Hjarterehabilitering - eit fylkesdekkande tilbod ved Nordfjord sjukehus

Kven er hjarterehabiliteringa for?

Hjarterehabiliteringa er retta mot deg som har hatt hjarteinfarkt, blitt blokka/fått sett inn stent i kransåra (PCI), har fått utført by-pass operasjon eller har andre sjukdomar knytt til hjartet. Det er ynskjeleg at ein startar opp med rehabilitering så raskt som mogeleg etter ei hjartehending.

Målsetjinga med rehabiliteringa er at du som pasient skal kome raskare tilbake til det daglege livet, få ein effektiv opptreningsfase og dermed auka funksjonsnivå og livskvalitet.

Du vil gjennom programmet treffe andre som har vore i tilsvarande situasjon som deg, slik at de kan utveksle erfaringar og lærdom med kvarandre. Du vil også treffe brukarrepresentantar. 

Vi inviterer pårørande til å delta på teoridagane, slik at dei kan auke kunnskapen sin om hjartesjukdom, og møte andre i same situasjon.

Innhald i rehabiliteringa

• Individuell samtale med lege, sjukepleiar, fysioterapeut  
  og farmasøyt.
• Trening under rettleiing av fysioterapeut
• Oppfølging av blodtrykk og blodprøver
• Psykiske reaksjonar – «Å leve med hjartesjukdom»
• Kosthald
• Medisinar og medisinbruk
• Motivasjon og mestring
• Risikofaktorar
• Brukarrepresentant
• Seksualitet
• Røykeslutt
• Tilbake til arbeidslivet

Korleis er rehabiliteringa lagt opp?

Rehabiliteringa går over 8 veker. I løpet av desse vekene er det 4 dagar med teori på Nordfjord sjukehus, for alle deltakarar. Dette er lagt til måndag og tysdag i 1. og 5. veke av rehabiliteringa. Dei andre vekene har ein trening og oppfølging ved sitt lokalsjukehus. Du gjennomfører ein belastingstest på tredemølle før kurset. Lege er ansvarleg for innhaldet og gjennomføringa av kurset.

Det blir utarbeidd personlege mål for kvar einskild, og du blir fulgt opp av lege, sjukepleiar, fysioterapeut og farmasøyt.

Undervisninga går føre seg i grupper, og alle får eit individuelt tilpassa opplegg med samtalar, trening og behandling.