Palliativt team si oppgåve er å gje råd og rettleiing innan behandling, pleie og omsorg til pasientar med alvorleg sjukdom og kort forventa levetid. Dette gjeld pasientar både i og utanfor sjukehusa.
I Palliativt team er det tilsett ein sjukepleiar, ein kreftsjukepleiar og to legar.
Teamet har formalisert samarbeid med ei tverrfagleg gruppe ved FSS som består av m.a. anestesilege, prest, fysioterapeut, sosionom, psykiater og ressurssjukepleiar. Palliativt team har også formalisert samarbeid med Kompetansesenter i palliativ behandling (KLB), Helseregion Vest.
Kva er målsettinga til Palliativt team?
Gjennom samarbeid med helsepersonell på sjukehus (pasientansvarleg lege og pasientansvarleg sjukepleiar) og i primærhelsetenesta (fastlege, ressurssjukepleiar, sjukeheim, heimesjukepleie) vil Palliativt team medverke til:
- at pasienten er godt symptomlindra den siste levetida.
- å legge tilhøva til rette, slik at pasienten har eit reelt val om å vere heime eller nær heimstaden (t.d. sjukeheim) i siste fase av livet.
- å støtte pasienten og dei pårørande.
- å styrke fagutvikling av helsepersonell gjennom undervisning og rettleiing.
Arbeidsmåtar:
- Palliativt team tek vurderingsbesøk i sjukehus saman med pasientansvarleg lege/sjukepleiar. Ved spesielle høve besøk i pasienten sin heim eller på sjukeheim saman med sjukepleiar/ fastlege.
- Palliativt team skal i utgangspunktet ha ein rådgjevande funksjon, men kan i visse høve ta ansvar for oppstart/oppfølging av særleg komplisert symptomlindring.
- Koordinering av helsetenester og andre støttetiltak ved utskriving frå sjukehuset.
- Etablere nettverk rundt pasienten og vere eit bindeledd mellom sjukehuset og primærhelsetenesta.
Kven kan henvisast?
Pasientar der kurasjon ikkje lenger er eit mål og med kort forventa levetid, som treng:
- lindring av smerter og andre plagsomme symptom.
- støttande tiltak ved psykiske, sosiale og eksistensielle problem.
Lenkjer: