Barseltilbod opnar att

Dronebilde Nordfjordeid sjukehus.jpg — NORDFJORD SJUKEHUS: Fødande får tilbake tilbodet om barselopphald frå måndag 16. okober.

- Det er svært gledeleg at vi no kan opne barseleininga, seier avdelingssjef for kvinneklinikken i Helse Førde, Trude Hansen Folkestad.

Barsetilbodet med overnatting for kvinner og barn vart stengt før ferien. Årsaka var jordmormangel. I perioden frå før ferien har fødande som soknar til sjukehuset på Nordfjordeid, hatt tilbod om å få barseltida på Førde sentralsjukehus.

- I første omgang er det dei friskaste barselkvinnene som får tilbod om å ha barseltida ved Nordfjord sjukehus, opplyser Hansen Folkestad.

Sidan i vår har Helse Førde drive eit jordmorsenter ved sjukehuset. Her er jordmor tilgjengeleg 24 timar i døgnet. Jordmorsenteret har også utvida opningstida for poliklinikktilbod frå klokka 08.00 til 20.00.

- Nokre syns det er har stor verdi å kunne reise til kontroll etter jobb, seier avdelingssjefen.

Jordmorsenteret tilbyr no også fødselsførebuande kurs og ammekurs.

Alle andre tenester enn barseleininga har vore i full drift gjennom sommaren.