Flytta ambulansebåt innover Sognefjorden

I samband med vegstengingane i Midtre Sogn flytta Helse Førde i går kveld ambulansebåten "Rosesol" frå Solund til Høyanger.

Publisert 03.02.2024
Sist oppdatert 07.03.2024
Ein ambulanse ved sidan av ein ambulansebåt

Foto: Helse Førde

"Rosesol" ved kai i Høyanger laurdag føremiddag.

- Ambulansebåten blir liggande i Høyanger til situasjonen har normalisert seg, seier ambulansesjef i Helse Førde, Stian Sægrov. Han opplyser at båten utførte eitt opdrag i natt.

Riksveg 55 er stengd både mellom Kyrkjebø og Høyanger sentrum og i Esefjorden i Sogndal kommune.

Helse Førde avgjorde å flytte båten innover fjorden både med tanke på Høyanger sentrum og for å vere i beredskap med tanke på andre innestengde grender langs Sognefjorden. Både kommunehelsetenesta og kommuneleiinga i Høyanger og Sogndal er informerte.

I Høyanger valde kommunen også å etablere eiga legevakt då eit ras stengde riksvegen like aust om Nordeide ferjekai like før klokka 19.00 fredag kveld.

Helse Førde har i tillegg bemanna opp reserveambulansebåten. Den ligg ved kai på Hardbakke og ivaretek beredskapen i Solund.