Testikkel ligg ikkje i pungen eller lyskekanalen, barn

Ernæring

Barnet skal faste før operasjonen. 

Hygiene

Barnet bør dusje eller bade kvelden før operasjonen.

Medisinar

Dersom barnet bruker astmamedisinar, skal desse takast på operasjonsdagen. Ta med astmamedisinane til sjukehuset. Brukar barnet andre medisinar til vanleg, spør legen eller sjukepleiaren om barnet skal ta desse på operasjonsdagen.

Sjukdom

Dersom barnet er forkjølt eller har andre symptom på infeksjon som hoste, feber, diaré og/eller oppkast dagane før operasjon, ta kontakt med avdelinga barnet skal opererast på.

Anna

Ta gjerne med kosebamsen eller noko anna som betyr tryggleik for barnet. Litt større barn kan ha glede av ei favorittbok eller dataspel for å gjere ventetida meir hyggjeleg. Det finst bøker å låne på biblioteket, som handlar om barn på sjukehus som kan vere ei god hjelp i å førebu barnet til å bli lagt inn på sjukehuset.

Under operasjonen blir testikkelen trekt ned og festa i pungen, og blir utført medan barnet søv. Barnet får eit lite sår på pungen og eit lite sår i lysken. 

Operasjonen blir utført medan barnet søv. Ein føresett følgjer med barnet til operasjonsavdelinga og er til stades til barnet har fått sovemedisin og sovnar. Føresette får beskjed når operasjonen er ferdig og barnet har komme til oppvakningsrommet. Ein føresett kan då sitje ved sida av senga til barnet vaknar.

Så fort barnet har vakna og har lyst på noko å drikke serverer vi saft eller saftis. Nokre barn er plaga med kvalme etter operasjonen og då er det lurt å vente litt med mat og drikke. Når forma til barnet tillèt det, og når kirurgen har snakka med dei føresette om kva som er gjort og om vidare oppfølging, er det tid for heimreise.

Gjer det vondt?

Barnet får som regel smertestillande medisin før, under og etter operasjonen for å ha minst mogleg vondt. All smerte klarer vi ikkje å ta bort. Vi bruker smerteskalaer for å vurdere smerta til barnet saman med barnet sjølv (viss det lèt seg gjere) og dei føresette.

Dei første dagane etter inngrepet treng barnet smertestillande middel. Etter kvart minkar smertene, men barnet kan kjenne ubehag i fleire veker.

Ved heimreise vil de få med skriftleg informasjon om dosering av smertestillande medisinar som paracetamol (Paracet) og ibuprofen (Ibux, Nurofen).

Kor lenge varer behandlinga?

Kor lenge barnet er på operasjonsstova varierer mellom 1‐3 timar. Kor lenge barnet må vere på sjukehuset i etterkant av operasjonen er avhengig av forma til barnet etter operasjonen. Barnet må ete, drikke og tisse litt, og legen må få tid til å gi informasjon før de dreg heim.

Som regel skal barnet vere heime frå barnehage og skule eit par dagar etter operasjonen. Eventuell kontroll på poliklinikken blir avtalt med kirurgen som snakkar med dykk etter operasjonen.

Dei første 1‐2 vekene etter operasjonen må barnet unngå aktivitetar som sykling/løping/fotball og tilsvarande. Dette for å unngå slag mot pungen.