Vi tilrår at du alltid nyttar siste versjon av nettlesaren din.

Brystreduserande operasjon, kvinne

Unormalt tunge og store bryst kan føre til auka belastning på nakke og skuldrar og gjere trening vanskeleg. Nakke- og skuldersmerter kan ha ein svært samansett bakgrunn, og det er dermed ingen garanti for at mindre bryst gir mindre plager.

Tilvising og vurdering

Ved offentlege plastikk-kirurgiske avdelingar er det sett felles kriterium som må bli oppfylt for å bli sett på venteliste til operasjon:
  • Du må ha KMI mindre enn 27 (KMI = vekt/høgde x høgde)
  • Det må vere mogleg å fjerne minimum 350–500 gram frå kvart bryst
  • brystet må vere >800 ml stort.
  • Du må ikkje røyke


 

Før

Du kan ikkje røyke, snuse og eller bruke/ta andre nikotinpreparat før og etter operasjonen. Du må vere nikotinfri minst seks veker før og seks veker etter operasjonen. Ikkje bruk naglelakk og ta av alle piercingar før du møter på sjukehuset.

Dersom du er over 40 år anbefaler vi mammografi før operasjonen. Siste mammografiundersøking skal vere innanfor seks månader. Bruker du faste legemiddel, må du hugse å ta med ei liste over desse når du kjem til undersøking før operasjon. Denne må innehalde legemiddelnamn, styrke og dose. Ikkje gløym å oppgi eventuell bruk av p-piller og ikkje-registrerte preparat (naturlegemiddel). Nokre legemiddel kan auke risikoen for komplikasjonar, og du må derfor unngå desse i tida før operasjon.

Når du kjem til sjukehuset, skal du ha på deg komfortabelt tøy som er lett å ta på, og som ikkje strammar over operasjonsområdet. Det er viktig at du har med deg spesial-bh. Lege og sjukepleiar vil informere deg om dette, og om kva type dei anbefaler.

Du må dusje på operasjonsdagen for å førebygge infeksjon. Ikkje bruk body lotion.

Faste

Før operasjonen må du faste. Det inneber at du ikkje kan ete, drikke, eller tygge tyggegummi/drops. Magesekken må vere tom for at ikkje mat eller væske skal komme over i lungene under narkosen. Det er viktig at du følgjer instruksjonane om korleis du skal kome godt førebudd til sjukehuset. Dersom du ikkje følger reglar om faste og røyking, kan du risikere at vi må utsetje operasjonen.

Du skal ikkje ete fast føde eller drikke mjølk i 6 timar før operasjonen. Du kan gjerne drikke klare væsker (vatn, saft, juice utan fruktkjøt, brus, te, kaffi utan mjølk/fløyte) inntil 2 timar før planlagt operasjon. Unngå tyggegummi og sukkertøy i 2 timar før operasjonen. Inntil 1 time før operasjonen kan du svelge medisinar med eit glas vatn (maks. 150 ml).

Ved spesielle inngrep kan det vere andre rutinar som gjeld. Dette blir du orientert om på sjukehuset før operasjonen.

Under

Morgonen før inngrepet, teiknar kirurgen på deg.
 
Inngrepet gjeng føre seg i narkose. Under operasjonen blir hud, feittvev og kjertelvev fjerna. Alt som blir fjerna, vil bli undersøkt av patolog rutinemessig.
 
Det finst fleire teknikkar på korleis brystreduksjon blir utført, og dette avheng noko av forma på brysta dine. Nokre gonger blir det lagt inn dren i kvart bryst, andre gonger ikkje. Drena leiar ut sårvæske og kan vanlegvis bli fjerna etter eitt–to døgn. Behov for dren blir vurdert under operasjonen. Sluttresultatet medfører arr rundt brystvorta, frå brystvorte til falden under brystet, og i sjølve brystfalden.
 
Etter operasjonen blir brystene nøye observert med tanke på bløding og sirkulasjon i brystvortene på oppvakningsavdelinga. Det første døgnet kan det vere litt bløding. Andre vanlege symptom er auka smerter og hevelse. Ein viss hevelse og misfarging i huda er vanleg, men forbigåande. Dersom du får kraftig aukande smerter og hevelse, bør du bli vurdert av lege. Bandasjane kan du skifte etter behov.
 
Før avreise skal du ta på ein tilpassa bh som skal gi støtte og kompresjon. Den kan du ta av i forbindelse med dusjing. Bh-en skal vere utan metallbøylar og med formpressa skåler. Den bør også vere med breie skulderstroppar og breie side-/ryggband. Vi anbefaler spesial-bh dag og natt i fire veker etter operasjon, deretter to veker på dagtid.

Etter

Av sikkerheitsmessige grunnar skal ingen køyre bil sjølv etter ein operasjon og narkose. Gjer derfor avtale med nokon som kan hente deg. Du må sørge for at du har tilsyn første kvelden og natta etter operasjon og narkose. Gjer derfor avtale med familie/venner om å vere i same bustad som deg.

Hygiene

Normalt kan du dusje når bandasjen og drenet er fjerna. Bruk berre mild såpe før såret er heilt lukka og heila. Og la den inste tapen sitte på. Denne tapen må du lufttørke godt før du tar på spesial-bh.

Sting

Dei fleste stinga er sydd innvendig og forsvinn av seg sjølv. Eventuelle restar av trådar kan du klippe vekk ved neste besøk på poliklinikken. Skulle nokre sting gi plager, kan du ta kontakt med poliklinikken på dagtid.

Sluttresultat

Etter brystreduksjon kan ein få nedsett evne til å amme. Endra/nedsett følelse i brystvortene er vanleg og kan vere varig. Ein kan ikkje vite sluttresultatet før det har gått tolv månader etter operasjonen. Blodforsyninga til delar av hud eller feittvev kan bli redusert etter operasjonen. Dette kan gi større sår som vanlegvis gror med tida til hjelp.

Arr

Alle stader der det er skore i huda (der det blir arr), blir det etter operasjonen få sett på teip. Dette gir sikrare heiling og finare arr. Når alle sår er heila, kan det vere ein god idé å smøre arra med fuktigheitskrem for å betre elastisiteten. Ei normal sårheiling inneber ein tynn brem med raudleik og kløe. Det er ikkje uvanleg med ujamn arrdanning, inkludert små «klumpar» i såret den første tida. Det er ofte vanskeleg å føreseie på førehand kven som får fine arr eller ikkje. Generelt skal du ikkje utsette arr som framleis er raude, for sol. Bruk eventuelt beskyttelsestape eller kraftig solkrem.

Sjukemelding

Under sjukemeldingsperioden er det sunn fornuft som gjeld. Gå korte turar og auk den fysiske aktiviteten gradvis. Unngå tunge løft i starten og auk heller gradvis etter kvart. Du skal ikkje svømme eller trene hardt dei første vekene. Lytt til kroppen din. Lengda på sjukemeldinga avheng av kor tungt arbeid du har.
 
Det er vanleg med kontroll på poliklinikken hos sjukepleiar etter ei veke og til den som opererte deg, etter ca. tre månader. 
 

Ver merksam

Komplikasjonar som kan oppstå, er overflatiske sårdanningar grunna dårleg blodforsyning i hud og brystvorter. Det er fare for nedsett følelse i brystvorter – nokre gonger er dette varig, andre gonger forbigåande. Dei mest alvorlege komplikasjonane er blodoppsamlingar i det opererte brystet og infeksjon som kan gi behov for reoperasjonar og forlenga sjukehusopphald.

Får du symptom som aukande hevelse, smerter, raudleik og/eller feber, må du ta kontakt med avdelinga snarast. Ved teikn på mindre komplikasjonar som væskedanning og småsår i arra, kan du ringe til sjukepleiar på poliklinikken på dagtid for å avtale ein kontrolltime.

Ved mistanke om betennelse eller uttalt væskesiving frå operasjonsarra, fjern tapen. Deretter kan du dusje og la huda tørke (bruk gjerne fønar med låg varme).


Sist faglig oppdatert 10.04.2026

Kontakt

Kirurgisk avdeling

Kontakt Kirurgisk avdeling

Oppmøtestad

Du finn oss på Førde sentralsjukehus.
Vi har og sengepost og poliklinikk på Lærdal sjukehus.