Vi tilrår at du alltid nyttar siste versjon av nettlesaren din.
Dupuytrens kontraktur, operasjon
Ved Dupuytrens kontraktur blir bindevevshinna i handflata tjukkare og lagar harde knutar og strengar under huda. Tilstanden er mest vanleg i Norden og blir kalla ofte «vikingfinger». Årsaka er ukjent, men det er ofte arveleg.
Diagnosen blir stilt ut frå sjukehistorie med årsaker og symptom, og undersøkinga til legen. Vanlegvis blir ikkje ømme knutar i handflata behandla i tidleg fase, for det kan påskynde sjukdomsprosessen. Dersom sjukdommen gir funksjonstap og ledda stivnar, kan det vere aktuelt med operasjon.
Tilvising og vurdering
Fastlegen tilviser til spesialisthelsetenesta for vurdering.
namn og fødselsdato
om pasienten ønsker operativt tilbod om det er aktuelt (oppgi vekt og høgde)
akutt skade eller snikande debut
symptom og varigheit
detaljerte opplysningar om smerter (lokalisering, utstrålande, eventuelle smerter andre stader)
eventuelle tidlegare operasjonar
funn ved klinisk undersøking: rørsleutslag, hevelse, kraft, nerveutfall?
bildediagnostikk:
resultat av bildediagnostikk, når og kvar er dette utført?
for pasientar med mistanke om slitasje i tommel (cmc1) ønsker vi standard røntgenbilde
behandling utført og effekt av denne (for eksempel fysioterapi)
yrke og sjukmeldingsstatus
faste medikament
andre sjukdommar
behov for tolk
Før
Det er ingen førebuingar til denne operasjonen.
Under
Under operasjonen blir dei harde strengene eller knutane i den fortjukka bindevevshinna fjerna slik at fingrane kan strekkast ut. Operasjonen kan ta frå 30 minutt til tre timar og blir gjort i lokalbedøving eller narkose, avhengig av kor omfattande inngrepet er. Av og til er det nødvendig med hudtransplantasjon dersom huda har blitt veldig stram.
Du får ein mjuk bandasje som gir lett trykk eller ein gips på handa og dei opererte fingrane. Vanlegvis kan du reise heim same dag.
Etter
For å motverke hevelse i handa etter operasjonen bør du:
Halde handa høgt (over hjartehøgde) når du ikkje bruker handa, og strekke ut i skuldra.
Ha handa på pute om natta.
Bevege på og bruke handa så mykje som bandasjen tillèt, men unngå tunge løft.
Bøye og strekke fingrane og armen fleire gonger dagleg.
Du kan oppleve smerte i operasjonsområdet i nokre dagar. Du kan ta smertestillande ved behov (for eksempel Paracet og Ibux).
Vanlegvis blir du sjukmeld i inntil 4 veker, avhengig av typen arbeid du gjer. Etter éi veke skal du til kontroll og skifte bandasje. Da får du eventuelt tilpassa støtteskjene som du skal bruke om natta i ein periode. Du vil få rettleiing til arrbehandling og opptrening av handfunksjon hos ergoterapeut. Kontrollane blir avtalte etter behov.
Stinga blir fjerna av ein sjukepleiar eller fastlege etter 10–14 dagar.
Ver merksam
Dersom bandasjen er for trong, om du får feber, har vedvarande smerter eller hevelse som ikkje går tilbake, må du kontakte sjukehuset.
Det er alltid ein risiko for at noko av kjensla i fingeren kan bli sett ned i ein kortare eller lengre periode etter operasjon. Dersom fingeren har vore svært bøygd over lang tid kan det vere vanskeleg å få retta han heilt ut. Det er også ein risiko for at tilstanden kan komme tilbake igjen.
Det går regelmessig rutebussar mellom Førde Sentralsjukehus og Førde Rutebilstasjon.
På nettsidene til skyss.no finn du bussruter med oversikt over stoppestadar og tider for Sogn og Fjordane.
Frå Førde er det også gode bussamband til Bergen, Oslo, Ålesund og Trondheim.
Flybuss
Det går direkte flybuss frå Førde Lufthamn Bringeland til Førde Sentralsjukehus for alle fly som landar. Bussen stoppar ved busstoppet på motsatt side av Vievegen, på austsida. Herfrå går flybussen til Førde Lufthamn Bringeland 75 minutt før alle flyavgangar.
Parkering
Det er mogleg å parkere gratis på sjukehusområdet for pasientar og besøkande.
Taxi
Drosjesentralen i Førde er om lag 100 meter frå Rutebilstasjonen. Ved behov er våre tilsette i resepsjonen tilgjengelege 24 timar i døgnet og kan bestille taxi til deg.
Praktisk informasjon
Ved Førde sentralsjukehus finn du Sjukehusapoteka Vest HF si avdeling i Sogn og Fjordane.
Apoteket gjev tilbod til alle nyutskrivne og polikliniske pasientar ved Førde Sentralsjukehus, samt alle tilsette og besøkande. Sjukehusapoteket er altså open for alle.
På veg heim frå sjukehuset kan pasientar få med seg alt dei treng av legemiddel og utstyr for vidare behandling heime. I tillegg har apoteket eit stort og variert utval av reseptfrie legemiddel, hudpleiemiddel, kost- og ernæringsmiddel samt andre apotekvarer.
Apoteket gjer klar legemidla medan du ventar og gjev råd om korleis du skal bruke dei på rett måte.
Apoteket forsyner dei fleste avdelingane i Helse Førde med legemiddel, apotekvarer og farmasøytiske tenester og gjev farmasøytisk rådgjeving til mange kommunar i Sogn og Fjordane.
For å få behandling ved sjukehus eller poliklinikk må du i utgangspunktet vere tilvist frå lege, kiropraktor eller manuell teapeut. Har du trong for legehjelp skal du ringe fastlegen din eller den kommunale legevakta.
Mange pasientar og pårørande ønskjer å ta bilete eller video som eit minne frå tida på sjukehuset. Då kan det vere lurt å hugse nokre reglar.
Det er sjølvsagt heilt greitt så lenge det er pasientane og/eller pårørande og vener som er på bileta.
Det er likevel ikkje lov å ta bilete av medpasientar eller tilsette. Vi har hatt tilfeller der bilete av medpasientar/tilsette er blitt publisert i digitale media utan deira godkjenning.
Vi håper alle viser respekt for personvernet til alle dei møter under besøket på sjukehuset og avgrensar fotografering til å gjelde eigen familie og vener.
Ved Førde sentralsjukehus finn du kiosk der du kan kjøpe aviser og andre kioskvarer. Du kan også levere kupongar til Norsk Tipping sine spel.
Alle kantinene i Helse Førde er opne for tilsette, pasientar og pårørande.
Kantinene på Lærdal sjukehus og Nordfjord sjukehus finn du i underetasjen. Dei har opningstid 10.30 - 14.30.
Hovudkantina ved Førde sentralsjukehus ligg i 2. etasje. Her får du kjøpt varm mat og mykje anna. Den har opent 07.30 - 20.00. I Førde finn du også ein kafe i 1. etasje innanfor resepsjonen. Denne har opningstid 09.00 - 15.00. Her finn du kaffe, te, anna drikke, påsmurt og kaker m.m.
Kantina ved Indre Sogn psykiatrisenter er open alle kvardagar frå klokka 10.00-13.30.
Kantina på Tronvik er open for tilsette og bebuarar.
Du kan nytte mobiltelefon ved sjukehusa. Vi oppfordrar likevel alle til å bruke mobilvett og ta omsyn til medpasientar.
Det er viktig å sette telefonen på stille om natta, og på stilleringing eller vibrering om dagen. Av omsyn til dei andre pasientane er det best å gå ut av rommet dersom du må ta ein lengre samtale.
Vi ber om at du inne på pasientrommet ikkje snakkar eller har lyd på mobilen i tidsrommet etter klokka 21.30 til klokka 08.00 neste dag.
Det er gratis trådlaust nettverk for pasientar, pårørande og besøkande på sjukehusa. Dette kan du kople deg til frå din smarttelefon.
Førde sentralsjukehus har sett av hundre parkeringsplassar berre for pasientar og pårørande. Er alle desse plassane opptekne, er det fleire parkeringsområde rundt Førde sentralsjukehus. Ledige plassar på desse områda kan òg nyttast av besøkande.
Blodgjevarar og rørslehemma har eigne parkeringsplassar mellom anna framfor hovudinngangen og rundt om på sjukehuset sitt område. Dei som kan parkere her, har eige parkeringsløyve. Utan slikt løyve er parkering rekna som ugyldig.
Ordinær parkering for pasientar og pårørande: Parkeringsplassen er inn frå Svanehaugvegen, nord-aust for Svanabygget som er hovudbygningen ved sjukehuset. På nedsida av parkeringsplassen er det også ladepunkt for el-bil.
I 6. etasje har Førde sentralsjukehus eige pasienthotell.
Pasienthotellet har 22 senger. Dei er fordelt på seks enkle rom og åtte doble rom. Alle romma er tilpassa rullestolbrukarar.
Treng du nokon å snakke med? Sjukehuspresten er til for deg anten du er pasient eller pårørande. I møte med denne omsorgstenesta kan du finne ein «fristad» og ein plass å samle tankane. I samtale med sjukehuspresten er det tid og rom for både stort og smått.
Du treng ikkje ha kristen eller religiøs tru for å ta kontakt. Det er ditt liv og dine tankar som har fokus. Det er sjølvsagt og høve til klassiske prestetenester som mellom anna sermoniar og bøn.
Uansett kva du har på hjartet er sjukehuspresten tilgjengeleg for å møte deg, der det passar deg best. Det kan vere på telefon, prestekontoret, pasientrom, i kantina eller kanskje på ein benk ute.
Ta kontakt direkte med Helene Langeland på telefon 908 79 281, eller spør personalet om å tilkalle/avtale tid med prest.
Sjukehuspresten er primært tilgjengeleg i ordinær kontortid, men kan og tilkallast til andre tider.
Kontoret er på plan 2, første dør til høgre for inngangen til kantina.
Slik koblar du deg til gjestenettet vårt:
Koble deg til det trådlause gjestenettet (gjest.ihelse.net)
Ein nettlesar skal opne seg automatisk. (Om påloggingsvindauget ikkje dukkar opp, forsøk å opne nettlesaren manuelt).
Les nøye gjennom vilkåra.
Trykk "Godta" når du har lese og forstått vilkåra.
Innlogginga skjer automatisk på einingar etter første pålogging, så lenge kontoen er aktiv. Det skal berre vere nødvendig å logge seg på éin gong per eining per 31 dagar.
Akuttmedisin: Etter avtale på telefon 57 83 90 82.
Barneavdeling: Visittider sengeposten 5. etg: Kontakt personale på vaktrommet.
Kirurgisk: Visittider sengepost 12.30-13.30 og 18.30-19.30.
Kreft: Visittider sengepost: Har ikkje faste visittider. Ta kontakt med vaktrommet.
Kvinneklinikken: Far eller medmor kan kome når dei ønskjer utanom kviletid klokka 13.00-15.00. Søsken til barnet og andre besøkande kan takast i mot utanfor avdelinga.
Medisinsk: Visittider medisinsk sengepost 14.30-15.30 og 19.00-19.45. Til eineromma: Etter avtale.
Nevrologisk: Ikkje fast visitttid. Pårørande og andre er alltid velkomne.
