Vestlandslegen

Vestlandslege-studentane skal først ha tre års studiar ved Universitetet i Bergen før dei kjem til blant andre oss. I Helse Førde blir det  årskull på 20 medisinstudentar. Det første kullet startar ved UiB hausten 2025, og kjem då til Helse Førde hausten 2028.  

Frå og med hausten 2030 vil det til ei kvar tid vere 60 medisinstudentar tilknytt den nye studiemodellen i Helse Førde. Studentane vil komme tett på den kliniske kvardagen i sjukehusa våre.  

Helse Stavanger er i gong med Vestlandslegestudentar, og Helse Førde vil få dei første 20 studentane inn hausten 2028. 

Søknadsfrist for desse er 15. april 2025.

Det er etablert eit nytt, felles studieløp for alle Vestlandslegestudentane, med lokale tilpassingar. 

Gjennom programmet får medisinstudentane høve til praksis, rettleiing og erfaring i lokale helsearbeidsmiljø på Vestlandet.  

Undervisning og praksis

De tre siste åra av studiet vil undervisning og praksis hovudsakleg føregå i Førde, med tydeleg fokus på ei klinisk tilnærming og praksisrettleiing. Det vil vere eit nytt, felles studieløp for alle Vestlandslegestudentar. Dette kan avvike noko og bli tilpassa lokale forhold. 

Noko av undervisninga og praksis vil også skje ved dei andre sjukehusa i Helse Førde, og i primærhelsetenesta.

Fleircampusmodell

Medisinstudiet skal riggast som ein fleircampusmodell; eitt studieprogram med fleire campusar. Det vil vera rom for ei viss lokal tilpassing, men målsetjinga er at alle studentane i programmet, uavhengig av kvar dei studerer, skal gjennom dei same faga i same semester.

Vestlandslegen blir eit stort prosjekt. Helse Førde, Helse Stavanger og Helse Fonna jobbar no med UIB for å etablere ein felles samarbeidsmodell.   

Det pedagogiske og akademiske vil i stor grad bli styrt av og utvikla i samarbeid med UiB, og det skal etablerast eigne retningsliner for utdanningssamarbeid for Vestlandslegen.  

Det vil vere behov for å styrke alle fagområda som skal utdanne studentar, og det krev både akademisk, pedagogisk og fagleg kompetanse på høgt nivå.

Det vil også bli behov for lokale til undervisning, ferdigheitstrening og kontor både for studentar og medarbeidarar. I tillegg vil det bli behov for studentbustader.  I Helse Førde har vi planlagt å løyse dette ved ei ombygging av Angabygget, der psykiatrisk klinikk heldt til før dei flytta til Dagabygget.

Vestlandslegen er eit program som skal bidra til å byggje eit sterkare og meir berekraftig helsevesen på Vestlandet, ved å skape tettare band mellom medisinstudentar og regionen vår.

Kommunar og spesialisthelsetenesta over heile landet har store utfordringar med å rekruttere nok legar. Vestlandslegen er eitt av fleire tiltak for å styrke rekrutteringa ved å auke talet på studieplassar ved medisinstudiet i Noreg og knyte sterkare band til Vestlandet.  

Ved å utdanne lokalt, er det større sjanse for at studentane blir verande etter utdanninga. Dette vil leggje til rette for ei meir berekraftig rekruttering for Helse Førde og for kommunane.  

Samstundes vil Vestlandslegen gjere Helse Førde og regionen vår meir attraktiv som arbeidsstad, og dermed leggje til rette for betre ressurstilgang. Vestlandslegen vil også bli viktig for kompetansebygging innan helsefaga. 

Lokalt og regionalt samarbeid 

Prosjektet vil også påverke andre enn Helse Førde. Samarbeid med kommunane blir viktig for å sikre den delen av utdanninga som skal føregå i primærhelsetenesta.  

Det blir også etablert eit tett samarbeid med Høgskulen på Vestlandet, både med tanke på undervisningslokale og kompetansebygging. 

Studentene vil komme tett på den kliniske kvardagen i sjukehuset. Vestlandslege-modellen ei studieform, der ein tek i bruk ulike læringsarena i spesialisthelsetenesta (og kommunehelsetenesta i framtida). Det vil skape ein god samanheng mellom teori og praksis.