Utviklingsplan for Helse Førde - innsatsområde

05. Bemanning og kompetanse

Medarbeidarane er vår aller viktigaste ressurs. Ei av hovudsatsingane våre er difor å rekruttere, utvikle og behalde dyktige medarbeidarar. Helse Førde har om lag 3000 medarbeidarar, og er ein av dei største og mest mangfaldige arbeidsplassane i regionen.

En gruppe mennesker i laboratoriefrakker

Det er risiko for manglande tilgang til helsepersonell framover. Helse Førde sine sjukehus er også avhengig av mange andre yrkesgrupper for å halde drifta i gang, til dømes innan tekniske-/ingeniørfag, administrasjon, matforsyning og reinhald.

Vidareutvikling og intern kompetansestyrking er like viktig som å rekruttere nytilsette. I tillegg vil det vere behov for å kartlegge kva kompetanse spesialisthelsetenesta vil ha behov for framover, ettersom helsetenestene stadig er i utvikling.

Utfordringar og moglegheiter

Det er svært viktig at vi jobbar systematisk for å utdanne, rekruttere, behalde og vidareutvikle medarbeidarar. Helsepersonellkommisjonen sin utredning Tid for handling, NOU 2023: 4, har foreslått tiltak for å møte utfordringane både på kort og lang sikt.

I vårt område ser vi det som særs viktig med eit nært samarbeid med Høgskulen på Vestlandet, Universitetet i Bergen og vidaregåande skular om å utdanne helsepersonell, legar og fagutdanna/lærlingar. Vestlandslegen er eitt tiltak som kan gjere oss betre rusta til å rekruttere legespesialistar til Helse Førde. Det er under planlegging ein ny, desentralisert studiemodell der medisinstudentar får dei siste åra av si utdanning i Helse Førde. Dette vil gje nye moglegheiter for å rekruttere legar til distriktet. Samarbeid med kommunane om å rekruttere og behalde helsepersonell er også viktig for å gjere begge partar rusta for framtida.

Mål

Helse Førde har riktig kompetanse og tilstrekkeleg medarbeider-kapasitet til å dekke dei behova vi ser i åra framover.
I planperioden: Tiltaka i rekrutteringsstrategien til Helse Førde er iverksett og bidreg til redusert ekstern turnover.
Helse Førde skal styrke utdanningstilbodet for helsepersonell gjennom praksisstudier og læreplassar.

Tiltak for å nå målet

Gjennomføre tiltaka i Helse Førde sin rekrutteringsstrategi etter plan, herunder
- samarbeide med kommunane om rekruttering og kompetansestyrking
- profilere regionen som ein attraktiv plass å bu og arbeide
- utarbeide strategi for lærlingar i Helse Førde
Utarbeide lokal kompetansestrategi og følgje opp regionale tiltak, mellom anna sikre tilstrekkeleg tal intensivsjukepleiarar, jordmødre, legespesialistar.
Samarbeide med utdanningssektoren om nok/breitt tilbod av medisiner- og helsefagutdanningar, herunder samarbeide om å vidareutvikle Campus Vie (kompetanse, infrastruktur og areal).
Vurdere oppgåvegliding mellom yrkesgrupper for betre bruk av samla kapasitet/kompetanse.
Legge til rette for master og phD-utdanning ved stipend/ i klinikk, og for at kompetansen vert nytta etter endt utdanning.
Auke tal tilsette med 100 % stilling.
Vidareutvikle innføringsprogramma og leiarutviklingsprogrammet.
Nye medarbeidarar som tek utdanning i kvalitet/forbetringsmetodikk kvart år.
Auke kompetansen på brukarmedverknad på individ- og systemnivå.
Følgje opp forbetringsundersøkinga og jobbe for at medarbeidarane skal ha eit forsvarleg arbeidsmiljø.
Legge til rette for hospitering og kompetansenettverk internt og eksternt.
Vere medviten om seniorpolitikk og inkluderande arbeidsliv.
Jobbe aktivt med kompetansestyrking og HMS-arbeid for å hindre vald og truslar.

Slik skal vi måle at vi er på rett veg

Tiltak frå rekrutteringsstrategien er gjennomført.
Etablert grunnlag for å vurdere kva kompetansebehov vi har fram mot 2040.
Tatt i bruk nasjonale framskrivingar og bemanningsmodellar.
Definert prioriterte område for kompetanseutvikling i ein lokal kompetansestrategi. Kompetansestrategi for Helse Førde vart vedtatt februar 2024.
Fått til samarbeid med utdanningssektoren om tilpassing av utdanningskapasitet til lokalt behov.
Etablert strategi for rekruttering av lærlingar i Helse Førde.
Tal kombinerte stillingar med undervisningssektoren har auka.
Det er lagt planar for utvikling av Campus Vie.
Redusert ekstern turnover.