Vestlandslegen i Førde toppar søkarlistene

Samordna opptak har nettopp publisert søkartala for helsestudium, og resultata viser stor interesse for det nye medisinstudiet ved Universitetet i Bergen (UiB) som inkluderer tre år i Bergen og tre år i Førde. Dette nye tilbodet, kjent som Vestlandslegen Førde, har fått flest søkarar per plass samanlikna med andre medisinstudium på Vestlandet.

Foto: Helse Førde

- I dag feirar vi dei gode søkartala til Vestlandslegen Førde, seier overlege Kaya Kvarme Jacobsen i ein kommentar frå møte i kompetanse- og utdanningsutvalet, når søkartala vart gjort kjende.

  Kvarme Jacobsen er overlege på ortopedisk avdeling ved Førde sentralsjukehus, og lokal prosjektleiar for Vestlandslegen Førde. I tillegg har ho ei bistilling som førsteamanuensis ved UiB for å koordinere undervisninga til medisinstudentane som har praksis i Helse Førde. 

- Vi som jobbar med medisinstudentar i Helse Førde får veldig god respons på den praksisutdanninga vi har i dag, og tolkar desse tala som at ryktet om Helse Førde som utdanningsinstitusjon er godt, også blant elevar i den vidaregåande skulen, seier Kvarme Jacobsen.

Det er tydeleg at kombinasjonen av studium i både Bergen og Førde appellerer til mange. Medisinstudiet ved UiB har dermed fått ein sterk start med det nye tilbodet.

I tillegg til å ha flest søkarar per plass, ligg Vestlandslegen Førde på andreplass blant medisinstudiuma når det gjeld studium med høg konkurranse om plassane. Dette viser at det er stor interesse og konkurranse om å få ein studieplass her.

- Det er svært gledeleg at så mange søkarar ønsker å gjennomføre dei tre siste åra av studiet sitt i Helse Førde. Vi skal vere klare når dei første 20 studentane kjem hit i 2028, og har allereie starta planlegginga i eigen organisasjon og i samarbeid UiB og kommunane, seier Anne Kristine Kleiven, utviklingsdirektør i Helse Førde.

Studentane blir inviterte til ei første samling i Førde allereie no i haust. Deretter kjem det 20 nye studentar hit kvart år, slik at det totalt vil vere 60 medisinstudentar i alt fordelt på dei tre åra.

- Dette vil bidra til å styrke studentmiljøet og gir ein unik sjanse til å rekruttere framtidige legar til regionen vår, avsluttar Kleiven.

1. Bergen/Førde: 177 førstevalssøkarar (8,8 søkarar per studieplass – 20 studieplassar)
2. Bergen/Stavanger: 118 førstevalssøkarar (3 søkarar per studieplass – 40 studieplassar)
3. Bergen: 505 førstevalssøkarar (3,1 søkarar per studieplass – 165 studieplassar) 

Medisinstudiumet ved UiB med dei tre første åra i Bergen og dei neste tre i Førde gir studentane ei unik moglegheit til å oppleve både by- og distriktsmedisin. Dette kan bidra til å gi studentane ei breiare forståing og erfaring som vil vere verdifull i den framtidige karriera deira som legar.

Samordna opptak sine tal viser at helsestudium generelt har ein aukande popularitet, og det er spesielt gledeleg å sjå at det nye tilbodet ved UiB har blitt så godt motteke. I tillegg til medisinstudium, ser vi ei kraftig auke i førstevalssøkarar til sjukepleiestudiumet, med ein auke på nærare 40 % sidan i fjor. Dette er det høgaste talet førstevalssøkarar til dette studiumet dei siste fem åra. Sjukepleieutdanninga i Førde har i år hatt ei formidabel auke på heile 46,5 % søkarar i høve i fjor. 

Det er også interessant å sjå at 62,9 % av søkarane som er heimehøyrande i Vestland, har søkt seg til studium i Vestland. Dette er eit positivt teikn for framtida til helsetenestene på Vestlandet, og for rekruttering av helsepersonell til regionen.

For meir informasjon om søkartala og opptaket, besøk Samordna opptak si nettside.