Eit prosjekt frå forskingsgruppa PERSONFORSK
Norse Impact - samanhengande digitale tenester i psykisk helsefeltet
For å forbetre effektane og berekrafta til helsetenester innan psykisk helsevern, vil vi utvikle og skalere verktøyet Norse Impact. Norse Impact er eit datadrive system som skal tilby effektive digitale behandlingtiltak til pasientar med psykiske helseutfordringar. Unikt for NorseImpact er at behandlinga vert tilpassa kvar enkelt pasient ved hjelp av deira eigne data, noko som gjer tilbodet persontilpassa og meir presist.
Prosjektleiar: Christian Moltu, forskingssjef ved Psykisk helsevern i Helse Førde, professor ved Høgskulen på Vestlandet og grunnleggar av Norse Feedback.
Prosjektperiode: 2024 – 2028.
Budsjett: 31 millionar.
Finansiering: Norges Forskingsråd 20 MNOK og eigenfinansiering 11 MNOK.
«Ein fantastisk moglegheit til å bidra til berekraftige psykiske helsetenester i samarbeid med eit sterkt, tverrsektorielt konsortium»
Prosjektleiar Christian Moltu.
Bakgrunn for prosjektet
Psykiske helsevanskar er ei viktig utfordring for folkehelsa og produktiviteten i vestlege samfunn. Verdas helseorganisasjon (WHO) anslår at vi taper 50 millionar arbeidsår årleg på grunn av angst og depresjon. Dei tradisjonelle måtane å levere behandling på, basert på ansikt-til-ansikt-interaksjonar, er ikkje i seg sjølv berekraftig i framtida. Vi treng også innovativ teknologi for å betre kunne hjelpe folk som slit med psykiske vanskar og rusmiddelbruk.
Pasientar og behandlarar peikar på behovet for persontilpassa digitale intervensjonar. Slike verktøy må vere tilgjengelege utanfor dei tradisjonelle fysiske behandlingsmøta - før, under og etter behandling. Norse Impact vil bruke sjølvrapporterte data frå pasienten til å levere persontilpassa digitale behandlingsressursar – og tiltak for å styrke pasientane sin helsekompetanse og forbetre effekten av behandlingane dei er ein del av.
Prosjektet starta sommaren 2024 og vil vare i fire år. Det første året vil vi fokusere på utvikling av ein trygg og brukarvennleg teknologi som skal testast gjennom forsking på to viktige pasientgrupper: unge vaksne med rusproblem og unge i risiko for å utvikle psykosar. Dette er særskilt viktige grupper å engasjere i behandling og vil tene som proof-of-concept for Norse Impact.
Vi ser føre oss framtidige helsetenester som ein integrert tenesteflyt som inkluderer tradisjonelle fysiske møte, digitale behandlingsressursar og brukarstyrte komponentar, alle persontilpassa etter kvar enkelt pasient sine sjølvrapporterte data.
Prosjektorganisering
Konsortiet bak Norse Impact-prosjektet består av Helse Førde, Norse Feedback AS, St. Olavs Hospital, Helse Stavanger, Sunnfjord kommune, Molde kommune og Helse Møre og Romsdal. Øvrige partnarar i prosjektet er Høgskulen på Vestlandet, NTNU, Inventas AS og Sykehusinnkjøp HF.
Prosjektet er organisert med ei styringsgruppe, ei prosjektgruppe og ei rådgjevande gruppe beståande av ekspertar som gir vitskapleg og praktisk innsikt til prosjektet.
Prosjektgruppa består av medlemmar som er direkte involverte i prosjektets gjennomføring. Dei har ansvar for den daglege drifta, planlegginga og implementeringa av prosjektaktivitetane.
Styringsgruppa består av representantar frå dei samarbeidande helseføretaka og kommunane, samt brukarrepresentantar. Styringsgruppa har ei overordna rolle og ansvar for å overvake prosjektets framdrift, ta strategiske avgjersle og sikre at prosjektets mål blir nådde.
Arbeidspakkar
Prosjektleiing
- Prosjekteigar: Anne Kristin Kleiven, Utviklingsdirektør, Helse Førde, e-post: anne.kristin.kleiven@helse-forde.no
- Prosjektleiar: Christian Moltu, psykologspesialist, Forskingssjef psykisk helsevern, Helse Førde, christian.moltu@helse-forde.no
- Prosjektkoordinator: Anne Kristine Øvre, anne.kristine.nordby.ovre@helse-forde.no, Janne-Merete Torset Øien, janne-merete.torset.oien@helse-forde.no