deltok brannvern, politi, sivilforsvar, Røde Kors Hjelpekorps og Avinor under øvinga.

Av helseressursar deltok legane i Florø, saman med Florø sjukehus og ambulansetenesta. Det var og sett stab ved AMK Førde.

For helsevesenet var dette ei nyttig øving, der dei saman med naudetatane fekk trene og samhandle på akuttmedisin, skadeprioritering og logistikk.

Helse Førde nytta og høve til å drille ulike moment som er nedfelt i beredskapsplanen, mellom anna varsling R-AMK, informasjonsavdelinga og psykososialt støttegruppe.

Info

Finn Ove Njøsen 28.09.2007

Vil ha styresak om pasienthotell

Tue, 15 Jun 2010 12:14:21

Styret i Helse Førde ønskjer sak om bygging av pasienthotell. Klinikkdirektør Anne Margrete Øvsthus orienterte i dag styret frå utgreiingsarbeidet om pasienthotell.

Øvsthus orienterte styret at det kan bli ein investeringskostnad på 10,1 million kroner for eit pasienthotell i Førde sentralsjukehus sine eksisterande bygningar.

Ho fortalde styret at det har vore ein god prosess med vernetenesta, tillitsvalde, tilsette og avdelingsleiarane.

Ho understreka også at det har vore uttrykt skepsis til deler av prosjektet i organisasjonen.

Etter Øvsthus si orientering bad styret om å få lagt fram ei sak der både investeringskostnad og effekt på drifta blir synleggjort.

Info

Finn Ove Njøsen 28.09.2007

Helse Førde sitt styre ber om at vedteken ramme blir følgd

Tue, 15 Jun 2010 12:18:06

Helse Førde sitt styre ber om at planlegging av rusinstitusjonen på Nordfjordeid skal skje innan vedteken økonomisk ramme.

Opphavleg ramme er på 16 millionar
kroner. Det er gjennomført ei
kostnadskalkyle som viser at investeringa kjem på 26,6 millionar kroner.

Styret ber om at prosjektgruppa som ser på rusinstitusjonen skal kome med framlegg som ligg innanfor ramma.

Dersom prosjektgruppa ikkje maktar å halde ramma krev styret at saka skal tilbake til handsaming i styret.

Info

Finn Ove Njøsen 01.10.2007

Positivt møte mellom HF-styret og sjukehusgrupper

Tue, 15 Jun 2010 12:20:35

Helse Førde inviterte sjukehusgruppene i fylket til dialog sist torsdag. Programmet tok mellom anna opp utviklingstrekk, ambulansedrift og økonomi/utfordringar i føretaket.

Leiar i ”Forsvar Lærdal sjukehus”, Bente Øien Hauge var positiv etter møtet. Ho håpar no at det kan bli ein fast dialog, ein eller to gongar i året, mellom sjukehusgruppene og Helse Førde sitt styre.

Programmet starta med felles samling mellom føretaksstyret, ”Forsvar Lærdal sjukehus” og ”Aksjonsgruppa for eit godt helsetilbod i Sogn og Fjordane”. Etter fellesmøtet møtte styret dei to gruppene til separate møter.

Info

Finn Ove Njøsen 01.10.2007

Dugnad for å unngå fristbrot

Tue, 15 Jun 2010 12:23:29

Kirurgisk avdeling har sett i verk ein dugnad ut året for å unngå fristbrot for fedmepasientar.

Helse Førde har regionfunksjon innan fedmebehandling, og har avtale med Helse Vest om at det skal gjennomførast 60 operasjonar kvart år. Det har likevel ikkje vore nok til å unngå fristbrot. Føretaket må dermed betale når pasientar ønskjer å få utført operasjon andre stadar etter at fristen er ute. Dette har ført til at Helse Førde kunne få seks millionar kroner i utgifter på grunn av fristbrot i år.

No vert det sett i verk ein dugnad ved Førde sentralsjukehus for å få redusert desse utgiftene. I praksis betyr det at fleire pasientar skal opererast ut over hausten. Kirurgisk avdeling treng to ekstra sjukepleiarar ut året og har sendt ut førespurnad til dei andre avdelingane om nokon kan avsjå desse.

Info

Vidar Vie 01.10.2007

Trombolysebehandling ved alle sjukehusa

Tue, 15 Jun 2010 12:26:10

Alle sjukehusa i fylket kan innan kort tid nytte blodproppløysande medisin i slagbehandlinga. Behandlinga har svært gode resultat ved hjerneslag.

- Trombolysebehandling har ved utvalde tilfelle vist svært god effekt. Men den kan ikkje brukast ved alle slagtilfelle, og det er heilt avgjerande at behandlinga vert sett i verk innan tre timar, seier avdelingssjef Stig Hegrestad ved Nevrologisk avdeling på Førde sentralsjukehus.

Saman med Jon Sverre Arnestad, Olav Hesjedal, Hans-Johan Breidablik, Trine Vingsnes, Harald Nyberg og Konrad Hvidsten har han utarbeidd felles retningslinjer for slagbehandling i Helse Førde.

Førde sentralsjukehus tok i bruk den blodproppløysande medisinen i juni, og har så langt nytta den ved sju slagtilfelle. Lærdal sjukehus har brukt den ein gong i same periode.

Likt tilbod uavhengig av geografi

- Målet har vore at alle slagpasientar i fylket skal ha eit like godt tilbod. Ein kritisk suksessfaktor her er tid, og difor har det vore viktig å kunne etablere tilbodet både i Førde, Lærdal og på Nordfjordeid. I løpet av næraste framtid har også Nordfjord sjukehus etablert tilbodet, seier Hegrestad.

Behandlinga er aktuell for dei mellom 18 og 80 år, pasientar som har kraftsvikt i ein arm eller eit bein eller begge delar, dei som taleforstyrrelsar (afasi) og for dei som får plutseleg synstap på eit auge der det ikkje er anna årsak.

Info

Vidar Vie 03.10.2007

Open dag på Rutlin

Tue, 15 Jun 2010 12:29:45

Laurdag 20 oktober er det open dag på psykiatrisenteret på Rutlin mellom klokka 11.00 og 15.00. Det skjer i samband med verdsdagen for psykisk helse.

Det er fjerde gong det blir invitert til open dag på Rutlin, og kvart år brukar 80-100 menneskje å kome. Alle er hjarteleg velkomne.

Her er programmet:

11:00: Program i kantina (felles)

Servering av gratis kaffi og høve til å handle noko attåt i kantina

Opning, ved avdelingssjef Sogndal Bup, Tore Hågård

Musikk og sang, ved Børge Vatlestad

11:30: Guida omvisning/orientering om senteret

12:15: Populærføredrag (parallelle føredrag)

- PMTO – terapi, ved PMTO-terapeut Gerd Kvile (biblioteket)

- Sinnemeistring (AMT), ved miljøterapeut Wenche Yttri og klinisk pedagog Hege Fimreite Måren (”ovale møterom/voksenpsykiatrisk poliklinikk)

13:00: Pause/skifte av føredrag

13:15: - ADHD, kva er det ?, ved barnepsykiater Tore Hågård (biblioteket)

- Den viktige samtalen med ungdom, ved Hege Fimreite Måren og miljøterapeut Rønnaug Dahl (ovale møterom)

(føredraga er ferdige ca kl. 14.00)

Kantina er open heile dagen og det blir sal av betasuppe med saft, kaffi, frukt, kaker o.a.

Inga påmelding - Velkomen til alle

Arrangør: Arbeidsgruppa i brukarmedverknad i psykiatrien, Sogndal Bup og Indre Sogn psykiatrisenter.

Info

Vidar Vie 04.10.2007

Habiliteringsprisen for 2007 til Lasse Seim og Robert Kalsvik

Tue, 15 Jun 2010 12:35:49

Dei er i dag er tildelt Habiliteringsprisen for 2007. Begge arbeider i Flora kommune.

Lasse Seim og Robert Kalsvik har vore krafta bak oppstart og gjennomføring av eit krevjande tilbakeføringsprosjekt til heimekommunen. Dette gjeld ein person med funksjonshemming og store utfordringar. Vedkommande levde meir enn to tiår i institusjon.

Lasse Seim og Robert Kalsvik har engasjert
seg personleg og fagleg i fleire år for
å etablere eit verdig og godt lokalt tilbod
for denne personen. Dette og liknande
prosjekt som dei har arbeidd med er svært
viktige, både for dei personane det gjeld,
familien, lokalsamfunnet, og samfunnet generelt.

Trass i ulikt syn på kva som er gode løysningar, har det synt seg at det både kan vere mogeleg og riktig å leggje til rette for at alle menneske skal kunne få eit verdig liv i lokalsamfunnet.

Lasse Seim og Robert Kalsvik har stått som ansvarlege for gjennomføringa av den krevjande tilbakeføringsprosessen. Dei har vist stor evne til å balansere ulike interesser og synsmåtar, og samstundes vist mot og vilje til å fremje realistiske og gode løysingar, sjølv om dette også kunne innebere eit stort konfliktpotensiale.

__________________________________________________________________________
For ytterlegare kommentarar han de vende dykk til
Einar Lunga tlf. 918 78 283 eller
Øyvind Watne tlf. 950 59 298

Info

Finn Ove Njøsen 05.10.2007

Gjennomgang av ambulansetenesta

Tue, 15 Jun 2010 14:40:39

Helse Førde er i ferd med å gå gjennom turnusar, drift og struktur innanfor ambulansetenesta. Arbeidstakarsida har kravd fleire årsverk på enkelte stasjonar på grunn av vaktbelastning og overtid.

Helse Førde tok over ambulansetenesta 1. april 2005 frå private aktørar. I samband med dette vart det etablert bemanningsplanar og vaktordningar etter drøftingar med tillitsvalde. Dette skulle seinare evaluerast, noko som har tatt lengre tid enn føresett.

Styret hadde saka til drøfting i styremøte 28. september, og det er no etablert ein prosess der leiinga i Helse Førde og tillitsvalde sine organisasjonar og vernetenesta skal delta. Tenesta er i dag driven som ein kombinasjon av stasjonsvakt og heimevakt, men på dei største stasjonane er det vakt på stasjon heile døgeret. Det er også ynskjeleg å få planlagt tid til etterutdanning og mellom anna deltaking i øvingar.

Revidert plan
Innan 25. oktober skal Helse Førde legge fram eit opplegg til revidert bemanningsplan for ambulansestasjonane og det skal parallelt drøftast med nokre kommunar om alternative løysingar for drift av ambulansebilane. Felles bruk av helsepersonell kan vere eit av løysingsalternativa.

Då saka var oppe på styremøte 28. september vart det også bestemt at dagens struktur for ambulansestasjonar skal gjennomgåast.

Her er heile vedtaket:

Vedtak:

1. Styret i Helse Førde syner til opplysningane i saka knytt til fagforeiningane sine oppseiingar av turnusar i ambulansetenesta.

2. Styret føreset at administrerande direktør gjer nødvendige tilpassingar i bemanninga i ambulansetenesta, slik at forholdet mellom stasjonsvakt, heimevakt og bruk av overtid blir så optimalt som mogleg.

3. Dei økonomiske konsekvensane skal, så langt råd er, takast omsyn til.

4. Vidare ber styret om få framlagt ny sak knytt til vurdering av ambulansestasjonsstrukturen i Sogn og Fjordane. Saka skal fokusere organisatoriske, faglege og økonomiske aspekt ved dagens struktur, og belyse eventuelle forbetringar i ein alternativ struktur.

5. Parallelt ber styret administrerande direktør om å gå i dialog med aktuelle vertskommunar for om mogleg innleie samarbeid om drift av ambulanseteneste ved dei ambulansestasjonane der dette vil kunne ligge til rette.

Info

Vidar Vie 09.10.2007

”Ting fungerer, det er ingenting å bemerke”

Tue, 15 Jun 2010 14:44:27

Psykisk helsevern i Helse Førde og kommunane i fylket får rosande omtale i ein nasjonal rapport om tilbodet til personar med psykiske lidingar.

Det er Helsetilsynet som har gjeve ut rapporten, og i følgje den står Sogn og Fjordane i ei særstilling:

Tilsynsmyndigheten i Sogn og Fjordane formidler at det ikke synes å være alvorlig svikt på noe område, verken i spesialisthelsetjenesten eller i kommunene, og avviker dermed fra de andre:

”Ting fungerer, det er ingenting å bemerke”

Tilsynet er bekymra over deler av Psykisk helsevern andre delar i landet, men altså svært fornøgd med stoda her i fylket.

- For oss som arbeider innan psykisk helsevern, og ikkje minst med tanke på alle våre pasientar, er dette svært kjekt. Det er viktig å merke seg at rapporten omhandlar både kommunane og vårt tilbod. Vi har eit svært tett og godt samarbeid, og eg trur det er mykje av årsaka til at ting her i fylket fungerer så godt, seier klinikkdirektør Ole Christian Reusch i Helse Førde.

Han påpeikar også at dette først og fremst må vere ein spore til vidare innsats.

- Vi skal glede oss over dei gode resultata, men samstundes passe oss vel for å bli sjølvgode. Det er absolutt rom for forbetringar innan for våre tenester også, og vi skal stå på for å halde oppe det gode nivået, seier han.

Info

Vidar Vie 09.10.2007

Nasjonalt kursing ved Førde sentralsjukehus

Tue, 15 Jun 2010 14:47:30

Det blir halde kurs ved Førde sentralsjukehus i "vaginal ultralyd i gynekologi og obstetrikksom".

Kursinga er tenkt for spesialistar og legar i spesialistutanning i fagområdet fødselshjelp og kvinnesjukdommar.

Kurset er også ope for alle med interesse for ultralydundersøking av kvinna sitt underliv (allmennlegar, røntgenlegar - spesialistar eller i utdanning for å nemne nokre).

Tida er 25.10 - 26.10. 2007 og føregår i Auditoriet ved Førde sentralsjukehus.

Det er eit nasjonalt kurs med lokale, nasjonale og internasjonale forelesarar. Godkjent av legeforeningen.

Dei andre kursa er i 2008, mai og august. Vi kjem attende til desse når programma er meir avklara.

Info

Finn Ove Njøsen 16.10.2007

100.000 til LMS frå Helse Vest

Tue, 15 Jun 2010 14:50:22

KOLS pasientar skal få eit betre tilbod i Sogn og Fjordane. LMS har difor fått støtte frå Helse Vest for å utvikle kvaliteten i LMS sitt tilbod til denne pasientgruppa.

Lærings- og Meistringssenteret i Helse Førde ønskjer å forbetre kvaliteten til KOLS-pasientar og får no 100.000 kroner til dette arbeidet. Hovudmålet med prosjektet som støtta går til er kvalitetsforbetring av lærings- og meistringstilbod for personar med KOLS og deira pårørande, tilpassa spreidd busetnad, bygd på likeverd i bruk av brukarar og fagfolk sine erfaringar og kunnskapar.

Vidare er det meininga at ein skal få erfaring med, og evaluere bruk av, standard metode for kvalitetsutvikling av læringstilbod utarbeidd av ”Nasjonalt Kompetansesenter for læring og mestring ved kronisk sykdom”.

Meir brukartilpassing
Bakgrunnen for arbeidet er at ei arbeidsgruppe under Lærings- og Meistringssenteret i Helse Førde ønskjer å utarbeide planar for å vere med på å starte opp fleire og meir brukartilpassa lærings- og meistringstilbod til personar med kronisk obstruktiv lungesjukdom (KOLS) i Sogn og Fjordane og deira pårørande.

Det er i dag etablert polikliniske rehabiliteringstilbod for personar med KOLS under Helse Førde, i Førde og Florø. I Florø har det også vore arrangert lungerehabiliteringskurs for inneliggjande pasientar. Desse tilboda dekker ikkje det totale behovet for gruppa, og det når ikkje ut til brukarar i alle deler av fylket, på grunn av lang reiseavstand.

Hovudmålet med prosjektet er å etablere eit likeverdig og tilpassa lærings- og meistringstilbod til alle personar med KOLS som er busette i Sogn og Fjordane og deira pårørande. Tilboda skal vere bygd på lik vektlegging av brukarar og fagfolk sin kompetanse.

Meir tilgjengeleg
Delmålet med prosjektet er å kvalitetsforbetre lærings- og meistringstilboda til personar med KOLS i Sogn og Fjordane og til tilpassa og tilgjengelige tilbod til flest mogeleg brukarar i fylket.

LMS vil difor starte opp og prøve ut 1-2 desentraliserte KOLS-skular. Vidare vil dei planlegge og gjennomføre oppfølgingsdagar/temadagar for brukarar 1-2 stadar i fylket samt å planlegge og gjennomføre kurs for pårørande 1-2 stadar i fylket.

LMS vil også starte opp arbeidet med å etablere forum for helsepersonell i Sogn og Fjordane, som jobbar med lungerehabilitering

LMS vil vidareutvikle brukarstyrt oppfølgingstilbod som er tilgjengelige og kjende for alle brukarar i fylket. Dei vil utdanne to kvalifiserte kursleiarar til sjølvhjelpskurset ”Å leve eit friskare liv”. Dei vil også gjennomføre sjølvhjelpskurs to stader i fylket og kvalitetsforbetre tilboda etter standard metode for å kvalitetsforbetre læringstilbod.

Info

Finn Ove Njøsen 18.10.2007

Kortare ventetid innan ortopedi

Wed, 29 Sep 2010 13:56:47

Ventetidene på fleire av dei ortopediske tenestene i Helse Førde er reduserte. – Pasientane kjem raskt til, lovar avdelingssjef Svenning i Lida.

- Vi har halvert ventetidene innan fleire av tenestene våre ved Førde sentralsjukehus. Medan det før tok 12 veker før pasientane fekk time til poliklinikken så er det no redusert til seks veker.

- I praksis kan det vere mogeleg å sleppe til endå raskare, seier avdelingssjefen.

Dei fleste pasientane som kjem inn til sjukehus får først time på poliklinikk, og seinare time til for eksempel operasjon.

- Flaskehalsen har over tid vore poliklinikken, og det er der vi har hatt lang ventetid. No har vi hatt stor poliklinisk aktivitet innan ortopedi ved Førde sentralsjukehus fleire månader, og det har gjort at ventelistene der har minka.

- I tillegg har vi no fått eit ekstra undersøkingsrom på poliklinikken, noko som fører til auka kapasitet, seier Svenning i Lida.

Her finn du ventetider og kvalitetsindikatorar

Info

Vidar Vie 19.10.2007

UPH inn i Psykiatrisk klinikk

Tue, 15 Jun 2010 14:56:37

UPH blir inntil vidare ein del av Psykiatrisk klinikk med Øyvind Watne som avdelingssjef og medisinskfagleg ansvarleg.

Avdelingssjef Arvid Søreide ved Ungdomsavdeling for Psykisk helsevern (UPH) er i permisjon for å gjere ferdig spesialiseringa som barne- og ungdomspsykiater. Øyvind Watne er avdelingssjef for Psykiatrisk klinikk, og UPH blir framover ein sengepost under klinikken.

Drifta ved UPH vil halde fram som før.

Info

Vidar Vie 21.10.2007

Utstyr på plass før nyttår

Tue, 15 Jun 2010 14:59:08

Utstyret som skal gjere personell i Helse Førde i stand til å oppdage høyrselskader hos små born er på plass i løpet av året.

- Vi har fått inn alle anbod og reknar med å ha ei avgjersle i løpet av denne veka. Det betyr normalt at utstyret har kome i slutten av november, seier avdelingssjef Jon Erik Skei ved avdeling for medisinsk-teknisk utstyr i Helse Førde.

Screeningutstyret som vert kjøpt inn skal plasserast i fødeavdelingane i Helse Førde, og undersøkinga skal gjerast av personalet som arbeider der. Dersom det vert oppdaga noko unormalt ved den første undersøkinga så vert det gjort utvida hørselsundersøking ved hørselssentralen FSS. Ved hørselssentralen må det såleis investerast i meir avansert utstyr, som måler om lydimpulsane når hjernen.

Ikkje pengemangel
NRK Sogn og Fjordane si melding, om at kjøpet har vore forseinka på grunn av pengemangel, stemmer ikkje. Det fortel avdelingsoverlege Einar Solheim.

- Vi skulle svært gjerne hatt utstyret på plass 1. januar i år, men det er praktiske årsaker til at det har blitt utsett. Det viktige no er at vi snart har det på plass. Vi har i dag det utstyret som skal nyttast ved den første screeningen, men berre ved høyrselsentralen. Det vil seie at det er berre utvalde grupper av nyfødde som vert testa etter ei risikovurdering. Utstyr for supplerande undersøking - hjernestammeaudiometri, har vi ikkje, og desse pasientane må undersøkast på Haukeland til vi får utstyret, seier Solheim.

Info

Vidar Vie 22.10.2007

Vil hjelpe afrikanske kvinner

Tue, 15 Jun 2010 15:07:43

Jordmor Karen Elisabeth Sætre såg eit innslag på TV frå Afrika. Der fekk ho med seg korleis grupper av kvinner lir etter fødslar som oppstod mellom anna av brutale valdteker.

Sætre reagerte spontant på Afrika-reportasjen og ville gjere noko med problemet.

– Eg vil vere med å hjelpe dei afrikanske kvinnene gjennom organisasjonen MedHum. Organisasjonen hjelper kvinner med ”vaginal fistel” i Afrika, seier Sætre.

Ho tok kontakt med fagutviklingsjordmor, Ingvild Strømmen, og vil arrangere svangerskapskurs for kvinner i distriktet. Alle jordmødrene på Førde sentralsjukehus sa seg med ein gong villeg til å vere med å hjelpe, gratis.

Svangerskapskurs i Førde
Dermed slår jordmødrene ved FSS to fluer i ein smekk og arrangerer svangerskapskurs for kvinner i Sogn og Fjordane og let alle midlane av kurset gå til kvinner i Afrika.

Kurset vil bli halde laurdag 24. november, anten på FSS eller ved sjukepleiarhøgskulen.

– Det er lenge sidan førre gongen kvinnene her i distriktet har fått tilbod om svangerskapskurs. Dette er truleg på grunn av små stillingsheimlar for jordmødrene i kommunehelsetenesta, trur Sætre.

Kurset vårt er tenkt å ha fødselsførebuing som tema. Vi går inn på tema som fødselsprosessen, redsel, smerter, barsel, amming, parforhold og ting som er relevant for kvinner her. Jordmødrene vil også ha ein kort informasjon om kvinnene sine problem i Afrika og prosjektet der.

Vaginal fistel
Mange kvinner i Kongo har kompliserte og langvarige fødslar etter svært brutale valdteker eller anna vald. Også små born som blir gravide eller utsette for vald får fysisk skade i form av vaginal fistel.

Kvinnene i krigsområdet i Kongo har liten tilgang til fødselshjelp og blir liggande lenge i fødsel. Barnet døyr til slutt i mange tilfelle. Mange av kvinnene er også redde for å oppsøke hjelp på grunn av frykt for valdtekt i dette krigsherja landet.

Vaginal fistel er ei unormal opning frå urinvegane eller frå tarmen til vagina, slik at urin og/eller avføring kjem ukontrollert ut. Kvinnene har store smerter, luktar vondt, og blir ofte utstøytt av familie og lokalsamfunn. For å bli friske treng dei ein operasjon og hjelp til å kome tilbake til samfunnet.

Pengane frå jordmødrene i Førde skal gå til eit prosjekt som skal gi gratis behandling og utdanning av lokale sjukepleiarar og legar. Midlane vil også gå til førebyggjande tiltak som kursing av jordmødre og sjukepleiarar. Organisasjonen dei gjev pengane til vil også gjennomføre opplysningskampanjar til folk gjennom film og radio.

For meir om ”medhum” kan de gå inn på denne linken: www.medhum.no

Info

Vidar Vie 24.10.2007

Traumebehandling utanfor sjukehus

Tue, 15 Jun 2010 15:12:39

90 tilsette i Helse Førde har no gjennomført opplæring i traumebehandling utanfor sjukehus. Det er planlagt meir opplæring i 2008.

Ambulansetenesta har i den seinare tid hatt fokus på traumebehandling, og gjev tilbod om PHTLS kurs for tilsette i ambulansetenesta.

16. – 18. oktober hadde dei kurs i Lærdal, og har tidlegare gjennomført fem kurs. Omlag 90 tilsette har gjennomført kurset til no. Neste opplæring vert gjennomført i Førde 13. – 15. november i Førde, og det er planlagd fleire kurs i 2008.

Kursa vert gjennomført i samarbeid med Stiftelsen Norsk Luftambulanse sitt KIA prosjekt (Kompetanseheving i Ambulansetenesta). Helse Førde har utdanna eigne instruktørar i kurskonseptet. Desse instruktørane arbeider i ambulansetenesta og er stasjonert i Vågsøy, Sogndal, Lavik og Førde.

Kva er PHTLS?
PHTLS står for Prehospital Trauma Life Support, eller på norsk; Traumebehandling utanfor sjukehus. Det er utarbeidd av NAMT, National Association of Emergency Medical Technicians, som er ein fagorganisasjon i USA som arbeider med akuttmedisin.

Utviklinga av konseptet starta i 1981, og er no ein del av traumeopplæring i 32 land rundt om i heile verda. Kurskonseptet er stadig i endring. Det er basert på forsking og statistikk. Helse Førde er ein av dei første som har tatt i bruk versjon 6 av det omfattande fagstoffet som ambulansepersonell skal ha studert i forkant av kurset.

PHTLS legg hovudvekt på prinsipp og ikkje metode. Den baserer seg på ambulansepersonalet si evne til å fatte rett avgjersle basert på ein solid plattform av kunnskap innan anatomi/fysiologi, rett prioritering av skade, og prinsipp om rask endeleg behandling. Kurset har også mykje fokus på praktiske ferdigheitar innan traumebehandling.

Info

Finn Ove Njøsen 24.10.2007

Færre blir tvangsinnlagte

Wed, 16 Jun 2010 07:08:57

Stadig færre av pasientane med psykiske lidingar i fylket blir tvangsinnlagte. Gode erfaringar frå tidlegare innleggingar, og samspelet mellom psykiatrien og primærhelsetenesta, er viktige delar av forklaringa.

Få tvangsinnlagte pasientar er eit kvalitetsteikn i psykisk helsevern. Difor har nasjonale styresmakter sett som mål at færre enn 20 prosent av pasientane skal kome i den kategorien. Helse Førde

*Prosent tvangsinnlagte dei første åtte månadane kvart år:*
2004:	17,3 prosent
2005:	16,2 prosent
2006:	14,5 prosent
2007:	10,3 prosent

utmerkar seg i positiv lei. Dei første åtte månadene i år var vel 10 prosent av pasientane tvangsinnlagte.

- Mange av pasientane våre er gjengangarar. Dei kjenner seg trygge på kva som møter dei hos oss, og ønskjer difor ei frivillig innlegging. Samstundes klarer primærhelsetenesta i kommunane ofte å fange opp tidleg at pasientane treng spesialisthjelp. Dermed unngår vi at pasientane er så sjuke at tvangsinnlegging er einaste løysinga, seier Mona Holmefjord, psykiatrisk sjukepleiar på akuttavdelinga ved Psykiatrisk klinikk i Førde.

- Det at vi i tillegg har svært velfungerande distriktspsykiatriske senter i Sogndal og på Nordfjordeid spelar også positivt inn, seier overlege Per Bergsholm.

Holmefjord og Bergsholm peikar på fleire andre årsaker til dei positive tala i Sogn og Fjordane

Aktivt kursing av kommunelegar
Mange kommunelegar har arbeidd ved klinikken
Stadig fleire psykiatriske sjukepleiarar i kommunane
Fast og faglært arbeidskraft ved psykiatrisk klinikk
Godt nettverk primærhelsetenesta/psykisk helsevern
Ambulant psykiatriteam møter pasientane i kommunane
Stor grad av vidareutdanning innan psykiatri

Dei som vert tvangsinnlagte er ofte tidlegare pasientar som har slurva med medisinen. Då kan dei bli ute av stand til å vurdere om dei bør leggast inn. Til sist er det ofte bekymra pårørande som kontaktar kommunelegen som igjen ber om ei innlegging.

- Andre stader i landet er det døme på at kommunelegar legg pasientar inn med tvang, fordi det er einaste måten å få til ei akuttinnlegging på. Slik har vi det ikkje hos oss.

Kommunelegen har rett til å legge inn pasienten og vi har plikt til å ta i mot dei. Vi drøftar sakene med kommunelegane, men vi stoppar ikkje innleggingane, seier avdelingssjef Øyvind Watne.

- Eit anna element som spelar positivt inn er at vi i mindre grad nyttar vanedannande medisinar i behandlinga enn elles i landet. Det gjer nok også at vi får færre tvangsinnleggingar seinare, seier Bergsholm.

Info

Finn Ove Njøsen 24.10.2007

Forbetringsprogram for varig balanse

Wed, 16 Jun 2010 07:15:58

Jon Bolstad, administrerande direktør i Helse Førde, går inn for at det vert etablert eit langsiktig program for effektivisering og forbetring i Helse Førde.

Jon Bolstad, administrerande direktør i Helse Førde, går inn for at det vert etablert eit langsiktig program for effektivisering og forbetring i Helse Førde.

- Helse Førde manglar 100 millionar kroner på å kome i balanse. For å klare det må vi ha tid. Både i år og i 2008 skal vi ha fokus på auka aktivitet og kostnadsreduksjonar. I tillegg skal vi etablere eit forbetringsprogram over tre år, mellom anna med fokus på betra pasientflyt og logistikk, seier Jon Bolstad.

Sintef-rapport
Eit viktig grunnlagsdokument for arbeidet er rapporten om forbruk av sjukehustenester som Sintef har utarbeidd. Der er Helse Førde samanlikna med fire andre føretak, slik tabellen viser.

- Rapporten viser at vi har nærma oss landsgjennomsnittet, men at vi framleis har ein ubalanse mellom døgn- og dagbehandling. Sengekapasiteten er også stor, og vi har for høgt kostnadsnivå. Den er eit svært godt utgangspunkt for det vidare arbeidet, seier Jon Bolstad.

Han skisserer tre kategoriar av kostnadsreduserande tiltak:

Operasjonelle tiltak
Funksjonsfordeling
Strukturelle tiltak

- I ein tiltaksplan med mål om å skape balanse i økonomien er ein nøydd til å klargjere kva som er mogeleg å realisere gjennom operasjonelle tiltak før ein vurderer tiltak av funksjonell og strukturell karakter, skriv han i tilrådinga til styret.

- God styring

Helse Førde har engasjert konsulentselskapet ProsessPartner A/S som har brei røynsle med forbetringsarbeid i helseføretak. Dei rår også til at det vert starta eit langsiktig program.

- Der vil ein i tillegg til pasientbehandling, setje fokus på dei tre andre hovudoppgåvene til sjukehusa; opplæring av pasienter og pårørande, utdanning av helsepersonell og forskning.

Eit slikt utviklingsarbeid er i tråd med dei overordna målsettingane i strategiplanen ”Helse 2020”. Det samsvarar også med Styringsdokument 2007 for Helse Førde HF, der føretaket av eigar er pålagde å jobba med pasientlogistikk og prosessforbetring, kvalitet og god styring av verksemda, heiter det i tilrådinga frå konsulentselskapet.

Strukturkostnader
ProsessPartner tilrår også at det vert gjennomført ein gjennomgang av dei strukturelle kostnadene:

- Det er vår vurdering at Helse Førde har ei større kostnadsulempe som ein konsekvens av sjukehusstrukturen enn det strukturkomponenten og skjønnstilskotet dekkjer. Vi tilrår difor Helse Førde HF å be om ei grundigare berekning av dei reelle strukturkostnadane til føretaket. Ei slik berekning bør gjerast på grunnlag av bedriftsøkonomiske prinsipp, ved å berekne den faktiske kostnadsulempa føretaket har, heiter det i rapporten deira.

Info

Vidar Vie 24.10.2007

Funn i rapporten frå SINTEF

Wed, 16 Jun 2010 07:30:51

Funna i SINTEF-rapporten tilseier at Helse Førde må setje i gang eit langsiktig forbetringsprosjekt med mål om å planlegge aktiviteten betre (pasientflyt og logistikk).

Mange av dei forbetringstiltaka som er skissert i punkta under (henta frå styresaka) vil høyre inn under paraplyen til dette langsiktige prosjektet.

Oppsummeringstabell (SINTEF)

(Landsgjennomsnitt = 100)

I den vidare gjennomgangen vil SINTEF-Helse sine funn under hovudoverskriftene Sjukehusforbruk, Sengekapasitet, Ressursinnsats personell og Ressursinnsats kostnader og bli kort skissert. Under kvar overskrift vil vi også skissere forslag til forbetringstiltak for Helse Førde der det er naudsynt.

1. Sjukehusforbruk

SINTEF- rapporten syner:

- Helse Førde hadde både i 2003 og 2006 høgare forbruksrate for døgnopphald, enn i Helse Vest RHF og gjennomsnittet for landet elles. I same tidsperiode har Helse Førde redusert sin eigen rate for døgnopphald. (tabell 2, s.15 i SINTEF-rapporten)

- I 2003 var samla forbruk i Helse Førde fem prosent over landsgjennomsnittet. I 2006 ligg samla forbruk ein prosent under landsgjennomsnittet. Helse Fonna har i same perioden auka sitt sjukehusforbruk. Forbruket i Helse Fonna i 2006 ligg rett under nivået til Helse Førde og skilnaden mellom Helse Førde og Helse Fonna er monaleg redusert frå 2003 til 2006.

- Vi har framleis låg rate for dagopphald og del dagkirurgisk behandling er låg i Helse Førde, spesielt gjeld dette for Førde sentralsjukehus (FSS) og Lærdal sjukehus (LSH) (tabell 5, s.18 og tabell 6, s.19 i SINTEF-rapporten)

- Helse Førde har høg rate for bruk av offentlege polikliniske konsultasjonar. Men delen konsultasjonar i Helse Førde hjå private spesialistar ligg lågt samanlikna både med landsgjennomsnittet, Helse Vest RHF og Helse Fonna. Når ein tek omsyn til forbruket hjå dei private spesialistane, vert såleis det samla bilete noko utjamna.

- I 2003 hadde Helse Førde ei betydeleg høgare rate for elektiv kirurgisk verksemd samanlikna med Helse Fonna. Helse Fonna har i denne perioden auka raten for elektiv kirurgisk verksemd, og skilnaden er i 2006 nesten utjamna. (Tabell 3, s.16 i SINTEF-rapporten)

- Helse Førde har 2581 preoperative liggedagar på 3 dagar eller meir. SINTEF Helse seier at dette utgjer 8,3 senger i 2006. (SINTEF-rapporten, avsnitt 7, s. 6)

- I Helse Førde er omfanget av innlagte pasientar som vert skrivne inn og ut same dag høgt og det er eit høgt volum av liggedagar over trimpunktet. (Tabell 11, s. 23 i SINTEF-rapporten)

- Skilnadane mellom Helse Førde og Helse Fonna i tal opphald per pasient er noko mindre i 2006 enn i 2003, men vi har framleis høgare tal enn Helse Fonna. I 2003 hadde Helse Førde ei høgare forbruksrate av sjukehustenester innan dei fleste hovudkategoriar i ICD-10 samanlikna med Helse Fonna og landet. I 2006 er dette ikkje tilfelle, framleis har vi høgare forbruksrate for sjukdomar i nervesystemet, sjukdomar i auge, sjudomar i muskel og skjelett og bindevev og sjudomar i urin og kjønnsorgan men på andre områder har Helse Fonna høgare forbruksrate.

- I 2003 blei 82,7 prosent av pasientane frå Helse Førde behandla i eige helseføretak. Denne andelen er i 2006 redusert til 79,4 prosent. Ein større andel av pasientane vart i 2006 behandla ved Haukeland universitetssjukehus og andre helseføretak i eigen region. (Tabell 16, s. 33 og tabell 17 s. 34 i SINTEF-rapporten)

Forbetringstiltak - sjukehusforbruk.
· Helse Førde har eit høgt forbruk av døgnbehandling, lågt forbruk av dagbehandling og låg dagkirurgisk aktivitet. Det må gjennomførast omorganisering og tilpassing av areal ved FSS for å auke dagkirurgisk aktivitet så snart som mogeleg. Sjå også styresaka 067/07 V om pasienthotell og dagkirurgisk areal.

· Gjennomsnittlege liggedagar over trimpunktet er 7,8 % for Noreg. I Helse Førde er det berre Nordfjord sjukehus som ligg under dette. Ved Nærsjukehuset ligg nesten kvar fjerde pasient lengre enn trimpunktet. Sidan liggedagar utover trimpunkt i prinsippet er ufinansierte liggedagar i høve DRG-systemet bør vi snarast finne tiltak for å få ned liggetida.

· I motsetnad til dagbehandling og dagkirurgi er omfanget av poliklinisk aktivitet i Helse Førde høgt og delen konsultasjonar hjå private spesialistar ligg lågt. Vi veit at det til tider er ventelister og lange ventetider for pasientar som skal til dei offentlege poliklinikkane i Helse Førde. Vi må vurdere om det er mest tenleg å dekke trongen for slike tenester innanfor dei offentlege poliklinikkane eller om det burde vore oppretta fleire private avtalar.

· Det er eit mål for Helse Førde at stadig fleire tenester skal utførast ved ambulant organisering, også jamfør arbeidet med lokalsjukehusstrategiar. Vi skal i større grad enn no flytta legespesialistane ut til og mellom lokalsjukehusa og sentralsjukehuset slik at pasientane får tilbod i sitt lokalsjukehusområde. Dette vil auke tilgjenget for pasientane og bidra til fagleg utvikling og utveksling mellom behandlarane i ulike delar av Helse Førde.

· Vi må samarbeide endå betre med kommunehelsetenesta, og gi tilbod om kompetanseheving og rettleiing til helsepersonellet der slik at dei kan ta fleire kontrollar og meir av den oppfølgjande behandling i kommunane.

· Vi vil vurdere om praksiskonsulentordninga skal utvidast.

2. Sengekapasitet

SINTEF- rapporten syner:

- Sengekapasiteten i Helse Førde var i 2006 over landsgjennomsnittet, høgare enn i Helse Fonna, men på line med Helgelandssykehuset. Når det gjelder ressursinnsats målt i tal senger (tabell 30, s. 52 i SINTEF-rapporten), hadde Helse Førde i 2003, 3,8 effektive senger per 1000 innbyggarar. Dette er i 2006 redusert til 3,4. Helse Fonna hadde dei same åra høvesvis 2,8 og 2,7 effektive senger.

- Sengekapasiteten i Helse Førde er framleis høgare enn landsgjennomsnittet. Sjølv om Helse Førde har redusert sengekapasiteten sin meir enn Helse Fonna utgjer skilnaden i 2006 ein sengekapasitet på 0,7 per 1000 innbyggarar. Rekna utifrå Helse Førde sitt befolkningsgrunnlag utgjer dette 74 senger meir enn i Helse Førde enn i Helse Fonna.

Forbetringstiltak - sengekapasitet.

Der har i løpet av 2007 vore ytterlegare reduksjon av sengekapasiteten i Helse Førde. Det gjeld mellom anna 17 senger som resultat av arbeidet med Ortopediplanen. Vidare er det under planlegging etablering av pasienthotell i 2008 og andre tiltak som vil føre til ytterlegare reduksjon i talet på senger.

· Vidare reduksjon av sjukehussenger må setjast i verk.

· Drifta skal leggast om til meir dagbehandling og dagkirurgi.

· Vi må samarbeide med kommunehelsetenesta, og gi tilbod om kompetanseheving og rettleiing slik at vi unngår unødvendige akuttinnleggingar særleg på dei medisinske avdelingane.

· Preoperativ liggetid skal reduserast.

· Helse Førde sin tradisjonelle avdelingsstrukturar hindrar fleksibel bruk av senger og personell. Vi ynskjer å starte eit prosjekt der ein vurderer andre organisatoriske einingar som t.d. fordeling av pasientane utifrå funksjon og ikkje utifrå diagnose.

· Sjukeheimssenger som er finansierte av Flora kommune ved Nærsjukehuset skal ikkje lenger rapporterast som spesialisthelsetenestesenger.

3. Ressursinnsats personell

SINTEF- rapporten syner:

- Ressursinnsatsen målt i tal årsverk (tabell 31, s. 54 i SINTEF-rapporten) var i 2003 på 14,2 årsverk per 1000 innbyggarar i Helse Førde. Tilsvarande tal i 2006 var 14,3.

- Helse Fonna derimot har auka personellinnsatsen til 13,2, men ligger framleis under landsgjennomsnittet som er på 13,9.

- For personellfaktoren er det drift/servicepersonell og adm./kontor som ligg høgt i Helse Førde.

- Når det gjeld opphald per legeårsverk (tabell 32, s 55 i SINTEF-rapporten) har Helse Førde i 2006, 16 færre opphald enn det ein finn i Helse Fonna og vi ligg også klart under Helgelandssykehuset med 17 færre opphald per legeårsverk. (Det er viktig å merke seg at i nokre tilfeller er ikkje innleigde personellressursar rekna inn i lønnssystemet i alle helseføretaka slik som vi gjer det i Helse Førde. Tabellen er difor ikkje korrigert for dette)

Forbetringstiltak – ressursinnsats personell
Helse Førde er den største høgkompetanseinstitusjonen i fylket. Kjernepersonellet vårt, (legar, sjukepleiarar m.m.) må sjølvsagt til ei kvar tid ha oppdatert fagkompetanse og eit kunnskapsnivå som er på line med dei andre helseføretaka i Noreg. Den humane kunnskapskapitalen og vedlikehaldet av denne er difor sjølve grunnlaget for Helse Førde si drift. Dekningsgraden for personell som arbeider med kjerneoppgåvene våre, direkte pasientbehandling ligg om lag på landsgjennomsnittet. Legeårsverk per 1000 innbyggjar er 0,1 under snittet medan sjukepleiardekkinga er på landsgjennomsnittet.

· Det er avgjerande å drive kontinuerleg rekrutteringsarbeid for heile tida å vere i forkant og sikre at vi til ei kvar tid har kompetent personell i alle stillingar, til dømes slik vi gjer det i Paragona-prosjektet.

· For å vedlikehalde kunnskap og kompetanse vil vi halde fram med kontinuerleg kompetanseheving av kjernepersonell.

· For å sikre fagkvalitet og kunnskapsutvikling vil FOU-arbeidet verte prioritert høgare dei komande åra.

· Innan utgangen av 2009 har vi teke i bruk ny teknologi som vil gje ein reduksjon på 25 – 30 årsverk i kategorien drift/servicepersonell.

4. Ressursinnsats kostnader og finansiering

SINTEF- rapporten syner:
- Helse Førde har 8 % høgare kostnadsnivå enn landsgjennomsnittet. Sjølv om omfanget av døgnbehandling totalt i Helse Førde er redusert i perioden indikerar talgrunnlaget at vi samanlikna med andre helseføretak bør snu meir av drifta mot dagbehandling.

- Samanlikna med dei utvalde helseføretaka i 2006 har Helse Førde det høgaste relative kostnadsnivået for driftskostnader DRG-verksemd per DRG-poeng,1.08, og det nest høgaste for driftskostnader DRG-verksemd per liggedag, 1,02. På begge desse indikatorane ligg relativt kostnadsnivå i Helse Vest lågare enn landet.

- Helse Førde HF er det einaste av helseføretaka som ikkje har senka det relative kostnadsnivået frå 2005 til 2006. (tabell 33 og tabell 34, s. 57 i SINTEF-rapporten)

Forbetringstiltak – ressursinnsats kostnader og finansiering.

Helse Førde har saman med Nordlandsjukehuset det høgaste relative kostnadsnivået for driftskostnader DRG-verksemd per DRG-poeng i 2006.

Det er eit ope spørsmål kva som er rett kostnadsnivå for Helse Førde. Skal vi ligge på landssnittet må vi redusere kostnadane knytt til DRG-basert verksemd med 60 mill kr. Skal vi ligge på snittet for helseføretaka i Helse Vest må vi reduserer DRG-basert verksemd ytterlegare og ned mot 100 mill.

(tabell 33 side 57 i SINTEF-rapport)	Kostnadsnivå 2006	Relativt kostnadsnivå 2006	Behov for omstilling mill kr
Nordlandssykehuset	38 186	1,09
Helse Førde	37 888	1,08
Landsgjennomsnittet	35 057	1,00	60,0
Helgelandssjukehuset	34 994	0,99	67,5
Helse Vest	33 422	0,95	97,5
Helse Fonna	31 832	0,91	127,5

Kostnadsnivået er eksklusiv kapitalkostnader (avskrivingar)

I det vidare arbeidet med å finne ut kva som er rett kostnadsnivå for Helse Førde må mellom anna desse omsyna leggast til grunn for vurderinga:

Tal institusjonar i høve pasientgrunnlag - struktur

Omfang vakt- og beredskaps ordningar ved sjukehusa
Reiseavstand til sjukehus – geografi
Folketal, folketalsutvikling og demografi
Tilbod og kompetanse i kommunehelsetenesta

Info

Vidar Vie 25.10.2007

Nasjonal kursing med internasjonale kapasitetar

Wed, 16 Jun 2010 07:34:22

I går og i dag har Førde sentralsjukehus vore staden for nasjonalt kurs i "vaginal ultralyd og obstetrikksom". Det var fleire utanlandske føredragshaldarar med Nazar Amso i spissen.

- Internasjonal kompetanseutveksing er viktig, og det å snakke med kollegaer frå både innland og utland er viktig, seier Jostein Tjugum ved Førde sentralsjukehus.

Tjugum stod som arrangør for kurset i samarbeid med Knut Gjelland frå Haukeland Universistetssjukehus. Anne-Randi Solheim var Helse Førde sin koordinator for gjennomføring av kurset.

- Eg var i England i 2003. Der høyrde eg Nazar Amso halde føredrag om ultralyd. Dette var så bra at eg ønskte han velkomen til Norge, fortel Gjelland.

Dette er andre gong Nazar er i Noreg. Første gong var han i Bergen og altså denne gong i Førde.

- Helse Vest har vore heldig og fått ein stor internasjonal kapasitet til våre sjukehus, påpeikar Gjelland.

Nazar har halde føredrag rundt om i heile verda. Innhaldet i føredraget går i hovudsak på å forelese om ultralydundersøkingar for både allmennlegar, røntgenlegar og spesialistar eller spesialistar under utdanning, som er målgruppa for Nazar.

- Det er veldig hyggeleg å bli invitert til Førde. Opplegget her er veldig godt organisert og er "up to date", fortel Nazar som til dagleg arbeider ved Universitetet i Cardiff, Wales i England.

Føredragshaldarane:
Nazar Amso, PhD, Senior Lexturer, Department of Obstetrics and Gynaecologny, Wales College of Medicine, Cardiff, England
Seth Granberg, Prof. dr. med. Karolinska Universitetssjukhuset, Kvinnoklinikken Stockholm, Sverige. Han er også overlege ved Akershus Universitetssjukehus, Kvinneklinikken, Lørenskog.
Erling Ekerhovd, Docent dr. med. Sahlgrenska Universitetssjukehuset, Gynekolog og Reporduktionsmedisin, Gøteborg, Sverige.
Ingrid Petrikke Olsen, Overlege, Klinikk Hammerfest, føde- og gynekologisk avdeling, Hammerfest.
Knut Bakke, Overlege, Haukeland Universitetssjukehus, Kvinneklinikken, Bergen.
Knut Gjelland, Seksjonsoverlege, Haukeland Universitetssjukehus, Kvinneklinikken Bergen.
Jostein Tjugum, Overlege, Førde sentralsjukehus, Kvinneklinikken Førde.

Info

Finn Ove Njøsen 26.10.2007

Styret vil ha effektivisering og forbetring i Helse Førde

Wed, 16 Jun 2010 07:36:36

Omstilling ved FSS og avvikling av sengeposten i Florø er viktige moment som skal utgreiast etter at Helse Førde sitt styre i dag gjorde eit omfattande vedtak i saka om handlingsprogram.

Helse Førde sitt styre gjorde såleis vedtak i møte i dag:

Omstilling og modernisering av drifta ved Førde sentralsjukehus (FSS) skal ha hovudfokus. Dette inneber reduksjon av sengetalet og auka dagbehandling/poliklinikk og snarleg driftsstart av internt pasienthotell. Det er styret si klare føring av ingen funksjonar/pasientilbod skal fjernast. Styret sluttar seg til etableringa av eit langsiktig program for forbetring og effektivisering i Helse Førde 2008 - 2010. Styret ber administrasjonen sette av ressursar til arbeidet i samband med budsjettet for 2008.
Basert på rapporten frå SINTEF-helse ber styret til neste møte om å få framlagt forslag til dimensjonering av sengetalet ved FSS i tråd med tilbodet ved Haugesund sjukehus, justert for relative størrelser. Oversikten skal presenterast klinikkvis med konsekvensar for bemanning, drift og investeringar. Styret forventar ikkje fullverdige konsekvensanalysar på dette stadiet, men oppstillinga skal gje grunnlag for eit førebels målbilete for drifta ved FSS. Styret legg til grunn at rapporten frå ProsessPartner også inngår i arbeidet.
Styret ønskjer kartlagt og gjennomgått alle former for vakt- og beredskapssystem i Helse Førde.
ENØK-potensialet i føretaket skal greiast nærare ut.
Sak om prehospitale tenester vert lagt fram så snart dialogen med kommunane er gjennomført, jfr. vedtak om dette i styresak 057/07, handsama av styret 28.09.2007.
Styret legg i framhaldet til grunn at eksisterande areal og bygningsmasse skal effektiviserast og utnyttast på ein betre måte enn i dag. Nye oppgåver skal fortrinnsvis løysast innanfor eksisterande bygningsmasse.
Til neste styremøte vert det lagt fram eiga sak med forslag til endringar av drifta ved sjukehuset i Florø. Følgjande skal leggast til grunn:
- vidareføring av poliklinisk verksemd
- avvikling av sengeposten
- sal av bygningsmasse med leige av naudsynt areal til Helse Førde si verksemd i Florø
Vurderingane av sal skal leggjast fram for styret snarast råd og seinast i samband med budsjett 2008
Dei utgreiingar styret her ber om skal vere grunnlag for arbeid med budsjett 2008. Arbeidet må difor gjevast høgaste høgaste prioritet og framdrift må haldast.

Info

Finn Ove Njøsen 26.10.2007

17 nye medarbeidarar i ambulansane er fagutdanna

Wed, 16 Jun 2010 07:39:12

- Så langt i år har ambulansetenesta i Helse Førde utdanna 17 ambulansemedarbeidarar innan føretaket. Eit svært gledeleg og oppløftande tal, seiser kst. ambulansesjef Stian Sægrov.

I 2005 kom det nasjonale forskrifter som sette

- Så langt i år har ambulansetenesta i Helse Førde utdanna 17 ambulansemedarbeidarar innan føretaket. Eit svært gledeleg og oppløftande tal, seiser kst. ambulansesjef Stian Sægrov.

I 2005 kom det nasjonale forskrifter som sette klare kompetansekrav til akuttmedisinske tenester utanfor sjukehus, her under ambulanseteneste.

Minst ein av dei to på ambulansen skal vere autorisert ambulansearbeidar med fagbrev. Fram til 2010 er det dispensasjonsordningar frå dette kravet.

- For Helse Førde som for resten av landet vert det ei stor utfordring å nå kompetansekrava. Difor er det gledeleg å sjå at fleire av personellet som har jobba i tenesta i lengre tid, avlegg fagprøve og får formalisert sin kompetanse, seier Sægrov.

Ambulansetenesta har nyleg sett iverk tiltak for å motivere og førebu dei tilsette til å ta fagbrev. For å auke rekruttering av autoriserte ambulansearbeidarar vil fleire av Helse Førde sine tilsette få tilbod om å skrive lærekontrakter, og slik få ei tettare oppfølging. Det er og oppretta avgrensa prosjektstillingar med fagutviklarar for å auke oppfylginga av dei tilsette.

- Når personellet vert fagutdanna endrar dei lønsgruppe, noko som burde vere ein motivasjon i seg sjølv. Personellet får og ytterlegare lønsauke etter å ha søkt og fått autorisasjon, slik forskrifta krev, understrekar Sægrov.

Personellet som no kan tittelere seg som ambulansearbeidarar fordelar seg over stasjonar frå heile fylket. 13 kvinner og 4 menn så langt i år.

Info

Finn Ove Njøsen 26.10.2007

Det blir pasienthotell ved Førde sentralsjukehus

Wed, 16 Jun 2010 07:41:42

Helse Førde sitt styre har i dag vedteke at det blir pasienthotell ved Førde sentralsjukehus. Pasienthotellet blir bygd i noverande bygningsmasse i 7. etasje.

Vedtak i styret i Helse Førde, i dag 26. oktober:

Styret syner til vedlagte notat ”Plan for etablering av pasienthotell Førde sentralsjukehus Helse Førde 2007”, og legg til grunn at prosjektet vert realisert i tråd med dette.
Finansiering av tiltaka som skissert i saksutgreiinga vert innarbeidd i budsjettet for 2008.

Info

Finn Ove Njøsen 26.10.2007

Brukar stadig mindre energi

Wed, 16 Jun 2010 07:45:27

Helse Førde har redusert energibruken med 3,7 millionar kilowattimar dei siste åra. Det tilsvarar årsforbruket til om lag 180 husstandar

Helseføretaket, med totalt ca. 89.000 kvadratmeter bygg i seks kommunar i Sogn og Fjordane, er ein storforbrukar av energi, men arbeider for å få ned energibruken. Eit nytt prosjekt skal redusere forbruket med ytterlegare 2,5 millionar kilowattimar i løpet av 2008.

- Bygningane som er med i desse prosjekta er Nordfjord sjukehus, Lærdal sjukehus, Florø sjukehus, Førde sentralsjukehus og institusjonane innan Psykisk helsevern i Førde og på Tronvik. I tillegg til samarbeidsprosjekt med Enova deltek Helse Førde i eit regionalt energinettverk i Helse Vest som vert kalla HEI (Helhetlig energi innovasjon). Vi deltek i dette nettverket for å få erfaringsutveksling med andre tilsvarande bygningar i Helse Vest. Vi er også i samarbeid med aktuelle energileverandørar med tanke på framtidig ekstern forsyning av varme/kjøling, seier Nils Arne Haukeland, avdelingssjef for Teknisk drift i Helse Førde.

Her er nokre eksempel på tiltak som er med i prosjektet:

- Systematisk energiregistrering og oppfølging (EOS)
- Utskifting av anlegg og bygningsdelar som har låg energiutnytting
- Betre styring og regulering av varme- og ventilasjonsanlegg
- Konvertering til vassboren varme
- Installering av varmepumper
- Solskjerming
- Bruk av alternative varmekjelder

Tabellen viser utvikling i energibruk pr. kvadratmeter i føretaket.

Info

Vidar Vie 29.10.2007

Høgskulen: - Heilt avhengige av kvarandre

Wed, 16 Jun 2010 07:51:34

Det blir gjort ein enorm innsats i Helse Førde i utdanninga av sjukepleiarar. Dei som følgjer opp studentane våre når dei er i praksis på sjukehusa fortener ei stor rose.

Det seier dekan Eva Marie Halvorsen ved Avdeling for helsefag på Høgskulen i Sogn og Fjordane. Sist vinter vart sjukepleieutdanninga ved
skulen kåra til den beste i Noreg i ei nasjonal studentundersøking. 1. november i år er søknadsfristen til kullet som startar i januar.

I store delar av utdanninga er studentane i praksis i kommunane og i Helse Førde. Halvorsen seier tilbakemeldingane frå praksisperiodane er gjennomgåande gode.

- Vi har kontinuerlege evalueringar og studentane er fornøgde. Viss det dukkar opp saker som kan forbetrast så er avstanden kort, og vi kan løyse problema raskt. Vi ligg tett opp til Førde sentralsjukehus, og vi har lærarar på sjukehusa på Nordfjordeid , Florø og i Lærdal. Avdeling for helsefag og føretaket er i stor grad avhengige av kvarandre. Utan sjukehusa kunne ikkje vi ha utdanninga i Sogn og Fjordane, og utan oss hadde rekrutteringa av sjukepleiarar vore langt vanskelegare for Helse Førde, seier Halvorsen.

Felles forskingsavdeling
Høgskulen og føretaket har samarbeidsavtalar som regulerer forholdet partane i mellom, og regelmessige møter for å sikre at samarbeidet fungerer best mogeleg. I tillegg til dei mange sjukepleiestudentane så utdannar høgskulen også spesialsjukepleiarar innanfor anestesi, operasjon, intensiv og psykiatri. Også det er eit viktig rekrutteringstiltak for Helse Førde.

Høgskulen si avdeling i Førde har i løpet av eit år 320 personar på vidare- og etterutdanning. Mange av desse er også tilsette i Helse Førde. Mellom anna tar fleire mastergraden i organisasjon og leiing ved Høgskulen i Sogn og Fjordane.

- No utvidar vi samarbeidet til å gjelde ei felles forskings- og utviklingsavdeling. Den første forskingsleiaren vert tilsett i desse dagar. Dette trur eg blir eit fruktbart samarbeid som også skal kome pasientane i Sogn og Fjordane til gode på sikt, seier Halvorsen.

Info

Finn Ove Njøsen 30.10.2007

Diabetes hos born aukar i omfang

Wed, 16 Jun 2010 08:09:50

Barneavdelinga i Helse Førde har 66 born som jamleg får oppfølging for Diabetes 1. Diabetes aukar kraftig i omfang. I 2005 og 2006 vaks talet med åtte kvart år.

Halvveges i år er konstatert seks nye born i Sogn og Fjordane med Diabetes 1.

- Den yngste vi har oppdaga med Diabetes 1 er 15 månader, fortel diabetessjukepleiar Randi Stubhaug Gamlestøl ved Barneavdelinga i Helse Førde.

- For å kunne leve godt med diabetes og førebyggje utviklinga av seinkomplikasjonar, må den enkelte ha tilbod om kontinuerlig oppfølging. Som diabetessjukepleiar har eg ei viktig oppgåve når det gjeld informasjon, støtte og rettleiing om korleis sjukdomen kan handterast i det daglege, for å auke livskvaliteten, seier Randi Stubhaug Gamlestøl.

Det blir forska mykje på kvifor Diabetes 1 oppstår. Så langt er ein komen fram til at arv har litt å seie. Vevstypen til ein person kan vere avgjerande om ein får diabetes.

- Miljø har mest å seie for om sjukdomen bryt ut, men ingen har kunnskap om kva i miljøet som er utløysande. Eg vil likevel understreke at foreldre til borna vi får inn på barneavdelinga ikkje har gjort noko gale, seier Gamlestøl.

For unge under 18 år så ligg Sogn og Fjordane litt over landsgjennomsnittet i tal Diabetes 1 førekomstar.

Info

Finn Ove Njøsen 30.10.2007

Turnuslegane trivest stadig betre

Wed, 16 Jun 2010 08:12:57

Fornøgde turnuslegar kan vere nøkkelen til framtidig legerekruttering i Helse Førde. Ei systematisk evaluering, utført sidan hausten 2004, viser at føretaket er i ferd med å lukkast.

Det starta for tre år sidan. Fylkeslegen i Sogn og Fjordane var bekymra over dei negative tilbakemeldingane frå turnuslegane si teneste ved sjukehusa i fylket. Turnusplassane i Sogn og Fjordane var svært upopulære og var på sisteplass i rating over nasjonale sjukehus med ansvar for opplæring av turnuslegar. Med statlege midlar engasjerte han dei rutinerte legane Ragnar Børsheim og Øyvind Watne for å starte med grupperettleiing for turnuslegar.
Dei to legane tok fatt på oppgåva og møtte ei svært kritisk gruppe unge legar.

- Dei var så misfornøgde med organisering og innhaldet i turnustenesta at det ville vore nesten umogeleg for Helse Førde å rekruttere dei som assistentlegar, seier Børsheim.

- Føler seg velkomne
Dei to legane er no i gang med det sjuande kullet av turnuslegar. For kvart kull har dei sendt rapport til Fylkeslegen, som har teke opp resultata frå evalueringane med føretaket. Tilbakemeldingane frå dei to siste kulla viser at svært mykje har skjedd i løpet av dei tre åra prosjektet har vart.

- Det som ikkje fungerte i 2004 fungerer no. Turnuslegane føler seg velkomne, verdsette og ivaretekne. Dei er ein del av kollegiet, får betre rettleiing, har betre kontakt med overordna og dei får fleire og meir interessante arbeidsoppgåver. Det tok tid, men resultata frå i år viser stor framgang. Det er større forståing i administrasjonen i føretaket og i dei enkelte avdelingane for at dette er viktig, og turnuslegane får meir systematisert oppfølging, seier Børsheim.

Trur fleire vil bli
Børsheim trur at langt fleire av turnuslegane kan tenkje seg å bli no enn kva som var tilfelle for nokre år tilbake.

- Får du folk til å like seg ein stad, så skal det meir til at dei reiser sin veg. Dei fleste turnuslegar har ingen naturleg tilknyting til fylket frå før, så motivasjonen for å bli må komme gjennom gode erfaringar og tilrettelagte forhold for legen. Nokre turnuslegar har også med seg familien hit og utfordringa vi ser no er at samarbeidet mellom føretak og kommune må betrast slik at legane slepp å flytte, byte bustad og skifte barnehage/skule når dei skal ut eit halvt år i turnusteneste i kommunane.

- Har planar om å bli i fylket

28 år gamle Gudmund Øvsthus er vel halvferdig med turnustenesta si i Helse Førde. Han har lyst til å halde fram med å arbeide ved Førde sentralsjukehus.

- Eg er godt fornøgd med den tenesta eg har hatt. Vi har nok å gjere, passeleg med ansvar, og det er kort veg til hjelp om det trengst. Terskelen for å be om hjelp for oss turnuslegar er også låg, seier Øvsthus, som starta tenesta si i psykiatrien, heldt fram ved Medisinsk avdeling og no skal avslutte den innanfor kirurgien.

Tilbakemeldingane frå dei andre turnuslegane har jamt over vore svært gode.

- Innanfor kirurgisk avdeling er det likevel mange turnuslegar, og dermed mindre praksis. Men også der er dei fornøgde med måten dei blir tekne hand om. Mitt inntrykk er at tenesta har blitt betre med åra. Eg trur også at det er rette vegen å gå for Helse Førde. Dei siste åra har ein dessutan fått ei endring i val av turnussjukehus, der turnuslegar kan velja å koma til Sogn og Fjordane utan å vera med i loddtrekninga som fordeler turnusplassar elles i landet. Slik får fylket no turnuslegar som vel Sogn og Fjordane fordi dei ynskjer å koma hit, så turnuslegane er nok meir motiverte for å bu i fylket før dei flyttar hit, enn kva som var tilfelle for nokre år tilbake. Inntrykk og trivsel betyr uansett veldig mykje når vi vel framtidig bustadadresse, seier 28-åringen, som altså ser for seg at han, kone og barn blir buande i Førde.

- Planen er å bli i fylket ei tid framover, og eg ser ikkje bort frå at eg kan koma til å slå meg ned i fylket for godt. Eg ser fleire alternativ ved Førde sentralsjukehus som eg kunne tenkje meg å jobbe med i framtida, seier Gudmund Øvsthus.

Info

Finn Ove Njøsen 31.10.2007

Kvar 20. krone går til pasienttransport

Wed, 16 Jun 2010 08:16:55

I fjor brukte Helse Førde 92,7 millionar kroner på å transportere pasientar med drosje, buss, bil, fly og båt. Meir enn kvar 20. krone som blir brukt i helseføretaket går til pasienttransport.

- Viss vi kan spare inn 1000 kroner på ei reise, så veit vi at dei pengane kan nyttast til å behandle andre pasientar. Difor samordnar vi reiser i drosje, sikrar oss gode rabattar på fly og driv med opplysningsverksemd overfor tilsette, kommunelegar og pasientar, seier Terje Olav Øen, direktør for Prehospital klinikk i Helse Førde.

Geografien i Sogn og Fjordane, og dagens utbygging av kollektivtrafikken, gjev store utfordringar for helseføretaket. I fjor brukte Helse Førde meir pengar på pasienttransport enn Helse Bergen, som har fire gongar så stort budsjett.

Dette brukte Helse Førde på pasienttransport 2006
Drosje:	49,5 millionar kr.
Rutefly:	4,1 millionar kr.
Rutegåande transportmiddel:	10,6 millionar kr.
Følgjekostnader:	1,2 millionar kr.
Opphaldsutgifter/ overnatting:	3,4 millionar kr.
Pasienttransport i ambulansebåt:	8,5 millionar kr.
Totalt:	92,7 millionar kr.

Fleire i same bil
- Er det noko pasientane kan gjere for å redusere utgiftene til helseføretaket?

- Å godta å køyre fleire i same drosje, når det ikkje er særskilt medisinsk årsak til åleinetransport. Dessutan er det ynskjeleg at pasientar som har høve til det nyttar rutegåande transport heile eller delar av strekninga. Viss pasienten har høve til å nytte eigen bil, så kan det også vere ei god løysing. Der lege meiner at pasient skal ha følgje på turen er det retningslinjer som regulerer kompensasjonsordning for det. Pasientar som nytter privatbil får refundert 1,70 kroner pr. kilometer. Lange drosjeturar med ein pasient i bilen er den dyraste løysingar for helsetenesta, seier Øen.

God samhandling
Helseføretaka vart økonomisk ansvarlege for all pasienttransport frå 1. januar i 2004. Framleis er det nok ikkje alle som veit at pengane som skal dekke drosja, kjem frå det same budsjettet som skal dekke drifta av, til dømes pasientbehandling og ambulansedrift. Men Øen meiner at haldningane er i ferd med å endre seg, og køyrekontoret gjer ein viktig jobb.

- Vi har fått nokre klager på samordning, nokre med god grunn og andre kanskje ut frå at pasientar har høgare forventning, enn kva samfunnet kan hjelpe til med av tenester. God samhandling med pasient på førehand gjev oftast gode løysingar. Legar og anna helsepersonell har også fått eit meir medvite forhold til kva type transport dei skal tinge.

Sterkare styring
Delar av Helse Førde har teke i bruk eit nytt elektronisk system med tinging av transport.

- Målet vårt er at all pasienttransport skal vere elektronisk rekvirert og styrt i løpet av 2008. Det inneber at mellom anna fastlegar skal rekvirere transport elektronisk, og at køyrekontoret i Helse Førde skal koordinere tenesta. Pasientar skal no ved reiser til og frå sjukehus tinge ekstraskyss direkte hjå køyrekontoret, og ikkje via lokal drosjestasjon, avsluttar Terje Olav Øen.

Info

Finn Ove Njøsen 01.11.2007

Heile landet vil ha treningskontaktar

Wed, 16 Jun 2010 08:23:00

2001 vart ordninga med treningskontaktar etablert. «Oppfinnaren» var Harald Munkvold ved Aktiv på dagtid. Konseptet er eksportert til store delar av landet.

- Ordninga går ut på at heilt vanlege folk vert kursa i treningslære og til å forholde seg til folk med ulike problem. Sidan 2001 har vi i Helse Førde brukt treningskontaktar i behandling av rusproblem og psykiske lidingar. Etter kvart har vi også utvida det til å aktivere andre pasientgrupper som til dømes diabetes, overvektige, hjarte-, muskel- og skjelettlidingar og kreft via Aktiv på Dagtid, seier Munkvold.

Han fortel at Aktiv på Dagtid kontinuerleg har førespurnader om treningskontaktordninga frå store delar av landet. Torsdag 11. oktober var han også i Sosial- og helsedirektoratet for å fortelje om ordninga.

- Ei ekspertgruppe som skal sjå på alternative metodar til å behandle overvektsproblematikk hos born og vaksne lurte på om dette også kunne nyttast der.
Svaret mitt var ja. Eg er sikker på at det kan nyttast, kombinert med annan behandling.

Han fortel at Atle Skrede og han, via Aktiv på dagtid, har utdanna om lag 550 treningskontaktar sidan 2001.

- Vi gir dei kurs, og mange av dei blir lønna som støttekontaktar av sosialkontora. Idéen er adoptert mange andre stader i landet også, seier Munkvold.

Info

Finn Ove Njøsen 02.11.2007

Litt fleire fødslar i fylket

Wed, 16 Jun 2010 08:25:36

Talet på fødslar ved sjukehusa i fylket er litt høgare til no i år enn på same tidspunkt i fjor.

Fødselstala i fylket har gått nedover i fleire år. Til no i 2007 har det vore 16 fleire fødslar enn i same periode i fjor. Lærdal har hatt like mange fødslar til no i år som dei hadde i heile fjor.

Her er tala pr. sjukehus:

Førde sentralsjukehus: 59 fødslar i oktober 2007 ( 607 fødslar pr. 01.11.06 og 616 fødslar pr. 01.11.07 )

Lærdal sjukehus: 5 fødslar i oktober 2007 ( 66 fødslar til 01.11.06, 73 fødslar til 01.11.07 )

Nordfjord sjukehus: 35 fødslar i oktober 2007 ( same fødselstall, 260 pr. 01.11.06 og pr. 01.11.2007 )

Info

Vidar Vie 05.11.2007

Nyreskule startar opp att

Wed, 16 Jun 2010 08:28:24

Lærings- og Meistringssenteret (LMS) startar no opp at med Nyreskule for pasientar og pårørande.

Nyreskulen har starta opp att og vil vere eit årleg tilbod. Skulen er no eit samarbeid mellom dialyseavdelinga ved Førde sentralsjukehus og LMS.

Nyreskulen er eit tilbod til dei som har nyresvikt, og der det i framtida vil kunne bli naudsynt med dialysebehandling og/eller nyretransplantasjon. Pårørande får óg tilbod om å vere med.

Kurset har gruppeundervisning og går over tre dagar. Den nyresjuke og pårørande vil under kurset få informasjon og rettleiing om det å leve med nyresvikt og å meistre sjukdomen best mogleg.

Det er eit tverrfagleg team som står for undervisninga.

Fagpersonell er legar, sjukepleiarar, ernæringsfysiolog, fysioterapeut og sosionom.

I tillegg deltek dialysepasient, nyretransplantert pasient, donor og representant frå Landsforeningen for Nyrepasientar og Transplanterte (LNT).

Brukarar med som førelesarar

Sølvi Losnegård er dialysepasient ved dialyseavdelinga på Førde sentralsjukehus. Ho er ein av førelesarane under Nyreskulen.

Temaet ho skal førelese om er «Livskvalitet for dialysepasientar». Som brukar har ho vore med på førebuinga av Nyreskulen. Sjølv har ho vore dialysepasient i fem år og kan fortelje mykje om det å leve med nyresvikt.

- Det er viktig å vite kva ein går til ved dialyse eller ein transplatasjon. Kurset gjev ein brei informasjon om det å vere nyrepasient og det å vente på transplantasjon. Kunnskap kan gjere oss pasientar eller pårørande trygge, understrekar Losnegård.

Kursdeltakarane vil også få omvisning på dialysen.

Losnegård har tidlegare vore aktiv i nyreforeininga for Hordaland og kontaktperson i Sogn og Fjordane.

Info

Finn Ove Njøsen 06.11.2007

Tove Hovland skal leie Forbetringsprogrammet

Wed, 16 Jun 2010 08:32:38

Seniorrådgjevar Tove Hovland skal leie Forbetringsprogrammet i Helse Førde. Målet er å utvikle behandlingslinjene, pasientbehandlinga og pasientservicen.

Styret i Helse Førde vedtok i siste styremøte at føretaket skal sette i verk eit program for effektivisering og forbetring.

- Arbeidet skal ta utgangspunkt i dei fire kjerneområda for spesialisthelsetenesta: Pasientbehandling, utdanning av helsepersonell, forsking og opplæring av pasientar og pårørande. Hovudmålet er å kontinuerleg utvikle behandlingslinjene, pasientbehandlinga og pasientservicen ved å effektivisere og vidareutvikle den faglege kvaliteten i Helse Førde, seier Tove Hovland.

Meir fag
- Sjølv om økonomi er eit vesentleg moment i mykje av det vi driv med, så ønskjer vi å dreie fokuset meir over på det faglege. Vår organisasjon og våre tilsette er opptekne av god og sikker pasientbehandling. Eg trur det er svært viktig å ta utgangspunkt i det når vi skal endre våre måtar å arbeide på, seier ho.

Eit av dei første oppdraga er å velje dei ulike forbetringsprosjekta som skal inn i programmet. Det skal skje saman med dei tilsette, og med hjelp av ekstern konsulent.

- Eit tema som heilt sikkert vert med er behandlingslinja. Vi skal sjå på korleis vi betre skal straumlinjeforme behandlingsforløpet for ulike pasientgrupper. Internt i Helse Førde handlar det om tida frå pasienten kjem inn i mottak og fram til utskriving. For å få det til så må vi også samarbeide med kommunehelsetenesta, seier Hovland.

- Sintef-rapporten som nyleg vart lagt fram viser at Helse Førde har for høg sengekapasitet.

- Det blir viktig å vurdere korleis vi kan redusere talet senger, samtidig som vi beheld eit godt fagleg tilbod. Vi sit ikkje i dag med svara på korleis vi skal gjere det, men eit av grepa som allereie er sett i gang er pasienthotell. Der har vi sett på funksjonen til pasientane når vi vel kva senger dei skal nytte. Ein annan ting som styret har gjeve klare signal på er at vi må auke den dagkirurgiske verksemda. Vi har for lite dagbehandling generelt i Helse Førde, og det vil ikkje vere unaturleg at eit av prosjekta omhandlar det.

Viktig å få med dei tilsette
Tove Hovland vil legge stor vekt på å få med dei tilsette i arbeidet som skal gjerast. Tillitsvalde og vernetenesta skal i tillegg vere med i den utvida leiargruppa som elles utgjer direktørmøtet i føretaket.

- Erfaringa frå andre organisasjonar er at ein treng både ei sterk forankring i, og styring frå leiinga, samtidig som dei som utøver faget, og brukarane, må involverast. Prosjekta i programmet må ha deltakarar frå dei som arbeider i involverte avdelingar. I slike prosessar er det slik at dei som eig utfordringane også må løyse dei. Leiinga, styret og eksterne konsulentar kan peike på at Helse Førde har for lite dagbehandling, men løysinga ligg der våre tilsette møter pasientane, seier Tove Hovland.

Forbetringsprogrammet skal organiserast etter følgjande modell:

Info

Anbod på kjøp av drosjetenester

Wed, 16 Jun 2010 08:35:50

Helse Førde har gjennomført anbodsrunde for kjøp av pasienttransport i Årdal, Lærdal og Aurland. Resten av fylket kjem no puljevis. Anbodstida er to år med opsjon på inntil to nye år.

Sogn og Fjordane er spesielt med grisgrendt folkesetnad og lange avstandar. Når Helse Førde no inngår avtalar, har vi fokus på å få avtalar med transportørar lokalisert der brukarane er. Vidare er det viktig at dei har tilgjengeleg fleire ulike biltypar, slik at pasientane sitt behov vert dekka. Det er krav om minst ein rullestolbil i kvar kommune.

- Det ligg også inne i anbodet at det skal bli ei kompetanseheving hjå drosjesjåførane i pasienthandtering og førstehjelp, seier Inge Horstad, som har Pasienttransporten som arbeidsfelt.

Dei nye transportørane etter første anbodsrunde er:

Årdal: Kjell og Olav Lerum.
Lærdal: Marianne og Jan Geir Solheim.
Aurland: Kjell Bakke og Johnny Steensen.

Alle desse køyrer drosje i dag, og vil i tillegg supplere med turvogner. Totalt vert det no fleire bilar i området.

Dei nye kontraktane startar opp 1. januar 2008. Pasientar med drosjerekvisisjon frå behandlar kan kontakte transportør direkte på lokale turar. På turar utanom kommunen ringer ein køyrekontoret. Helse Førde dekker berre drosjekostnader for turar der transportørar har avtale med helseføretaket.

- Betre prisar, betre tilpassa bilpark og ei tettare samhandling mellom transportør, pasient og køyrekontor er dei viktigaste momenta for å sikre ei rasjonell og god teneste for brukarane våre, seier Horstad.

Info

Finn Ove Njøsen 08.11.2007

Barneavdelinga trappar opp på Nordfjordeid

Wed, 16 Jun 2010 08:40:19

Nordfjord sjukehus har no barnelege ein dag i veka. – Pasientar som elles måtte reise til Førde får dermed time der, seier avdelingssjef Rolf Horne.

- Vi opplever at det er svært godt motteke at vi no kan ha faste dagar på Nordfjordeid, seier Horne.

Då Ole Sverre Haga slutta som barnelege på Nordfjord sjukehus kom det ingen søkjarar til stillinga. Helse Førde lyste i staden ut ei stilling på Førde sentralsjukehus og lukkast i å rekruttere ein ny barnelege.

- Målet har heile tida vore å få opp igjen aktiviteten på Nordfjord sjukehus. Vi starta med ein dag i månaden, og har trappa opp sidan i sommar til ein dag i veka. Då er det ein spesialist i barnesjukdomar som reiser frå Førde til Nordfjordeid. Det heile er koordinert av barneavdelinga sin poliklinikk på Førde sentralsjukehus, seier Horne.

Ein del av funksjonen til ein barnelege er knytt til fødeavdelinga.

- Der vert det også gjeve rettleiing til jordmødrer når det gjeld nyfødde, det er samarbeid med gynekologar, og vi stiller opp viss foreldre eller fagfolk har spørsmål. I tillegg så har legen vanleg poliklinikk der born som er tilviste til Helse Førde vert mottekne, opplyser avdelingssjefen.

40 prosent
Han reknar med at om lag 40 prosent av dei tilviste borna frå Nordfjord no får time på Nordfjordeid. Han fortel at dei prioriterer å gje dei som bur lengst vekk frå Førde, til dømes Selje og Vågsøy, time på Nordfjordeid.

- Det er dei enklaste konsultasjonane som skjer på Nordfjordeid. Enkelte andre konsultasjonar krev sentralsjukehuskompetanse. Til dømes må fleire fagfolk inn i biletet, og det er krav til anna utstyr. Difor må nokon uansett til Førde. Det er også slik at nokre, uansett kvar dei bur i fylket, må reise til større regionsjukehus som til dømes Bergen, seier Horne.

Godt samarbeid
Overjordmor Linda Grotle Hauge på fødeavdelinga på Nordfjord sjukehus er glad for at dei no har barnelege med jamne mellomrom.

- Vi fekk utfordringar i ein periode, og det er storveges at vi har fått barnelege ein gong i veka. Bergen og Ålesund har eit liknande opplegg mot høvesvis Voss og Volda, og det er ein modell som også fungerer godt her. Å ha barnelege tilfører avdelinga ein ekstra kvalitet, og samarbeidet er framifrå, seier ho.

Info

Vidar Vie 12.11.2007

Alle dei skadde til Bergen og Voss

Wed, 16 Jun 2010 08:44:14

Pasienten som vart lagt inn på Lærdal sjukehus etter trafikkulukka i Aurland vert onsdag kveld sendt vidare til Haukeland universitetssjukehus.

Dei andre som vart skadde i ulukka vart sendt direkte til Haukeland universitetssjukehus og Voss sjukehus. Pasienten som vert overført onsdag kveld har alvorlege brotskader.

Meldinga om ulukka kom inn 13.47 til AMK ved Førde sentralsjukehus. Helse Førde sende ut lege, ambulansar, luftambulansar og rekvirerte redningshelikopter frå hovudredningssentralen på Sola. I tillegg varsla andre naudetatar sine ressursar.

Info

Vidar Vie 14.11.2007

Behandling av friske – en syk ide??

Wed, 16 Jun 2010 08:47:35

Klinisk etikkomité minner om fagleg seminar der ein får refleksjonar kring dilemma ved behandling av risikofaktorar, blodtrykk, cholestrol og låg beinmasse m.m. Det er søkt legeforeininga om kursgodkjenning for spesialiteten allmennpraksis.

Seminaret er i regi av klinisk etikk komite Helse Førde. Seminaret blir avvikla fredag 23. november 2007 - kl. 10–14.00. Stad: Auditoriet, Førde Sentralsjukehus.

Ein kritisk refleksjon omkring rådande tankegang for individuell førebygging.

Professor Dr.med. Irene Hetlevik, Inst. for samfunnsmedisin NTNU og allmennpraktikar ved Ranheim legesenter innleier med:

Behandling av friske – en syk ide??

Ein kritisk refleksjon omkring rådande tankegang for individuell førebygging.

Hennar forskingsområde er hjarte/karsjukdomar, kliniske retningslinjer, implementering, humanistisk medisin. Ho disputerte på tema: ”The role of clinical guidelines in cardiac risk intervention in general practice”.

Eva Søgnen overlege i kardiologi, Førde Sentralsjukehus, vil deretter belyse tema ut frå klinisk kardiologisk synspunkt. Pro-argument for individuell førebygging av hjarte/kar sjukdom.

Debatt, samtale spørsmål

Professor Dr. med. Eivind Meland, Inst. for samfunnsmedisin, Universitetet i Bergen:

”Evidens og eksistens” - nokre ord om kunnskapssynet i medisinen.

Tema vert belyst i ei kunnskapsteoretisk ramme. Biologi og eksistens høyrer saman som komplementære størrelse.

Seminaret vil vere fagleg interessant for alle som driv med individuell førebyggande medisin i allmennpraksis (og spesialisthelsetenesta). Ein får refleksjon kring faglege/etiske dilemma ved behandling av risikofaktorar, blodtrykk, cholestrol, låg beinmasse t.d.

Kom, høyr og diskuter med to kunnskapsrike professorar frå allmennmedisin, Irene Hetlevik og Eivind Meland og vår eigen kardiolog Eva Søgnen.

Kurset er gratis.

Påmelding til kari.anne.sunde@helse-forde.no for personar utanfor Helse Førde.
Helse Førde sine tilsette skal melde seg på via Læringsportalen på Helse Førde sitt intranett.

Klinisk etikkomité Helse Førde

Info

Finn Ove Njøsen 16.11.2007

Redningshelikopteret skal ha legar frå Helse Førde

Wed, 16 Jun 2010 08:50:43

Helse Førde er bedne om å førebu bemanning av legeressursane til redningshelikopteret i Florø. Helikopteret skal vere ein del av luftambulansen.

Redningshelikopterbasen i Florø er føreslått etablert innan 1. januar 2009. Vilkåret er at Stortinget gjev sitt samtykke i samband med behandlinga av statsbudsjettet for 2008.

Legane som arbeider på basen skal vere fagleg og administrativt knytt til Helse Førde. Helse- og omsorgsdepartementet legg også til grunn at redningshelikopteret vert ein del av luftambulansen.

Helse Vest har no bede Helse Førde om å starte førebuingane med å etablere døgnkontinuerleg legeberedskap innan utgangen av neste år. Kostnaden med legevaktordninga er stipulert til 5,6 millionar kroner og vert dekka av Justis- og politidepartementet.

Info

Finn Ove Njøsen 16.11.2007

Åtte polske legar vil til Helse Førde

Wed, 16 Jun 2010 08:54:42

Åtte polske legespesialistar har så langt sagt ja til å arbeide i Helse Førde. Dei har no starta på eit halvårleg kurs i norsk.

- Dei åtte spesialistane har kompetanse som er svært viktig for føretaket. To indremedisinarar skal arbeide i Lærdal, og dei seks andre spesialistane kjem til å starte på Førde sentralsjukehus, seier personaldirektør Jan Birger Moe.

Dei seks som kjem til Førde er to kreftlegar, ein nevrolog, ein revmatolog, ein radiolog (røntgenlege) og ein hematolog (spesialist i blodsjukdomar).

Legane har tidlegare vore på besøk i Helse Førde. Der fekk dei vite kva føretaket kan tilby og vart intervjua av leiinga i dei aktuelle avdelingane. No har dei byrja opplæring i mellom anna norsk i Polen, og etter planen skal dei starte i Helse Førde sommaren 2008.

- Dette er eit spanande prosjekt for oss. I tillegg til at vi skal ta godt i mot dei på arbeidsplassen, så skal vi også syte for at dei og familiane trivest på fritida. I så måte er mellom anna tilbod om bustad, skule og barnehage sentralt, seier Jan Birger Moe.

Info

Vidar Vie 16.11.2007

Møte i Koordineringsrådet

Wed, 23 Jun 2010 12:17:07

Det vert møte i Koordineringsrådet fredag 23. november. Innkallinga finn du her.

Innkalling til møte i Koordineringsrådet

Vi kallar med dette inn til møte i Koordineringsrådet fredag 23. november 2007, kl 11.00 – 15.00.

Sakliste:

1 - Godkjenning av innkalling og referat
2 - Val av leiar
3 - Rammeavtale for samhandling mellom Helse Førde HF og kommunane
4 - Sal av jordmorteneste til kommunane.
5 - Hørselshemmedes Landsforbund etterspør kommunale høyrselskontaktar
6 - Kort orientering om ev aktuelle saker frå kommunane
7 - Kort orientering om aktuelle saker frå Helse Førde HF.

- arbeidet med akuttmedisinske team og telemedisin
- oppstart av forbetringsprogrammet

8 - Eventuelt

Venleg helsing

Tove Hovland

Seniorrådgjevar

Info

Vidar Vie 16.11.2007

Forskar på arbeidsmiljø og kvalitet

Wed, 16 Jun 2010 09:02:43

Ei forskargruppe frå Helse Førde og Høgskulen i Sogn og Fjordane er i gang med å undersøke pleiepersonell si vurdering av arbeidsmiljø og kvalitet i helsetenestene.

Det er pleiepersonell ved dei medisinske avdelingane i Helse Førde som er invitert til å delta i undersøkinga.

Bakgrunnen for undersøkinga er at sjukehusavdelingar med høg kvalitet, er karakterisert med godt leiarskap og eit inkluderande tverrfagleg teamarbeid, der dei ulike faggruppene opplever sine oppgåver som klart definert, og at dei tilsette er nøgde med jobben sin. Sjukehusavdelingar med slike særtrekk er assosiert med låg pasientmortalitet, god pasienttryggleik og nøgde pasientar.

Formålet med studien er å beskrive pleiepersonell si vurdering av arbeidsmiljø og kvalitet på helsetenester ved medisinske avdelingar i Helse Førde. Forskarane vil med det prøve å identifisere moglege område for kvalitetsforbetring.

Det er frivillig å delta og dei som måtte ønskje det kan også trekkje seg frå undersøkinga undervegs. Alle er garantert anonymitet ved deltaking i studiet. Forskarar har streng teieplikt. Innsamlingsperioden for opplysningane går fram til 3. desember i år.

Resultata av studien vil bli gitt til alle tilsette knytt til avdelingane som deltek i studien og til klinikkdirektøren. Funna i undersøkinga vil bli drøfte og ein vil evaluere nytteverdien.

Forskargruppa består av Irene Aasen Andersen, master i organisasjon, stipendiat John Roger Andersen og 1. amanuensis Øyvind Glosvik.

Info

Finn Ove Njøsen 16.11.2007

Oppdatering av tilbodet innafor psykisk helsevern

Wed, 16 Jun 2010 09:08:00

Kommunelegar, tilsette og fagleg og administrative leiarar i fylket er invitert til oppdateringskurs innafor psykisk helsevern. Kursprogrammet er no endeleg.

Psykiatrisk klinikk inviterer til kurs med oppdatering kring tilbodet innafor psykisk helsevern.

- Målgruppa for kurset er faglege og administrative leiarar for helse- og sosialtenesta i kommunane i Sunnfjord/Ytre Sogn. Kommunelegar i Sogn og Fjordane og tilsette i den kommunale helsetenesta

Det blir gjennomgang av avtale for samhandling mellom Psykiatrisk klinikk og kommunane i Psykiatrisk klinikk sitt DPS-område.

Psykiatrisk klinikk har ein dobbeltfunksjon innafor Psykisk helsevern i Helse Førde. Dei har sentralsjukehusoppgåver for heile Helse Førde sitt område, og funksjon som distriktspsykiatrisk senter for lokalsjukehusområdet Sunnfjord/Ytre Sogn. Klinikken ønskjer no å gjere profilen som DPS tydelegare, og vil med dette invitere breitt til kurs/seminar med særleg fokus på DPS-funksjonane.

Drøfting og meiningsutveksling vil vere eit sentralt element i heile kurset.

Frå sentrale helsestyresmakter er det føringar for at det skal vere ein samarbeidsavtale mellom kvar kommune og den psykiatriske eininga. Det er lagt inn drøftingar av innhaldet i ein slik avtale som ein del av programmet. Vi ønskjer innspel i høve avtaleteksten i forkant av møtet i november, slik at naudsynte justeringar i teksten kan gjerast. Vi ser føre oss eit ein mest mogleg likelydande med kva kommune vil vere tenleg.

Vi har gjort avtale om overnatting ved Sunnfjord hotell. Dei som ønskjer overnatting må sjølv ta kontakt med hotellet, telf. 57834000.

Det er ikkje kursavgift, men deltakarane må dekke kostnad til reise og opphald sjølv. Vi har gjort slik avtale med hotellet:

Antal	Teneste	Fra	Til	Pris pr person pr døgn/dag
	Heilpensjon enkeltrom	27.11.07	28.11.07	Kr 1127
	Dagpakke buande			Kr 370
	Dagpakke ikkje buande			Kr 370
	Middag ikkje – buande			Kr 370

Vi har søkt Den norske legeforening om godkjenning av kurstimar for spesialiteten i allmennmedisin.

Sidan vi har oppgåver overfor alle kommunane i Sogn og Fjordane vil vi invitere breitt til dette seminaret. Men om vi får plassmangel vil vi måtte prioritere deltaking frå kommunane i Sunnfjord/Ytre Sogn.

Vi har fått støtte frå Fylkesmannen i Sogn og Fjordane til å arrangere kurset.

Har de spørsmål kring kurset og avtalen ta gjerne kontakt med oss på telefon 57839470

Påmelding innan 15.11.07 sendast til marit.slettevold@helse-forde.no

Øyvind Watne
Avdelingssjef Psykiatrisk klinikk

Marit Slettevold
oversjukepleiar Psyk. klinikk Førde

Info

Finn Ove Njøsen 19.11.2007

Samhandlingsmøte kommunehelsetenesta – Nordfjord psykiatrisenter

Wed, 16 Jun 2010 09:11:20

Fredag 23. november frå kl 09.00 blir det samhandlingsmøte mellom kommunehelsetenesta i Nordfjord og Nordfjord psykiatrisenter.

Fredag 23. november, kl 09.00 – 13.00. Møtet blir halde i Storstova, NPS.

Sakliste:

Status samarbeidsavtalar
Uteteam med akutt-funksjon ved NPS ?
Utviklingshemming og psykiske lidingar – system for utredning/diagnostisering,
arbeidsmåtar, samhandling mellom 1. og 2. lina
Erfaringsutveksling om organisering av psykiatritenestene
Born med psykisk sjuke foreldre
Fagdagar 2008

Det blir servert enkel lunsj.

Info

Finn Ove Njøsen 20.11.2007

Innkjøp av fleire nye sjukehussenger

Wed, 16 Jun 2010 09:15:50

Tilbakemelding på dei nye sengene som vart levert i september har vore svært positive både frå pasientar, pleiepersonell, portørar og teknisk drift.

- Etter den første levering
av senger har no
sengegruppa
gjennomført evaluering av desse. Vi har i etterkant av evalueringa hatt møte med leverandøren med tilbakemelding og ynskje om små endringar, fortel Nils Arne Haukeland.

Resultatet av dette er at det no er sett i bestilling 46 nye senger.

5 av desse sengene vert levert direkte til Lærdal sjukehus. Opplæring av brukarar og teknisk personell vert gjennomført der i samband med leveringa.

Alle dei nye sengene er elektrisk hev-/senkbare slik som det førre innkjøpet.

Sengene vert levert rundt årsskiftet 2007/-08. Målet er levering i 2007.

- Det er svært gledeleg at vi no får kjøpe inn 46 nye senger. Vi har då samla kjøpt inn 86 slike senger + 4 senger som vart kjøpt inn i samband med adipositaspasientar, avsluttar ein nøgd Haukeland.

Info

Finn Ove Njøsen 20.11.2007

Redningshelikopter styrkar akuttberedskap

Wed, 16 Jun 2010 09:19:25

- Redningshelikopteret i Florø vil bety ei ytterlegare styrking av akuttberedskapen. Ikkje minst langs kysten av fylket vårt.

Det er konklusjonen til avdelingssjef Olav Hesjedal i Avdeling for akuttmedisin i Helse Førde. Måndag møtte han Karl-Åke Sjøborg som er medisinsk leiar i 330 skvadronen. Sjøborg opplyser at dei ønskjer mange medisinske oppdrag når dei er på plass i Florø om vel eitt år.

- Om lag 70 prosent av oppdraga til redningshelikoptera våre er ambulanseoppdrag. Helikoptera våre er i lufta to gonger dagleg, alle kvardagar, av treningsomsyn. For oss er det betre å få verkelege oppdrag enn å drive treningsflyging, seier han.

Toler all slags ver

Det er Helse Førde som skal bemanne redningshelikopteret i Florø med legeressursar, slik dei i dag bemannar luftambulansen i Førde. Olav Hesjedal er svært fornøgd med at skvadronen ønskjer ambulanseoppdrag.

- Helikopteret i Førde vil framleis vere den primære luftambulansen vår. Redningshelikopteret kjem til å vere eit supplement. Ikkje minst i krevjande vérsituasjonar, seier han.

- Så lenge vi flyr over ope vatn så kan vi tole om lag all slags vér og vi kan fly med null sikt. Dermed er vi svært operative på havet og langs kysten, seier Sjøborg.

- Det betyr at vi kan nytte redningshelikopteret på fleire av dei oppdraga der luftambulansen i Førde ikkje kan brukast. Redningshelikopteret kan hente pasientar langs kysten, og fly dei til Bergen eller Ålesund i situasjonar med ekstremt vér, seier Hesjedal.

Skal gjere det tryggare

Dei to ser fram til eit godt samarbeid når skvadronen er på plass i Florø innan 1. januar 2009. Redningshelikopteret skal ha ein besetning på seks personar, mellom dei ein redningsmann og ein anestesilege. Sjøborg er ikkje i tvil om at baseetableringa vil bety noko for folket i Sogn og Fjordane.

- Vi er på plass for å gjere det tryggare, og då både på havet og på land. På land har vi om lag same føresetnader for å fly som luftambulansen i Førde, men det at vi har heis gjer at vi kan ta ein del oppdrag som ikkje dei kan. Med kombinasjonen av nattsynbriller og infraraudt kamera er vi også langt betre rusta for å drive søk både til lands og til havs, seier han.

Hesjedal er også oppteken av at redningshelikopteret kan ta seks-åtte pasientar.

- Det er heldigvis ikkje ofte vi har situasjonar med så mange skadde. Men det betyr at vi kan supplere dei med personell som kan følgje og behandle så mange pasientar til sjukehus, seier avdelingssjefen.

Info

Vidar Vie 20.11.2007

Prognosen betra med fem millionar

Wed, 16 Jun 2010 09:26:09

Årsprognosen til Helse Førde er betra med fem millionar kroner etter stor aktivitet i oktober. Føretaket ligg no an til eit avvik i høve til budsjett på 82 millionar kroner.

- Utviklinga i siste månad var gledeleg, men viser likevel tydeleg kor stor omstillingsutfordring føretaket har. Sjølv om aktiviteten var høgare enn budsjettert, og høgare enn i same månad i fjor, så gjekk Helse Førde likevel med 7,5 millionar kroner i underskot i oktober. Det betyr at vi er nøydde til å redusere kostnadene våre, seier administrerande direktør Jon Bolstad.

Prognosen for årsresultatet er betra med fem millionar kroner. Utviklinga i oktober var altså betre enn føretaket såg føre seg for ein månad sidan. Det akkumulerte underskotet etter ti månaders drift er 57 millionar kroner dårlegare enn budsjett.

Info

Vidar Vie 21.11.2007

Sju millionar å spare på nedlegging av sengeposten

Wed, 16 Jun 2010 09:29:25

Ei nedlegging av sengeposten ved Nærsjukehuset vil føre til ei innsparing på om lag sju millionar kroner. Då er ikkje kostnadsreduksjonar knytt til bygningen tatt med.

Sengeposten ved Nærsjukehuset har til saman 11 senger. Seks av dei er senger for Flora kommune, og dei fem siste er Helse Førde sine spesialisthelsetenestesenger. Avtalen mellom kommunen og Helse Førde går ut ved nyttår, og adm. dir. Jon Bolstad føreslår for styret å avvikle dei fem sengene til føretaket så snart som mogeleg.

- Ei avvikling vil kunne gjennomførast utan store negative konsekvensar for pasientane i Sogn og Fjordane, og med vesentleg økonomisk verknad. Med dei utfordringane Helse Førde har, så er eg ikkje i tvil om at dette er ei rett prioritering, seier Bolstad.

Lengre reisetid

I saka som vert lagt fram for styret går det fram at det er kapasitet ved dei andre sjukehusa til å ta hand om pasientane frå Nærsjukehuset.

- Pasientane ved Nærsjukehuset er i stor grad heimehøyrande i Flora. Det betyr at dei som må på sjukehus får lenger reisetid, men med dagens kommunikasjonar er ikkje ulempa svært stor. Andre konsekvensar er at nokre kan bli liggande lenger ved Førde sentralsjukehus fordi ein ikkje har andre lokale tilbod til avlasting, og det kan vere at dei blir skrivne ut tidlegare til kommunen enn før. Nokre må kan hende også overførast til andre opptreningsinstitusjonar eller andre postar eller avdelingar i Helse Førde, seier Jon Bolstad.

Sparer 20 årsverk

Nærsjukehuset har vel 50 årsverk utanom Psykisk helsevern. Ei nedlegging av sengeposten vil føre til at eit stort tal årsverk må omplasserast til nye arbeidsoppgåver. Det er etablert ei nedbemanningsgruppe i samarbeid med verneteneste og tillitsvalde.

- I tillegg til dei 20 stillingane ved sengeposten, så vil også omlegginga få konsekvensar for støttepersonell som til dømes teknisk personale og reinhaldspersonale. Den individuelle tilrettelegginga vil starte når vi og tillitsmannsapparatet set i gang nedbemannings- og omstillingsprosessane, seier Jon Bolstad.

Han reknar med at føretaket vil spare inn om lag 20 årsverk på å legge ned sengeposten. Helse Førde har eit regelverk som regulerer korleis dette arbeidet skal gjennomførast.

Bygningsmassen ikkje avklara

Styret i Helse Førde har bede om at også sal av bygningane i Florø vert vurdert. Jon Bolstad ønskjer å kome tilbake til det når arealbehovet til dei resterande funksjonane ved Nærsjukehuset er ferdig utgreidd.

- Vi veit at avskrivingane åleine utgjer 7,6 millionar kroner, og at vi har relativt store driftsutgifter på Nærsjukehuset. I tillegg ventar det utgifter til vedlikehald på om lag 20 millionar kroner dei første åra dersom dette skal brukast vidare til sjukehus. Eg ønskjer å kome attende til dette, seier han.

Konsekvensar for radiologi, laboratorium og legevakt

Nedlegging av sengeposten vil også føre til at Helse Førde tilbyr å flytte legevaktssentralen til Førde sentralsjukehus. Sentralen tek i dag hand om telefonar frå Flora og Solund. Det er kommunane som betaler for tenesta, og tenestene er tenkt å haldne fram som i dag.

Laboratoriet har i dag eit årsverk ved Nærsjukehuset og behovet for desse tenestene vil vere vesentleg redusert ved omlegginga. Det er difor føresett at verksemda vert lagt ned. Vaktordninga innanfor radiologi kan avviklast, men Bolstad ser føre seg at det framleis er radiologisk (røntgen) verksemd i Florø. Omfanget av dette vil bli nærare utgreidd.

Framleis dagkirurgi

Den ortopediske aktiviteten ved Nærsjukehuset vart bestemt flytta til andre sjukehus i Helse Førde, då ortopediplanen til føretaket vart vedteken våren 2007. Det skal framleis vere kirurgisk verksemd ved sjukehuset.

- Det er bestemt at meir av behandlinga i Helse Førde skal over på dagbehandling og dagkirurgi. Kirurgisk avdeling, i nært samarbeid med Avdeling for akuttmedisin, arbeider med å sjå på kvar dei ulike pasientgruppene skal få si behandling, seier Jon Bolstad.

Poliklinisk aktivitet

Det skal også vere spesialistpoliklinikk med til dømes hud og indremedisinske tenester i Florø. Det er også aktuelt å halde på lærings- og meistringsfunksjonar og blodbank i Florø. I tillegg held aktiviteten til Psykisk helsevern fram som i dag.

- Vi skal ikkje underslå at sengeposten er sentral for Nærsjukehuset. Ei nedlegging av våre fem senger, saman med opphøyr av sengene til kommunen, vil også få konsekvensar for andre delar av tenestene. Samstundes er det viktig å peike på at Helse Førde har ei omstillingsutfordring på rundt 80 millionar kroner neste år. Då er det vår plikt å prioritere, og nedlegginga av sengeposten er det rette valet under desse føresetnadane, seier Bolstad.

For ytterlegare informasjon, kontakt:

Adm. direktør Jon Bolstad, telefon 57 83 90 20
Informasjonssjef Vidar Vie, telefon 48 07 75 86

Info

Finn Ove Njøsen 22.11.2007

Styresak om modellval

Arne Eithun, Helse Førde — Wed, 16 Jun 2010 09:48:25

Administrerande direktør i Helse Førde har i dag lagt fram forslag til målbilete og modell for somatiske spesialisthelsetenester i Helse Førde HF mot 2020.

Føretaket har over lang tid hatt store økonomiske utfordringar, og Helse Førde HF har ikkje nok midlar til vedlikehald og investeringar i medisinsk teknisk utstyr eller bygningar. Samtidig har føretaket utfordringar med å skape robuste fagmiljø og sikre rekruttering og stabilisering av nøkkelpersonell.

Les også:

For å ta i vare kravet om moderne, kunnskapsbaserte og trygge tenester innan tilgjengelege økonomiske rammer for innbyggjarane i heile Sogn og Fjordane tilrår administrerande direktør denne modellen som målbilete for Helse Førde mot 2020:

Generelt for heile Helse Førde HF

Pasientane vert behandla på beste effektive omsorgsnivå
Spesialisthelsetenestene er på nivå med det objektive behovet hjå befolkninga i fylket.
Det ligg ikkje utskrivingsklare pasientar i Helse Førde HF sine sengepostar.
Eventuelle desentraliserte sengepostar har avklart arbeidsdeling mellom kommunane og spesialisthelsetenesta.
Det er trygge, kompetente og føreseielege akuttmedisinske kjeder.
Det er føreseielege pasientforløp for svangerskaps-, fødsels- og barselomsorga for heile fylket.
Det er tett samarbeid og kompetanseutveksling mellom helsepersonell i kommunane og i Helse Førde HF.

Førde sentralsjukehus sitt sjukehusområde

Det er tilbod på sentralsjukehusnivå innan dei fagområda som befolkninga i Sogn og Fjordane har behov for. Helsetenestetilbodet på dette nivået skal heile tida givast i eit avklart samarbeid med Haukeland universitetssjukehus.
Kompetansemiljøa på Førde sentralsjukehus er robuste og tek i vare dei desentraliserte tilboda.

Lærdal sjukehusområde

Dagbehandling og poliklinikktilbod med ambulerande personell frå Førde sentralsjukehus.

Nordfjord sjukehusområde

Dagbehandling og poliklinikktilbod med ambulerande personell frå Førde sentralsjukehus.

- Det er berre denne modellen som gir Helse Førde HF rom til å kunne satse på forsking, utdanning og fagutvikling og dermed sikre fagkvalitet og god pasientbehandling, seier administrerande direktør Jon Bolstad.

Overgangsmodell

Det er likevel forhold som tilseier at målbiletet ikkje kan gjennomførast straks. Til dømes skal det lagast nye helselover og ein nasjonal helse- og omsorgsplan der mellom anna finansiering og avtalestruktur mellom kommunane og føretaka skal beskrivast. Dette vil ha innverknad på retning og framdrift i endringsarbeidet. I etterkant av høyringsprosessen er det gjennomført ei vurdering av ein Modell 2 som inneheld sengepostar på lokalsjukehusa, med fødetilbod på Nordfjord sjukehus og ortopedi ved Lærdal sjukehus.

- For å sikre meir føreseielege endringsprosessar ynskjer eg modell 2 som ei mellombels løysing, seier Bolstad.

Dei økonomiske konsekvensane ved å gjennomføre modell 2 svekkjer resultatet med omlag 48,3 mill kroner. Administrerande direktør rår difor styret til å få løyst den økonomiske utfordringa ved modell 2 gjennom dialog med eigar.

Ekstra tilskot til investering
I saka vert det også peika på eit behov for ekstra tilskot til investeringsmidlar og til ein omstillingsorganisasjon over fleire år. Administrerande direktør meinar eigar gjennom å løyve pengar til dette kan gi Helse Førde HF mogelegheit til den utviklinga føretaket treng fagleg og økonomisk.

Han meiner at desse forholda må løysast gjennom ein dialog med eigar

Du finn styresaka her.

Handtering ved plutseleg dødsfall

Wed, 16 Jun 2010 09:32:11

Prehospital klinikk saman med Norsk Luftambulanse arrangerte denne veka "Fagdag om pårørandehandtering ved plutseleg, uventa dødsfall".

Det var psykolog Atle Dyregrov frå Senter for Krisepsykologi i Bergen som var forelesar på fagdagen som vart arrangert på Nordfjordeid.

Atle Dyregrov engasjerte deltakarane med interessante forelesingar, kombinert med innspel og spørsmål frå deltakarane. Gjennom rollespel der deltakarane var med, vart det sett fokus på korleis innsatspersonell opptrer i møte med pårørande som finn ein nær pårørande død.

I løpet av dagen var Dyregrov innom tema som:
Kva som er naturlege mentale mekanismer når ein opplever dramatiske situasjonar

Korleis menneske opplever ein krisesituasjon
Emosjonell førstehjelp
Innsatspersonellet sine reaksjonar
Kulturelle likskapar og ulikskapar i reaksjon på kriser og dramatiske dødsfall
Overbringing av dødsbodskap
Dødsbodskap til barn
Gode råd om korleis handtere ulike reaksjonar, som til dømes sinne retta mot innsatspersonell
Faremoment i overbringing av dødsbodskapen
Oppfølging av personell.

Ved at innsatspersonell frå ulike etatar deltek på same fagdag, får ein god erfaringsutveksling mellom personell som ofte møtast i dramatiske situasjonar ute i felten. Tilbakemeldingar frå deltakarane tyder på at dette var ein nyttig dag, som gjer personellet betre budd på å møte pårørande i vanskelege situasjonar.

Tekst og foto: Erlend Bae

Info

Finn Ove Njøsen 21.11.2007

Helse Førde delte kompetanse nasjonalt

Wed, 16 Jun 2010 09:34:49

Tysdag gjennomførde psykolog Are Mikael Lillebø eit landsomfattande foredrag om ”Kognitive endringar ved MS”. Det var første gong Førde sentralsjukehus stilte med foredragshaldar.

Femten institusjonar i landet i tillegg til Island deltok på den nasjonale undervisninga. Ved kvar institusjon blei det laga til møterom, der Lillebø sin power-point presentasjon vart synt fram, medan Lillebø sjølv sat på sitt kontor og forelas. I møteromma var det sett opp høgtalarar der deltakarane kunne følgje med på foredraget.

Are Mikael Lillebø er psykolog ved Avdeling for fysikalsk og medisinsk rehabilitering (AFMR). Han har for tida studiepermisjon for å lære meir om Multippel Sklerose.

– MS er ein sjukdom som rammar funksjonar både kognitivt (mentalt) og somatisk. I og med at eg no har permisjon for å studere MS, så var dette foredraget noko som passa meg godt, fortel Lillebø.

Helse Førde er med i eit nasjonalt nettverk der om lag 50 institusjonar deltek.

– Det var det nasjonale nettverket som hadde spurt om vi kunne stille med foredragshaldar, og avdelingssjef Stig Igland oppfordra meg til å halde foredraget., fortel Lillebø.

Det var moglegheit for spørsmål til Lillebø etter sjølve foredraget. Spesielt Universitetssjukehuset i Tromsø stilte fleire spørsmål med utdjupning av det Lillebø hadde halde foredrag om.

– Det var litt spesielt å sitje framføre telefonen og halde foredraget. Ofte er det betre å sjå deltakarane. Eg får ingen bilde av mottakarane slik at eg kan korrigere presentasjonen, seier han.

Til no har nettverket nytta seg av telefon ved undervisninga. I framtida er det mogleg å gjennomført dette via videooverføringar.

– Det er mange dyktige fagfolk med mykje erfaring og høg kompetanse ved AFMR. Det er difor kjekt å kunne bidra til kompetansebygging ved andre avdelingar på rehabiliteringsfeltet. Som kjent er kunnskap det einaste som blir større når ein delar med andre, seier avdelingssjef Stig Igland.

I Førde følgde 21 personar med på undervisninga.

Den nasjonale fjernundervisninga blir administrert av avdeling for fysikalsk medisin og rehabilitering ved UNN i Tromsø. Det er regelmessig undervisning innan fagområdet "fysikalsk medisin og rehbilitering".

Undervisninga blir gjennomført omlag annankvar tysdag.

Monica Tyvoll Tefre styrde teknikken ved Førde sentralsjukehus under foredraget.

Info

Finn Ove Njøsen 21.11.2007

30 tilvist i ordninga ”Raskare tilbake” denne veka

Wed, 16 Jun 2010 09:56:17

Totalt er det tatt imot 183 tilvisingar i "Raskare tilbake". Denne veka er 30 nye pasientar kome til.

Ordninga med "Raskare tilbake" har teke seg kraftig opp denne veka, fortel koordinator Eva Sonneson.

Dei fleste denne veke er tilvist til Avdeling for Fysikalsk medisin og rehabilitering (AFMR) i første omgang. Fleire blir tilvist vidare frå AFMR til andre avdelingar etter utgreiing.

Har ein kommunelege sendt ei anna tilvising på ein pasient, skal ein ikkje sende ein ny til ”Raskare tilbake”.

Kommunelegane skal, dersom det allereie er sendt ei tilvising på ein pasient, få omgjort denne tilvisinga frå ordinær tilvising til ei ”Raskare tilbake” tilvising dersom dette er ønskjeleg.

Blir ikkje dette gjort blir pasientar ”dobbeltbooka”, og det skal ikkje førekome.

Kontakt Ewa Sonneson som er koordinator om de vil gjere endringar, då går tilvisinga raskare. Ho kan kopiere eventuelt tidlegare tilvisning og legge den inn som ”Raskere tilbake”.

Vi får då avslutte ”vanlig tilvisning” og har betre kontroll.

Ewa Sonneson på telefon 57 83 92 19.

Prosjektet ”Raskare tilbake” er sett i verk i Helse Førde. Målet er å få pasientar som er sjukmelde raskare tilbake i arbeid.

Fritt sjukehusval er ikkje ein del av dette opplegget.

Alle tilvisingar skal sendast:
Helse Førde HF
"Raskere tilbake" - tilvisingsmottak, 6807 Førde

NAV har oppretta ein eigen nettstad der du finn meir informasjon: http://www.nav.no/raskeretilbake

Info

Finn Ove Njøsen 23.11.2007

Pengegåve til Ungdomsavdeling for psykisk helsevern

Wed, 16 Jun 2010 10:12:03

UPH fekk 13 033 kroner frå Fagrørsla og Raude Krossen i Svelgen. Dei to organisasjonane deler årleg ut overskotet frå 1. mai arrangementet sitt.

Dette året valde dei UPH som mottakar av pengar. Tidlegare har mellom anna ”Beheim Karlsen fondet” fått pengar frå dei to aktive organisasjonane.

Det var leiar i Svelgen Raude Kross, Synøve Sande, og leiar i fagrørsla i Svelgen, Jonvald Naustdal, som var på plass ved UPH for å overrekke sjekken. Miljøterapeut Silje Skagen tok imot gåva på vegne av institusjonen.

– Pengane blir ikkje ståande lenge på konto. Det er viktig at vi får utstyr slik at vi kan få aktivisert ungdomane ute. Dette gjev gode opplevingar og meistringsfølelsar, fortalde miljøterapeut Irene Hjelm.

Miljøterapeutane som var til stades under overrekkinga takka for gåva. Dei fortalde om behova avdelinga har for utstyr. Pengane vil gå til innkjøp av utstyr slik at ungdomane kan få delta meir i aktivitetar. Kanoar står høgt på prioriteringslista. UPH vurderer å gå til innkjøp av tre kanoar, og gåva vil dekke om lag halvparten av dette beløpet.

– Eg er glad for valet vi gjorde av mottakar for pengane. Etter å ha høyrt på miljøterapeutane ser eg kva behov denne avdelinga har for utstyr, sa leiaren i Svelgen Raude Kross, Synøve Sande.

Frå venstre Jonvald Naustdal, Anette Vågene Shanks, Irene Hjelm, Silje Skagen, Else Frøyne, Olaug Kårstad og Synøve Sande.

Info

Finn Ove Njøsen 23.11.2007

Rammeavtale ut til kommunane

Wed, 16 Jun 2010 10:14:28

Koordineringsrådet har i dag godkjent forslaget til rammeavtale mellom Helse Førde og kommunane.

Koordineringsrådet har i dag godkjent forslaget til rammeavtale mellom Helse Førde og kommunane.

Forslaget blir no sendt til KS for uttale. Rammeavtalen for samhandling mellom Helse Førde og den einskilde kommune skal i etterkant behandlast og underskrivast i kvar kommune.

Rammeavtalen skal sikre eit godt og effektivt samarbeid mellom kommune og helseføretak for å kunne gje eit heilskapeleg tilbod med høgast muleg fagleg og brukaropplevd kvalitet. Fagrådet skal med bakgrunn i rammeavtalen utforme forslag til delavtalar mellom føretaket og kommunane.

Det er nasjonalt trekt fram at det særskilt er behov for formalisert samhandling innan område som til dømes psykisk helse, rusmiddelområdet, rehabilitering og habilitering, helsetenester til eldre, helsetenester til barn og unge, helsetenester til pasientar med kroniske sjukdommar, svangerskaps-, fødsels- og barselsomsorg, førebyggande helsetenester og utskrivings- og innskrivingspraksis. Dette arbeidet skal skje i ein prosess der fagfolk frå begge nivåa, og pasient/brukarrepresentantar, får høve til å delta.

Koordineringsrådet er det overordna samarbeidsorganet mellom kommunane, KS og Helse Førde. Rådet er sett saman av representantar frå alle regionråda i fylket, KS og Helse Førde.

Administrerande direktør i Helse Førde, Jon Bolstad, er leiar i Koordineringsrådet. Det skal veljast ny leiar når regionråda og KS har konstituert seg etter valet i haust.

Info

Vidar Vie 23.11.2007

Forskingskoordinator tilsett

Wed, 16 Jun 2010 10:19:26

Patrik Stolt er nytilsett som koordinator for forskingsarbeidet i Helse Førde. Han skal også jobbe inn mot den felles FoU-avdelinga (Senter for helseforsking) mellom Helse Førde og Høgskulen i Sogn og Fjordane.

Stolt tek til i arbeidet i starten av januar 2008.

Forsking og utvikling (FoU) er eit av kjerneområda til spesialisthelsetenesta. I november 2006 arrangerte Helse Førde og Avdeling for helsefag ved Høgskulen i Sogn og Fjordane seminar der eit forskingssamarbeid stod på dagsorden. Leiar for ei Felles FoU-avdeling er enno ikkje på plass, men Helse Førde har rekruttert sin eigen forskingskoordinator som skal arbeide med å få til meir forskingsverksemd innanfor dei ulike delane av føretaket. Stolt vil dessutan få jobben med å vidareutvikle samarbeidet med Høgskulen.

Stolt er lege med spesialkompetanse i revmatologi og har i sitt klinske arbeide i hovudsak jobba innan dette området.

Sidan 1990-talet har han arbeidd med forsking på Karolinske Institutt i Stockholm.

Han disputerte i 2004 og tok doktorgrad innanfor forsking på livsstil og revmatologiske sjukdomar.

Stolt er gift og kona er sosionomutdanna.

Info

Finn Ove Njøsen 26.11.2007

Nytt tilbod for personar med muskel- og skjelettplager

Wed, 16 Jun 2010 10:22:57

Nesten halvparten av alt sjukefråvær skuldast muskel- og skjelettplager. No startar Helse Førde opp ein eigen poliklinikk for dei som har slike lidingar.

– Målet er å gje desse pasientane rask og rett hjelp, slik at dei kan kome seg tilbake til arbeid, seier spesialfysioterapeut Marte Bale ved Avdeling for fysikalsk medisin og rehabilitering.

Ho og Hanna Froehlke-Sollie, som er spesialistlege i fysikalsk medisin og rehabilitering, har teke initiativet til å byggje opp den nye tverrfaglege poliklinikken ved Førde sentralsjukehus. I tillegg til desse to så skal ergoterapeut, sosionom og psykolog utgjere teamet. På sikt ønskjer dei også ein sjukepleiar som koordinator.

– Ikkje nødvendigvis alle pasientar som kjem til poliklinikken vert heilt friske. Men mange kan klare seg i arbeidslivet etter ei betring av funksjonsevne og/eller betre tilrettelegging på arbeidsplassen. Som team ønskjer vi å hjelpe pasienten til ein betre livssituasjon, inklusivt ein ordna økonomisk situasjon, parallelt med at vi tilbyr behandling, seier Bale.

– Vi veit at personar med muskelskjelettplager ofte blir langtidssjukmelde. Difor er det viktig at fastlegane tilviser pasientane tidleg til oss, gjerne gjennom ordninga ”Raskare tilbake”. Det kan hindre at plagene blir kroniske, påpeikar ho.

Støtte frå Helse Vest

Helse Vest har gjeve 100 000 kroner til oppstart og drift av tilbodet i 2007, og den tverrfaglege poliklinikken har allereie teke i mot sine første pasientar.

Den aktuelle pasientgruppa er svært stor. Ifølgje rapporten «Plager flest – koster mest» var dei samla offentlege utgiftene til sjukepengar, attføring og uførepensjon for muskel-/skjelettlidingar i Noreg på 28 milliardar kroner i 2002. I 2005 var utgiftene på over 30 milliardar.

På landsplan reknar ein med at omlag 46 prosent av sjukefråværet og 33 prosent av uførepensjonane skuldast muskel- og skjelettlidingar.

Skal få god oppfølging

Eit av måla til den nye poliklinikken er å gje pasientane oppfølging over tid.

- Vi vil følgje dei opp så lenge det er behov for det. Behandlinga blir først avslutta når pasienten ønskjer det, eller når teamet vurderer det som trygt i høve til pasienten sitt behov. Det nye pasienthotellet ved Førde sentralsjukehus vil vere godt eigna for denne gruppa, når det opnar neste vår. For ein god del av desse pasientane vil det vere naturleg at dei bur på pasienthotellet nokre dagar medan dei får behandling og trening hos oss, seier Marte Bale.

Info

Finn Ove Njøsen 26.11.2007

Skal korte ventetid i barne- og ungdomspsykiatrien

Wed, 16 Jun 2010 10:27:04

Nordfjord barne- og ungdomspsykiatrisk poliklinikk har fått 300.000 kroner i støtte til eit prosjekt som skal hjelpe til med å korte ventetidene.

Frå årsskiftet skal born med rett til helsehjelp vere garantert ei første vurdering i barne- og ungdomspsykiatrien innan 10 dagar. Likeeins skal dei ha kome til behandling innan 65 vyrkedagar.

- Ved Nordfjord BUP hadde dette blitt svært vanskeleg viss vi ikkje hadde fått støtte frå Helse Vest til å engasjere ein spesialpedagog. Ho har kompetanse som blir svært viktig for å oppfylle krava, og for å sikre at denne gruppa får både tidleg og god hjelp, seier avdelingssjef ved Nordfjord BUP, Mary-Ann Refseth.

Mange med ADHD
Om lag 30 prosent av borna og ungdomane som blir tilviste Nordfjord BUP har hyperaktivitet/konsentrasjonsvanskar som tilvisingsårsak. Spesialpedagogen får ei viktig rolle i arbeidet med å gje desse borna eit godt tilbod.

- Vi har eit eige ADHD-team. Spesialpedagogen skal ta delar av utredninga av desse borna og legge den fram for teamet. I tillegg skal ho følgje saka vidare med rettleiing til barnehage, skule og PPT. Det er ei ressurskrevjande gruppe pasientar som har rett til å få utarbeidd individuelle planar. Samstundes er vårt inntrykk at alle ønskjer å jobbe saman for å gje desse borna eit godt tilbod, seier avdelingssjef Mary-Ann Refseth.

Ho seier at det vil verte krevjande å klare fristen på 65 dagar for Nordfjord BUP, men håpar at det skal vere mogeleg gjennom dette prosjektet.

Legg vekt på raske vurderingar

Tore Hågård som leiar Sogndal BUP seier at også dei skal klare fristen på 10 dagars vurderingstid.

- Etter nyttår vil vi leggja endå meir vekt på raske vurderingar, og vi vil i all hovudsak halda denne fristen. Eg trur vi òg i lange periodar vil klara å halda 65 dagars ventetid på behandling. Med tanke på forventningane til pasientane og deira pårørande så er det også viktig å få fram at dei nye fristane gjeld for dei med rett til naudsynt helsehjelp. Med andre ord dei med alvorlege vanskar, seier han.

Gruppebehandling Heller ikkje ved Førde BUP er det 10 dagars fristen som set størst krav til avdelinga.

- Så sant tilvisingane gir eit godt nok grunnlag for prioritering så klarer vi den vurderingstida. Ventetid for behandling hos oss ligg no over 65 vyrkedagar i gjennomsnitt. På grunn av vakante stillingar så kjem vi til å ha problem med dette kravet, i alle fall dei første månadane av 2008, seier avdelingssjef Camilla Voss, som samtidig poengterer at dei sterkt ønskjer kortast mogeleg ventetid for barn og ungdom.

- Difor vil gjere det vi kan for å utnytte kapasiteten. Aukande bruk av gruppebehandling er eit virkemiddel for å redusere ventetid utan å behandle færre. Det er vi allereie i gang med og kan utvikle vidare, seier ho.

Ungdomsinstitusjon for psykisk helsevern (UPH) i Førde opplyser at dei skal innfri dei nye fristane.

Info

Vidar Vie 26.11.2007