Vi tilrår at du alltid nyttar siste versjon av nettlesaren din.

Baby boom i Helse Førde: – Flest sidan pandemien

Ved utgangen av mai var det fødd 400 barn på Kvinneklinikken i ved Førde sentralsjukehus. Jordmødrene har ikkje vore så travle sidan pandemi-året 2021.

Publisert 10.06.2026
Jordmor Tina Gotteberg Hove med ein nyfødd baby i armane.

Foto: Helse Førde

Jordmor Tina Gotteberg Hove med eit levande og nydeleg bevis på at høgsesongen på kvinneklinkken held fram inn i juni.

– Eg har ingen teoriar om kvifor eller korleis vi har fått denne utviklinga akkurat no, men konstaterer at dette er udelt gode nyhende på alle nivå. 

Administrerande direktør i Helse Førde, Arve Varden, har sjølv eit barnebarn blant dei 400 smårollingane som har kome til verda i Sogn og Fjordane så langt i år.  

400 så langt

76 born kom til verda i mai, faktisk ein liten nedgang etter at over 80 barn kom til verda i  april, mars og februar. Totalen er likevel svært gledeleg, med 50 fleire fødde born til no i 2026 enn året før. 

– Vi må faktisk tilbake til 2021 for å finne tilsvarande tal. Den gongen var vi midt i pandemien og fødselstala var høge over alt. No må vi leite etter andre forklaringar, seier Varden.

Fødslar i Helse Førde 2017-2026
År Jan Feb Mar Apr Mai Jun Jul Aug Sept Okt Nov Des Hittil Totalt
2026 76 81 83 84 76               400 400
2025 68 53 93 65 71 65 80 74 94 65 54 62 350 844
2024 60 62 75 80 84 83 83 66 72 82 57 55 361 859
2023 56 58 70 61 81 70 70 80 69 76 58 43 326 792
2022 68 66 73 69 71 69 76 72 71 65 49 53 347 802
2021 84 81 89 87 73 84 87 90 68 74 64 55 414 936
2020 68 78 65 66 83 69 69 66 83 68 59 52 360 826
2019 66 67 70 79 92 75 82 83 68 78 59 52 374 871
2018 54 65 70 79 77 95 71 80 76 89 55 52 345 863
2017 89 72 77 81 82 83 75 90 86 69 71 59 401 934

 

Held fram i juni

Jordmor og seksjonsleiar ved kvinneklinikken, Kristin Opseth Rygg, kan skrive under på at det ikkje har roa seg så langt i juni. Seinast i dag, onsdag 10. juni, måtte ho kalle inn ekstravakter for at alle dei fødande skulle få god oppfølging. 

– Det er svært gledeleg, men det er klart at når vi har seks fødslar før klokka 14 ein dag så blir det også heftig. Og vi kan ikkje gjere så store endringar i grunnbemanninga sjølv om vi ser at det kan vere ti som har termin same dag. Nokre kjem ei veke før, nokre kjem ei veke etter og vi må bemanne frå dag til dag. 

Spanande utvikling

Somrane er vanlegvis høgsesong på kvinneklinikken, ofte med den absolutte  toppen i september.  

– Historisk sett er det færre fødslar når vi nærmar oss nyttår, men det blir spanande å sjå kva tal vi kjem ut med, seier Opseth Rygg. 

PS: Fødselstal per kommune er tilgjengeleg gjennom SSB.