Trond Fjetland Aarre tildelt Kvalitetsprisen 2024

Kvalitetsprisen er ei høg utmerking som blir delt ut i føretaket årleg

Kvalitetsprisen i Helse Førde blir delt ut årleg, og er ein del av føretaket si satsing på kvalitet, forbetring og utvikling. Prisen er ei høg utmerking, og det er ei stor ære å motta den. Den skal gå til grupper eller enkelttilsette som på ein framifrå måte har bidrege til å styrke kvaliteten på tenestetilbodet innan prioriterte område i helseføretaket.

- Med Kvalitetsprisen ønskjer vi å løfte fram dyktige medarbeidarar og synleggjere kvalitetsarbeid som kjem pasientane til gode, seier administrerande direktør Arve Varden.

- Årets vinnar har verkeleg levd opp til dette gjennom ei årrekke. Han har markert seg, både i og utanfor fagmiljøet, såvel nasjonalt som lokalt. Eg vil gratulere Trond Fjetland Aarre med Kvalitetsprisen i Helse Førde 2024! 

Han har vore avdelingssjef ved Nordfjord psykiatrisenter sidan 2003, og sidan 2014 vore fagsjef i psykisk helsevern i Helse Førde. Gjennom alle desse åra har han vore ei stabil og tydeleg stemme på vegne av pasientane i psykisk helsevern og i det offentlege ordskiftet. 

Trond Fjetland Aarre får prisen for sitt mangeårige kvalitetsarbeid og sterke faglege engasjement for pasientane.

I det daglege kliniske arbeidet og som leiar er Trond alltid på jakt etter meir kunnskap og betre kvalitet. Nokre døme: 

I 2023 gjekk han saman med kollegar gjennom samtlege 431 akuttinnleggingar i Helse Førde i 2022. Målet var å skaffe meir systematisk kunnskap om innleggingane og vurdere om dei faktisk var naudsynte og føremålstenlege. Rapporten tilrådde å sjå på om ein kunne betre lokale akuttilbod for å unngå deler av innleggingane ved akuttposten. Som ei oppfølging har Trond i 2024 arbeidd for å etablere ei ny lokal pasientløype i tilfelle der det kan vere sjølvmordfare.

I fleire år har prisvinnaren hatt faste «utedagar» i kommunane. Der treff han fastlegar for dialog om pasientar, har møte og oppfølging med pasientar saman helsepersonell, og gir rettleiing i vanskelege saker. Dette gir godt grunnlag for å utvikle samhandlinga og skape ei felles kunnskapsutvikling. 

Trond søkjer alltid samarbeid og samhandling med kommunane, og ser på spesialisthelsetenesta som ein del av eit heilskapleg helsetilbod, der alle må bidra til det beste for pasientane. Under Trond si leiing har Nordfjord psykiatrisenter sterkt fokus på fag- og kvalitetsutvikling.  

Trond er ein fagperson med tydeleg integritet og sterk vilje til å stadig arbeide til beste for  pasientane, og ikkje minst å lytte til dei. Fagmiljøa opplever han som ein uredd fagperson, og nokre gonger med ukonvensjonelle standpunkt som kan utfordre etablerte oppfatningar. 

I tillegg til det daglege kliniske virket ved Nordfjord psykiatrisenter er Trond uvanleg produktiv som forfattar, undervisar og også samfunnsdebattant på vegne av faget. Han har ei offentleg stemme som blir lytta til, også nasjonalt. Vi viser til den imponerande publikasjonslista hans for 2024 som inneheld eigne fagbøker, kapittel i fagbøker, kronikkar og oversetting av utanlandsk faglitteratur.

Vi gratulerer Trond Fjetland Aarre med prisen!