Vi tilrår at du alltid nyttar siste versjon av nettlesaren din.

Allergivaksinering vaksne

Allergivaksinasjon er aktuelt for deg som har uttalt allergi mot pollen, dyrehår, husstøvmidd, bie-, og/eller vepsegift. Allergivaksinasjon kan kurere eller redusere symptoma knytte til allergisk sjukdom.

Allergivaksinasjon blir også kalla hyposensibilisering eller spesifikk immunterapi. Behandlinga går ut på å tilføre allergenet (det du er allergisk mot) jamt og over 3–5 år.

Dei aller fleste som får denne behandlinga opplever at kroppen reagerer mindre på allergen og at allergisymptom frå hud, auge, nase og luftvegar minkar eller forsvinn.

Vaksinasjon blir gjord med injeksjon/sprøyte eller smeltetablettar i munnen. Dette avheng av kva slags allergen du skal vaksinerast mot.

Tilvising og vurdering

Du må ha hatt symptom på problematisk allergi over minst to år, og  må avleggje positiv allergitest (prikktest eller blodprøve) på aktuelle allergen. Fastlege eller avtalespesialist innanfor øyre–nase–hals kan tilvise deg til sjukehuset.

Før

Dersom du skal ha vaksine med injeksjon/sprøyte, kan du ikkje ha hatt  infeksjonssjukdom (forkjøling, influensa, bronkitt eller liknande) eller fått nokon annan vaksine dei tre siste dagane før allergivaksinasjonen.

Blir du sjuk eller forhindra frå å møte, må du kontakte oss og avtale ny tid til vaksinasjon.

Somme medisinar kan påverke behandlinga. Du må derfor gi oss beskjed dersom du bruker medisinar.

Du skal ikkje drikke alkohol 8 timar før og etter vaksinasjonen fordi det aukar risikoen for biverknadar.

Under

Allergi mot bjørk, gras, katt og husstøvvmidd – injeksjonar

Ved behandling av bjørke–, gras–, katte– og husstøvmiddallergi kan dette gjerast i form av injeksjonar/sprøytar i armen. Du må møte på poliklinikken for kvar vaksinasjon. Det er vanleg at dette går føre seg som opptrapping med éin dose kvar veke i åtte veker. Deretter gradvis overgang til éin dose annankvar månad i tre år. Dei første gongene får du to–tre sprøyter med 30 minutts mellomrom. Du blir kontrollert etter kvar injeksjon. 30 minutt etter at siste injeksjon er gitt vil du vanlegvis kunne reise heim.

Allergi mot husstøvmidd, graspollen og bjørkepollen – smeltetablettar

Denne behandlinga har ei planlagd varigheit på 3 år. Du tek første tablett hos oss på poliklinikken. Du blir deretter observert i 30 minutt før du kan dra heim. Vanlege biverknader er kløe/svie/ubehag i munnen nokre minutt etter du har teke tabletten. Etter den første behandlinga kan du ta tablettane heime sjølv, med årleg kontroll hos lege.

Etter

Under heile behandlinga er det ein risiko for at vaksinasjonane kan utløyse allergisymptom, spesielt under den første delen med auke av dose. Derfor skal du alltid vere på avdelinga for observasjon i 30 minutt etter kvar vaksinasjon. Vi gjer eventuelt lungefunksjonstest (PEF) før og etter vaksinasjon.

Dei mest vanlege biverknadene er hevelse/kløe/ubehag på innstikkstaden ved sprøyter, og kløe/svie/ubehag i munnen ved smeltetablettar. Ved biverknader ut over kløe/ubehag på innstikkstaden bør dette behandlast med allergimedisin. Ta eventuelt kontakt med lege.

Du bør ikkje drive med anstrengjande fysisk aktivitet eller høg intensitet på vaksinasjonsdagen.

Du blir innkalla til årleg legetime for evaluering og oppfølging av behandlinga.

Ver merksam

Nokre timar og opp til eit par dagar etter at vaksinasjonen er sett, kan du få seinreaksjonar. Dette ser vi oftast som hevelse, raudheit og kløe på injeksjonsstaden. Dette er kjende reaksjonar som du må gi oss beskjed om ved neste besøk.

Det kan også oppstå generelle seinreaksjonar. Kløe i auge og nase, forverring av astma, elveblest, generell kjensle av å vere uvel. Dette er sjeldan, og du unngår vanlegvis slike reaksjonar ved måten behandlinga skjer på. Dersom du er i tvil om tilstanden din, ta kontakt med lege.

Sist faglig oppdatert 26.09.2024

Kontakt

Førde sentralsjukehus ØNH/kjeve avdeling

Kontakt ØNH/kjeve avdeling
En stor bygning med en stor plen foran seg

Førde sentralsjukehus

Svanehaugvegen 2

6812 Førde

Finn fram

Transport

Buss

Det går regelmessig rutebussar mellom Førde Sentralsjukehus og Førde Rutebilstasjon.

På nettsidene til skyss.no finn du bussruter med oversikt over stoppestadar og tider for Sogn og Fjordane.

Frå Førde er det også gode bussamband til Bergen, Oslo, Ålesund og Trondheim.

Flybuss

Det går direkte flybuss frå Førde Lufthamn Bringeland til Førde Sentralsjukehus for alle fly som landar. Bussen stoppar ved busstoppet på motsatt side av Vievegen, på austsida. Herfrå går flybussen til Førde Lufthamn Bringeland 75 minutt før alle flyavgangar.

Parkering

Det er mogleg å parkere gratis på sjukehusområdet for pasientar og besøkande.

Taxi

Drosjesentralen i Førde er om lag 100 meter frå Rutebilstasjonen. Ved behov er våre tilsette i resepsjonen tilgjengelege 24 timar i døgnet og kan bestille taxi til deg.

 

Praktisk informasjon

Ved Førde sentralsjukehus finn du Sjukehusapoteka Vest HF si avdeling i Sogn og Fjordane.

​​Apoteket gjev tilbod til alle nyutskrivne og polikliniske pasientar ved Førde Sentralsjukehus, samt alle tilsette og besøkande.  Sjukehusapoteket er altså open for alle.

På veg heim frå sjukehuset kan pasientar få med seg alt dei treng av legemiddel og utstyr for vidare behandling heime. I tillegg har apoteket eit stort og variert utval av reseptfrie legemiddel, hudpleiemiddel, kost- og ernæringsmiddel samt andre apotekvarer.

Apoteket gjer klar legemidla medan du ventar og gjev råd om korleis du skal bruke dei på rett måte.

Apoteket forsyner dei fleste avdelingane i Helse Førde med legemiddel, apotekvarer og farmasøytiske tenester og gjev farmasøytisk rådgjeving til mange kommunar i Sogn og Fjordane.

​For å få behandling ved sjukehus eller poliklinikk må du i utgangspunktet vere tilvist frå lege, kiropraktor eller manuell teapeut. Har du trong for legehjelp skal du ringe fastlegen din eller den kommunale legevakta.

Les meir om eigendelar på helsenorge.no

Mange pasientar og pårørande ønskjer å ta bilete eller video som eit minne frå tida på sjukehuset. Då kan det vere lurt å hugse nokre reglar.

​Det er sjølvsagt heilt greitt så lenge det er pasientane og/eller pårørande og vener som er på bileta.

Det er likevel ikkje lov å ta bilete av medpasientar eller tilsette. Vi har hatt tilfeller der bilete av medpasientar/tilsette er blitt publisert i digitale media utan deira godkjenning.

Vi håper alle viser respekt for personvernet til alle dei møter under besøket på sjukehuset og avgrensar fotografering til å gjelde eigen familie og vener.

​Ved Førde sentralsjukehus finn du kiosk der du kan kjøpe aviser og andre kioskvarer. Du kan også levere kupongar til Norsk Tipping sine spel.

Alle kantinene i Helse Førde er opne for tilsette, pasientar og pårørande.

​Kantinene på Lærdal sjukehus og Nordfjord sjukehus finn du i underetasjen. Dei har opningstid 10.30 - 14.30.

Hovudkantina ved Førde sentralsjukehus ligg i 2. etasje. Her får du kjøpt varm mat og mykje anna. Den har opent 07.30 - 20.00.
I Førde finn du også ein kafe i 1. etasje innanfor resepsjonen. Denne har opningstid  09.00 - 15.00. Her finn du kaffe, te, anna drikke, påsmurt og kaker m.m.

Kantina ved Indre Sogn psykiatrisenter er open alle kvardagar frå klokka 10.00-13.30.

Kantina på Tronvik er open for tilsette og bebuarar.

​Du kan nytte mobiltelefon ved sjukehusa. Vi oppfordrar likevel alle til å bruke mobilvett og ta omsyn til medpasientar.

Det er viktig å sette telefonen på stille om natta, og på stilleringing eller vibrering om dagen. Av omsyn til dei andre pasientane er det best å gå ut av rommet dersom du må ta ein lengre samtale.

Vi ber om at du inne på pasientrommet ikkje snakkar eller har lyd på mobilen i tidsrommet etter klokka 21.30 til klokka 08.00 neste dag.

Det er gratis trådlaust nettverk for pasientar, pårørande og besøkande på sjukehusa. Dette kan du kople deg til frå din smarttelefon.

Førde sentralsjukehus har sett av hundre parkeringsplassar berre for pasientar og pårørande. Er alle desse plassane opptekne, er det fleire parkeringsområde rundt Førde sentralsjukehus. Ledige plassar på desse områda kan òg nyttast av besøkande.

Blodgjevarar og rørslehemma har eigne parkeringsplassar mellom anna framfor hovudinngangen og rundt om på sjukehuset sitt område. Dei som kan parkere her, har eige parkeringsløyve. Utan slikt løyve er parkering rekna som ugyldig.

Ordinær parkering for pasientar og pårørande:
Parkeringsplassen er inn frå Svanehaugvegen, nord-aust for Svanabygget som er hovudbygningen ved sjukehuset. På nedsida av parkeringsplassen er det også ladepunkt for el-bil. 

 

​I 6. etasje har Førde sentralsjukehus eige pasienthotell.

Pasienthotellet har 22 senger. Dei er fordelt på seks enkle rom og åtte doble rom. Alle romma er tilpassa rullestolbrukarar.

​Treng du nokon å snakke med? Sjukehuspresten er til for deg anten du er pasient eller pårørande. I møte med denne omsorgstenesta kan du finne ein «fristad» og ein plass å samle tankane. I samtale med sjukehuspresten er det tid og rom for både stort og smått.

Du treng ikkje ha kristen eller religiøs tru for å ta kontakt. Det er ditt liv og dine tankar som har fokus. Det er sjølvsagt og høve til klassiske prestetenester som mellom anna sermoniar og bøn.

Uansett kva du har på hjartet er sjukehuspresten tilgjengeleg for å møte deg, der det passar deg best. Det kan vere på telefon, prestekontoret, pasientrom, i kantina eller kanskje på ein benk ute.

Ta kontakt direkte med Helene Langeland på telefon 908 79 281, eller spør personalet om å tilkalle/avtale tid med prest.

Sjukehuspresten er primært tilgjengeleg i ordinær kontortid, men kan og tilkallast til andre tider.

Kontoret er på plan 2, første dør til høgre for inngangen til kantina.

Slik koblar du deg til gjestenettet vårt:

  1. Koble deg til det trådlause gjestenettet (gjest.ihelse.net)
  2. Ein nettlesar skal opne seg automatisk. (Om påloggingsvindauget ikkje dukkar opp, forsøk å opne nettlesaren manuelt).
  3. Les nøye gjennom vilkåra.
  4. Trykk "Godta" når du har lese og forstått vilkåra.
Innlogginga skjer automatisk på einingar etter første pålogging, så lenge kontoen er aktiv. Det skal berre vere nødvendig å logge seg på éin gong per eining per 31 dagar.
 

  • Akuttmedisin:
    Etter avtale på telefon 57 83 90 82.
  • Barneavdeling:
    Visittider sengeposten 5. etg: Kontakt personale på vaktrommet.
  • Kirurgisk:
    Visittider sengepost 12.30-13.30 og 18.30-19.30.
  • Kreft:
    Visittider sengepost: Har ikkje faste visittider. Ta kontakt med vaktrommet.
  • Kvinneklinikken:
    Far eller medmor kan kome når dei ønskjer utanom kviletid klokka 13.00-15.00. Søsken til barnet og andre besøkande kan takast i mot utanfor avdelinga.
  • Medisinsk:
    Visittider medisinsk sengepost 14.30-15.30 og 19.00-19.45. Til eineromma: Etter avtale.
  • Nevrologisk:
    Ikkje fast visitttid. Pårørande og andre er alltid velkomne.
  • Ortopedisk:
    13.30-16.00 og 17.30-19.30.