Psykiatrisk klinikk - Akutt døgn

Akutt døgn har einerom med eige bad. For å ivareta tryggleiken til pasientane er ytterdørene låste. Dersom du ønskjer å gå ut eller inn på sengeposten, må du kontakte personalet.  

Innlegging

Dersom du har behov for akutt psykiatrisk hjelp, må fastlege, legevaktslege eller lege ved ei anna sjukehusavdeling sende tilvising til Akutt døgn. Akutt døgn tek imot pasientar både til frivilleg og tvunget psykisk helsevern.

Kven er tilbodet for

Akutt døgn tek imot pasientar som treng akutt hjelp ved til dømes psykose, alvorleg depresjon, sjølvmordstankar eller akutte livskriser .

Behandling

Akutt døgn tilbyr allmennpsykiatrisk vurdering, diagnostisering, stabilisering og behandling.

Som pasient får du ein fast behandlar, som oftast lege eller psykolog. På kvar vakt har du ein fast miljøkontakt som følgjer deg opp. Miljøkontakten kan vere sjukepleiar, helsefagarbeidar, miljøterapeut eller assistent.

Behandlinga blir tilpassa dine behov og kan mellom anna omfatte:

• samtalar med behandlar (psykoterapi)
• legeundersøkingar og nødvendige prøvar
• medikamentell behandling
• sosionomtenester
• elektrokonvulsiv behandling (ECT) når dette er aktuelt
• støttesamtalar og miljøterapeutiske aktivitetar

Som ein del av behandlinga legg vi vekt på individuelt tilpassa aktivitetar, fysisk aktivitet, trening og andre tiltak som kan bidra til meistring og betring.

Opphaldet varer vanlegvis frå eitt døgn til nokre veker, avhengig av behovet ditt. Når den akutte fasen er over, vurderer vi saman med deg kva vidare behandling og oppfølging som er best for deg.  

Pårørande

Vi legg vekt på eit godt samarbeid med pårørande og andre aktuelle hjelpeinstansar.

Barn som pårørande

Dersom du har barn, har Akutt døgn ein barneansvarleg som kan bidra med informasjon og oppfølging knytt til barn som pårørande.