Blæreoperasjon (TURB) – innlegging

Førebuande dag

Du må møte på preoperativ poliklinikk før behandlinga. Det vil da bli tatt blodprøver og urinprøve. Røntgenbilde og eventuelle andre nødvendige undersøkingar blir også tatte denne dagen.

Faste

Før operasjonen må du faste. Det betyr at du ikkje kan ete, drikke, tygge tyggegummi/drops, snuse eller røyke. Magesekken må vere tom for at ikkje mat eller væske skal komme over i lungene under narkosen. Det er viktig at du følger instruksjonane om korleis du skal komme godt førebudd til sjukehuset. Dersom du ikkje følger reglar om faste og røyking, kan du risikere at vi må utsette operasjonen.

Du skal ikkje ete fast føde eller drikke mjølk i 6 timar før operasjonen. Du kan gjerne drikke klare væsker (vatn, saft, jus utan fruktkjøtt, brus, te, kaffi utan mjølk/fløyte) inntil 2 timar før planlagd operasjon. Unngå røyk, snus, tyggegummi og sukkertøy i 2 timar før operasjonen. Inntil 1 time før operasjonen kan du svelge medisinar med eitt glas vatn (maks 150 ml).

Ved spesielle inngrep kan det vere andre rutinar som gjeld. Dette blir du orientert om på sjukehuset før operasjonen.

Medisinbruk

Om du bruker viktige medisinar om morgonen, for eksempel hjarte- eller lungemedisin, skal du ta desse saman med vatn slik du elles bruker å gjere.

Om du har diabetes, skal du ikkje ta morgonmedisin, insulin eller diabetestablettar.

Om blodfortynnande medisinar

Oftast skal ein slutte med desse frå 2–10 dagar før inngrepet. Kor mange dagar vil avhenge av kva medisinar du bruker. Har du ikkje fått beskjed om dette, må du kontakte sjukehuset i god tid for råd. NB! Om du står på Albyl-E treng du ikkje slutte med dette før inngrepet.

Hygiene

God hygiene er vesentleg for å unngå infeksjonar. Det er derfor viktig at du møter nydusja operasjonsdagen.

Operasjonsdagen

Nokre pasientar blir lagde inn dagen før, mens andre kjem fastande same morgon. Sjukepleiar vil informere deg om førebuingar til operasjon.

Det er viktig at du følger instruksjonane om korleis du skal komme godt førebudd til sjukehuset. Dersom du ikkje følger reglar om faste og røyking, kan du risikere at vi må utsette operasjonen.

Operasjonsdagen møter du fastande på sengeposten. Om du blir lagd inn dagen før, får du informasjon om fasterutinar på sengeposten.

Operasjonen blir utført med eit skop gjennom urinrøyret der blæreforandringane blir fjerna og brente bort. Det fjerna vevet blir tatt ut gjennom urinrøyret og blir sendt til undersøking.

Vanlegvis blir spinalbedøving sett («ryggmergsbedøving»), eller du får narkose.

Eventuell tilleggsførebuing og behandling

Etter operasjonen blir du først observert på oppvakningsavdelinga. Du blir seinare flytta til sengeposten.

Du må ha kateter til urinblæra 1–2 dagar etter operasjonen.

Det er vanleg at trongen til å late vatnet kan komme brått den første tida etter operasjonen, og det kan komme blod i urinen i lengre tid.

Heimreise og vidare oppfølging

Dei fleste pasientar blir skrivne ut 1–2 dagar etter operasjonen.

Du bør unngå tunge løft i 3 veker, fordi det lett kan begynne å blø før vevet er tilhelet. Drikk ca. to liter pr døgn for å skylje gjennom blæra i tida framover.

Som oftast blir det avtalt kontroll etter 2–3 veker på poliklinikk for gjennomgang av vevsprøva.

Sjukmelding blir vurdert ved heimreise og tilpassa arbeidssituasjonen din.