Administrerande direktør si tilråding: – Dette er krevjande, og eg skulle gjerne vore det forutan

Styret i Helse Førde vedtok 25. september å gå vidare med fleire store og krevjande endringar for å sikre berekraftige og forsvarlege helsetenester i regionen. Sidan då har prosjektgrupper og fagmiljø arbeidd grundig med å greie ut konsekvensar og alternativ for ortopedi, barsel, prehospitale tenester og hudtilbodet i føretaket. Arbeidet har vore både omfattande og utfordrande. 

– Eg skulle gjerne ønskt at vi hadde rammevilkår som gjorde at vi ikkje var nøydde til å ta slike grep, men eg må berømme prosjektleiarane og medlemmene i gruppene. Det er eit svært solid arbeid som er gjort, seier Varden. 

Tilrådingane blir lagt fram for styret som ei orienteringssak onsdag 17. desember, men endeleg vedtak blir tidlegast fatta i styret 29. januar. Sluttrapportane er no tilgjengelege, og er vedlagt denne artikkelen. 

Oppsummering av prosjekta og tilrådingar

Ortopedi

Administrerande direktør meiner at ei samling av den ortopediske aktiviteten i Førde sentralsjukehus er rett prioritering og forsvarleg, slik Helse Førde sin økonomiske situasjon er. Prosessen skal vere strukturert, med fokus på pasienttryggleik og god behandling. Den nødvendige omstillingsprosessen skal også ta vare på dei tilsette og deira rettar på best mogleg måte. Det skal takast særlege omsyn til pasientar med lengre reiseveg og sårbare pasientgrupper. Dette kan mellom anna skje gjennom kompenserande tiltak som poliklinikk, dagkirurgi og skadepoliklinikk. Reduksjon av uønskt variasjon og vidare digitalisering skal ha sterkt fokus, og det skal leggast til rette for avtalespesialistar ved lokalsjukehusa. 

• Samling av ortopedisk aktivitet ved Førde sentralsjukehus.

• Lærdal sjukehus skal ha eit poliklinisk ortopeditilbod for pasientar i opptaksområdet inntil to dagar per veke (utanom ferie og høgtider).

• Både Lærdal og Nordfjord sjukehus skal ha eit dagkirurgisk tilbod med inntil 30 operasjonsdagar i året.

• Det skal utgreiast eit tilpassa skadepoliklinisk tilbod ved Lærdal og Nordfjord på dagtid, mandag til fredag. Framlegg for styret i april 2026.

• Arbeidet med å redusere uønskt variasjon og vidare digitalisering skal ha sterkt fokus.

• Det skal leggast til rette for at avtalespesialistar kan etablere seg ved lokalsjukehusa.

• Kommunane i Sogn og Fjordane helsefellesskap skal inviterast til samarbeid for å ivareta sårbare pasientgrupper etter samlinga av ortopeditenestene i Førde. 

• Dei strukturelle endringane, med samling av ortopeditenestene ved Førde sentralsjukehus, skal gjennomførast når det er praktisk mogleg, og seinast til sommaren 2026.

• Gjennomføringa skal evaluerast i dialog med kommunane og leggast fram for styret våren 2027 og 2028.

Administrerande direktør tilrår vidareføring av den tilpassa modellen for barseltilbodet i Nordfjord, som er vurdert som den beste løysinga for både Helse Førde, kommunane og kvinnene i regionen. Samtidig skal det arbeidast vidare med å finne gode løysingar for Indre Sogn, med tett dialog og samarbeid med kommunane.

• Barseltilbodet ved Nordfjord sjukehus blir vidareført gjennom modellen God start, i samarbeid med kommunane Stad, Kinn, Gloppen, Stryn og Bremanger. Dette skjer med ein tilpassa driftsmodell og kostnadsdeling.

• Samhandlingsmodellen mellom Helse Førde og kommunane i Nordfjord skal evaluerast årleg med omsyn til fagleg kvalitet, oppgåvedeling og økonomi. Evalueringane skal leggast fram for styret ved slutten av 2026 og 2027.

• God start-eininga i Lærdal held fram som i dag, i samarbeid med kommunane i Lærdal og Årdal. 

• Det skal utgreiast alternativ organisering av barseltilbod, poliklinisk aktivitet og følgeteneste i Indre Sogn, fortrinnsvis etter samme modell som i Nordfjord. Dersom dette ikkje er mogleg, skal ein vurdere å samle barseltilbodet ved Førde sentralsjukehus. Utgreiinga skal leggast fram for styret innan 1. juni 2026. 

Administrerande direktør tilrår å gjennomføre endringane i ambulansestrukturen, som vil gi ei innsparing på om lag 5,6 millionar kroner. Endringane skal følgjast opp nøye, og evalueringar skal leggast fram for styret for å sikre at pasienttilbodet og beredskapen blir ivaretatt.

• Døgnbilen i Lavik blir flytta til Fjaler, og stasjonen i Lavik blir gjort om til beredskapspunkt. Dagbilen i Fjaler blir lagt ned.

• Etter endringa vil et vere to døgnbilar i Fjaler, og totalt sett ein dagbil mindre i området.

• Ambulansestasjonen i Høyanger blir uendra.

• Det skal leggast vekt på gode løysingar for pasientbehandling, og tilsette sine rettar. Ved etablering av beredskapspunkt i Lavik, skal det vere dialog med Høyanger kommune om plassering.

• Det skal gjennomførast årleg evaluering av tenestetilbod og responstid ei to første åra etter endringane, i dialog med kommunane Høyanger, Hyllestad, Fjaler, Askvoll og Sunnfjord. Administrerande direktør skal orientere styret om framdrift og evaluering.

Administrerande direktør tilrår å samle hudtilbodet og avvikle enkelte poliklinikkar, då dette gir ei meir effektiv og forsvarleg drift. Pasientar vil framleis ha tilgang til nødvendige behandlingar, og det skal setjast inn tiltak for å redusere ulempene for dei som får lengre reiseveg. 

• Tilbodet ved hudpoliklinikken i Florø blir lagt ned, og flytta til Førde.

• Tilbodet ved hudpoliklinikken i Sogndal blir vidareført inntil vidare, styrt av det medisinske behovet for lysbehandling. 

• Administrerande direktør skal søke å hente ut driftsfordelar gjennom meir samla drift av hudtilbodet, særleg i form av redusert personalbehov.

• Dei første to åra etter endringane trer i kraft skal det gjennomførast årelg evaluering av utviklinga av tenestetilbodet, i dialog med kommunane. Evalueringane skal leggast fram for styret.

Prosjektet har frist for levering av sluttrapport 20. desember.

Framlegg til vedtak

Dette er administrerande direktør sitt framlegg til vedtak. Endeleg avgjerd blir fatta av styret tidlegast 29. januar 2026. Prosjektrapportar og tilrådingar er tilgjengelege her på nettsida. 

– Nokre vil meine vurderingane mine er feil, men eg må ta det valet eg meiner er best for Helse Førde og tilbodet vi skal gje innbyggarane som heilskap, avsluttar Varden.