Trygge og kunnskapsbaserte helsetenester av høg kvalitet
Helse Førde skal utvikle ei framtidsretta helseteneste der pasienten står i sentrum. Kvalitet, tryggleik og likeverd skal vere grunnmuren i tenestene, og vi skal nytte kunnskap, teknologi og nye arbeidsformer for å flytte helsehjelpa nærare der pasienten er. Målet er samanhengande, tilgjengelege og berekraftige tenester i heile opptaksområdet. Vi skal møte pasientar og pårørande med openheit og respekt, og leggje til rette for medverknad og informerte val. Gjennom systematisk kvalitetsarbeid, forsking og læring skal vi kontinuerleg forbetre tenestene, i tett samarbeid med kommunar, fagmiljø og brukarar.
Moglegheiter
Ny teknologi, digitale løysingar og fleire desentraliserte tenester gir høve til å vidareutvikle og tilby meir helsehjelp nærare der pasientane bur. Vi tek i bruk ny kunnskap og forskingsresultat for å forbetre kvaliteten på behandlinga og ta godt vare på pasienttryggleiken. Trygg legemiddelhandtering er avgjerande for kvalitet og pasienttryggleik, særleg knytt til overgang mellom sjukehus, kommune og heim.
Utvikling innan persontilpassa medisin og avansert diagnostikk gir høve til meir målretta behandling, betre behandlingsresultat og redusert overbehandling. Aktiv brukarmedverknad bidreg til meir treffsikre og individuelt tilpassa behandlingstilbod. Omstilling i måten vi arbeider på kan legge til rette for betre utnytting av ressursane. I tillegg har vi eit godt utgangspunkt gjennom samarbeidet med kommunane, Sogn og Fjordane helsefellesskap og avtalespesialistane. Den samla kapasiteten i Helse Vest gjev høve til meir samordna ressursbruk og betre utnytting av behandlingstilboda. Dette gjev moglegheit til å skape meir heilskaplege og samanhengande pasientforløp for innbyggjarane våre.
Utfordringar
For Helse Førde er det ei viktig oppgåve å sikre eit likeverdig helsetilbod i eit geografisk stort opptaksområde. Samstundes krev utviklinga kontinuerleg omstilling av organisasjonen og arbeidsformene våre, i takt med ny teknologi og endra krav. Føretaket må sikre tilstrekkeleg kompetanse og kapasitet i ein situasjon med aukande etterspurnad etter helsetenester.
Eit velfungerande samspel mellom ulike nivå og aktørar i helsetenesta er heilt avgjerande, men kan vere krevjande å få til i praksis.
Overordna mål
- Helse Førde leverer trygge, kunnskapsbaserte og likeverdige helsetenester av høg kvalitet. Tenestene skal vere tilgjengelege og rettferdig fordelt.
- Pasientar og pårørande har kunnskap for å ta informerte val, og ferdigheiter til å medverke aktivt i eiga behandling og meistre eiga helse.
- Forsking og innovasjon er ein integrert del av Helse Førde si verksemd.
Strategiske tiltak
- Aktiv implementering av ny fagkunnskap og nasjonale faglege retningsliner i klinisk praksis.
- Kontinuerleg vurdere korleis og kvar tenestene kan utviklast og leverast.
- Vidareutvikle heimebehandling, digital oppfølging og ambulante tenester som støttar behandling på rett nivå saman med kommunane.
- Vidareutvikle samarbeidet i Sogn og Fjordane helsefellesskap, særskilt kring dei prioriterte pasientgruppene.
- Legge til rette for innføring av persontilpassa medisin og avansert diagnostikk, i tråd med nasjonale og regionale føringar.
- Systematisk bruk av brukarerfaringar i kvalitets- og pasienttryggleiksarbeid.
- Styrke allmenn helsekompetanse gjennom klart språk, strukturert informasjon, målretta rettleiing og opplæring av pasientar og pårørande
- Auke forskingssamarbeidet med andre sjukehus, utdanningssektoren, kommunane og nasjonale og internasjonale forskingsmiljø.
Slik skal vi måle at vi er på rett veg
- Aktiv involvering av Sogn og Fjordane helsefellesskap.
- Reduksjon i ventelister og fristbrot.
- Betre innsikt gjennom resultat frå brukarundersøkingar.
- Involvering av brukarrepresentantar i kvalitets- og utviklingsarbeid.
- Auke i tal digitale konsultasjonar og digitale lærings- og meistringstilbod.
- Reduksjon i talet på uønskte hendingar og pasientskadar.
- Høg skår på nasjonale kvalitetsindikatorar.
- Fleire vitskaplege publikasjonar med eksterne samarbeidspartar.