Fredag 31. oktober besøkte dei første medisinstudentane ved det desentrale studiet Vestlandslegen Førde sentralsjukehus. Dei fekk eit tett program og god sjanse til å bli kjent med campus, sjukehuset og undervisarane.
Over tretti studentar har valt Campus Førde som studiestad etter tre år ved Universitetet i Bergen. Fire av dei kjem frå Sogn og Fjordane: Torbjørn frå Sogndal, Sara frå Florø, Mathilde frå Førde og Eline frå Høyanger. Tjueni studentar besøkte Campus Førde.
Administrerande direktør Arve Varden ønskte studentane velkomen:
– Vestlandslegen er noko vi har arbeidd lenge med. Vi trur det er viktig for å rekruttere legar til Sogn og Fjordane, både i spesialist- og kommunehelsetenesta. Eg håpar de vil trivast og finne studiet meiningsfullt. Kanskje ser de ei framtid som lege her hos oss?
Studentane fekk møte undervisarane gjennom ein "speed-date" med fagmiljøet. Med entusiasme og humor presenterte dei faga sine og seg sjølv. Dei understreka at Helse Førde har lang erfaring med undervisning, blant anna gjennom LIS-utdanning og praksisordningar.
– Lite sjukehus driv også med avansert behandling, sa Pawel Mielnik.
Fleire peika på fordelane med å studere på ein mindre stad. Det gode samarbeidet mellom fag og avdelingar vart framheva. Her kjenner folk kvarandre, og det er lettare å bygge relasjonar. Som ein sa:
– Vi er litt mindre, litt lettare – og litt oftare nærare pasientane.
LIS-legane Vilde, Malin og Kristine fortalde om si opplæring i Førde. Dei trekte fram tett og personleg oppfølging, god trivsel og opplæring nær pasient og behandling.
Dagen vart avslutta med møte hos Sunnfjord kommune og byvandring i Førde sentrum.